Ke Aloha Aina, Volume IV, Number 53, 31 December 1898 — Page 7

KE ALOHA AINA

 

 

@ KAAO KAILI PUUWAI

NO KA

UI MINEWA.

A ME NA

Kaikunane Eiwa

I Hooliloia i mau Manu Nene Ahiu a i ole na Keiki i Hoehaehaia

Kakauia no KE ALOHA AINA

MOKUNA IV.

O MINEWA ILOKO O KA EHAEHA.

            Nolaila, me keia noonoo iloko ona, huli aku la oia iwaena o ka huikau o ua kulauakauhale la e halo ana mao a maanei o na ipuka hale mai ke nui a ka liilii, aka, aole nae hookahi o keia mau hale i hoil e mai i na helehelena o kona mau kaikunane ana e huli pauaho ole nei.

            A ua lilo no hoi keia i mea nana e hoehaeha loa ai i ka puuwai o ka kaua Minewa, aka, aoie no nae oia i hoopau i kona manao huli no kona mau kaikunane, oiai, o lakou wale no ka mea nui iloko o kona puuwai ia wa.

            A i ka uhi ana mai o na eheu o ka pouli maluna o ua kulanakauhale la, ua pau iho la na poopoo a pau iaia i ka huli ia, aka, he nele wale no ka mea i halawai mai me ia.

            Nolaila, me ke kaumaha nui, huli aku la oia i wahi nona e hoaumoe iho ai ia po iloko o ka pouli, a o ka mea nana i hooi loa ae i kona ehaeha, oia no ka make pololi a ka ai.

            I ka hala ana aku o ke kulanakauhale ihope, ua hoea aku la oia ma kahi a na nahelehele loloa e ulu ana, a malaila i hina aku ai oia ilalo, a hookuu aku la i manawa no kona mau lihilihi e hoomaha ai.

            A iloko o na sekona pokole wale no, ua poina ae la oia i kona mau ehaeha a pau, a a i keia wa aia oia ke hooipo la me Niolopua, oiai oia e nanea ana i ka nani o ka aina moeuhane, aia hoi, ua halawai aku la kona uhane me kona makuahine i hala e aku i ka make, a i ka ike ana mai o kona makuahine iaia, ua ani peahi mai la kona mau lima no ka nee ana aku imua, a ma ka heleheleua o kona makuahine e hoike mai ana oia i na helehelena i piha i ke aloha no kana kaikamahine.

            Ia wa no i owaka mai ai koaa waha, a lohe aku la hoi ka kaua Minewa i ke poha ana mai o ka leo o kona makuahine, i ka i ana mai.

            E kuu lei aloha, aole kou mau kaikunane maluna o keia mokupuni, aka, ua hala aku la lakou ma kekahi aina mamao loa, a nolaila mai koepau manawa i ka huli ana aku maloko nei o ke kulanakauhale,

            E Minewa, e hoomanowanui i ka huli ana i kou mau kaikunane, a mai pauaho, a na ke au o ka manawa e hoopomaikai mai ia oukou kuu mau leialoha. Nolaiia e ku ae a hele aku no loko o na ululaau, a malaila e loaa ai na kokua ia oe

            I ka hooki ana ae o ke kino wailua i kana kamailio ana, oia no ka wa i lele aku ai o Minewa me ka manao ana e hopu aku i kona makuahine, a haawi aku i na kuwili pumehana i na helehelena i nalohia aku no kekahi mau makahiki loihi i hala ae nei, aka, ua nalowale hikiwawe aku la nae oia.

            I keia manawa no i puoho ae ai ua Minewa la, a ike iho la he moeuhane wale no ka keia, a hiolo makawalu mai la na waimaka o ua kaikamahine la no ke aloha i kona mama, oiai, akahi no oia a ike hou i ka helehelena o kona makuahine, a me ka hakalia ole, ku ae la oia iluna a nana aku la i ka hikina i ka o mai o na kukuna o ka malamalama o ka la, a o kona manawa no ia e hooke aku ai e like me ke kono a kona makuahine aloha.

            Maluna o na o-pu nahelehele i n ho iho ai oia, a kali aku la i ka oili mai o na kukuna malamalama me kona mau lihilihi i hele a haukeke i ke anu, aka, ua lilo nae ia i mea ole iaia, oiai, aia oia ke akenui la o ke ao koke ae, i kuoe wawae aku ai oia no loko o ka ululaau e ku mai ana, kahi koi a kona mama aloha i hoike mai ai ilaila e loaa ai ona kokua iaia.

            Hala ae la he manawa loihi o kona okou ana malaila, aia hoi, ua hoohauoli ia mai la kona puuwai i ka ike ana aku i ka hoomaka ana mai o ke alaula o ka malamalama e pii ae ana maluna o na kuahiwi o kona aina aloha.

            A ia manawa no i ku ae ai oia a hele aku la no loko o ka ululaau iloko o ka pololi a me ke anu e iniki ana i kona nui kino, aka, he hookahi wale no nae mea nana i hoomama ae i kona kaumaha, oia na olelo a kona makuahine i hala aku i ka make i hoike mai ma ka moeuhane,

            No kekahi mau mile loihi kona kune hele ana, ua komo aku la oia iloko o na ululaau, a ke alawa la hoi kona mau maka ma o a maanei me ke akenui ana e loaa koke aku kona kokua elike me ke kuhikuhi a ka moe, aka, oia mau kuko ana nae aole i hookoia mai, a nolaila, ua liio ia ia mea nana e hoehaeha hou mai ana i ka puuwai o ka kaua Minewa hoomanawanui.

            A i kona hiki ana aku ma ke kae o kekahi wahi kahawai uuku, ua hoomaha iho la oia, a muki aku la i mau olopu wai no ka hoomaalili ana aku ia loko o kona noupo, malaila no hoi i ike hou ia aku ai kamahele opio e hookahe mai ana i na omaka waimaka i piha i ka ehaeha mai kona mau lihilihi mai,

            Oiai, eia oia e kaniuhu ana n kona mau ehaeha, aia hoi, ua hoopuiwaia ae la oia i ka lohe ana aku i ka nakeke ana mai o na lala laau maloo ma ke kapa o ua wahi kahawai la, a i ko Minewa aea ana ae iluna, ua hoohikilele ia ae la oia i ka ike ana aku i kekahi elemakule poohina nona na oho aiai i like me ka hau e kuuwelu ana ma kona mau kipoohiwi.

            E paa ana ua elemakule la he ninai ma kona lima akau, a he kookoo ma kona lima hema, a i kona ike ana mai i ke kaikamahine, ua motio pololei mai la kana huakai no kahi a Minewa e noho nei.

            I ka hiki ana mai o ua elemakule la ma kahi a Minewa e noho nei, ua lohe koke ia aku la kona leo i ka pae ana mai me ke ano hikilele penei:

            E ka luahine malihini, heaha kau maanei o keia kakahiaka nui, oiai, ke ike aku nei au maluna o kou helehelena ua piha i ke kaumaha a me ka ehaeha?

            A i ka hooki ana iho o ka leo nui o ka elemakule, ua pane koke aku la o Minewa i ka ninau a ka elemakule poohina.

            E ka elemakule maikai, e kala mai ia'u, aole au he luahine, aka, he kaikamahine opio au, i huna iho i ko'u hiohiona opio i wahi e palekana ai mai na poino mai he nui, oiai, ua maopopo no ia oe, aole he oi ae o ka palekana o na kaikamahine opio mamua o na luahine. A i mea e e hooiaio ia ai o ka'u mau olelo e nana mai.

            Ia manawa no i wehe ae ai o Minewa i ka aahu luahine ana e komo ana, a me ka paple ooma e kau ana maluna o kona poo.

            O keia no hoi ka manawa i hooho ae ai ka elemakule me ka hikilele i ka puana ana ae:

            Auwe! Ka wahine ui e, minamina wale aku la no ka hoi au i kou nani.

            A o keia mau nanaina kau au e ike mai la, wahi a Minewa i hoomau aku ai, mamuli no ia o ko'u kipaku ia ana e ko'u makuahine kolea mai ka home mai o ko'u papa aloha, a o ka mea nae i hooi loa ia ae ai o ko'u kaumaha, mamuli no ia o ka maopopo ole ia'u kahi e loaa ai o ko'u mau kaikunane aloha e eiwa ia'u, aole anei oe e oluolu e hoike mai ia'u, ina paha ua ike oe ia lakou maloko nei o keia mau ululaau.

            Aole, e ke kaikamahine opio a ka ui nui wale, aole he kino kanaka i halawai me a'u maloko o keia ululaau, a o oe hoi ke kanaka mua loa a'u i ike ai, oiai, ua pau ia'u na poopoo o keia ululaau i ka hele ia, aka, aole he mau ola uhane i huipu me a'u.

 

            Ua hoopihaia ae ka halekeaka Ohuma me na poe puni lealea ma ka po nei.

 

E HOEA AE ANA.

            Ua hoikeike ia mai ia makou, eia ke liuliu mai nei ia hoa hou o ka mokupuni, ma ka inoa "Ka Lahui Hawaii," a eia kona punana ma ka uapo o Kamika makai mai, ma ka aoao ma Waikiki o ke alanui, e pili la i ke kahawai o Nuuanu. Eia malalo o ka hoohana ana a Chas. L. Hapakini, ka Luna Nui nana e lawelawe ia wahaolelo hou, a oiai, aole i maopopo ia makou kona kahua i ku ai, nolaila, aole e hiki ia makou ke kamailio e aku i kona ano, koe wale iho no paha, eia oia malalo o kekahi Hui Hawaii, i manao ia na lakou e hookele aku ana iaia iwaena o keia lahui.

            Oiai, he mea maikai ka nui o na wahaolelo nei o ka aina, a pela hoi e hoomahuahua mau ia ai ka ike heluhelu iwaena o keia lahui, ka mea hoi a ia lani alii a kakou i hoopuka ae ai me ka haaheo, "he aupuni palapala ko'u" a pela io no i ike ia ai iwaena o keia lahuikanaka holookoa, me he mea la, o ka lakou puni ia a hiki i keia la.

            O keia iho la na lono i loaa mai imua o makou, a i manaoia hoi, ma ka hoike mai a ka mea nana i lawe mai ka lohe, o ka Poakahi ae nei, Ianuari 2, 1899, kona la e puka mai ai, ke ole he mau keakea ana i kona puka ana ia la, a i ole, ma ka Poalua paha, mahope iho o ka la Hapenuia.

 

HE HUI MAHIAI.

            Eia o Byron O. Clark, ke kakauolelo o ka Papa Mahiai, ke hoolala nei no ke kukulu ana i hui mahiai, he nui na poe e kokua nei no ka holomua o keia hanui.

            He 1,300 eka aina i loaa i keia wa, oia hoi, na aina e waiho wale ia makai o ke alanui aupuni mawaena o Manana a me Waialua, he umi mile mai Manana aku, a he ewalu mile mai Waialua mai, he elua mau kahawai e kahe nei maluna o ua mau aina la.

            He nui a lehulehu na poe e hoi aku ana no lalo o laila, e paa nei mai ka iwakalua a ke kanaono eka no ka mahiai ana aku. E hooulu ana i na mea ai ulu no Honolulu nei, a o na hua ai hoi no ka hoopuka ana aku iwaho.

            E kukulu ia aku ana no ka pomaikai o na poe e noho ana malaila he halepule me ona halekula no ka hoonaauao ana i na opio e noho ana malaila, me ka mahelehele ia ana he elima eka aina e kokoke ana i ka halepule a me ka halekula i wahi no na poe mahiai e kukulu ai i mau home no lakou.

 

KA MOKUKAUA ITALIA ETNA.

            Ma ka hora 11 o ke kakahiaka Poalua nei, i hoea mai ai ai ka mokukaua Italia Etna, he 10 a oi la holo mai Kapalakiko mai, ua halawai oia me ka ino ma ka moana ma kona wa i haalele aku ai ia Kapalakiko a hiki i kona hoea ana mai la i Honolulu nei.

            Ua hoea ae ka mokukaua Etna ma Kapalakiko ma keia mahina aku nei mai Itaiia a hiki i Sepania a me na mokupuni Madeira, a mai laila mai no na kapakai akau o Amerika Hema, me ke komo ana ma ke kowa o Magelana, no na kapakai hema o Amerika Hema a hiki i Mea Ailana, kahi ona i hoomaemae ia mai nei.

            He mokukaua holomama o Etna no ka papa ekahi o na aumokukaua o Italia, he 275 kapuai kona loihi, 42 kapuai laula, 20 kapuai hohonu. He 3,500 tona kona kaumaha, a he 7,000 lio huki ka ikaika hoohana o kona mau enegine mahu, a he 17 1/2 nota kona holo i ka hora. Hu elua ona mau nia papu me na pu kani pinapinai.

            E lawe ana oia he elua mau pukuniahi 10 iniha, eono pu 6 iniha, elima pu kani pinapinai Norderefeldt a me eha mau pu kani pinapinai Hotchkiss.

            He 300 ka nui e kona mau kanaka me 20 aliimoku. E noho ana oia he 10 la maanei a hoomau aku ma kana huaki kaapani honua no Samoa a me Fiji, a mailaila aku no Kik@ne.

            I kona wa i komo mai ai, ua haawi mai la oia i na kipu @ aka, mamuli o ka nele @ puni Repubalika me na p@ kipu a me ke ino ana o na pukuniahi haawi aloha, nolaila, ua kokua aku la ka mokukaua Beninetona ma ka aoao o ke aupuni ma ka haawi ana i na pu aloha he 21 i ka mokukaua Italia.

 

KA AHAHELE HAWAII.

            Ua haawi ia maloko o ka Hale Mele Hou ka Ahamele Hawaii, no ka pono o na poe Hawaii. Ua hoopiha u ia oloko o ua hale la me na poe puni himeni a me na poe makaikai. He nui lehulehu na poe i komo pu mai ma na kokua ana no ka holomua o keia hana nui, oia hoi, na kula o Kawaiahao, Kamehameha, Hui Himeni Hawaii, Makai a me kekahi mau hui hookani pila.

            He nani na mea a pau i panee ia mai imua o ke anaina nui i hiki aku, a ua hoi mai lakou me ka piha hauoli. Ua lohe hou ia mai, me he mea la, e wehe hou ia ana no he ahamele ma keia mau mahina aku.

 

            Ua hookuuia ia mai o Loio Davis malalo o ka bona o $250, ka haole i hoopaiia ai no ka hoowahawaha i ka aha.