Ke Aloha Aina, Volume IV, Number 51, 17 December 1898 — Page 6

KE ALOHA AINA

 

6 KE ALOHA AINA, POAONO, DEKEMABA 17, 1898.

 

HE MOOLELO WALOHIA

-:NO:-

ALANADELA

Ka Wahine Hoopahaohao o ka Aahu Keokeo.

-A I OLE-

Ka Loea Hookani Pila Hapa o ke Kulu Aumoe.

 

            A i ka wa i hooki ae ai o ke kanaka aoo i kana kamailio ana, oia no ka wa i poha mai ai o ka leo o ke kanaka opio no ko laua nee ana aku imua e like me ka mama nui a ko laua mau lio e hiki ai ke lawe aku.

            A oia no ka wa i umoki aku ai o mau hololio la i ka ikaika holo o ko laua mau lio, a ua lilo ae la hoi na mea a pau e alai mai ana mamua o ko laua alahele i mea ole i ke kanaka opio, oiai, aia kona ake nui o ka ike lihi aku i na mea no laua keia meheu makamaka hou e waiho nei iluna o na lau nahele.

            Aia laua ke pii la iluna o na pali nihinihi a ke iho la ma kekahi mau awawa kuhohonu, aka, oia mau hiohiona weliweli e ikeia nei e na holo lio ua lilo wale no ia he mea ole ia laua, a o kahi o na mooa makamaka hou oia wale no ke alakai o keia hanu meheu pohihihi.

            A hala ae la he hora a oi o keia hookolo meheu ana, aole he ike lihi ia aku o ka laua mea e huli nei, a ua lilo hoi ia i mea e hoouluhua loa ia ai o ka noonoo o ke kanaka opio, a no ia kumu, ua haawi ae la oia i ke kauoha i kona kokoolua no ka hooi hou ana aku i ka holo o na lio a ua like ka mama holo o na mau lio me he kikiao makani puahiohio la.

            A he mea oiaio, iloko o na minute pokole wale no, ua oili pulelo aku la ua mau lio la ma kekahi aoao o ua ululaau nei, a mamua hoi o ko laua alo e waiho mai ana he kula palahalaha.

            Oiai, ko laua mau maka e huli ana ma o a maanei o ke kula palahalaha me ka iini nui ana e ike koke aku i ka laua mea e huli nei, a i keia wa no i ike ia aku ai ka hapai ana ae o ka opio i kona lima e pea ana i kana pahikaua a kuhi aku la no ke kukulu akau me ka puana ana ae.

            E kuu hoa aoo, e alawa aku i ke kukulu akau, heaha kela mau mea pouliuli e nee la imua me ka puahi nui, aole anei he mau lio ia ma kou hoomaopopo aku?

            Ae, ae, e ke kanaka opio, he mau lio io no kela, aka, o ka mea apiki nae, aohe he ike ia aku o ko laua mau hololio i ke kau mai maluna o ko laua mau hokua, wahi a ke kanaka aoo i pane mai ai.

            Aole nae i puliki mai na hololio i ka holo o ko laua mau lio, aka, aia laua ke hookina la i ka holo o ko laua mau lio, a he mea oiaio, aia ua mau hololio la ke hoohahani aku la mahope o na lio ahiu i kela a me keia minute.

            A hala ae la he hapaha hora o ko laua uhai ana mahope o na lio e ahai la ka pupuhi me ka mama, a lawa i loheia aku ai ka opio i ka pane ana aku me ka leo nui moakaka i ke kanaka aoo:

            E kuu hoaloha e nana aku maluna o ka hokua o na lio, a hoike mai heaha kau mea e ike ana.

            I keia wa i alawa aku ai ke kanaka aoo no luna o ka hokua o na lio ahiu, a no kekahi mau sekona ka hoolei pau ana o ka lena ike o na maka o na hololio la, aia hoi, ua ike ia aku la oia i ka puiwa ana ae a pane mai la i kona kokoolua me ke ano pioo.

            He mau kino kanaka ka'u e ike nei, ke kuhihewa ole nae ka ike a ko'u mau maka, a ua hauhoa ia laua me na kaula paa. Oia pu anei ka ike a kou mau onohi maka e kuu hoaloha maikai?

            Ae, he kino kane a me hookahi kino wahine a'u e ike la maluna o na hokua o kela mau lio ahiu, a o ka'u e hopohopo ae nei, e loaa ana anei ia kaua kela mau kino kanaka me ko laua mau hanu e kamau ana no?

            He mea maopopo oleia ia kaua, o na lani hookahi wale no kai ikeia mau mea, a o ka'u pule e hooloihi ia ko laua ola a hiki i ka hoea ana aku o na kokua, wahi a ke kanaka aoo i panai mai ai me ka leo kaumaha.

            I keia wa i ike ia aku ai ka opio hololio i ka hoihoi ana iho, i kana pahikaua no loko o kona wahi, no ka mea, aohe mau enemi o ko laua alahele o mua, aka he mau kino uhane pio no ka haawi ana aku i na kokua.

            Me ka hookaulua ole iho lalau iho la oia i kana kaula ili e waiho ana mamua o kona alo i hoopaa ia i ka omuku o kona noho, a i ka hemo ana ae o ua kaula ili la, ua ikeia aku la oia i ke koaiai ana ae maluna o kona poo me ka ikaika aku a kou mea kakau e kaena ae nei he emepera oia no ke kipuka ili.

           

            Ua hoopauia mai ko Kapena Chas. Warren noho hou ana iloko o ka oihana makai, mamuli o kona ona ana i ka wa o kana uwati e ku ana pela ko makou lohe.

            He elima ka nui o na mokuahi o na aina e, e hoea mai ana mai na awa like ole mai, Miowera mai Vitoria mai, Warimu mai Sidane mai, Pekina mai Kapalakiko mai, Kina mai Iokahama mai a me ka Auseteralia mai Kapalakiko mai.

 

KA BUKE MOOLELO HAWAII

I HAKUIA E KA

Moiwahine Liliuokalani ma Wasinetona,

Pai a hoopukaia e Li ame Shepord o Bosetona, Amerika Huipuia.

Unuhiia no ka pomaikai o na poe heluhelu o KE ALOHA AINA.

MOKUNA XII.

KA HUAKAI KAAPUNI HONUA.

 

            Oiai oia e hana ana no ka pomaikai o ka poe e noho ana ma kona aupuni, a me ka huli ana i na limahana nana i hoowaiwai mai i na makamaka o na aina e ala no nae lakou ke hana ino la iaia no ka hoolilo dala me ka hoopau manawa wale no ma ke kaahele ana aku ma kekahi aina mamao.

            Mai Kina aku, ua holo aku la ka moi no Siama, a malaila i apo ia mai ai oia me ka hanohano e ko laila moi, a malaila aku no Inia, kahi hoi i like ke ea me ko kakou, a komo mai la ka makemake iloko ona no ka lawe ana mai i mau limahona no na mahiko.

            Aole nae i holopono kona nana ana no na limahana Inia, aka, ua hoouna aku nae o Iapana a me Kina i na limahana no ko makou mau mahiko. I keia wa ua maopopo ia makou ka manao o ka hookomo ana mai, a i ole o ka hana aelike ana i na limahana. E hoomanao ia i kela wa; o ka hoao ana aia no ia i kona wa hou loa, a o ka ninau oia no ka huli i na limahana i hiki ole ke hoopau ia e ka ea o ko makou aina.

            O ka hopena aole ia i kue ia, a ina he manao ko ko'u kaikuanane e imi no kona pono wale iho no me ka nana ole i na poe i noho malalo o kona hae, ina i keia la eia no kona ohana kemana nei.

            Mamuli o kona manao kuokoa no na hanauna Amerika, ua hana aku la oia i ke kuikahi panailike, a ma kona huli a wae pono ana, ua haawi aku la oia he manawa i na poe kanuko i manawa no lakou e loaa ai na waiwai nui.

            Ua hoolilo aku oia i ka manawa kinohi o kona nohoalii ma ka hookiekie ana i kona poe, i ka wa koke no i loaa ai ka waiwai a me ka ikaika, ua poina iho la lakou i kana mau hana aloha, a ohumu iho la e hoopoino i kona mana, a me ka hookahuli ia ana o ke Kumukanawai malalo o laila i hoomalu ia ai ke aupuni no aneane hapaha kenetuira.

            O ka wa i hookoia ai o keia hana e lakou, ma ka makahiki 1887 no ia. Mahope o kona noii pono ana i ka ninau limahana ma ka hikina, ua kaapuni aku la ko'u kaikunane i na aupuni nui o Europa, me ka huli hoi ana mai ma ke alahele o Wasinetona, a ua hookipa la oia me ka maikai ma na wahi a pau ana i kipa aku ai.

            Ma ka la 29 o Okatoba, 1881, i hoea mai ai oia i ka home, a ia wa pu no i haalele aku ai au i ko'u kuleana noho alii kiekie ma ke keena aupuni, kahi hoi a'u i paa ai no eiwa mahina a me na la keu.

 

MOKUNA XIII.

KO'U NOHO KAHU AUPUNI ANA.

            Aka, he mau kumuhana ano nui kakaikahi ka'u e kamailio aku ai i keia wa. He mau pule kakaikahi mahope iho o o ko ka Moi Kalakaua kaawale ana aku, ua pahola ae la ka lono, ua puka ae ka mai Samola Poki iloko o ke kulanakauhale.

            Ua manaoia, ua hoea mai keia ma'i mai Kina mai, aka, o na hiohiona i hala aku la, i loaa ia makou he oolea, a o ka hana pono wale no oia no ka hoao ana aku e kaohi i ka laha loa ana aku. Ua kahea aku au i ka Aha Kuhina, a ua makaukau hoi au ma na ano a pau e kaohi mai ai i ka nee mua ana aku o ka ma'i .

            O na launa kamailio ana mawaena o na mokupuni, ua hoopaaia na moku e lawe ana i na ohua, ua hookapu loa ia. Ua haawi ia aku na hoomalu ikaika ana maluna o na poe i loaa i ka ma'i a i hoohuoi wale ia.

            Aole i pau.

 

HE HOIKEIKE KII HOOLELEAKA.

            E haawi ia ana he hoikeike kii hooleleaka nui ma ka Hale Mele Hou, ke hiki aku i ka po o ka la 24 o keia mahina. O na kii e hoikeike ia ana oia no na kii o ka hopu pio ia ana o kekahi papu kaua Sepania ma kahi kokoke i Santiago, a ike ia aku la na koa a me na luina Amerika e lele kaua ana maluna o ua papu la, ke kahua kaua o Guantanamoa ka huki ia ana o ka hae Sepania ilalo, ka huki ia ana o ka hae Amerika ma Manila, Persidena Makinile a me kona Aha Kuhina e makaikai ana i ka hookahakaha ma Camp Alger, a me kekahi mau kii kaua e ae.

            Mahope o ka pau ana o ka hoouka kaua hahana e ikeia aku ana, e ikeia aku ana na poe konua o ke Kea Ulaula me na Kaikuahine Wilikine e nee ana iwaena o na kahua kaua e malama ana i na poe i ho@ ha ia, na poe make e laweia ana maluna o ke kaa. O keia mau kii @ hoikeike ia mai ana, e onioni ana lakoiu me he mau kii kino kanaka maoli la no.

            Ma ka Moana i huli hoi mai ai ke Ona Miliona James Campbell me kona Loio Kikila Baraunu me na ola kino maikai.

 

Nuhou Kuloko.

            E loaa no na Hae Hawaii Silika Nani ma ka Halekuai Golden Rule Bazaar. Alanui Papu.

            E hoouna ia mai ana he mau pualikoa Amerika kumau no Honolulu nei ma keia mua aku.

            E haawi ia ana he ahamele nui ma ka Hale Mele Hou, ke hiki aku i ka po o ka la 27 o keia mahina.

            Eia na poe heihei kaa baikikala ke hoomaamaa mai nei no ka holo aku i Maui e heihei ai ma ka la Hape Nuia ae nei.

            Eia na Alamanaka Hawaii maikai i ike mua oleia ma Honolulu nei, ke kuaiia nei e ke Golden Rule Bazaar no ka 25 keneta pakahi.

            He elua makai ku huina, hookahi makai kiai awa a me hookahi kiai po, oia ka huina o na poe e kiai nei i ke Columebia i keia mau po.

            He lono kai loaa mai nei no kekahi hoonaueue olai i ike ia ma Kau, ma ka hora 3:30 o ka La Sabati nei, aka, aole nae he ola i poino.

            He elua mau mokuahi hou e kapiliia aku ana no ka Hui Mokuahi Pakipika, a e hooholo ia aku ana mawaena o Kapalakiko a me Pilipine me ke kipa pu i anei.

            O kahi maikai a emi loa o na Kii Bebe a me na Kii Paani ona ano a pau ma kahi ia o ke Golden Rule Bazaar. E kipa mai a e makaikai i na Waiwai nui hewahewa.

            He mokukuna malihini ka ke kapena o ka mokukuna Luka i ike ai ma keia huli hoi ana mai nei a ka mokukuna mai Laupahoehoe mai ma ka hikina aku o Maui, ua koho wale ia ae he moku opiuma no ia.

            Ua haawi ia ae e Mrs. Kahuila Wilikoki he paina luau nui ma kona home ma ka auina la Poaono nei, ua hoea ae na poe i luhi pu ai me ia ma ka aha fea nui i malama ia ai ma Sana Lui, a me kekahi poe e ae he lehulehu wale.

            O ka huina lahui o Rusia, he 129,000,000, a o ka nui o na nupapa e hoopuka ia nei he 743, aka, he oi iki wale ae no nae ia mamua o ka hapalua o na nupepa e pai ia nei ma ka mokuaina o Penesilevania, nona ka huina o 1430.

            He moku Sepania e lawe ana he ukana dala o 17,000,000 a me na auka gula, ua ili oia ma kekahi kahakai o Gunwaloe, he iwakalua makahiki i hala ae nei. Ua pae mai na dala i uka o ka aeone i kekahi manawa, a no ia kumu, ua hoala ae la o Houston he haole Enelani, he hui no ka hele ana aku e huli i keia waiwai e huna ia nei e ke kai.