Ke Aloha Aina, Volume IV, Number 49, 3 December 1898 — Page 7

KE ALOHA AINA

 

POANO, DEKEMABA  3,  1898.          7

 

HE KAAO KAILI PUUWAI

--:NO KA:--4

UI MINEWA.

---IA ME NA:---

Kaikunane Eiwa

----

I Hooliloia i mau Manu Nene Ahiu a i ole na Keiki i Hoehaehaia

----

Kalauia no KE ALOHA AINA

----

 

MOKUNA IV.

O MINEWA ILOKO O KA EHAEHA.

 

He manawa keia o na kipona waimaka, e hoohanini ia ana e ka luahine a me ke keikamahine i ko laua manawa i hoomaopopo ae ai ua hoea mai ko laua wa e hookaawaleia ai no ka manawa mau loa, a ma kela kapa o ka muliwai eleele o ka make e hui hou ai laua, a e pili aloha hou ai laua no ka manawa pau ole e like hoi me na makahiki i kaahope aku la.

          A i ka mao iki ana ae o na haawe kaumaha o ke aloha e lulumi ana maluna o kona kino, oia no ka wa i pae hope mai ai o ka luahine i ka i ana mai:

          E kuu aloha ke kaawale nei kaua no ka manawa hope loa, a o ka’u e kalokalo hope ae nei i na mana lani e hahai ka hopena o kou mau la me ke kuonoono a me ka hauoli nui.

          I ka hooki ana ae o ka luahine i kana kalokalo ana, oia no ko laua wa i puili aloha hope ae ai, a imi aku la o Minewa i kona wahi e pake le ai me ka haalele ana iho i ka luahine e moe ana iluna o na mauu koekoe e kali ana no ka hopena o ka make e hookokoke mai ana ma luna ona.

          A e like me ka hikiwawe o kona mau kapuai wawae ke lawe iaia, pela oia i nee aku ai imua me ka puahi nui, a o kona puuwai hoi ke pana wikiwiki la ia me ka makau nui no kona loaa mai i ke kanaka ahiu. Oiai, ua maopopo no iaia he make wale no ka uku panai e loaa ana iaia no keia holo mahuka mai na lima kakauha mai o ke kanaka puuwai eleele.

          Aka, iaia nae e hoomau nei i kona nee ana imua me ka awiwi nui, ua hoohikilele ia ae la oia i ka lohe ana aku i kekahi halulu e nee mai ana mamua o kona alahele, a na ia halulu i kaohi mai i kona mau kapuai wawae mai ke nee hou ana aku imua.

          A o kona mau puka pepeaio i keia manawa aia ia ke kauiono pono la no kahi o ka he halulu e pae mai ana, na keia halulu i kono mai iaia e hoopau ae oia i kona nee ana aku imua o keia alahele, a e imi hou aku i alahele okoa, oiai, ua halialia mai la iloko ona aohe keia halulu no kekahi mea okoa aka, aka no ke kanaka ahiu no.

          A he mea oiaio ua pololei na halia i komo mai iloko o ka kaua Minewa, no ka mea, la manawa koke ua oili koke mai la ke poo o ke kanaka ahiu, ka mea hookahi a kona puuwai, i weliweli loa ai, mailoko mai o ka hihipea o na laau.

          I ka ike ana aku o Minewa i ka oili ana mai o ke poo o ke kanaka ahiu, oia no kona wa i ku koke iho ai, a hoolalau iho la ma ka ohi ana i na lala laau maloo, a ma ka nana aku a ka mea kakau o keia moolelo aohe wahi lilo o ka luahine ohi wahie o na ululaau o Narivo.

          I ka ike ana mai o ke kanaka ahiu i ka kaua eneu e ohi wahie nei oia no kona wa i hoohuli ae ai i kona alahele a nee mai la hoi imua no kahi a Minewa e imi nei i kahi ona e noonoo ole ai o ke kanaka ahiu o kana pio no keia e huli nei. A i kona hiki ana aku ma kahi a Minewa e noho ana oia no ka wa i poha aku ai o kona leo i ka ninau ana aku.

          E ka luahine auwana heaha kau hina maanei o keia awakea?

          Na keia leo weliweli o ke kanaka ahiu i hoopiha mai i kona puuwai me ka makau nui, aka, ua hiki ole nae iaia ke noho hamau iho, no ka mea, he hoopii ana mai ia i ka inaina o ke kanaka i hoonole ia me ke aloha hoakanaka, nolaila, me ka hookaulua ole iho pane aku la oia me ka olu wa pihe penei:

          E ka haku o keia mau ululaau e ohi wahie ae ana kau wahi kauwa no ka hoomoa ana i ka’u mau wahi mea ai i keia kakahiaka.

          Na keia mau olelo a ka kaua Minewa i kapa aku ai i ke kanaka ahiu he haku no na ululaau, i hookomo aku i na manao oluolu iloko ona, a i keia manawa akahi no a akakuu mai ka leo o ua kanaka la i ka ninau hou ana mai:

E ka luahine e hoike mai me ka huna ole iho, aole anei au wahi kaikamahine i ike iho nei i ka maalo ana ae ma keia mau wahi i keia kakahiaka nui?

Ae, he wahi kaikamahine ka’u ike iho nei i ke kaalo ana ae nei maanei he hora paha a oi ke kowa a e uhai ana mahope o kekahi dia keiki, aka, ma ka’u hoomaopopo aku ua oi aku no ka mama o ke dia mamua o ua wahi kaikamahine la, wahi a Minewa i pane aku ai me ka maalea nui.

A na keia mau olelo a Minewa i hookomo mai na manao inaina iloko o ke kanaka ahiu no ke kaikamahine opio mamuli o ka loaa koke ole o na io holoholona.

Nolaila, me ka kookaulua ole, loheia aku la kona leo i piha me ka inaina i ka hooho hope ana ae, penei:

E make ana ia’u kela wahi kaikamahine, no ka mea, ua hala aku la ko’u manawa paina, a eia au me ka pololi ke huli nei iaia.

A i ke kuu ana iho o koha leo, oia no ka wa i haalele iho ai ke kanaka ahiu i ka kaua Minewa e hookepue nei, a hele aku la me ka puahi nui no kahi a Minewa i kuhikuhi aku ai, kahi hoi e waiho mokaki ana o na lole aahu o Minewa haakae i ke koke.

I ka hala ana aku o ke kanaka ahiu, oia no kona wa i haalele aku ai i ka ohi ana i na lala laau maloo e waiho mokaki ana, a motio pololei aku la hoi kona alahele no ke alahele mua ana i hele mua ai me ka iini nui ana i na manawa a pau e hiki koke oia no waho o ua mau ululaau la me ka haawi pu ana ae hoi i na hoomaikai no kona palekana mai ka make ana mai na lima mai o ka enemi, aka, ua hoopakele ia nae oia e ka aahu ana e komo ana a me ka papale ooma ana e kau ana.

Ma ka moali o ke kanaka lokoino i waiho iho ai mahope maluna o na lau nahelehele, malaila ka kana aloha i hookolo aku ai, a he mea oiaio, mamua o ka napoo ana o ka la, ua hoea aku la oia no waho o ka ululaau, a iloko o na minute o ke kauinaha e huekoni ana ia loko o kona puuwai, aia hoi, ua hoohauoli ia mai la kona noonoo i ka ike ana aka i na puoa o na luakini a me ka halealii i ke ku mai ma kahi o 10 mile ka mamao mai iaia aku.

Ma keia wahi i hoomaha iho ai o Minewa, me ke kulu pu ana iho o kona mau waimaka no ke aloha i kona mau kaikunane, oiai, ua komo mai la na halialia ana iloko ona, aole lakou iloko o ka halealii i keia wa, aka, ua hoauwana ia aku lakou no kekahi aina okoa aku, elike me kona hana ia ana e ko lakou makuahine kolea.

A i keia manawa no i komo mai ai na kuko like ole iloko ona e hoi aku paha oia no ka home o ke kanaka ahiu a i ole e nee aku paha imua no kahi o ka halealii o kona makuakane e ku mai ana.

Nolaila, mahope o kona noonoo ana i kana hana pono e hana aku ai ua hooholo iho la oia, ua oi loa aku ka pono o kona hoomau ana aku i ka hele ana imua, a malia o aloha hou mai kona makuahine kolea iaia a haawi mai i na hookipa aloha ana aku maloko o na paia o ka hale ana i holoholo ai i kona manawa kamalii.

Aka, aole nae oia e hiki ke hele hou aku, oiai, ua hele oia a maluhiluhi, nolaila, ua hele aku la oia e imi i wahi no kona poo e hoomaha iho ai ia po, no ka mea, aia ka la ke hookokoke iho la i ka ilikai.

A malalo o kekahi kumulaau nui a iluna hoi o na mauu huihui i hina aku ai ka kaua Minewa a hoohala iho la i na hora loloa oia po, me na manaolana hauoli hoi o ka ike hou ana aku i kona makuakane aloha a me na kaikunane.

 

NA ANOAI O KA UWAPO.

Ua malama ae na Limahana o ka Uwapo Mokuahi Ocianika, he halawai ma Maunakiakie, i ka Poakolu nei, Nov. 30. A ma ia halawai ana, na kuka ae lakou no na mea e pili ana i ko lakou pomaikai. Oia hoi, he Hui e hoopakele ana ia lakou mai na poino mai o keia noho ana kino, aua koho pono ia na inoa malalo iho nei i mau Luna Nui no ka Hui.

 

Jno. Kaiama                            Peresidena

D. P. Keawehaku                             Kakauolelo

Kepuluna                                Puuku

J. K. Keoneula                        Luna Hoohana

 

          Mahope iho o ka pau ana o ka halawai, ua paneeia mai he papaaina i luluu me na ono a Liua. Ke kalokalo ae nei kou mea kakau i na Mana Lani e uhai ia ka Hui a na limahana o ka Uwapo Ocianika me na pomaikai he nui. Imua e na Hawaii no na hana pono a haule mai na lani.

                                                                                                                                     D. K.

          (He oiaio, o na hana i ku i ka pono, he hoeueu ikaika ia o ka noho ana ulakolako ma keia mua aku, a he kipaku loa ana aku i ka ilihune a me ka makilo ma ko oukou mau ipuka hale. O ka makau e nonoi aku nei i na Luna Nui i kohoia, e hoopono ma ka oukou malama ana i ka waiwai o ka lehulehu, i ole ai e waia ko oukou mau inoa a lilo i mea hoowahawahaia.   L. H.)

---

 

KE ALAWAI O PANAMA.

 

          Aia ke nee mua la na noonoo ana no ka hoonee mua ana aku i ke alaoki wai hou o Panama. Ua hoala a ae he hui hou ma Farani e kekahi mau kanaka banako, me ke komo pu ana aku o M. Bannard-I, ka Peresidena o ka Hui Komohana o Farani, kekahi hoi o na kanaka waiwai loa. Ua loaa mai nei he manawa i kaupalena ia mai ke aupuni nui o Colombo, oia hoi, e pau ia i ka makahiki 1906. He $13,000,000 iloko o ka waihona i keia wa, a he puu dala mahuahua e waiho makaukau la no ka hoohana ana, a mawaena hoi o 3000 a i ole 4000 limahana no ka hana ana ma keia alawai.

          Ua hoopau loa ia ka noonoo ana e oki pololei, aka, e hana ia aku ana ma ka hookio ana i ka wai iloko o kekahi mau lokowai nui, no lakou ka huina o eono. O ke kumu o ka hiki ole ke hoomoe pololei ia mamuli no ia o ka ikaika o ka muliwai Charges i ka wa ua, a ua hiki ole hoi i kona ikaika ko ke hoohana i ka wa e hookio ia ai o kona wai iloko o kekahi mau loko, a ua manao ia na kona wai e hoopiha i keia mau loko. O ka nu o keia i loko wai ma kahi no ia o 5,300 @ka a@na.

---

 

AOLE I MAKE O PUNINI.

 

          Mamuli o na lono i hoike ia mai e kekahi o ko makou mau hoaloha, e pili ana no ka make ana o D. M. Punini, a me ka hoike hoi a kekahi mau makamaka nupepa e ae o ke kulanakauhale nei, ua hiki ole iho la i ko makou puuwai ke kaohi iho i na manao kuhohonu o ke aloha e hu ana me he wai mapuna la, a pela iho la i telegarapa awiwi ia, aku ai me ka hoohakalia ole, maloko o na kolamu o ka nupepa pukala KE ALOHA AINA o ka Poalima nei.

          Aka, ua hoohauoliia nae makou i ka hoike aku, aole oia i make, eia no oia ke ola nei, me ke ola kino onawaliwali. Ua ike makou iaia, a ua kamailio pu hoi me ka oluolu.

          Ke hoikeia aku nei ka lohe i na mea a pau, aole i make o D. M. Punini elike me ka lono i loaa mai ia makou, a aia no oia ma ka home noho o kana mau keiki, ma Kauluwela ae nei.

---

 

KUAI A KE KAHU NO KEKAHI MAU AINA WAIWAI LOA.

 

          MAMULI O KE KAUOHA A ka Aha Hookolokolo Kaapuni o ka Apana Ekahi, e kuai aku ana au ma ke kudala akea ana ma ka Poaono, ka la 3 o Dekemaba M. H. 1898 ma ka hora 12 o ke awakea o ia la ma ke alo, oia hoi ma ka puka mauka o ka Hale Oihana Hookolokolo ma Honolulu mokupuni o Oahu. I ke kuleana hapakolu (1/3) mahele oio ia a pau loa o S. L. Kekumano Opio, he keiki oo ole iloko o na aina a pau loa i hai ia maloko o ka Papa Hoike malalo iho nei, i ka mea koho kiekie loa no ke dala kuike, me ka apono pu ia mai nae o @a kuai ana e ua Aha Hookolokolo la.

No na mea i koe e ninau ia.

S. L. KEKUMANO, (Kahu.)

          A i ole i kona mau Loio Kaneakua a me Enoch Johnson.

          Honolulu Nov. 14, 1898.

---

 

PAPA HOIKE.

          1.---Ke kuleana hapakolu (1/3) mahele ole ia a pau loa o ua S. L. Kekumano Opio nei, ke keiki oo ole i oleloia, iloko o kela aina pa hale me ka hale pu maluna iho e waiho la ma Kamakela ma Honolulu no i oleloia i hoolilo ia mai ai e J. D. Holt Jr. ia J. N. Ilae, ke kupunaka e ponoi o ke keiki oo ole i oleloia ma ka palapala kuai i kopeia ma ka buke 167 aoao 472 a i hoakakaia penei: E hoomaka ana ma ke kihi aku komohana o keia aina ma ka huina o kekahi mau alanui elua a holo aku, hema 4 00’ hikina 56 kapuai ma ke alo, akau 75 00’ hikina 1:5.4 kapuai ma ka apana ma ka aoao hema o keia aina, akau 30 00’ komohana 56 7 kapuai, alaila hema 75 00’ komohana 90 kapuai ma kekahi wahi alanui liilii a hiki i kahi i hoomaka ai. O ka Ili 13-100 o ka eka a oia no hoi kekahi wahi o ka Palapala Sila Nui Helu 1758 kuleana Helu 980 i hooko ia no Keone.

          2.---Ke kuleana hapakolu (1/3) mahele ole ia o ua keiki oo ole nei iloko o ka Ili Aina o Punaula maloko o ke Ahupaa o Mapulehu ma ka mokupuni o Molokai, i hooili ia @a e Isaac Lewis ia Kekini ke kupunawahine o ua keiki oo ole nei i oleloia, ma ka palapala kauoha i hoo@ pono ia e ka Lunakanawai Hutchinson, ka Lunakanawai Kaapuni o ka Apana Hookolokolo Kaapuni Elua ma ka la 5 o Maraki M. @ @

                                                                                                                            nov. 15 6 ts