Ke Aloha Aina, Volume IV, Number 46, 12 November 1898 — Page 1

KE ALOHA AINA

 

E hoopuka mau ia aku ana mai ka Poakahi a ka Polima o na pule a pau o kela a me keia mahina.

            Ka Uku Pepa, he 20 keneta o ka pule. No ke kope h ookahi, he 5 keneta.

            E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.

            E pai ia no na Olelo Hoolaha, na Kanikau me na Mele Inoa, me ke Dala kuike.  Aole nupepa ma ka owili pakahi e hoouna ia ke ole e hookaa mua ia ka uku pepa.

            E hoouna pololei mai i na Nuhou, na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

            Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hoike mai i ka Lunahooponopono i kona inoa ponoi.

 

Ka Nupepa Puka Pule

Ke Aloha Aina

Hookahi makahiki $2.00

Eono mahina $1.00

Ekolu mahina .50

Hookahi mahina .20

 

EMMA A. NAWAHI

Puuku o Ke Aloha Aina

EDWARD L. LIKE.

Lunahooponopono a Hope Puuku

S. P. KANOA.

Hope Lunahooponopono.

 

            O na kauoha Nupepa me na hookaa Dala, e hoouna pololei mai i ka Puuku ma Honolulu.

 

Nuhou Kuwaho.

            Ma ke Dorika o ka po Poalima nei i loaa mai ai ia makou na hunahuna mea hou o na aina mamao, a oia no hoi ka makou e hoopuka aku nei no ka pomaikai o ko makou poe heluhelu, penei:

 

E HOOPAU WALE ANA PAHA O FARANI.

            Ladana, Oct. 29. Ua hoopula ae na nupepa i na manao e pili ana no ka nee ana o Mekia Marchand mai Fashoda aku no Khartoum, he hoike ana hoi ia no kona haawi pio i ka ninau ano nui e noonoo ia nei, aka, aole no nae i hoololi ia ae ke kulana.

            Ua hoike ia ae e nee aku ana oia no Cairo, i hiki ai iaia ke launa kamailio me ke aupuni Farani, a i kona wa e hiki aku ai ilaila, e waiho aku ai oia i na kumu popilikia e hiki ole ai iaia ke  noho aku Fashoda malalo o na kulana e ike ia nei, a e noi aku ana i ke aupuni no ka unuhi ana aku i kona mau pualikoa.

 

E PAA ANA O AMERIKA I NA MOKUPUNI O PILEPINE.

            Wasinetona, Oct. 29, Ua hooholo o Peresidena Makinile e paa i na mokupuni Pilipine a pau. E lawe ana o Amerika Huipuia i ke koikoi o ka uka ana i na aie o Pilipine ma ke koi a Sepania no ka huina o $40,000,000. A ua ae o Sepania i ka hookuu lilo loa ana aku ia wahi no Amerika, i na e uku ia mai ana kana mau koi.

 

APOIA MAI ME KA PUMEHANA.          

            Ladana, Oct. 27.  I keia auinala i hoea mai ai o Kenerala Kitchener, a ua apo ia aku hoi oia e ke Alihikaua Nui o na pualikoa o Beritania, ka Hake Woolsey a me kekahi mau aliikoa.  Ua haawi ia aku na hoohanohano iaia e na koa ma kahi hoolulu kaaahi, a  ua haawi ia mai hoi na leo ohohia nona mai na kanaka e hoopiha ana malaila i kipa mai e ike iaia i kona wa i hoi mai la mai Aigupita mai. Ma kahi hoolulu kaaahi ma Vitoria, ua hoopiha ia me na kanaka nui hewahewa e ake aku ana e ike ia Kenerala Kitchener, a ua hiki ole hoi i na makai ke kue aku. A i ka wa o ke Kenerala i hemo mai ai me ka manao e kau aku iluna o kona kaa, ua alai ia mai la ia e ka puulu kanaka nui, e haawi ana i na leo kalokalo, huro a pela aku, a ua hookeke mai hoi lakou a ua hiki ole iaia ke nee hou aku imua, a mamuli o kona emi ana ihope a puka malu ma kekahi aoao o kahi hoolulu kaaahi i pakele aku ai oia mai na kanaka haawi ana i na leo ohaoha nona.

 

KA MANAWA HOLO LOA O KA ATELANIKA.

            Nu Ioka, Oct. 27.  Ua holo ia mai nei e ka mokuahi Fuerst Bismack ka manawa holo loa i haalele iho ia Nu Ioka, ma ka la 20 o Okatoba, i ka hora 10:52 a.m., ua kaalo ae la oia ma kahi o ka moku ipukukui he 22 minute mahope iho, a hoea aku la i Cherburg i ka hora 2:35 o keia kakahiaka, a ua like hoi me eona la, 10 hora a me 15 minute ma keia holo ana, he 39 minute ka haule iho o keia manawa i ka manawa holo i ike ia mawaena o keia mau awa.  A ua kokoke loa hoi e piha iaia he 20 nota i holo ai i kela a me keia hora.

 

HE HOOKAHI I MAKE A ELUA I HOEHA IA E KA POKA HOOKAHI.

            Sam Diego, Oct. 28.  Ua hoea ae he ulia manaomanao i keia kakahiaka ma Esenada, o ke komo ana aku o kekahi poka iloko o ekolu kanaka, a he hookahi o lakou i make.  E hoomaamaa paikau ana kekahi mau koa Mekiko malalo o ke kuhikuhi ana a kekahi Kakiana, a i kona wa e kuhikuhi ana i na koa i ke ano o ka hoopiha ana a me ka wehe ana i ka poka mailoko mai o ka pu. A me kona manao ole he poka ko loko o kana pu, ua hihia ae la ke kiko o kana pu i kona aahu a kani aku la me ka lele pololei ana aku a ku aku la he ekolu koa.

 

HOEA KA EMEPERA I IERUSALEMA.

            Ierusalema, Oct. 29.  I keia la i hoea mai ai ka Emepera Uilama a em ka Emepera Wahine Augusta Victoria mawaho o ke kulanakauhale nei.  I ka hora 11 o keia la i komo mai ai na Mea Kiekie ma ka puka pa o Jaffa, a ma ka hora 3 i kipa ai laua ma ka Luakini o ka Halekupapau Hemolele.  O na alanui a me na hale, ua hoohiwahiwa ia me na nani like ole.

 

HOOPAI IA NA MUSSULMANS.

            Candia, Oct. 29.  He elima hou mau Mussulmans i hoopai ia no ke komo wale ana aku e luku wale i na koa Beritania ma ka la 6 o Sepatemaba, i make i keia la, ma ke kahua mua no o na poe he ehiku i halawai ai me ia hoopai hookahi no.  A ua hui pu aku ma keia hoopai ana he eha mau kanaka Bashi Bazouks, he iwakalua makahiki hoopaahao pakahi ma ka hana oolea.  Mai ke kaawale ana aku o na pualikoa Tureke, ua ikeia iho la he heluna o na kanaka hana hewa Mussulmans aia ma Italia.

 

NA HOOLILO O KA HOOLANA ANA I NA MOKU SEPANIA.

            Nu Ioka, Oct. 29.  Ua olelo ae ka mea kakau o ka nupepa Herald ma Wasinetona.  I na e haawi ia aku ana he $1,000,000 ia Hobson, ua olelo ae oia ua hiki loa iaia ke hoolana i na mokukaua poino o na Sepania, Cristobal Colon me Vizeaya, a lawe aku no ka kapili moku o Nu Ioka, a i ole o Norfolk.  Ua waiho aku o Hobson i keia manao i ka papa Kaua Moana, a e lawe ana ka papa a noonoo a hiki i ka Poakahi ae nei, a oia ka wa e malama hou ia ai o kekahi halawai hou me ka hoea pu i ka panina oia manao.

 

NO KOA TENESI.

            I ke kakahiaka nui o ka Poakahi nei i hoea mai ai ka mokuahi Zealandia mai Kapalakiko mai, a maluna ona i hoea mai ai na koa Tenesi, i kau ia hoi ka weli no ka lakou mau hana haihai kanawai ma Kapalakiko.  No kekahi mau la pokole wale iho no lakou e noho iho ai maanei, a holo loa aku no Manila.  Ua hoea aku kekahi poe kakau nupepa imua o Konela Kamika o na puali Tenesi, a ninau aku la ina he oiaio na mea i hoolaha ia e na nupepa o Kapalakiko no ka mea e pili ana i na koa Tenesi.  Ua hoike mai oia, aole he mau kanaka ino iloko o kona puali i oi ae mamua o kekahi mau pualikoa okoa aku, he nui na mea i kamailio ia no na koa Tenesi, aka, aole nae lakou he mau koa Tenesi, he poe koa lakou no kekahi mau puali okoa aku, a i ko lakou wa nae i hopu ia ai, ua hoike hoopunipuni aku lakou, he mau koa Tenesi lakou.

            Ma kekahi po, ua hopu ia he 76 koa, a i ka wa i huli pono ia aku ai ua loaa aku la he 11 wale no poe Tenesi iloko oia heluna, he mau po mahope mai, ua hopu hou ia iho la no he 40 koa, a iloko oia heluna aole he koa Tenesi.  He nui no na hana ino e ae i hana ia, aka, aole wale no nae o na Tenesi kai hana no lakou ponoi iho me ke komo pu ole mai o na koa e ae e kokua.

            Mamua o ko lakou hoolele ia ana mai iuka nei o ka aina, ua haawi aku ko lakou mau Kapena i na a o ikaika ana, e malama i ka maluhia, a e hoopau hoi i ko lakou nonohua no na koa Nu Ioka.  Ua hookuu ia mai he eha koa o kela a me keia puali, a no ekolu hoi hora a lakou e hoomaha ai mauka nei o ka aina.

            O na koa Nu Ioka wale no ka enemi makawelawela o keia poe Tenesi, a ua hoike mai kekahi mau koa Wasinetona ia makou, i ka wa o na pualikoa Nu Ioka e noho ana ma Kapalakiko, ua ulu ae la he mau kue mawaena o keia mau puali, a o ka hopena ua hoea aku la na koa Tenesi i kahi hoomoana o na koa Nu Ioka, a hoohiolo iho la i kekahi o ko lakou mau halelole.

 

UA HOI AKU LA NO SEPANIA.

            Ma ka mokuahi Belgic i loaa mai ai o ka lono no ka huli hoi ana aku no Sepania o Adimarala Montijo, ke alakai o na mokukaua Sepania i hoopiholo ia ai e na mokukaua Amerika, ma ke kaua o ke kaikuono o Manila, no ka hookolokolo kanawai koa ia ana.  Ua loaa ma iaia ke kauoha ma ka la 20 o Sepatemaba, no ka hoea ana aku ma Madarida no ka pane ana aku i na ninau no ke i poino ai kona mau moku.  Ua noi aku oia ia Mekia Kenerala Otis no ka ae ana mai iaia e haalele iho ia Manila no ka holo ana aku i Madarida, a ua loaa iaia ka ae ia ana mai.  Ma ka la 1 o Okatoba, i haalele iho ai oia ia Manila maluna o ka Esmeralda no Hongkong, a ma ka la 8 o Okatoba i haalele iho ai oia ia Hongkong maluna o ka mokuahi Farani Laos no Madarida, Sepania.

 

            Ma ka halekuai wale no o Hobron ma, e ku nei ma ke kihi o na alanui Moi a me Papu e loaa ai na laau hoola a ka Hui Ilikini E nana i ka lakou hoolaha e puka aku nei.