Ke Aloha Aina, Volume IV, Number 43, 22 October 1898 — Page 8

KE ALOHA AINA

 

HE MOOLELO WALOHIA

NO KE

Keikialii Alabati

 

Ke Kaeaea o Pelekane

A ME KA

Ui Madelina.

 

Ke Kukui Uwila o Ainapo

 

Hoohenoia no KE ALOHA AINA

            Oiai lakou e kuupau mai ana i ka holo o ko lakou mau lio me ka hiehie nui, ua ike pu ia aku la ka hulali o ka maka o ka lakou mau pahikaua.

            A oia no hoi ka wa i oniu ae ai o ko lakou alihikaua nui i kana pahikaua no ekolu manawa, a oia no ka wa o na koa kaua lio a pau i ike ia aku ai e helelei like iho ana mailuna iho o ka hokua o ko lakou mau lio no ka honua.

            A ua haawi koke ia aku la ke kauoha no ke komo awiwi ana aku iloko o ke keena hoahu o na mea kaua o kela a me keia ano, no ka aahu ana i na kapakila, ke o-pu malumalu hoi oia mau la poiuiu o ka noho ana.

            O ka nanaina o kela a me keia hoa pakahi, ua makaukau ia no ka hoohana ana aku ma na ano a pau, ina no ka make a ola paha.

            I keia wa e ku makaukau la na koa, oia no ka wa a Rokekila i pane aku ai i ka opio, me na huaolelo wala@ia o ke aloha:

            E haalele iho ana au ia oe ma ke Kakela nei, no ka uhai ana aku mahope o ka meheu o ka mea i ike ole i ke aloha, no ka hookau ana aku i ka hoopai kupono maluna o ka mea i loaa ole ia mea nani, a e hoopakele pu hoi i ke ola makamae o kau wahine aloha.

            Aole au e noho ana, ua makaukau au no ka hale pu ana me oe ma ia huakai hookahi, aole loa au e ae e noho mahope nei me ka waiwai ole.

            E haawi mai i kekahi o kou mau ilo i ao ole ia no’u, a na’u no e kula aku iaia i ka hana e peu koke ai o kona huhu.

            Na keia mau olelo a ka opio i hookaakaa ae i na maka o Rokekila, he opio ka keia i lehia ma ia hana o ke kau lio, a oia hoi kona wa i alakai aku ai i ka opio iloko o ka pa o na lio i hoolakalaka ole ia.

            He oiaio, he wahi keia no ka weliweli, aka, no ka kakou opio, o kana wahi lealea loa ia, a pela oia i noi aku ai i kona hoaloha e hana ia pela.

            Oia kona wa i kaulona pono aku ai i ka nana ana maluna o kekahi lio ahinahina, i hele ka hulu o kona poo a me ka a-i a pa i ka lepo, a ua uhi pu ia aku hoi kona mau maka a nalowale pu e keiaumau hulu e kai ewa ana mamua o kona alo: a pela no hoi kona huelo, ua halii i ka lepo, aka, he hiona makaala, a he ikaika lua ole.

            O keia kona wa i lalau aku ai i kekahi kaula ili nui e kaiewa ana iluna o ka pa, a me ia kaula ili oia i komo aku ai iloko o ka pa, a hele aku la iwaenakonu o ka pa, me kona akenui e hana i na mea a pau e hookoia ai o kona makemake.

            Me ka mama i loaa i kona mau wawae ke hole, a me ka ikaika hoi o ka ia uala o kona mau lima ke kowili i kana kipuka ili maluna o ka lio ahinahin.

            A me ka hala ole, ua noho pono aku la ke kipuka ili a ka opio ma ka a-i o ua lio ahinahina la, ka mea hoi nana i hooi ae i ke ahiu a me ka puiwa launa ole mai.

            Aka nae, oia mau oni ana, a me ka pakaawili ana io a ia nei, he mea makehewa wale no ia, no ka mea ua hoi hou mai ka ikaika hoohana iloko o na aakoko o ke Keikialii a oi aku mamua o ka manawa ana e noho pio ana.

            A oiai hoi oia e kupaka ana, o kona wa no ia i pili aku ai ma ka aoao, a me ka hikiwawe nui oia i lele aku ai a kau maluna o kona hokua me ka palamimo nui.

            A oia no kona wa i hookuu ae ai i kana paa ana i ke kaula ana e paa nei i ka a-i o ua lio la. A i keia wa no hei i hookuene pono iho ai ua keiki opio la iluna o ke kua o ua lio la.

            Na keia mea kaumaha e kau ana maluna o ke kua o ua lio ala, i hooi ae i kona huhu nui me ka weliweli pu hoi, e hiki ole ai ke manaoia e pakele kahi mea ola kino i kona huhu nui.

            A elike me ka weliweli o keia mau hana a ua lio la, pela i komo kiko mai ai ka manao hopohopo iloko o kona hoaloha, a hoomaka aku la oia e kauoha i kona mau alii koa, e komo iloko e hoopakele ae iaia mai ke kua mai o kela lio ahiu, a kona hoa opio hoi e pupue la i ke ki o ka paila.

            Aka, mamua ae nae o ko lakou komo ana aku iloko no ke kokua ana, aia hoi, ua hookahaha loa ia ko lakou naau i ka ike ana mai i ka mea i kauoha ia mai ai lakou e alualu aku, ua lehai aku la oia maluna o ka pa nona ke kiekie o 20 a oi anana.

            A iloko o ka imo ana a ka maka, na nalo aku la oia i ke ehu a ka ino e kamoe pololei aku ana mahope o ke alii powa a me kana pio pu hoi.

            I keia wa i puka mai ai o na leo hooho mai na koa a me na aliikoa pu hoi, me ka puana ana ae hoi me ko lakou mau leo e eaealo ana i ka lewa:

            Lilo ka opio e! Lilo ka opio e. A oia no hoi ka wa e kela a me keia e hooma – lo pono mai ai i ke kaulawaha o ko lakou mau lio, no ka hai ana aku mahope o ke alahele a ka opio i nalo mua aku la.

            Elike me ka manao maikai i loaa i ka haku o ke Kakela, e aahu kela a me keia i koua kapakila a me kana mau mea kaua, a e hahai kiko aku i ka opio i ole ai e poino kona ole.

            Elike me ka hikiwawe i loaa i kela a me keia, pela na mea a pau i haalele iho ai ia wahi me ka hookaulua ole, a o ka nekeke o na mea kaua, a me ke pohapoha o na kapuai wawae lio ka mea e lohe ia nei, a iwaena hoi o keia @ohai, aia no ka haku o ke Kakela, ke hookolo la mahope o ka meheu o ka opio ana i minamina ai.

            Hala ae la he manawa loihi o ko lakou hookolo ana mahope, aka, aole nae he wahi moali meheu i loaa ia lakou a pau,

            No keia nele ana, ua puuluulu ae la lakou malalo o kekahi ululaau, a hoakoa ae la i na opala wahie e loaa ana ia lakou, a puhi ae la i ke ahi, i kumu e ike mai ai ko lakou hoaloha opio.

            O keia ahi e ula wena nei o ke kuahiwi, ka mea nana i hoopioloke ae i na manao o ke alii powa, oiai no hoi oia e kuoe malie nei me kana pio no ka hoea aku i kona punana a ka ehaeha a me ke kaumaha i noho ai,

            Na keia mea i hoohikilele ae i kona manao, a hoomaopopo iho la oia, ua ike ia oia a me kana pio, a oia paha ola ke uh@ ia mai nei mahope.

            O keia no hoi ka wa i puhi ae ai ola i kana o-le, a wawalo aku la kona leo ma na wahi a pau oloko o ka ululaau, a i panai pu ia mai no hoi e na leo o ka o-le a kona mau koa omokoko.

            A iwaeua hoi o keia mau panai leo ana o na o-le, o kahi aliikoa pahaahaa kekahi e kukai pu nei ma ka leo hone o ka o-le.

 

LAWELAWE LIMA NA KOA NU IOKA ME NA MAKAI.

 

            Ma ka hora 4:30 o ka auina la Poaono nei, ua ulu ae la he haunaele mawaena o kekahi mau haole koa Nu Ioka me na makai, a e ole wale no o ka hoea ana ae o kekahi puulu makai mahuahua a me kekahi mau poe kokua mawaho aku nei i na makai, ke kumu i pau ai o ka hoao ana o na koa e hoopakele i ko lakou mau hoa.

            O ke kumu i ulu mai ai o keia haunaele mamuli no ia o ke kuai ana o kekahi mau koa ekolu i kekahi ipukukui helepo, a o ke aniani nae, aole i maopopo ka wa i naha ai a mamuli o ka ae ole o ka pake e hoihoi ia aku ua ipukukui la me ka uku ole ia o na poho, ua puhi ae la ka pake i ka ulili, a oia no ka wa o ka makai i komo mai ai a hopu iho la i kekahi haole, a oia no ka wa o kekahi mau koa elua i lele mai ai e hoopakele i ko laua kokookolu, aka, ua paa like aku la no nae laua i ka hopuia a laweia mai la no ka halewai

            Ma ke Sabati nei i hoea mai ai ka mokuahi hou o Poka ma, nona ka inoa o Mazama, he 9 la holo mai Kapalakiko mai.

            He 14 mau kanaka opio i lawe ia aku no ka halewai no ka hoohaunaele po ma ka waanao Sabati nei.

            O Manuokawai ka inoa i manao ia no ka mokuahi hou o Poka ma, i hoea mai la ma ke Sabati nei mai Kapalakiko mai.

            Ma ke kakahiakai o ka Poalima nei, ua halawai iho la me kekahi ulia poino he limahana no ka hale hana hao, a ua laweia aku oia no ka haukapila.

            Maluna mai nei o ke Kinau i loaa mai ai ka lohe no ka make ana o Alika K. Kaiwi, kekahi o na keiki puhiohe o ka Bana Lahui Hawaii, mauka o Olaa, i Puna, Hawaii, a e hoihoi ia mai ana kona kino wailua ma ke Kinau o ke Sabati ae nei. Aloha no ia Hawaii aloha aina oiaio i hala aku la.

 

Keaka Kikapu.

 

E hoomaka ana ma ka hora 8.

 

HIMENI MA NA HOOMAKEAKA

AOLE UKU! AOLE UKU!!

 

10 KENETA O NA NOHO.

E hoololi mau ia ana ka Paoa Kuhikuhii kela a me keia po.

 

KUAI HOEMI NUI O NA KINAMU, KALAKOA ME MAKALENA

 

            Na Kinamu Lilina e Kuai ia ana he 10, 12, 14 a me 16 i-a i ke 1.00

            Na Makalena Laalaau hou Loa he 6, 7, 8, 10 a me 16 i-a i ke 1.00

            Na Kalakoa Merimaka he 20 i-a i ke 1.00

            Na Kalakoa Amerika he 25 i-a i ke 1.00

            Na Ogandi ua hoemi i ia ke 20 keneta o ka i-a

 

            Eia makou ke kuai hoemi loa nei i na Waiwai a pau me ka nana ole ae i ka nui o na poho. Nolaila, e hele mai a e ike no oukou iho.

            BF. EHLERS & CO.

 

HE KUAI HOOPAU NUI LOA.

 

Lihilihi, Libine a me na Lole Aahu.

MA KAHI O

L. B. KERR

No Hookahi Pule Wale No.

            Na Ogandi Farani Ano Hou 5 keneta o ka i-a.

            Na Kalakoa Nainsooks, 5 keneta o ka i-a.

            Na Lole Keokeo o kela a me keia ano, he 5 keneta o ka i-a.

 

O Keia mau Waiwai he Emi

 

Nolaila, e komo mai, a e kuai no oukou iho.

            L. B. KERR.

Alanui Moiwahine. Honolulu