Ke Aloha Aina, Volume IV, Number 40, 1 October 1898 — Page 6

6                                  KE ALOHA AINA, POAONO, OKATOBA 1, 1898

 

HE MOOLELO WALOHIA

-----:NO:-----

ALANADELA

Ka Wahine Hoopahaohao o ka Aahu Keokeo-

-----A I OLE:-----

Ka Loea Hookani Pila o ke Kulu Aumoe.

            Aka, no kekahi mau sekona wale @o keia ike ana aku o na onohi ma@a o ke alii powa i keia wahine a ka @ni n@ e noho mai ana maluna o ka lala laau aia hoi, ua uhi hou mai ka pouli, a nalo aku na hiohiona @ani ana i ike ia ai he mau sekona mamua iho.

            Na kea mau hiohiona i hoopiha @ai i kona puuwai me ke pahaohao @oi, a pii ae la na nanaina nanakea @a kona mau papalina a haupu ae @a, aole keia he wahine kino kanaka aka, he uhane lapu ia no ka po, a lohe ia aku la kona leo i ka puana ana ae:

            E ka wahine a ka nani, ina he wahine oe i like me ko'u kino nei ke ano, he koko a he io, e lawe no au ia oe i moiwahine, a kahiko aku hoi me na aahu nani loa o ke gula a me ke dala, aka, ina oe he akua lapu o ka po, e kauoha no au i ko'u mau koa e alualu aku ia oe a hiki i kou lua kupapau, a hue ae i kou mau iwi i mau mea makaikai na na manu o ka lewa a me na holoholona o ke kula.

            A i keia manawa aia kona mau maka ke leha la no kahi ana i ike aku ai i ka wahine me ka aahu keokeo, me ka piha nauiki no ka owaka koke ole mai o na kukuna malamalama o ka uwila.

            A hala ae la he mau minute o kona kali ana, ua olapa hou mai la ka uwila me ka ikaika nui, a hoahuwale hou ia ae la ka helehelena o ka kaua Alanadela a me ka helehelena o ke alii powa, a ua halawai hou ae la ko laua mau onohi maka no ka lua o ka manawa.  A i keia wa no i komo aku ai na manao hoo hihi iloko o ka puuwai o ke alii powa, a lohe hou ia aku la kona leo i ka pane ana ae.

            E ka wahine ui no na helehelena nohea, ua piha kuu puuwai i ka hiaai nou, a ke hoomaopopo pu nei hoi au aole oe he akua lapu no i a po, aka, he wahine no oe i like me ko u ano.

            I keia wa no i uhi hou mai ai ka pouli, oia no hoi ka manawa i loheia aku ai ka leo kahea kapalili o ka ulili a ua alii powa la no k'a hoa koakoa ana mai i kona mau kanaka ma kahi ana e ku nei.

            Aka, aole nae ka kaua Alanadela i hookaulua iho i ka imi ana aku i kona wahi e pakele ai, nolaila, me ka ikaika nui ua paki mai la oia i kana pila napa maluna o ke poo o ka lio a ke alii powa e kau ana, a he mea oiaio, ua loaa pono aku la ke poo o ua lio la, a oia no hoi kona manawa i puiwa aku ai, a e like me ka mama i loaa i ua lio la, pela oia i kuu@au aku ai i ka holo me ka wili ana o kona poo

            Me ka eleu nui, kaohi mai la ua alii powa nei i ka ahai ana a kona lio, aka, aole nae he paa mai, a aia oia ke pulelo la iloko oia ino nui, me he pua la i hemo aku mailoko aku o ke kakaka a ke kanaka pana pua.

            I ka ike ana mai o na kanaka o ua alii powa ia i keia poino o ko lakou aoao, aole lakou i holo mai no ka hoakoakoa ana malalo o ke kumulaau elike me ka ulili kahea, aka ua alualu aku la lakou mahope o ko lakou hoku e ahai ia la e kona lio punahele.

            A i ka hoomaopopo ana iho o ka kaua Alanadela, aole he wa hou aku nona e hoohakalia ai, ua haalele koke iho la oia i ka lala iaau ana e noho ana, a iho mai la ilalo me ka puahi nui.

            Aka, aole nae oia i hookaulua iho no ka huli ana i ka pila hapa, oiai, ua komo mai la na manao hopohopo iloko ona, e hoohuli hou mai ana na powa i ka ihu o ko lakou mau lio no kahi a ke kumulaau a ke alii o na powa i ike ai iaia.

            Nolaila, me ka mama i loaa i kona mau kapuai wawae, ua kamoe aku la oia no kahi o ke alahele huna, a ka wai e lele mai ana mai ke kahi pali a kaua hoi i ike ai ma na helu i hala aku nei.

            Aole nae oia i hiki aku i ka hapalua o kona alahele, aia hoi, ua lohe ae la oia i na kapuai wawae lio e pohapoha mai ana me ka ikaika nui, a i kona wa i haliu aku ai no kahi o na leo pohapoha kapuai lio, oia no ka wa o ka uwila i anapu ae ai me ka malamalama nui, a hoahuwale ia ae la ua poe hololio nei.

            A oia pu no hoi kona wa i ike aku ai i ke alii powa e kuupau a@a i ka holo o kona lio no kahi o ke kumulaau, a mahope ona e ukali ana kona mau kanaka, a na'o hou aku la iloko o ka pouli.

            Ua hiki loa i ka kaua eueu ke lohe aku i ka leo hookina o ua alii la haawi ana i ke kauoha i kona mau kanaka no ka pii ana iluna o ke kumulaau ana i ike ai ia Alanadela, me ka mahui mua ole ae, ua puehu mua ka hulu.

            Ia manawa l ikeia aku ai, he umi mau kanaka i ka lele ana iho mailuna aku o ko lakou mau lio, a pii aku la noluna o ua kumulaau la a no kekahi mau minute ko lakou hoaa ana, ua loheia aku la ko lakou mau leo i ka hooho ana ae:

            E ko makou haku, aole he kino kanaka o luna o keia kumulaau, a ua kuhihewa paha oe : na lau laau he kanaka.

            Aole, aole loa au i kuhihewa, aka he wahine kino i kanaka no ka'u i ike iho nei nona na helehelena lua ole o ka ui, a he aahu keokeo hoi kona e komo ana, a ma kona uha e waiho ana he pila hapa.

 

Nuhou Kuwaho.

            KE KUHINA HOU O IAPANA MA WASINETONA.

            Iokohama, Sept. 11.  O Komura Juro, Hope Kuhina o na Aina E, a Kuhina o Iapana ma Seoul, Corea, oia ke pani aku ana ma kahi o Toru Hoshi ma ke ano Kuhina Noho ma Wasinetona.

 

HOOWELIWELI IA KEKAHI MAU LUNA AUPUNI.

            Kingston, Sept. 12.  Elike me na lono i loaa mai Barbadoes mai, mahope o ka make ana o Pilo, ka lunahoomalu o ka Ahaolelo, ma ka la 2 o Sepatemaba, ma o ka powa ia ana, ua hoike ia aku ka lohe i ke Kiaaina a me elima luna aupuni, e hoea like mai ana ia hopena maluna o lakou ma ke ano he uku makana no ka lakou mau hana hookaumaha.

 

            KE MAHUAHUA MAU LA KA HAUNAELE.

            Ladana, Sept. 13.  O ka mea kakau o ka Daily Mail, ua olelo ae oia.  O ka haunaele iloko o ke kikowaena o Kina aole hiki ia ke kue ia aku.  O na haunale ma Kainan a me ka apana o Kwangsi ua komo nui aku he mau tausani o na kanaka, no ke kue ana i ke alii Manchuria.

 

HE HANA PUUWAI ELEELE.

            Bridgeport, Sept. 13.  Ua loaa iloko o ka muiiwai Mill Pond ke kino make o kekahi wahine opio i pepehi hoomainoino ia, a hookomo ia iloko o kekahi pahu lole.  Eia na makai ke huli nei i ka meheu o ka limakoko.

            KA NUI O KA LILO O NA SEPANIA MA KEIA KAUA.

            Nu Ioka, Sept. 11.  O ka mea kakau o ka nupepa Herald ma Wasinetona, ua telegarapa mai nei oia penei:  Mawaho ae o ka lilo ana o kekahi panalaau a me ka poino ana o kekahi mau moku kaua ma ka hoouka kaua, o ka nui o na lilo ma ka aoao o Sepania ma keia kaua ana iho nei, aia no ia ma kahi o $374,000,000.  Ua loaa mai keia hoike i ke Keena Kaua mai na aliimoku mai o keia aupuni ma na wahi kuwaho.  O keia mau dala a pau na hoolilo ia aku ia no na huakai i hoouna ia aku ai i ka panalaau, no lakou ka huina o na koa he 180,431 koa 6,222 aliikoa a ma kahi o 700 Kenerala.  A he $5,600,000 wale no i hoolilo ai no ka hoomahuahua hou ana ae i kona ikaika kaua moana.

 

PIHA INAINA NA HUNEGARIA I NA ITALIA.

            Ladana, Sept. 13.  He lono kuikawa kai loaa mai nei mai Viena e hoike mai ana, ua hoopiha ia na Hunegaria me ka inaina i na Italia, mamuli o ka powaia ana o ka Emepera wahine, a na nui na hui kue i na Italia i hoala ia ae ma Treiste, a ua ulu ae he haunaele malaila, na hoike ia mai he eono poe i make, a  ua puka ae na pualikoa no ka hoomalu ana.

            Ms. Gratz ua liia he kanaka Italia kalewa mea ai, a ma Viena he 1,500 Italia i hoopau ia mai ka hana mai, i wahi e nui ole ai ka haunaele.  A o ke Kuhina Italia ma Viena, aia oia ke kiai ia la e kekahi pualikoa ikaika.

 

UA HULI HOI AKU LA O ADIMARALA CERVERA NO SEPANIA.

            Portsmouth, Sept. 12.  O ka hapanui o na koa marina a me na luina i komo pu ai ma kela poino i ili iho maluna o na mokukaua o Adimarala Cervera ma Santia go, ma ka la 3 o Iulai, ua laweia mai lakou mai ka mokupuni Seavey mai i keia kakahiaka no luna o ka mokuahi Kulanakauhale o Roma.  A ua kau pu aku hoi o Adimarala Cervera me kana keiki maluna ona.  O ka huina o na Sepania i lawe aku ai oia ma kahi no ia o 1,700.

 

KA MOKU LAWEKOA CHINA.

            Kobe, Sept. 9,  Ua hoea mai ka moku iawekoa China i anei ma ka po Poaha nei, aka, ua hookaulua iho oia maanei he hookahi hora wale no, no ke kali ana ia Kenera'a Green i k pa aku i Kioto  Ua holo pololei aku ka mokuahi China no Kapalakiko me ke ku ole ina Iokohama.

 

KA HAOLE HOOKALAKUPUA CARL HERTZ..

            Ua malamaia ae na hana hoikeike a Carl Hertz maloko o ka Hale Mele Hou ma ka Poalua nei, he nani a he ku i ke pahaohao kana mau mea i hoikeike mai ai, a o ka oi loa aku o ka nani oia no na holoholona like ole i hemo mai mailoko mai o ka halelana o Noa a me ke kane i hoopaa ia na lima me ke kaulahao i lilo i wahine i ka wa i uhi ia ai o kekahi paku lole.

 

E HOOLILO IA AKU ANA !

            He hookahi Moku Kiakahi nona ka loihi he 20 kapuai, laula o ka oneki he 7 kapuai a oi, me ke Kia a me na Pea a pau.  A i kupono loa i waapa lawaia.  E ninau ia

            J. J. DOWER.

            Ma ka Hale Kamana o ka Hui o Waila ma.     sept 29---1 wk

 

HOOLAHA PAPA AINA.

            Ke hoikeia aku nei ka lohe i na poe a pau, e noho ano ma ka lele o Auwaiolimu, e waiho nei ma Kakaako, he aina leialii hoi i lilo mai ia'u ma ka hoolimalima no 15 makahiki mai ka Moiwahine Kanemake mai Kapiolani.  Ua kapu loa ka hele ana a malama i na holoholona maluna o ua aina la, o ka poe he mau holoholona ka lakou e malama nei, e hookaawale koke aku iloko o 15 la mai keia wa aku, a ina aole pela, e hana no au elike me ke kuhikuhi a ke kanawai.  E hoolohe e na makamaka i keia, o poino auanei.  A ke papa pu ia nei hoi na ano kanaka a pau i ke komohewa ana maluna o ua aina la, a me ka pahale a'u e noho nei, a ae hookohu nei au ia Maikui i Hope no'u e hooko ai i na hana a pau ma ko'u inoa elike me ke kanawai.  D. KAHANU.

            Kakaako, Augate 29, 1898.

 

Na Palapala.

KA LA HANAU O LILIU MA KE KAHUA MA'I LEPERA.

MR. LUNAHOOPONOPONO:

Aloha Oe.

            E oluolu e hookomo iho i keia mau hua olelo e kau ae la maluna, ma kahi kaawale o kou kino lahilahi, oia hoi ka la hanu o Liliu.

            He oiaio, ua malama ia keia la me ka hauoli nui, ua aia mai ka Peresidena o ka Hui Aloha Aina a me kona mau hope a lawe ae la i ke kulana hookele o na hana o ka la me ka hauoli nui.

            Ponei na lealea i malamaia:

            1.         Heihei waa papa no na keiki liilii, aneane napawalu mile ka pahu holo, eo ia Palikapu, Sam. Kaleleku a me Kaleimanuia, makana, $2.00.

            2.         Heihei lio nunui, elua lio holo; no Kahue, no Luukie, eo ia Kahua, pahu holo aneane hapalua mile, makana, $3.00.

            3.         Heihei lio liilii, elua lio holo Jno. Bele a me Maka, eo ia Jno.  Bele, pahu holo eiike me na lio nunui, makana, $3.00.

            4.         Heihei Ekake, na nui na poe i holo, eo ia Naihe, pahu holo, oia ka hapalua o kahi i holo ia e na lio, makana.  $5.00.

            5.         Heihei alualu dala, ua waiho ia ilalo o ka lepo, lilo ia S. K. Mahi makana, $2.00.

            6.         Heihei kukini, no na poe nun@, eo ia Joe Kauhane, elua holoana, pahu holo, 120 i-a, makana, $2.00.

            He paani kinipopo ka panina o na hana o ka la mawaena o na hui o Kalaupapa a me Kalawao, ma ke ano lealea, eo ia Kalaupapa, aole nae i hoomaopopo ia ka nui o na holo, ekolu no komo ana.

            He aha mele manawalea kai manao ia e wehe ma ke ahiahi o ua la nei, aka, malalo o kekahi mau kuia i ike ole ia mamua, ua hoopaneeia a ke ahiahi Poaono, Sept, 3.

            Ua wehe io ia ka aha mele manawalea i ke ahiahi Poaono, no ka hanohano a me ka ihiihi o ka la i puka mai ai ka lei a ka lahui Liliulaniikekapu.  Ua hoopihaia ae ka Beritania Hall e ka lehulehu, ua kuupau ia mai na lealea like ole e mamae ai ka iwi aono, aohe wahi hoohalahala a ka manao e wae iho ai.  Ua piha hauoli ke anaina i akoakoa ae ma ia po, a piha aloha pu no hoi i ka lawe ia ana mai o na na himeni hoonaue puuwai, no ke ano o ka laweia ana o ko kakou aupuni a me ka pio ana o ka Hae Hawaii.

            Aole i pau.

 

            Maluna mai o ka Auseteralia e hoea hou mai ai na keiki Hawaii i holo aku ai maluna o ka Hoku Ao, i Honolulu nei mai Kapalakiko mai.

            O ka Mikahala ke holo aku ana ma na awa o ka Mauna Loa, a e haule iho ana hoi ka Mauna Loa no ka hoomaemae ana a ma ka la 10 o Okatoba e hoomau aku ai oia i ka holo ana ma kona mau awa.