Ke Aloha Aina, Volume IV, Number 40, 1 ʻOkakopa 1898 — Page 1

KE ALOHA AINA

 

BUKE IV.

HONOLULU , POAONO, OKATOBA 1, 1898.

HELU 40

 

KA NUPEPA KE ALOHA AINA

E hoopuka mau ia aku ana mai ka Poakahi a ka Polima o na pule a pau o kela a me keia mahina.

 

Ka Uku Pepa, he 20 keneta o ka pule.  No ke kope hookahi, he 5 keneta.

 

E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.

 

E pai ia no na Olelo Hoolaha, na Kanikau a me na Mele Inoa, me ke Dala kuike.  Aole nupepa ma ka owili pakahi e hoouna ia ke ole e hookaa mua ia ka uku pepa

 

E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

 

Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.

 

Ka Nupepa Puka Pule

Ke - Aloha - Aina

                                                Hookahi makahiki.....................$2.00

                                                Eono mahina...          ................$1.00

                                                Ekolu mahina............................    .50

                                                Hookahi mahina........................    .20

                                                          EMMA A. NAWAHI.

                                                                      Puuku o

                                                                Ke - Aloha - Aina

                                                           EDWARD L. LIKE.

                                                     Lunahooponopono a Hope Puuku

                                                               S. P. KANOA.

                                                         Hope Lunahooponopono.

O na kauoha Nupepa me na hookaa Dala, e hoona pololei mai i ka Puuku ma Honolulu.

 

Nuhou Kuwaho.

  Maluna mai nei o ka mokuahi Coptic i loaa mai ai ia makou na nuhou hope loa, a no ka pomaikai o ko makou poe heluhelu ke hoopuka aku nei makou me ka hookaulua ole penei:

 

POWAIA KA EMEPERA WAHINE O AUSETURIA.

  Geneva, Switzerland, Sept. 10.

  Ua powaia ka Emepera wahine o Auseturia, ma kahi kokoke i ka Hotele Beaurivage ma keia auina la, e kekahi ana kia nona ka inoa o Luigi Laochini, ua paa i ka hopuia.  E hele ana ka Emepera Wahine no kahi o ka mokuahi e ku ana me kona ukali, a oia no ka wa i holo mai ai o kekahi kanaka a hou iho la ma ka aoao hema o kona umauma kekahi mea oolea i manaoia he paila.

  He uuku loa ke koko i kahe mai, a ua hoomau aku la no hoi ka moiwahine no ka iho ana no ka moku, aka, i kona hiki ana aku iluna o ka oneki, ua maule iho la oia, ua haalele koke iho la ka moku i ka uwapo, aka, mamua o ke kaawale loa ana aku, ua ikeia iho la aole e ola ana ka Emeperese, a nolaila, ua hoi hou mai la ka moku, a hoihoi ia aku la oia no ka hotele, a malaila i lele ae ai kona aho.

 

NUI KE KAUMAHA O NA HUNEGARIA.

  Budapest, Hunegaria, Sept. 10.

  O ka nuhou e pili ana no ka powaia ana o ka Moiwahine o Hunegaria a Emepera Wahine o Hunegaria, ua loaa mai ia me ke kaumaha nui.  Ua ikeia aku na kane me na wahine e uwe ana ma na alanui.  A e ikeia aku ana na hae e hapa ana ma na alanui a pau.

 

PAKELE KE OLA O KA MOI O RUSIA.

  Nu Ioka, Sept. 7.  Ua loaa mai nei he lono telegarapa i ka nupepa World mai Ladana mai, e olelo ana:  He lono kai hoike ia ae maanei no kekahi kumu i hoolala ia e lawe i ke ola o ke Za o Rusia ma Moscow, ma kela pule aku nei.  Oia ka hoopahu ana i kekahi hale e ku ana ma ke alanui a ke Za e holo mai ai, a mai na apana laau e lele aku ana mai ka hale i hoopahuia e hoopoino i ke Za.

  Mahope o keia hoailona ana ua haule aku ia Alexander Kolanoff e hooko i keia hana.  Iloko o kona pioo nui, ua kuhihewa iho la oia i kekahi ukali o ka moi me kana wahine e maalo ae ana o ke Za ia, oia no kona wa i hoopahu ae ai i ka hale.  Ua make ua ukali la me kana wahine, a ua kukonukonu hoi na palapu i loaa i ke kalaiwa, a mawaho ae o lakou he kanakolu a oi aku poe i hoeha ia.  Ua loaa aku ke kino make o Kolanoff iloko o na apana laau, a he iwakalua minute mahope iho oia manawa, ua maalo ae la ke kaa o ke Za me kana aliiwahine malaila.  He nui na poe o Moscow, aka, ua hookapu ia nae na nupepa Rusia I ka hoopuka ana ae ia mea.

 

HOAOIA E LAWE I KE OIA O KA EMEPERA O KINA.

  Iokohama, Sept. 14.  He telegarapa kai loaa mai nei mai Seoul mai, e hoike mai ana o ka moi a me ka hooilina alii, ua loaa laua i ka ma'i mahope o ka paina awakea a ua manaoia na hanai ia laua me kekahi laau make.  He umikumamakahi poe o ke aloalii i hopu ia.

  Seoul, Corea, Sept. 16.  Ua hoike ia maanei he luna aupuni kiekie o ka halealii, no ka inoa o Ko, ua mihi ae oia no kona kauoha ana i ke kuke o ka halealii e hookomo i laau make iloko o na mea ai a ka Emepera a me ka hooillna alii, a na loaa like hoi laua i kekahi ma'i ikaika loa ma ke Sabati nei.  Ua hoomau aku ua luna aupuni la, o keia hoolala na kekahi unuhi olelo no ia e no ho ana ma Rusia, i lilo i punahele mamua, aka, i keia wa ua hoohaahaa ia.

 

HE MAKANI INO NUI.

  Ladana, Sept. 13.  He lono kai loaa mai nei i keia po, e olelo mai ana, ua hoea ae la kekahi makani iho weliweli loa ma Bardodoes, ma ka aoao makani o na mokupuni o Lesser Antilles.  He elua haneri a oi poe i hoeha ia a he 40,000 i hooneleia i na home.

 

 

 

POHA HOU KA PELE O KA MAUNA VESUVIUS.

  Napela, Sept. 15.  Eia o Mauna Visuvius ke hoike hou mai nei i kona nani mahope o koua nalowale ana mai ka 1872, mamuli o ka poha hou ana ae la o ka pele.  O ka lua iwaenakonu a me kekahi mau lua hou, aia ia ke luai la i ka pohaku pele a me ka lehu, aia he ekolu mau mana pele e iho la ma ka aoao o ka mauna, a ke uhi la hoi i na ululaau ma ke kahua o Mount Somna, a ke kokoke aku la i ka hale kilo o na mea kino lani, ua hoopoino ia ke alahao, a ke hooweliweli la i ka halekoa o na Carbineers.

 

NA MOKUKAUA AMERIKA NO MANILA.

  Nu Ioka, Sept. 14.  Ua telegarapa mai nei ka mea kakau o ka nupepa Herald mai Wasinetona mai.  Ua hoike mai o Kuhina Long ia'u i keia la, o na mokukaua Iowa a me Oregona eia laua malalo o ke kauoha no ka holo ana aku i Manila ma ke alahele aku o Honolulu, no ka hoomahuahua ana aku i ka ikaika kaua moana malalo o ke alakai  ana a Adimarala Diuwe.

 

PIO MAI I NA LAWEHALA.

  Candia, mokupuni o Crete, Sept. 13.  Ua hoopuka ae la o Adimarala Gerald Noel, ka alihikaua mui o na mana kaua o Beritania Nui ma na wai o Crete he kauoha i keia la, he kauoha hope ia Edhem Pasha, ke kiaaina kaua o Tureke ma Crete, e koi aku ana iaia maloko o 48 hora e haawi pio mai ai oia i na alakai o ka haunaele i ulu ae nei a me na poe i luku wale ia, e haawi pio mai i ka papu a me ka pakaua e hoomalu ana i ke taona, a e lawe mai i na lako kaua mai na pualikoa Mussulman mai.

 

HE MAU PAUAHI NUI.

  Vancouver, Sept. 11.  Eia ke kulanakauhale o New Wistiminster he luahi nui na ke ahi, a eia hoi kona mau kupa ke aea hele nei ma na alanui me ke kaumaha.  Ua oili he ahi ma ka hora 11:45 o ka ponei, a mamuli o ka ikaika o ka makani, ua anai aku la ia mai kahi ku moku aku a hiki i ke alanui Royal, a he nui hoi na hale i pau i ke ahi.  Ma kahi o $2,500,000 ka nui o na poho.

 

  Prescott, Sept. 11.  O kahi hoahu nui o ke keleawe ma ka honua nei, a koe paha o Anaconda ua lilo ia he puu lehu i keia po, a he 3000 poe i hooneleia me na home, a ma kahi  o hookahi miliona dala poho ka nui o na waiwai i hoopoino ia e ke ahi.

  Ua hoomaka ka a ana o ke ahi ma ka hora 7 o ke kakahiaka a pio ma ka hora 10, he 11 i hoomaopopoia ua make a he 15 poe i nalowale.

 

HE 10,000 I PAU I KA MAKE.

  Ladana, Sept. 10.  O ka nui o na poino ma ka aoao o na Beritania ma ka hoouka kaua o Omdurman, he 23 aliikoa me na kanaka i make, a mailoko mai o keia huina he 19 no ka puali I, he iwakalua kumamakahi a me 99 poe i hoehaia.  He umikumamalua mau aliikoa Beritania i hoehaia.  o ka hae Beretania a me ka hae hoaka o Aigupita, ua hukiia ae la ia maluna o ka halealii ma Khartoum.  Ua telegarapa mai o Sir Herbert Kitchener, o ka nui o na make ma ka aoao o na Dervishes he 10,000, na poe i hoehaia he 1000 a o ka nui o na poe i hopu pio ia he 3,000 ma ke kahua kaua o Omdurman.

 

LUKUIA NA POE KARISTIANO.

  Ladana, Sept. 12.  O ka mea kakau o ka nupepa Times, ua kakau mai nei oia mai Candia mai, he 800 poe Karistiano i luku ia, a ua haowaleia ke taona e na poe Bashifazouks.  Ua ikeia aku na pualikoa Tureke e kipu ana i na Beritania.  He elua haneri me kanalima koa Borderes a me hookahi puali kauka i haalele aku la ia Malta no Crete.  Aia pu he ewalu mau mokukaua mamua o Candia ke ku makaukau la no ke kipoka aku i na lakou e makemake ia.

 

KA HAUNAELE MA CRETE.

  Ladana, Sept. 9.  He iwakalua koa a me na luina Beritania i make ma Candia, a he kanalima i hoeha ia, mai na poe hoohaunaele Mussulman mai i kipu mai ai mailuna mai o na hale.  O ka Hope-Kanikela Beritania, ua make oia maloko o kona hale mamuli o ka ho-a ia ana o ka hale i ke ahi.  A ke hopohopo ia nei he lehulehu wale na poe Karistiano i make.  He elua pualikoa o ka regimana Dorsetshire mai Malta mai i hoouna ia aku no Crete a aia hoi na mokukaua ke hoolele la i ko lakou mau pualikoa no uka o ka aina.

 

NUI KA WELA O KA LA.

  Hongkong, Sept. 12.  He ekolu poe i make mamuli o ka wela o ka la ma Hongkong.