Ke Aloha Aina, Volume IV, Number 38, 17 September 1898 — Page 1

KE ALOHA AINA

 

HOOKUMUIA I MEI 20, 1895

BUKE IV                   HONOLULU, POAONO, SEPATEMABA 17, 1898.                                 HELU 38

 

KA NUPEPA KE ALOHA AINA

_____

E hoopuka mau ia aku ana mai ka

            Poakahi a ka Polima o na pule a

            pau o kela a me keia mahina.

Ka Uku Pepa, he 20 keneta o ka

            pule. No ke kope hookahi, he

            5 keneta.

 

E loaa no ka pepa maike Keena

            aku o KE ALOHA AINA,

            a mai ka lima aku o na Luna Lawe

            Pepa.

 

E pai ia no na Olelo Hoolaha, na

            Kanikau o me na Mele Inoa, me

            ke Dala kuike. Aole nupepa ma

            ka owili pakahi e hoounaia ke

            ole e hookaa mua ia ka uku pepa

E hoouna pololei mai i na Nuhou

            na Kumumanao.  na Olelo Hoo-

            laha, na Kanikau a me na Mele

            Inoa i ka Lunahooponopono o

            keia Pepa.

 

Aole loa e hoopuka ia a hoolaha ia

            kekahi manao ma na kolaum o

            keia Pepa, malalo o kekahi inoa

            kapakapa ke ole e hooike mai i

            ka Lunahooponopono i kona

            inoa ponoi.

 

Ka Nupepa Puka Pule

 

Ke - Aloha - Aina

 

Hookahi makahiki ……….$2.00

Eono mahina ……………$1.00

Ekolu mahina……………    .50

Hookahi mahina …………   .20

 

EMMA A. NAHAWI.

Puuku o

Ke - Aloha - Aina.

EDWARD L. LIKE.

Hope Lunahooponopono.

 

O na kauoha Nupepa me na hoo-

kaa Dala, e hoona pololei mai i

ka Puuku ma Honolulu.   

__________________________________

 

Nuhou Kuwaho.

_______

 

            Maluna mai o ka mokuahi Belgic o ka Poaono nei, i loaa hou mai ai no ia makou na nuhou o na aina mamao, a no ka pomaikai o ko makou poe heluhelu, ke hoopuka aku nei me ka awiwi penei:

 

ANEANE I KAU WAHI O KA HOOKAHE KOKO.

            Parisa, Sept. 2. Eia ke hoomaopopo loa ia nei e ulu mai ana he kaua mawaena o Rusia a me Beritania Nui, a o na hoopaapaa ana no ka hihia o Dreyfus e hookomo aku ana ia Geremania a me Farni iloko o ke kaua.

E HOOUNA IA AKU ANA NO PILIPINE.

            Madarida, Sept. 2.  Ua loheia mai i keia po, ua hoopuka ae la [column 2] ke aupuni o Sepania he kauoha no ka hookoakoa ana i pualikkoa 110,000 kanaka no ka hoouna ia ana aku i Pilipine.

AIA NO KE HOOMAU LA I KA HAKAKA ANA.

            Manila, Sept. 2.  He mau moku i piha me na koa kipi kai komo aku ma na mokupuni hema me ka hao wale ana i na mea a pau e hiki ai ke loaa he kulana no ka noho maluhia ana.

E HOOPUIPUI HOU AKU ANA I KONA MAU MOKUKAUA.

            Wainetona, Sept. 1.  He eha mau hui kapili moku i waiho aku i ka lakou mau koho ana no ke kukulu ana i ekolu mau mokukaua hakaka hou i hooholo ia e ka Ahaolele.

            O keia malalo iho ke koho a kela a me keia hui no ka uku o ke kukulu i hookahi mokukaua:  Hui Kapili moku o Newport News, $2,580,000, Cramps, Piledelapia $2,650,000, Union Iron Works, Kapalakiko, $2,764,000 Dialogue & Co., $2,840,000.

 

E HOOKUU IA ANA NA PIO SEPANIA.

 

            Wasinetona, Aug. 31.  Ua hoopuka ae o Kuhina Allen no ka Hookuu ana ae i na pio Sepania a pau o kela hoouka kaua moana o ka la 3 o Iulai i hopu pio ia o i a mokukaua o Adimarala Cervera.   E hoihoi ia aku ana lakou no ko lakou mau home malalo o na lilo o ke aupuni o Sepania.  A oia hoi ka aelike i hookuu aku ai ke aupuni o Amerika Huipuia. A ua haawi ia mai hoi ka mana ia Adimarala Cervera e kona aupuni no ka hoomakaukau ana i mau moku no ka hoihoi ana aku i na koa, e hoi like aku ana no na alii a me na koa.  Ua manao ia ua hala aku la o Kapena Eulate i Nu Io ka no ka nana ana i na mokuahi Sepania e ku nei malaila

EIA NO KE HOOMAU IA LA KA HAUNAELE.

            Ladana, Aug. 31.  He lono kai loaa mai naei i ka nupepa Daily Mail, mai Manila mai, no ka la 27 iho nei o Augate, e olelo ana:  O na wahi a pau mawaho aku o Manila, aia no ia iloko o [column 3] ke kulana haunaele.  Aia na poe kipi ke haowale la i na waiwai o na Sepania, ke komo la hoi lakou iloko o na kulanakauhale no ka hao aha, a pela pu hoi i ua kaa a me na lio.

LOAA KA POMAIKAI I KEKAHI HAOLE O HONOLULU NEI.

            Seattle, Aug. 28.  I keia kakahiaha nui i hoea mai ai o ka mokuahi South Portland, a oia hoi ka mokuahi hope loa i huli hoi mai ke akau o ka puuiu mokuahi o Alaska, a maluna ona i huli hoi mai ai he 125 poe eli gula o Kolonadaika me na lepo gula o $200,000 ka waiwai io, a me kekahi puu dala o $100,000 iloko o ka pahuhao a ke kuapkako.

            O ke kanaka waiwai loa maluna ona, oia no George Otterson o Honolulu. Ua holo aku oia i Alaska he makahiki a oi i hala ae nei. I kona hiki ana malaila, ua kuai aku la oia i kakahi mau kuleana, a loaa iho la iaia kekahi kuleana maikai ma Bononza.

            Malaila oia i hana ai a hiki i ka pau ana o keia kikina hana o keia makahiki, a ua loaa hoi iaia he $80,000.

            Ua hopohopo o Otterson no kona powa ia, nolaila, ua hoomakaukau oia no ke kue ana aku. Ua makemake oia e nalo oia, nolaila, ua kau aku la oia maluna o ka mokuahi Sovereign ma ke ano he kokua wiliki.  A o kana huakai loihi a hiki i St. Michael, ua kiai makaala aku oia maluna o kona waiwai.

__________

            Ua ikeia o Otterson ma Honolulu ma ke ano he wiliki no ke kao eli awa.

 

KA MOIWAHINE OPIO O HLANI.

            The Hague, Aug. 31.  O keia ka la hanau o ka Moiwahine Wilhelmina Helena Paulina Maria, ka la hoi i lawa pono ai kona mau makahiki no ka lawe ana ae i ka mana o ke aupuni, ua pii ae oia maluna o kona nohoalii, a ua pau iho la hoi ka noho ana o kona makuahine i kahu aupuni.       

            [column 4]

KA LAWE IA ANA O HAWAII.

________

( Mai ka nupepa Argonaut mai.)

 

(Hoomau ia)

 

            A o na poe kakau o na nupepa i kokua ikaika iho ai i ka hoohui aina, ua hooku@ia ia mai lakou me keia haawina kaumaha.  O.W.D. Dessler, he mea kakau nupepa, ua kakau aku oia i ka Examiner, e olelo ana: "No na kanaka Hawaii, aole he lehulehu i hele mai i ka hoolewa o ko lakou hae. O na poe kakuikahi i hele mai, he hapanui oia he poe paa oihana.  O ke kanaka Hawaii koko piha ua ikeia kona kaawale ana mailaila aku.  O na Hawaii a me kekahi mau Amerika no i hoolilo ia mau mokupuni i home no lakou no kekahi mau makahiki, ua haalele iho ia Honolulu ia la a i ole ua noho ma ka malu o ko lakou mau home."

            O Mabel Crafat, he wahine kakau nupepa, ua kakau aku oia no ke Karonikala, he wahaolelo pu no ka hoohui aina, e olelo ana:  "Aole ia he wa no ka hauoli.  I ka wa i pau ae ai ua holoi ae na wahine Amerika i ko lakou mau maka, a o na kane  i hooikaika no ka hoohui aina, ua olelo ae me ka haalulu ana o ko lakou puu, "He nui ke kaumaha." No na kanaka Hawaii, aole lakou malaila.  Ua pani ae lakou ia lakou iho iloko o ko lakou mau home. He kakaikahi loa mamua o ka Hale Mana Hooko.  O ka hana i lawelaweia ua oi loa aku ka like me ka hoolewa mamua o ka aha lealea. He mea waiwai ole ka hoole ana ae, ua lawe mai kakou he wahine mare@i ae ole mai O ka wahine Hawaii wale no maluna o kahi i hookiekie ia, o ia ka wahine a kekahi lolo, ua kau ae oia i kona poo iluna, a hiki i ka wa i paani ia mai ai e ka bana Hawaii o ka mele lahui no ka manawa hope loa.  I ka leo mua ua huua ae la oia i kona maka me ka peahi, a hiolo malie iho la kona mau waimaka.  Aole oia i ike i ka Hae Hawaii i kona iho ana aku no ki wa hope loa.  O na Hawaii iloko o ka laina o na Koa Lahui ua uwe ake ae."

            O Alice R@x, he wahine kakau nupepa, ua kakau oia i ke Call me [column 5] ka olelo ana:  Maluna o kahi i hookiekieia aole he mau Hawaii koe wale no na kanaka e paa ana i na oihana aupuni na ia mea i onou aku ia lakou e hiki ae malaila.  Maloko o ke anaina ua uwe ae na Hawaii kakaikahi i ka wa e malamaia ana o na hana.  Ua iho mai ka Hae Hawaii @aluna o ke kaula.  A waiho iho la iluna o ka mauu ma ka aoao o ke-alanui pii e ka halealii.  I ka pau ana o Hawaii Ponoi, ua kani mai la ka o-le kanikau maluna o ka lua kupapau o ka Hae Hawaii."

            O na mea a pau e pili ana i ka hukihae ma Honolulu aole he hookahi mea i ikeia e like me ka hukihae ma Santiago. O na aliikoa Sepania i uwe ai ma Santiago, aka, he mau waimaka nae ia no na koa wiwo ole, a aole lakou i lawe mai i ka hilahila maluna o na koa i oi ae ka wiwo ole o ko kakou lahui ponoi i huki ai i ka hae Sepania ilalo, aka o na waimaka nae o na Hawaii aloha oluolu, a nawaliwali, nona kahi aupuni uuku i omo ia mai la e kakou, he awahia loa ia mamua o na waimaka o na Sepania i pio ai ma Santiago.  E manaolana kakou aole lakou e hana mai ana i kekahi mea e walania ai a oluolu ole ka luna kehala o na Amerika.

____________________

 

KA HALE HOLOI LOLE MAHU O IWILEI.

____________

           

            O ka aelike no ke kukulu ana i ka hale holoi lole mahu makai o Iwilei, ua lilo aku la ia ia William Wagner ma ka hora 2 o ka auina la Poaha nei, a eia ke hoomaka koke ia mai n@i ka hana ana me ka makaukau mua, no ka hoea mai o na mea paahana mahu, maluna mai o ka moku kalepa, W. G. Irwin, e hoea mai ana i Honolulu nei mai Kapalakiko mai iloko o keia mau la iho.  Eia ka noho Luna nui ana hale hana hou malalalo o E.C. Wis@on. O keia aku ana paha kekahi o na hana ano hou e lawelawe ia aku ana malalo o ka hoohana ana a mahu he hoike ana mai no hoi he lahui holomua no keia ma na ano a apau.