Ke Aloha Aina, Volume IV, Number 33, 13 August 1898 — Page 1
| This text was transcribed by: | Nadine "alohatita" Samorano |
| This work is dedicated to: | Ana & Kahala Bishaw |
KE ALOHA AINA
HOOKUMUIA I MEI 20, 1895
BUKE 1V. HONOLULU, POAONO, AUGATE 13, 1898. HELU 33
-----
KA NUPEPA KE ALOHA AINA
E hoe puka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loe e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pula
Ke Aloha Aina
Hookahi makahiki ... $2.00
Eono mahina ... $1.00
Ekolu mahina ... .50
Hookahi mahina ... .20
EMMA A. NAWAHI.
Puuku o
Ke Aloha Aina
EDWARD L. LIKE.
Lunahooponopono a Hope Puuku
S. P. KANOA.
Hope Lunahooponopono.
O na kauola Nupepa me na hookaa Dala, e hoona pololei mai i ka Puuku ma Honolulu.
-----
Nuhou Kuwaho.
Maluna mai nei o ka mokuahi Warimu a me ka moku lawekoa St. Paul, i loaa mai ai ia makou na lono hope loa, a no ka pomaikai o ko makou poe heluhelu ke hoopuka aku nei makou me ka awiwi nui, penei:
NUI KA MAI O NA KOA.
Wasinetona, Iulai 28. I keia po, ua hoopuka ae ke Keena Kaua, i keia mau olelo malalo iho:
Santiago, Iulai 28. O ke kulana o ke Kenerala Aukukana, o Amerika Huipuia ma ka la 27: O ka huina o na poe mai a pau, he 4,122, na poe mai fiva he 3,193 na poe mai hou he 822, a he uuku na poe make.
EIA HOU AKU NO A HOEA MAI.
Kapalakiko, Iulai 28. O ka puali Ehiku o Kaleponi, ka regimana e holo aku ana ma keia huakai aku. I keia wa i hookomoia ai o keia regimana no loko o ka hana e Mekia Kenerala Meriama, ka mea e hoomalu ana i ke Keena Poo ma Kaleponi, a o kana kauoha e hoopuka ai, aohe mea nana e kapae ae ma Kapalakiko. Ua manaoia maluna o ka mokuahi Scandia a i ole o ka Arizona lakou e hookau ia aku ai maloko o 10 la.
UA MAKE KA KE KEIKIALII BISIMAKA.
Ma ka hoea ana mai nei a ka mokuahi Warimu i ke kakahiaka Sabati nei, i loaa mai ai o ka lono o ka make ana o ke Keikialii Risimaka, ua kanalua loa keia lono, aka, ua hooiaio ia mai nae ia e na ohua o ka Warimu. O keia lohe i loaa mai ai mai Vitoria mai no ia, ke awa hope loa ana i ku ai, a oia keia mau olelo malalo iho na olelo i hoopukaia ae no ke Keikialii Bisimaka:
O ke Keikialii Otto Von Bisimaka, nona na makahiki he 83, i ike ia e ka honua holooka, e like me ko Pohakuhauoli ikeia a i ole e like me ko ka MNoiwahine Vitoria ikeia. No ka la 31 o Iulai keia lono, aka, o na lono nae o ka la 29 aku e hoike ana i ka loaa ana o ka oluolu maikai ia Bisimaka penei:
Hamburg, Iulai 29. Ua loaa mai nei he lono i ka Nachrichten mai Freidrichsruhe e hoike ana, ua paina ahiahi pu ae ke Keiki alii Bisimaka ma ke ahiahi onehinei, a o Kauka Schwernger, ko ua kuaka pili kino, ua haalele iho la oia ia Friedrichsruhe i ka po nei.
KOKOKE E ULELE HAKAKA.
Nu Ioka, Iulai 28. He lono kai loaa mai nei mai Colon mai, e olelo ana: O ke kumuhana e pili ana no Cerrutti eia ia iloko o ke kulana kupilikii. He ekolu mokukaua Italia eia mamua o Carthagen, a ua loaa mai ke kauoha i ka Adimarala Italia no ke kipoka ana aku i ke kulanakauhale. Ua manaoia e komo mai ana o Beritania Nui a me Amerika Huipuia mawaena.
AOLE E HAAWIPIO IA PORTO RICO.
Ladanu, Iulai 29. Ua olelo ae ka mea kakau o ka Daily Mail ma Madarida: E hakaka ana ke Aupuni Sepania a hiki i ka hopena no ke kue ana aku i ka haawipio ana ia Porto Rico ia Amerika Huipuia. Ua oiao lakou pono e ike ua lilo kekahi mokupuni o Pilipine mamua o Porto Rico.
KIPOKA IA O TUNAS DE ZAZA.
Havana, Iulai 28. He elua mokukaua Amerika i kipoka mai ia Tunas de Zaza, ma ka hora 9 o ke kakahiaka o ka la 26 o Iulai, aka, ua haalele iho nae laua mahope o kekahi mau kipoka hahana ia ana aku e na batari Sepania. He kanakolu minute ka loihi o keia hoouka kaua ana. He 300 ka nui o na poka i ki ia, a ua hoopoino uuku ia kekahi mau hale. Ua hoohauoli ia na pualokoa Sepania. O ka nui o na koa Sepania he elua i hoeha a me ekolu i loaa iki he mau palapu malani loa. Ua lele aku na poe Amerika ma Palo Alto, a huipu aku la me na poe kipi ma ka lele kaua ana i ke towera haawi hoailona e kokoke ana i kahi taona o Arroyo Blanca.
-----
KA PERESIDENA NUI O NA WAHINE.
Maluna aku o ka mokuahi Aorangi o ka auina la Poaha, i kau aku ai ka Peresidena Nui o ka Hui Aloha Aina a na Wahine, Mrs. Kuaihelani Campbell, i ukali ia e kana kane a me ka laua mau keiki, no ke alahele ma Victoria ae no Kaleponi, no ka hoihoi ana aku i ka laua mau keiki no ke kula mamua ae o ka manawa maa mau. E hala ana iaia a me kana aliikane, he mau mahina elua a ekolu paha mamua o ka huli hoi ana mai i ke one hanau o ke kupuna. O ka makou e kalokalo ae nei, e hahai ia kana huakai e na ulia o ka pomaikai, a hiki i kona hehi hou ana i ka aina nei, a ma ke alahele laula o ka moana, e hamau na leo kupikipikio o na ale, a oki hoi ke kipehi ana o na hunakai eoeha ili maluna ou. Ke Pahola aku nei makou ma ka aoao o ka kakou wahaolelo i ke aloha a nui.
NA HOAILONA O NA ALIIKOA.
No ka pomaikai o ko makou poe heluhelu ke hoike aku nei makou i ka hoailona o kela a me keia alii o luna o na mokukaua a me na pualikoa, a ma ia mau hoailona e maopopo ai ko lakou kulana mai ke kiekie a ka haahaa, a o keia mau hoailona malalo iho e ikeia ana ia maluna o na poohiwi o kela a me keia alii.
Na hoailona o na aliikea aina:
Kenerala, he palekaua mawaena o elua hoku; Lutanela Kenerala, he hookahi hoku nui a me elua hoku liilii; Mekia Kenerala, lua hoku Birigadia Kenerala, hookahi hoku; Konela, manu aeko, Lutanela Konela, elua lau dala; Mekia elua lau gula, Kapena elua kaha ma kela a me keia aoao o ka hoailona; Lutanela Ekahi, he hookahi kaha, Lutanela Elua, aole kaha.
Na hoailona o na alii kaua moana;
Adimarala, elua hoku iwaena o ka heleuma me kela a me keia aoao o ka hoailona, Hope Adimarala, heleuma mawaena o na hoku elua a o ke kolu o ka hoku maluna pono o ka heleuma; Ria Adimarala, heleuma mawaena o elua hoku; Komodoa, hoku mawaena o elua heleuma; Kapena, manu aeko mawaena o elua heleuma, Kapena Alakai, heleuma mawaena o elua lau dala, Kapena Lutanela, heleuma mawaena o elua lau gula; Lutanela, heleuma mawaena o elua kaha ma kela a me keia aoao, Lutanela Elua, heleuma mawaena o hookahi kaha ma kela a me keia aoao; Alii Hukihae hookahi heleuma.
-----
HOOPOINO IA E KE OLAI.
Vaparaiso, Iulai 24. He hoonaueue olai kai ike ia ma Concepion, ke kapitala o kekahi apana o Kil@ he nui na hale i pau i ka hanee, a o na uwea uwila a me na uwea te-telegarapa ua hoopoinoia. Ua nui na kauaka i haalele aku i ko lakou mau home a hoohaia iho la i ke koena oia po iwaena o na kahua akea. He lehulehu na hoonaueue olai i ikeia.
-----
KA MOKU LAWE KOA ARIZONA.
O ka mokuahi lawekoa Arizona e kipa mai ana oia ianei ma kona alahele no Manila, oia ka mokuahi nui hookahi e holoholo nei maloko o ka Moana Pakipika. He mau kapuai hou aku kona loihi i ko ka mokuahi Kina. O ka Arizona i na la i hala aku la oia kekahi o ka laina mokuahi, o Guion, a e holo ana ma ka Moana Atelanika. He hoahanau oia no ka mokuahi Alaski i hookiu ai me kekahi moku lawe nanahu a piholo, ke kaupu hehi ale oia mau la i aui aku la. Mai ko ka Arizona kapili ia ana a hiki i keia wa, he hookahi wale no ona manawa i halawai ai me ka ulia poino, oia hoi kona hookui ana me kekahi ahua hau e lana ana iluna o ka moana, a ua hoopoino ia kona ihu. He moku holo loa oia, a ua kapili ia ma Clyde. Ua hiki hoi iaia ke lawe he 1,500 koa.
KUPANAHA NA HANA A KE AKUA.
Mamuli o ka lokomaikai o ko makamaka J. B. D. Kuakahela, kekahi keiki papa o na Kona kai opua i ka lai, ua lawe mai la oia i kekahi mea hou no ka hoea ana mai o kekahi keiki kupanaha mailoko mai o ka puhaka o kekahi wahine, a penei ka moolelo i hoike ia mai ia makou.
Ma milolii, Kona Hema, ua hanau mai la ka wahine a A. P. Kapawai, he keiki kane kupanaha, o ke kino o keia keiki he kino no elike me ko ke kanaka, aka, o ke poo nae a me ka waha, he like loa me ko ka i'a. O kona mau lima he like me ka eheu manu, a o kona wawae, he wawae manu.
A oia ka makou e puana ae nei, ina e ole ana keia keiki a hiki i kona nui ana, ua hiki i kona mau makua ke ohi i na okeni ma ka hoouna ana iaia iloko o na hale hoikeike. Kupaianaha no hoi na hana a ke Akua.