Ke Aloha Aina, Volume IV, Number 32, 6 ʻAukake 1898 — ALOHA E KALANI. [ARTICLE]

ALOHA E KALANI.

Ua hoohikilele ia ae ko ke kulanakauhale ma o ke kani kuhao ana mai o ke oeoe o ka hale hana Kukui Uwila, i ka hora 12 a oi o ka wanaao Poalua, e hoike mai ana i ko Honolulu, ei ae ka mokuahi Gaelic, ke hii mai nei ia Kalani Aimoku imi pomaikai, ke kaalo mai nei ma ka Lae o Makapuu, a ke kamoe mai nei kona ihu no ka nuku o Mamala. He wa kupilikii keia no ka hanu o na makaainana aloha alii a pau, i lohe i keia mau hoailona o ka hoea mai o ua o Lamalama ke oho o ka palai, a oiai hoi kekahi poe, ua ka-ia loa ia e ka hiamoe ma ka uhaiaholo ana e ike lihi wale aku i na helehelena o ua Lani alii la, i papahi ia Kona manaopaa maluna o ke aloha i kona mau oiwi makaainana a me kona aina i hoopuni ia e na hunakai ehukai o ka Moana, a ma ia ano, ua haule aku la kekahi poe me ko lakou ike kino ole i ko Kalani mau helehelena, i ka wa i pili mai ai ka moku i ka uwapo. Ua hoea mua aku ka Agena o na mea pili i ko ke alii noho ana Joseph O. Carter iluna o ka mokuahi, mamua o ka pili ana mai o ka moku i ka uapo, a ua hui aku Oia me kona haku me na manao aloha oiaio, elike no hoi me kona ano mau, he naau i piha i ke aloha i kona haku alii, a pela no oia i hoea kino mua aku ai e halawai kino pu aku me ia, Ua hoea kino ae no hoi malaila kana kaikamahine aiii, a Hooilina Moi hoi o ke Kalaunu Victoria Kaiulaui a me ke Kamaalii David Kawananakoa, a me ku mea Hanohano Aichibald S Cleghorn, ka Peresidena Nui o ka Ahahui Aloha Aina o na kane, James K. Kaulia, ka Peresidena o ka Hui Kalaiaina D Kalauokalani, ke Kakauolelo Nui o ka Hui Aloha Aina Enoch Johnson, a me kona hope, James Aholo. Ua holo aku no hoi na Peresi dena o na Hui Aloha Aina me Kalaiaina, i ukali ia Edward Lilikalani maluna o ka moku, a pela no hoi me ke Kakauolelo a me kona hope, ua hoohala ia ka

hapalua hora ko lakou manawa maluna o ka moku, a i ka pili ana mai hoi i ka uapo, ua pii kino aku Kana kaikamahinealii a ke Keikialii Kawananakoa e i ike a e hui kino pu me ia iloko o na manao aloha makua a keiki hoi. I ka wa o Kalani i ku mai ai ma ke poo o ke ALapii e iho mai ai ilalo, ua puana mai la Oia i keia mau huaolelo i ku i ka walohia, oiai hoi Kona mau makaainana aloha alii e haiamu aku na malalo o ka uapo mokuahi: Aloha oukou a pau loa. Nani ka ehaeha oia leo anoano eehia i kokolo ae ma ko makou mau pepeiao, me na waimaka e hiolo ana maluna o kela a me keia mea pakahi e ku pohai aku ana imua o kona alo, me he mea la, e hoike aku ana Iaia, eia no makou a pau mahope Ou e ke alii, no ke kupaa i ke aloha i ka aina.

Ua hoomau ia keia mau leo walohia mai na lehelehe mai o Kalani Aimoku, aia e huli ae ai ma o a maanei a kauloua mai maluna o Kona mau makaainana piha i ke aloha a me ka hoomanawanui, a Nona mau lakou i na wa a pau; he hoike hoi imua o Kona alo, he oia mau no lakou a pau i ke alo pali. Iaia e iho mai ana mai ke alapii mai, aia na makaainana me na manao e haale ana iloko o ko lakou mau umauma, me na maka i hele a piha pono i na waimaka, e hea aku ana Iaia me na leo hooho o ka ehaeha, Aloha o-e e Ka-la-ni, a pela no hoi Oia i panai mai ai, me Kona mau omaka wai alii e hiolo mau mai ana mai Kona mau lihilihi mai. Ehaeha a kupouli ke hoomanao ae i ke kulana o Kona mau mua, a ina paha oia mau la, na la hoi e huli ana o ka waha o ka aina iluna. Oiai hoi ke kaa alii e kali ana no Kona kau aku maluna ona, no ka hoihoi ana aku laia ma Kona home ponoi ma Wasinetona, oia no ka wa i haawi koke ae ai o na makaainana aloha alii a pau i ko lakou aloha me na leo huro ekolu, e wawalo ana i ka paia lani, me he mea la, aia no Oia iluna o Kona Kalaunu kahi i noho ai. O keia no hoi Kona wa i haalele mai ai i ka uapo, mokuahi Pakipika iloko o ka piha hookeke nui, a i ukali ia hoi e ka Hooilina Moi, ke Keikialii Kawananakoa me ka Mea Hanohano A. S. Cleghorn, ka Peresidena Nui o na Ahahui Aloha Aina James K. Kaulia, a me na poe e ae he nui wale. Ua ukali ia mai ka huakai huli hoi i ka aina nei, e Joseph

Heleluhe a me kana lede, a me Jon Richardson kona mau hoa uhaiahoko hoi no ka pono o ka aina. Ua hiki kino aku i ka home noho ma Wasinetona Hale, iwaena o na leo puili aloha o Kona mau makaainana e kali mai ana o Kona hoea aku. I ka hoea ana aku o ke kaa Aiii ma ka Halealii Wakinekona, aia na Komite Hookipa e ku mai ana me ka makaukau e apo mai i ke Alii a me na Elele a ka lahui i ka lele ana aku o ke Alii no ka hale, ua honi aku la ke Alii a me na Elele i ke kupaoa o ke onaona o na wehi o ka waokele i la weia mai a hoohiluhilu ia ae maluna o na pou, na puka, a me na noho. I ka wa a ke Alii i komo ae ai ma ka rumi hookipa nui, oia ka wa a ka Peresidena J. K. Kaulia i haawi mai ai i na kahoahoa ana o na olelo o ka hoolauna mua loa ana aku ma ka aoao o ka lahui i ke Alii a me na Elele, a mahope iho o ka pau ana o na olelo hoolauna ma ka aoao o ka lahui, oia ka wa a Rev. E. S. Timoteo i haawi mai ai i na leo kaukau imua o ka Mea Mana Loa me ka eehia nui, a i ka pau ana o ka pule, oia ka wa i haawi ae ai na Komite i na lulu lima pumehana pu ana me ke Alii a hookuuia na hana ma ia wanaao. He maikai ke ola o ke Alii a me na hoahele Elele. Ma ia kakahiaka no hora 9, ua haawi ae ka Bana Lahui i ke kani hoonanea a ka lakou mau hokeo ma ka wa o ka paina kakahiaka o ke Alii, a Ue oia mau no ka nani a me ka nanahe o ua mau keiki la, a hoomanao mai la makou i na la i aui aku la. Ke haawi aku nei KE ALOHA AINA i kona aloha ia Kalani ame na Elele. He ma-i, ALOHA E KALANI, aloha na hoa Elele a ka lahui.