Ke Aloha Aina, Volume IV, Number 30, 23 Iulai 1898 — Page 1
| This text was transcribed by: | Hartwig Hermann |
| This work is dedicated to: | to Soli |
KE ALOHA AINA
KE ALOHA AINA
UA MAU KE EA O KA AINA I KA PONO
HOOKUMUIA I MEI 20, 1895
---
BUKE IV. HONOLULU, POAONO, IULAI 23, 1898. HELU 30
---
KA NUPEPA KE ALOHA AINA
---
E hoopuka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
KE - ALOHA - AINA.
Hookahi makahiki ..................... $2.00
Eono mahina ............................... $1.00
Ekolu mahina ................................. .50
Hookahi mahina ............................ .20
EMMA A. NAWAHI.
Puuku o
Ke - Aloha - Aina
EDWARD L. LIKE.
Lunahooponopono a Hope Puuku
S. P. KANOA.
Hope Lunahooponopono.
O na kauoha Nupepa me na hookaa Dala, e hoona pololei mai i ka Puuku ma Honolulu.
---
Nuhou Kuwaho.
--
KA HOPENA I MANAOIA NO SANTIAGO.
Kingston, Jamaica, Iulai 6. Mamua o ka hoohemo ana aku me ka wiwo ole o na mokukaua o Cervera iwaho o ke kaikuono o Santiago, ua ninau aku ke Kanikela Farani i ka Adimarala Sepania, heaha ka hana a na mokukaua, ina e holopono ana ka hopu pio ia a Kenerala Shafter i ke taona mauka o ka aina.
O ka pane i loaa aku mai a Cervera aku, me ke kanalua ole, e puhi ia ana ke kulanakauhale ike ahi, a e hoohuli aku ana oia i ka waha o na pukuniahi o kona mau mokukaua maluna pu o ke taona, me ka nana ole ae ina hoaloha a me ka enemi a hoolilo aku ia Santiago i puulehu. I ka lohe ana o ke Kanikela Farani ua haalele koke iho la oia i ke kulanakauhale.
AOLE I NOONOO O SEPANIA NO KA HAAWIPIO AKU.
Madarida, Iulai 5. Ma ka noho ana o ka aha kuka a ka Aha Kuhina ma ka po nei no kekahi manawa pokole, no ka noonoo ana e wehe ia i kuikahi no ka maluhia ua hooleia ae, a ua hooholoia ae e kaua a hiki i ke koe ole ana o kekahi koa maluna o Cuba.
Aole i loaa mai i ke aupuni na lono no ke kipokaia ana o Santiago, a ua telegarapa ia aku la o Kenerala Blanco, e hoike mai no mea e pili ana i ka hakaka moana.
WAIHO ILOKO O KA HOHONU O KA MOANA HE MAU HANERI OLA UHANE.
Nu Ioka, Iulai 6. O ka mokuahi Farani La Bourgogne, ua hookui aku oia me ka mokupea hao Cromartyshire, ma ke kakahiaka nui o ka la 4 o Iulai, he kanaono mile ma ka hema aku o Sable Island, a piholo iho la. Maloko o na ola kino a pau o luna o ka moku he 725, he 535 i waiho aku la na kino iloko o ka opu o ka moana. O na poe ohua kapena a pau, aole hookahi o lakou i pakele, a mawaena o 300 ohua wahine maluna ona he hookahi wale no i pakele mai.
Eia malalo iho nei ka moolelo o kekahi mau hana puuwai eleele i ka wa i halawai ai ka moku me keia mau ulia poino: Ua like na ohua a me na luina i keia wa o ka poino, ma ka hoao ana e hoopakele i ko lakou mau ola me ko lakou noonoo ole ae hoi i keia wa o ka pioo maluna o lakou i hilinai aku ai na ohua a pau, a iloko o keia wa o ke kupilikii, ua luku wale ia aku na wahine a me na kane.
Ma ka hora 5 o ke kakahiaka nui, i ka wa o kekahi uhiwai manoanoa e halii paa ana iluna o ka ilikai, ua hookui aku la oia me ka Cromartyshire me ka halulu nui, a ia wa no i lawe pu aku ai oia i kana mau pio no lalo o ka hohonu, a na ka puapuai ana a me ka mimilo ana o ke kai i hoike mai i kona wahi i waiho ai.
He mau minute pokole i hala ae mai ka hookui ana a ke piholo ana i hana ia ai kekahi mau hana manaonao. Iloko o keia wa, o ka oneki i hoalii ia e ka meha, na hoopiha ia ae la me na leo like ole.
O na wahine e alai ana mamua o na kanaka kino ikaika e holo ana no na waapa, ua uhau ia aku lakou i ka pahi. Maloko o na keena o ka ohua oneki he lehulehu wale o na Italia, a maluna o ko lakou mau helehelena iloko o keia wa e haliu aku nei no ka make, ua hoike mai la lakou i ko lakou mau manao omokoko.
O na aliimoku wiwo ole i make pu aku, ua hiki ole ia lakou ke hoomalu aku i na ohua a me na luina i piha me ka inaina. O ka malama moku elua, ua hoike aku oia he lehulehu o kana mau hana wiwo ole, aka, ua lilo nae ia i mea ole i kona mau luina i piha me na manao hehena.
Maluna o kekahi mea hoolana i hoopaa ia aku i ka moku poino e kau ana he kanaha wahine maluna ona, a i ka wa a ka moku i iho aku ai no lalo o ka hohonu, ua huki pu aku la oia i ua mea hoolana la, aole hoi he kane i oki aku i na kaula o ua mea hoolana la i hoopaa ia aku i ka moku i pakele ai hoi ke ola o keia poe wahine, a pau loa iho la lakou i ka make.
I ka wa o ka moku i piholo ai, ua koe iho la kekahi mau waapa kakaikahi e lana ana iluna o ka ilikai i hoopuni ia hoi me na poe e make iho ana. O kekahi poe wahine ua hopu aku lakou i ke kaula o kekahi waapa a paa iho la me ka hoopoino ole aku i na poe o luna, me ka manaolana ana malaila lakou e lana ai a hiki i ka hoea ana aku o ka hoopakele, aka, me ka naau aloha ole iloko o na kane, ua oki ia mai la ke kaula pa pau iho la lakou i ka make.
Ma kekahi mau manawa, ua hopu aku kekahi poe kane ma ka aoao o na waapa no ka hoolana ana, aka, ua uhau ia mai nae lakou me na hoe a me na hao kilou waapa a hiki i ko lakou nawaliwali ana, a make iho la.
O ka moku Beritania i pakele ai mai ka iho pu ana aku me ka mokuahi Farani no lalo o ka moana, na hookokoke mai oia malaila, a haawi maila i na hoopakele ana ina poe poino a mailaila aku oia i kolo ia aku ai no Halifax.
He kupanaha ke ola ana o kekahi poe iloko o ka wai no kekahi mau hora. O na aliimoku a pau o ka Bourgogne, ua make lakou elike me na kanaka wiwo ole. He hookahi wale no iwaena o lakou i hoea mai iluna o ka ilikai a hoopakeleia ae la.
NUI NA HALE I HOOHIOLOIA E KA MAKANI PUAHIOHIO.
Hampton, Iulai 4. He makani puahiohio kai pa iho ma Hampton Beach i ka hora 3:15 o keia la, a he nui na waiwai i koopoino ia me ka lilo pu aku o ke ola. O na hale ua hoohiolo ia, a o na lio ua hapai ia ae lakou luna a hookui ia aku la i na hale, a o na kaa ua laweia aku no kekahi mau kapuai mamao. O na kumulaau ua hahaki pu ia ae, a o kekahi mau kumu laau hoi ua ulaa pu ia ae mai ka honua ae.
He moku holo lealea no Kapena Frank Mudd, kai halawai me keia makani ino, oiai, oia e holo ana ma keia wahi me eiwa poe ohua, he elima i piholo aku a pakele mahuhune mai la hoi kekahi o lakou.
Ma ka hora 8 o keia po, ua ike ia iho la he elima poe i make.
HANEE HE UWAPO A MAKE HE EHA POE.
Shelby, Iulai 4. O ka uwapo e moe nei maluna o ka muliwai Mohikana, ua haule oia i keia la me 1,000 poe kanaka maluna ona. He eha i make koke no ia wa, a he haneri a oi i hoehaia. E malama ia ana he mare akea maluna o ka uwapo ma ke ano oia kekahi o na hana hoohiwahiwa. Mahope koke iho no o ka pau ana o ka mare, ua hanee iho la ka uwapo no umikumamawalu kapuai. Aole i hiki pono mai na lono oiaio i keia wa oini, na poe a pau iloko o ka pi'o nui. Ua manaoia aole he hookahi poe i hoehaia e kuku ana.
NOI O KENERALA SHAFTER E HAAWI PIO AKU.
Kingston, Jamaica, Iulai 5. Ma ke awakea onehinei, e hana ana malalo o na ao ana mai Wasinetona mai, ua hoouna aku la o Kenerala Shafter, ka alihikaua nui o na puali koa o Amerika Huipuia, he leta ia Kenerala Linares o na pualikoa Sepania e kiai la i ke kulanakauhale o Santiago, e koi aku ana i ke kulanakauhale. Na Konela Dorst i lawe aku i keia lono. He ekolu hora mahope iho o ka hakaka ana ua hoike koke aku la o Kenerala Linares aole loa oia e haawipio.
Ma keia awakea, ua hoouna hou aku la o Kenerala Shafter he koi no ka haawi pio ana mai o ke kulanakauhale, a e hoike aku ana hoi ia Kenerala Linares aia wale no a haawipio mai o Santiago, alaila, aole e lele kaua ia aku ana o Santiago, ma a Poalua. A hiki mai la i keia ahiahi aole he pane i loaa mai ia Kenerala Linares no keia koi elua e haawipio ana mai i ke kulanakauhale.
Ua launa kamaillo aku na kanikela o na aina e me Kenerala Wheeler. Ua olelo ae na kanikela he 31,000 ka nui o na kane, wahine a me na keiki a me na kupa o na aina e maloko o ke kulanakauhale, a ua noi aku na poe o ke kulanakauhale, e hoohakalia ia ka lele kaua ana a hiki i ko lakou wa e kaawale aku ai mai Santiago aku no ka malama ana mai a na koa Amerika, a ua hoole aku ke alakai o na koa Amerika i keia noi.
Aia na kanikela ke ake la e haawipio aku o Kenerala Linares, aka, ke kanalua loa ia la nae kona ae i keia noi. Ua hookunia aku na mokukaua Beritania Alert a me Pallas a me ka mokukaua Auseturia no ke kii ana aku i na kupa o na e maloko o Santiago e Adimarala Sampson.
---
Ua haawi ia aku la i na hoahanau Lucas ka hooponopono hou ana i ka hale hulahula e ku nei ma ka Paka Kuokoa, no ka hoolilo ana aku iaia halemai no Amerika.