Ke Aloha Aina, Volume IV, Number 25, 18 June 1898 — Page 6

KE ALOHA AINA

 

6          KE ALOHA AINA, POAONO, IUNE 18, 1898.

----------

KA BUKE MOOLELO HAWAII

I HAKUIA E KA

Moiwahine Liliuokalani,

ma Wasinetona.

------

Pai a hoopua ia e Li a me Sheppard o Bosetona, Amerika Huipuia.

----------

Unuhiia no ka pomaikai o na poe heluhelu o KE ALOHA AINA)

MOKUNA VII.

KA MOIWAHINE EMA.

            O keia koho ana, me ke kanalua ole, ua hoohikilele ia ae o Honolulu, ua kukalaia aku ia imua o ia kanaka e hoopuni ana i ka hale ahaolelo, a ua haawiia mai hoi na huro ana me na leo hooho hoapono ole e awili pu ana. O na hoaloha o Ema e noho ana ma Honolulu, o kekahi poe o lakou ua onaia i ka rama, a na lakou i hoola ae i ka haunaele. Ua kokuaia lakou e na poe i holu mai mai kona home noho mai. O keia manawa mawaena no ia o ka hora ekolu a me eha o ka auina la, o ka la 12 o Feberuari, 1874.

            Ua lele aku na poe hoohaunaele maluna o na hoa o ka ahaolelo i akoakoa mai, o na mea hoonani o ua wahi la, ua pau i ka wawahiia a okaoka liilii, na buke waiwai nui, na pepa a me na palapala hoike o na aha hookolokolo a me ke keena o ka Loio Kuhina, ua lu liilii ia aku ia, a o kekahi ua kiola ia aku mawaho o na puka aniani. Ua hoohana koke ia na pauku laau maluna o na hoa pakalaki o ka hale ahaolelo i loaa aku maloko o kona mau paia, a o kekahi poe o lakou u akiola ia aku mawaho o na puka aniani e hamama ana e na kanaka i piha me ke inaina. he nui na poe i hoounaia aku no ka lapaauia ana, mamuli o na palapu i loaa aku ia lakou ma ke poo a me na wahi e ae o ke kino, maloko o ka Haukii ia.

            Aka, aole nae keia o ka manao o na kanaka Hawaii, he manao inaina keia i ulu ae iwaena o na poe hoohaunaele mamuli o ka hooko olelo ana o ko lakou makemake e na Lunamakaainana.

            Ia manawa o ka Moi Kalakaua i kohoia iho la, ke Kamaʻliiwahine Likelike a me aʻu, e kali ana makou ma ka hale a ka Moiwahine Emma me kane i noho, ma ke ano he moi.

            I keia wa e noho ana oia me kona makuahine, Mrs. Fanny Rooke, a o laua wale no na mea e noho ana i ka halenui o Liholiho. He maluhia ka Halealii Iolani, kahi a ka moi e make e waiho ana, a he kakaikahi wale no hoi na koa e kiai ana i kahi a kona kino e waiho ana.

            Mahope iho ua hoea mai la he lede nona ka inoa o Miss Hannah Smithies imua o makou, a hoike mai la i kuu kaikunane oia ka moi o na kanaka Hawaii. Aole oia i manaoio i keia mau olelo, a ia wa i haalele iho ai oia ia makou, a hele aku la no kahi mamao aku no ka halawai ana me kekahi mea no ka hai ana mai a i ole no ka hoole ana mai i ka oiaio o keia hoike.

            Ua hoi koke mai la oia, i ukali ia e Mr. Aholo a me Mr. C.H. Judd lawe mai ia mea hou hookahi no, aole wale oia, aka, ua hai mai la no ka haunaele ma ka hale hookolokolo, a wahi a laua i olelo mai ai, malaila laua i holo mai ai no ka hoopakele ana i ko laua mau ola.

            O keia mau hoaloha ua ukali ia mai laua e Hon. Charles R. Bishop ke Kuhina o ko na Aina E, malalo o ka moi i make, a haaawi mai la i na hoouna kai pumehana i koʻu kaikunane no ka pii ana ae la maluna o ka noho kalaunu, a hai pu mai la i keia mau olelo, aia ke holomua la he haunaele weliweli loa ma na wahi oihana o ke kulanakauhale.

            Aole he hilinai ia o na makai, aole no hoi i na koa Hawaii, no ka mea, ua hoike mai lakou i ko lakou hooko pono ole ana i na kauoha, a ua huipu aku hoi lakou me na hoaloha o na moiwahine Ema ma ka hoohaunaele pu ana.

            Nolaila, ua ninau aku o Mr. Bihopa i ka mea nana e alakai ana i ka moi, aole anei he hana maauao ka hoopii ana aku me ka hakalia ole i na aumokukaua o na aina e, a he ekolu hoi lakou e ka ana maloko o ke awa, e hoolele mai lakou i ko lakou mau pualikoa a hoihoi hou mai i ka maluhia o ke kulanakauhale.

            No ka hoike ana i ka oiaio o ka nee mua o keia haunaele, o ka rumi o na lunakawai, ua lilo aku ia iloko o ka mana o na poe hoomalule kino o ka waiona. Ke hookokoke mai nei ka po, a ua hopohopo ia o puhi malu ia ke kulanakauhale i ke ahi. O kuu kaikunane i kohoia iho la i moi, kaʻu kane, ke Kiaaina Dominis a me Hon. Charles R. Bishop, ua hui ae la lakou, a noi aku la ia Hon. Henry A. Pierce, ke Kuhina Amerika, e hoolele ia mai na kanaka i lako me na lako kaua mai ua mokukaua Amerika Tuscarera a me Portsmouth mai, no ke kokua ana i ke aupuni i kona wa e makemake ana e hooko i na kauoha, a e kiai hoi i ke ola a me ka waiwai o na poe e noho ana ma ke kulanakauhale o Honolulu. He pualikoa kai hoolele ia mai e ka mokukaua Beritania Tenedos, o kona kapena, Kapelan Day, ua kaawale mai oia iuka nei o ka aina, aka, ua lawe ae nae ke aliimoku hooko i na koikoi a pau, Lutanela Bromley. O na pualikoa o Kapena Belknap a me Kapena Skerrett o Amerika Huipuia, ua lawe ae la lakou i ke kuea o ka hale hookolokolo e kukulu ia ai, a i ka ike ana o na poe hoohaunaele i keia, ua emi liilii aku la lakou me ka maluhia mailaila aku.

--------------

            Ua hoopai ia o Pokini he eono mahina hoopaahao ma ke ano aihue, mamuli o kona kiola ana i ka uwati a kekahi kanaka okoa iloko o ka luawai, a aole hoi i loaa a hiki i keia wa.

--------------

UA HALA AKU LA A NALO LOA.

-------

            O Kimo Aikake Pelekane kekahi o na kamaaina kuonoono loa iwaena o ka poai o ko Hawaii Paeaina, a he hoaloha kahiko loa hoi no ka lahui Hawaii o ke kulana kiekie ma ke ola ana, ua pauaho mai la oia i keia noho inea ana ma ke kino, ma ka hoea 7:25 p.m., o ke ahiahi Poalua nei, maloko o ka Halemaʻi Moiwahine, kahi hoi ana i noho ai no elima la wale no, no ka imi ana i ke ola o kona kino, Ua kuu aku la kona luhi ma keia ao, a ua pio iho la ka a ana o ke kukui o kona hale kino ma keia ao, a waiho iho la i kana ukana kino wailua na kana mau kaikamahine ehiku a me kana mau keikikane eha e a aku iloko o na waimaka eloelo o ke aloha makua.

            Ua pau ko oukou ike ana i ko maalo ana ae o ke a-ka o ko oukou makuakane maloko o na malu lau laau o ko oukou home noho ma ka makani Olauniu o Kapalama, a ua hoomehameha pu aku hoi oia i ke kipa ana aku ma kona home hoolaulea ma ke Awalau o Puuloa, i ka Pahamauleo o Ewa; nani ke koikoi o na haawina i kau mai maluna o ko ke kanaka noho kino a a, a ua like no hoi ia me ka ka Palapala. Hemolele i koh mua ai, he mahu wale no ko kakou ola i pu-a ae a nalo koke aku no.

            I ka wa i pahola ae ai o keia lono o ke kaumaha, maloko o ka uwea uwila o ke telepona, no kona make ana, ua hoopiha koke ia aku la kona home noho e na pilikana, na makamaka a me na hoaloha he lehulehu wale, mamuli o ko lakou aloha nui nona, ma ke ano he puuwai waipahe oia ma na ano a pau, a he hoaloha oiaio hoi no ke kanaka kulana kiekie a haahaa loa.

            Ua piha he 68 ona mau makahiki o kona ola ana, a ma ka la 15 o Dekemaba o kela makahiki aku nei hoi ka piha pono ana oia huina makahiki iaia, a ke hele nei hoi oia i ke 69 o kona mau makahiki, oiai hoi oia i hanau ia ma ka makahiki 1829. He kino ikaika kona a me ke ola maikai, i kekahi mau pule kakaikahi i hala ae nei, a ua hiki hoi iaia ke ola a pau ke keneturia o kona mau makahiki. Aka, o ka ke kanaka no nae ia i koho hewa ai, a o ka ke Akua, aole loa ia e hala, no ka mea, ua akaka mau iaia no nae ana o ka aui manawa i kela a me keia la a puni ka makahiki.

            He mahina ae nei i hala, ua hoomahuahua iki mai ka hana a ka mai maluna o kona kino, aka, aole nae hoi he mea e hopohopo ia ai, a ua hoohala hoi i ka moe ana maluna o kona wahi moe, me ka upu ole ia, e hoea mai ana kona mau la hoi e ma keia ili honua, aka, he mau la kakaikahi wale no nae, ua hooikai a loa mai la ka hana a ka maʻi maluna ona, a hiki i kona hoihoi ia ana i ka halemaʻi Moiwahine. Ua pau pilikana ma na mokupuni ma Honolulu nei.

            Ma ka Poaha o kela pule aku nei ua hiki ae ma kona home he elima kauka no ka nana ana i ke kulana mahuahua o kona maʻi e hekau ana maluna o kona kino, a ma ka Poalima ae no i hoonee ia mai ai oia no ka Halemaiʻi Moiwahine, no ka haawi ana i na hoopakele ana no kona ola.

            Ma ka Poaono nei, Iune 11, ka la hanau hoi o ka Naʻi Aupuni o Hawaii, oiai hoi ka inoa aloha alii ana i aloha loa ai, e puka mau ana mailoko mai o kona mau lehelehe, a e kamailio ana hoi oia no na kanaka mawaho aku o keia Paeaina, a o keia hoi ke kumu nui o ke ohewahewa o kona ike, a i hoea koke mai ai na haawina hoomahuahua o ka pilikia maluna ona, a i ka pili ana iho o kona mau maka, a waiho iho i ke kino i ukana puanuanu na ka lehulehu e makaikai iho ai iloko o na kulu waimaka eloelo o na poai like ole.

            Ua hanau ia o Kimo Pelekane ma Honolulu Hale, Honolulu nei, a oia hoi kela hale hana kaa e ku nei mawaena o ke Alanui Papu a me Uniona, e pili pu la me ka Hale Kaawai Helu 2 mua iho nei, a e noho hana ia nei e Mr. Wright. Oia hale i kapaia ai na kona makuakane ia i kukulu, a he elua hale hoi ke kiekie, a malaila oia i ike mua ai i ka malamalama o ka la.

            O na makua o Kimo Pelekane, mai Sidane mai ko laua holo ana mai no Hawaii nei, a he koko Pelekane oiaio hoi ko laua ma ka aina a laua i hele mai ai, a ua mare ia hoi laua ma ka makahiki 1825. O kona makuahine mai Enelani ae oia a hoea i Auseteralia, a mailaila mai hoi no Hawaii nei. Ua make oia i ka 1860 ma Hawaii nei.

            O kona makuakane hoi, he kapena moku oia no luna o kekahi moku okohola, a ua ili hoi kona moku, a no ia kumu, ua kau iho la oia a me kona mau boli-ko-lu maluna o kekahi waapa, aka, ua pau loa no nae lakou a pau i ka pepehi ia e na kanaka maoli o na paemoku o ka Hema aku nei.

            O ko lakou mua loa, oia no ka wahine mua a Kapena Haulani, (Howland) he kapena moku okohola a o ko lakou hope loa, oia ka makuahine o ka poe Maunakea e ola mai nei, nona hoi ka inoa Mrs. M.C. Monsarrat o keia kulanakauhale, ka mea hookahi hoi e ola nei iwaena o ka ohana.

            O ka wahine mare a Kimo Pelekane oia no o Annie Ragsdale, a ua make mua hoi no elua ae nei paha makahiki i hala a oi. I kona wa i make ai, ua waiho iho oia ia eha keikikane a me ehiku kaikamahine e ola an, a he huina nui a lehulehu hoi o na moopuna e u iho ana maluna o ka he kupapau o ko lakou kupunakane, me na manao piliaiko o ka ehaeha. He elua ana mau keiki i hala mua ma kela ao mao me ko laua makuahine.

            Ma ka make ana o Kimo Pelekane ua hoohakahaka ia iho he kowa nui iwaena o na poai like ole o keia kulanakauhale ma ke ano o ka noho ana, a pela aku. Aohe ana hana aupuni i lawelawe ai no ka lehulehu aka, ua noho no oia e lawelawe ma kana mau hana ponoi, koe wale no kona hookohu ia ana i hoa hanohano no ke au e noho mai ana o Kamehameha III, a he hoaloha hoi no na moi Kamehameha IV a me V. O kiha mau olelo no na mea pili aupuni he mikomiki ia a me ka mikololohua a ua lawe pinepine la hoi kana mau oleloao no na me pili aupuni e na moi e ola ana ia wa i hala aku la.

            He kanaka oia i loaa ke kulina kiekie loa ma ka olelo Hawaii, ka aina hoi nana i hoopomaikai aku i na la a hau o kona ola ana, a me he mea la, o ka olelo punahele hookahi ia iaia i na la a pau o kona ola ana a ua lilo hoi ia i ume pipili nana i hoopili paa aku iloko o na umauma o na kanaka Hawaii i ike a ike ole iaia ma na wahi a pau o keia Paeaina.

            He me oia ua maa i na kanaka Hawaii, ma ke ano he mea kuai papa kahiko, he Agena no na moku okohola, a he ona ponoi hoi no kekahi mau moku, he mau mokukuna e holo ana malalo o kona inoa, a e lawelawe ana hoi me ka holomua o ka pomaikai.

            Ua kapaia kona inoa Dowsett ma ka olelo haole "Kimo Pelekane" (Jim he inoa haole ia) e na kanaka Hawaii, a ua lilo hoi ia inoa iaia i mea makamae loa iaia a hiki i kona make ana. Aole oia i ike i ka aina hanau o kona mau makua, oiai, ua hoohiki paa oia maanei oia e noho ai a hiki i kona hopena.

            He hookahi wale no ona manawa i kaawale aku ai mai keia aupuni aku, a no eha la wale no hoi ka manawa ana i noho ai ma Kapalakiko, a huli hoi hou mai no no Hawaii nei.

            He lala oia no ka halemaʻi Moiwahine, ke Sailors Home a he hoa koikoi hoi no ka oihana Kalepa o keia Paeaina.

            He noi no hoi kana mau hana ponoi ana i lawelawe ai, a eia ia mau lalo ona hooponopono ana a kana mau keiki. O na hoa o ka ohana aole hiki ia lakou ke kamailio, ma paha ua hana oia i ka palapala hooilina.

            O ka Poaha, Iune 16, ka la e hoolewa ia aku ai o kona kino lepo, a waiho aku ma ka ilina kupapau o Maemae. Ua hala aku la oia me ia walohia, aka, o kana mau hana i kanu ai, ua ulu ia iloko o ka puuwai o ka lahui Hawaii me ke aloha nui ia, a nona hoi makou e komo pu aku nei e auamo like i na ehaeha me ka ohana a me ka lehulehu o kona mau hoaloha. Aloha no.

-------------------

            He nui na ohua a me ka ukana e kali nei no kekahi mokuahi e lawe aku ai ia lakou no Kapalakiko.