Ke Aloha Aina, Volume IV, Number 25, 18 June 1898 — Page 3

KE ALOHA AINA

 

POAONO IUNE 18, 1898.

 

-----

PIHOLO KA MOKU MERIMAKA.

 

Paa i ka Hopuia e na Sepania kona mau Luina.

 

HOOUKA IA HE KAUA MA SANTIAGO.

 

Manaoia aia o Adimarala Cervera me kona mau Mokukaua I Pilipine.

 

            Ma ke kua ana mai nei a ka mokukana Mohikana, ma ke ahiahi Poakolu nei, i loaa mai ai ia makou na nuhou e pili ana i ke kaua mawaena o Amerika Huipuia a me Sepania, a no ka pomaikai o ko makou mau makamaka heluhelu, ke hoopuka aku nei makou me ka hoohakalia hou ole iho, a oia iho keia malalo iho nei:

 

PIHOLO KA MOKU AMERIKA MERIMAKA

 

            Cape Haytien, Iune 3. O na mokukaua Amerika, e like me na hoike i loaa mai nei mai Santiago de Cuba mai, o na uwea telegarapa aia no ia malalo o ka mana o Sepania, ua kipoka hou aku lakou ma ka hora 3 o keia kakahiaka Poalima maluna o na papu a me na mokukaua. Ua hoomau ia ke kipoka ana me na pukuniahi a hiki i ka hora 4 a. m.

 

            He hookahi moku kokua Amerika i hoolako pono ia me na mea kaua i hoao aku e komo iloko o ke kaikuono. Ua hookuu aku na Sepania iaia e komo maloko o ka laina mua o na topido, aka, mamua nae o ka hiki ana aku o ka moku ma ka laina elua o na topido, ua hookuu ia mai la he topido e na Sepania, a hookui mai la i ka aoao o ka moku a pahu ae la me ka waiho ana iho he puka nui, a ia wa no i iho aku ai kona ihu iloko o ke kai a piholo iho la iloko o ka manawa pokole loa. Aole he maopopo o kona inoa, a pela pu hoi me ka nui o na poe i poino.

 

            He hookahi aliimoku, hookahi wiliki a me eono luina i hopuia e na Sepania. 10:25 p. m. He lono kai hoea mai nei mai Santiago mai e olelo ana: o ka moku i piholo iho la, ua hoomaopopoia o ka Merimaka no ia. O ka puka uwahi a me na kia wale no ka mea i ikeia maluna ae o ka ilikai.

 

            Port-au-Prince, Iune 4, hora 8:30 a. m. O na nuhou i loaa hou mai nei mai Santiago de Cuba mai e hai mai ana ia i na hoike no ka hoomaka ana o ke kipoka ia ana o kela wahi ma ka hora 3 o ke kakahiaka o nehinei. Mahope iho o ka pau ana o ke kaua, ua hoopahuia aku ka moku piholo Merimaka me kekahi dainamita eia na Sepania ke hana nei no ka hookaawale ana ae i ke awa, no ka hookuu ana aku i na mokukaua o Adimarala Cervera e hoohemo aku no waho moana i ka wa e hoea mai ai o ka aumokukaua mai Cadiz mai maloko o na wai o Cuba.

 

HAHANA KE KAUA MA SANTIAGO.

 

            Piledelapia, Iune 4. He lono kuikawa kai hoea mai nei mai kekahi ahi kiekie mai o na aumokukaua o Sampson i keia kulanakauhale i ka po nei e hoike mai ana: He kaua hahana ke hoouka ia nei i keia wa, a ua hoopoino aku na aumokukaua o Sampson i na papu o Santiago. Ua hamau na batari. A o ka nui o na poino ma ko Amerika aoao aole e hiki ia makou ke hoike aku.

 

IKEIA HE MAU MOKU SEPANIA MAWAHO AKU O HAITI.

 

            Kingston, Iune 4. Ua komo mai ka moku Altai i keia la me na hoike hou no na mokukaua Sepania. O kona kapena, ua hookomo iho oia iloko o kana buke hoomanao, ma kela Poakolu aku nei, mawaho aku o ka mokupuni Navassa, kokoke i Haiti, ua kaalo ae la he eha mau mokukaua me na hae Sepania e holo ana no ka hikina. Ua manao ia ua hoouna ia aku lakou no ka hoopakele ana i ka Adimarala Sepania Cervera a me kona mau mokukaua.

 

KO PARISA MANAO NO NA AUMOKUKA UA O CERVERA.

 

            Parisa, Iune 3. Eia he manao ikaika loa maanei a me Madarida, aole ka Adimarala Cervera ma Santiago de Cuba. O ka mea kakau o ke Gaulois ma Madarida, ua telegarapa mai nei oia mai laila mai, ua loaa mai iaia he lohe mai kekahi luna aupuni kiekie mai, aole i hoea aku o Adimarala Cervera i Santiago de Cuba, a o na moku Sepania malaila, no na aumoku topido ia o Villamil.

 

            Ua hoea mai na hoike i hooulaula ia ae e ka mea kakau o ke Gaulois, o Adimarala Cervera mahope o kona haalele ana iho i na mokupuni o Cape Verde, ua holo aku oia no ka hoopohihihi ana i na Amerika, alaila, me ka mama nui ua kuupau ia aku la ko lakou holo no Pilipine, a e hoea aku ana lakou ilaila i ka Poaono, a i ole i ke Sabati. O ke kauoha i haawi ia aku iaia oia no ka luku ana aku i na aumokukaua o Diuwe, e hopu pio a i ole hoopoino i na moku lawe koa Amerika ma ko lakou ahahele no na mokupuni o Pilipine mai Kapalakiko aku.

 

            I ka hoopau ana o ka mea kakau o ke Gaulois, ua olelo ae oia. O na aumokukaua o Adimara Sepania Camara, ua manaoia e huipu aku ana oia me Adimarala Cervera maloko o kekahi mau pule pokole wale no.

 

NUI KE ALOHA IA O NA KOA HE 2,500 E HOLO LA NO MANILA.

 

            Nu Ioka, Iune 5. He lono telegarapa kai loaa aku i ka World mai Berlina aku e olelo ana: O na lono telegarapa i loaa mai mai Manila mai ma ke alahele ae o Hongkong i loaa i na hale kalepa maanei mai na agena mai, eia na lahui o na aina e ke aloha nei no ka hoea maalahi mai o na pualikoa Amerika i hoounaia mai nei mai Kapalakiko mai no Pilipine.

 

            Ua hoike ia mai he maluhia o Manila. Aole he ulu hou ae o na hoohaunaele kipikipi. He nui ka mea ai e loaa la i ke kulanakauhale mailoko mai o ka aina. O ke paniku ana, ua hoike ia mai ia, aohe he waiwai, a aohe hoi he mau poino e loaa ana i na Sepania, a he hoopilikia wale ana no ia i na lahui e ma ke oki ana aku i ke komo ana mai o ko lakou mau waiwai.

 

E HAALELE IHO ANA KA MONTERE I KEIA LA.

 

            Kapalakiko, Iune 5. O ka hooponopono hou ana i ka moku lawe nanahu Brutus ke kumu i holo ole aku ai ka mokukaua monita Montere. O kekahi o kona mau paipu mahu kai poino, a o na kanaka ma ka pa kapili moku, ua hana lakou maluna ona i ka po holookoa o ka ponei.

 

            E hoao ia ana ka Brustu i keia kakahiaka nui, a ina e ikeia ana aole he wahi poino i koe, e holo koke mai ana oia no Kapalakiko no ka huipu ana me ka Montere, a ia wa e holo like aku ai laua a elua no Honolulu. Ua makaukau ka Montere ma ka la inehinei a po no ka holo aku i ka wa e kauoha ia mai ai, aka, ua kauoha ia aku nae oia e kali i ka Brutus.

 

            O ka nui o ka nanahu maluna o ka Montere he 380 tona. A o ka nui o loko o kona lua waiho nanahu he 200 tona, o ke koena iho, ua waiho ia iluna o kona oneki iloko e na eke i hoopaa ia aku i na pale o ua pukuniahi.

 

HOLO NO KE KOI POHO ANA IA HAITI.

 

            Nu Ioka, Iune 3. He lono kai loaa mai nei i ka nupepa World mai Kingston, Jamaika mai e olelo ana: E haalele koke iho ana ka mokukaua Giovanni Bausan ianei. Mawaho aku, o Barbadoes e halawai ai oia me na mokukaua Italia. A malaila aku e holo pololei aku ai na moku no Port-au-Prince, a malaila lakou e koi poho aku ai no ka pepehi ia ana a make o kekahi mau Italia ekolu he mau manawa i hala ae nei.

 

LELE KAUA IA HE PA KAUA RUSIA.

 

            Sana, Peteroboro, Iune 3. He lono kai pahola ae iwaena o na laua aupuni, no ka lele kaua malu ia ana aku o kekahi pa kaua o Rusia e kiai ia ana e 300 koa ma kahi taona o Andijan, Turkestan e kekahi poe kamaaina oia wahi no lakou ka huina o 1000. Ua olelo ia ae he 20 poe kow i make a he 18 i hoeha ia.

 

HAALELE NA BERITANIA IA HAVANA.

 

            Nassau, Iune 2. O ka mokukaua Beritania Talbot, aia oia malalo o ke kauoha no ka holo ana aku i Havana a lawe mai i na ohana Beritania a apu i noi aku ia Kanikeia Kenerala Collon no ke haalele ana iho ia Cuba. Ua lohe ia ae i keia la o ke Kanikela no kekahi e haalele iho ana ia Havana maluna o ke Talbot.

 

            E hoolele ia aku ana ma Jamaica aole hoi ma Nassau,  no ka mea, he uuku loa kahi no ka hoomalu ana aku ia lakou.

 

NA HOOLALA KAUA A MAKINILE.

 

            Nu Ioka, Mei, 25. He lono kuikawa kai loaa mai nei mai Wasinetona e olelo ana, o ka Peresidena a me kona mau alakai i hooholo ai, oia keia mau hoolala ana malalo iho nei:

 

            Akahi. - Ka luku ana i na aumokukaua Sepania maloko o na wai o Cuba, a i ole, o na puulu moku a pau a Sepania no ka hakaka ana.

 

            Elua. - O ke koma kaua ana aku iloko o Cuba a me Porto Rico, e hana ia no ia elike me ka hikiwawe e loaa ana no ka hoolele ana aku i na pualikoa Amerika iuka oia mau mokupuni me ka maalahi.

 

            Ekolu. - O ka lawe ana ae ia Pilipine ma o kekahi pualikoa i oi pakolu ae ka nui i ko ka wa i manao mua ia ai no ka hana ana.

 

            Eha. - O ke koho ana i ke ana no Cuba a me Porto Rico a me ka hoomau ana aku i ke kaua, aole ia e pau a hiki i ka wa o ke aupuni o Sepania e kahea mai ai i kona mau pualikoa, a i ole, luku ia paha e na pualikoa Amerika.

 

            Elima. - O ka hopena o ke ka ua e hoea mai ia mamua o ka pau ana o ke kau mehana.

 

-----

KA LA NUI MALALO O WAIANAE.

 

            Oa ha wi io ia ae no he la hauoli no na Hawaii a pau malalo o Waianae, e like me ka makou i hoike mua aku ai. Mamuli o ka lokemaikai o ka hui kaaahi o Dilinahama ua hookuu ia mai la na kaaahi no ka lawe ana aku i na haumana kula sabati o na ekalesia o Kaumakapili a me Kawaiahao ma ka uku hoahaa loa.

 

            Mamua ae o ka hiki ano ae i ka manawa e haalele iho ai o ke kaaahi i ke kulanakauhale nei no ka lawe ana aku i na haumana kula sabati no lalo o Waianae, ua hoopiha kui ia ae o lalo o kahi hoolulu kaaahi me na poe o loko o na papa kula sabati, na kahunapale a me na poe makaikai, a mahope o ka hora 8:30 i haalele iho ai ke kaaahi me ka lawe ana aku he 21 kaa i piha u me na kanaka e holo ana no lalo o Waianae, me ka haalele ana iho he mau haneri mahope e kali ana no kekahi kaa okoa aku.

 

            A ma ka hora 9:30 i lawe aku ai kekahi kaahi i ke koena o na poe i haalele ia iho, na kekahi kaaahi mailalo mai o Waialua i lawe mai i na poe kula sabati o laila.

 

            I ka hora 11 ponoi i malama ia ai na hoike kula sabati o na apana like ole, ma ka haawi ana mai he hookahi mele nani loa maiwaena mai o kela a me keia papa kula sabati. Ua haawi pu ia mai hoi he mau olelo hoolana no na kula sabati e W. R. Kakela, Rev. Desha a me Rev. Kapu.

 

            Mahope o ka pau ana o na hana hoike kula sabati, ua nee aku la na mea a pau no kahi o ka papaaina i hoomakaukau ia, a o ka mea i oi loa aku o ka hauoli i ike ia iloko o keia mano kanaka nui, ao e he mea hookahi i hoonele ia i ka mea ai, ua ai a lawa, a ua inu hoi i na wai momona i hoomakaukau ia a kena, aole he leo hoohalahala i lohe ia iwaena o na poe a pau i hoea aku i lalo o laila. I ka hora 4 o ka auina la i haalele aku ai na kuaahi a pau ia Waianae, a hoi mai la no ke kulanakauhale nei me ka loaa ole o na ulia poino. Ua nanaoia ma kahi o elua a ekolu tausani poe makai i holo aku no lalo o laila. Ua olelo ia ae o kekahi la kanaka nui ia i ikeia malaila.

 

KE KEAKA NIKA O KA PO POAONO NEE.

 

            Ua haawi io ae ka hui keaka nika a na opio Hawaii o ke kulanakauhale nei i hoaia ae ai maloko o ka Hale Mele Hou, ua nui no a lehulehu na poe i hoea ae malaila, na haawi mai lakou i na hana hoomakeaka lealea loa, na himeni a me na hookani pila ana. Ua lohe mai makou e haawi hou ana lakou he keaka hou ma keia mua aku.