Ke Aloha Aina, Volume IV, Number 25, 18 June 1898 — Page 1
| This text was transcribed by: | Kainani Hartnett |
| This work is dedicated to: | Cherry Lynn Zinger |
KE ALOHA AINA
HILO BAY, HAWAII
UA MAU KE EA O KA AINA I KA PONO
HOOKUMUIA I MEI 20, 1895
---------
BUKE IV. HONOLULU, POAONO, IUNE 18, 1898 HELU 25
--------
KA NUPEPA KE ALOHA AINA
-------
E hoopuka mau ia aku ana mai ka Poakahi a ka Polima o na pule a pau o kela a
me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa maike Keena aku o KE ALOHA AINA, a mai ka lima aku o
na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ke Dala kuike.
Aole nupepa ma ka owili pakahi e hoouna ia ke ole e hookaa mua ia ka uku
pepa.
E hoouna pololei mai i na Nuhou na Kumumanao, na Olelo Hoolaha, na Kanikau
a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa,
malalo o kekahi inoa kapakapa ke ole e hooike mai i ka Lunahooponopono
i kona inoa ponoi.
Ka Nupepa Puka Pule
Ke – Aloha – Aina
Hookahi makahiki ......$2.00
Eono mahina...............$1.00
Ekolu mahina................ .50
Hookahi mahina........... .20
EMMA A. NAWAHI.
Puuku o
Ke – Aloha – Aina
EDWARD L. LIKE.
Lunahooponopono a Hope Puuku
S.P. KANOA.
Hope Lunahooponopono.
O na kauoha Nupepa me na hookaa Dala, e hoona pololei mai
i ka Puuku ma Honolulu.
--------
Nuhou Kuwaho.
--------
Havana, Iune 1. O na mea i hoopuka ia ae e na Sepania, oia keia malalo iho nei:
O na aumokukaua Amerika, oia ka Iowa, Masekuseta, Burukelina, Texasa, Nu Olina, Marblehead, Minneapolis a me kekahi mau moku kokua no lakou ka huina o eono i huipuia aku, ua lawe aku lakou i ke kulana ma ke komohana, o ke awa o ke alawai o Santiago, ma ka la 31 o Mei, a kipoka mai la mai na moku mua elima mai.
O ka mokukaua Sepania Cristobal Colon e ku ana oia ma Punta Gorta, a ua hiki ke ike ia mai mawaho mai o ka moana. Ua panai ia aku na kipoka ana a na
mokukaua Amerika o ka mokukaua Cristobal Colon a me na papu o Moro.
He kanahiku ka @ni o na poka na aumoku kaua Amerika i ki mai ai, aole nae he nui o na poino i hana ia.
O ka loihi o ke kipoka ana he 80 minute, a haalele iho la lakou me ka lawe ana aku he hookahi mokuahi kokua i hoopoino ia.
He nui na poka i pa-hu ae ma ka hope o ka Iowa, a he ahi kai ikeia maluna o kekahi mokukaua okoa aku. He lehulehu na poka i haule mai iloko o ke Kaikuono ma kahi kokoke i na mokukaua Sepania. He nui ka hauoli i ike ia ma Santiago nei.
Ma na lono i loaa mai nei, ua komo aku la he mokuahi Geremania mawaena o na aumoku kaua Amerika e paniku ana, a komo aku la iloko o ke awa o Havana me 50,000 eke raiki.
PANIKUIA O SANTIAGO.
Kingston, Jamaica, Mei 28. O ka mokukaua kokua Amerika Haward, o ka laina mokuahi Amerika o Nu Ioka, ua hoea mai nei oia i anei i keia kakahiaka, a ua haalele aku hoi i na aumoku kaua Amerika ma ke awakea onehinei.
KOKUA O AGUINALDO I NA SEPANIA
Madarida, Mei 28. He lono malu kai loaa mai nei mai na poe Sepania ma Manila, e olelo ana: O Aguinaldo, ke alakai o na poe kipi ma Pilipine, mahope o ka loaa ana aku o na pukuniahi mai Adimarala Diuwe aku, ua hoopuka ae la oia e kokua ana oia ia Sepania. E olelo pu ana no hoi ua lono la, he mau alakai e ae no hoi kekahi o na poe kipi i hoopuka ae ia manao hookahi.
IKEIA NA MOKU SEPANIA E HOLO ANA
NO PORTO RICO.
Port-au-Prince, Mei 28. He mau hoike malu kai hoea mai nei mai Cape Haytien ia nei, e hoike ana he mau aumoku kaua Sepania kai ikeia mawaho aku o Cape Francis, kokoke i Samana Bay. Ua manaoia e holo ana ia aumo kukaua no Porto Rico.
He umikumamalua mokukaua Amerika e paniku la mawaho o ke awa o Santiago de Cuba, a o Adimarala Cervera a me na aumoku kaua Sepania, ua manaoia aia lakou iloko o ke awa kahi i hoopue nui ai.
HE HOOUKA KAUA HAHANA KAI
MALAMA IA AE.
Nu Ioka Iune 1. He lono kai loaa mai nei, ua komo aku na mokukaua Amerika, he elima ka nui iloko o ke kaikuono o Santiago, he hookahi moku kokua i hoopoino ia aole i maopopo ka make o na aoao elua. Ma ka la 31 o Mei i malamaia ai keia hoouka kaua.
E HOOPUKA HOU IA AKU ANA HE KAUOHA
NO 100,000 KOA.
Nu Ioka, Mei 28. He lono kuikawa kai hoea mai nei i ka nupepa Herald, e olelo ana: E kahea hou ia aku ana he 100,000 koa, i ka wa e lako pono ai na koa he 75,000 i kahea ia mai ne@. A e hoomau aku no hoi o Makinile i ka hoopuka ana i na kauoha a hiki i ka loaa ana he 500,000 koa.
AOLE HE WI O MANILA.
Hongkong, Mei 30. O ka mokukaua Beritania Pique o ka papa elua, ua hoea mai oia mai Iloilo a me Manila, ua hoike mai oia he maluhia ia mau wahi a pau.
He nui ka ai e hoea la ma Manila mai na wahi e hoopuni ana i ka aina. Aia na Sepania ke kukulu la he mau papu hou, aka, he mau pu kahiko waiwai ole nae kai manao ia no ia wahi, a he uuku loa hoi na lako kaua i koe o ka pa kua.
PAHOLA KA MAI AHULAU i na
KANAKA O DUWE.
Ladana, Mei 31. He lono kai hoea mai nei ke Daily Telegraph mai Manila mai, no ka la 26 o Mei nei, e olelo ana: O na mokukaua Amerika, eia no lakou iloko o ke Kaikuono nei, koe wale no na moku liilii, ua hoounaia aku lakou no ke kiai ana mawaho. Eia ke laha nei ka mai Samola Poki iwaena o na kanaka o Diuwe. O ka mai Samola Poki keia e na aumoku kaua.
LILO KA MOKUAHI KINA MALALO O
KA HAE AMERIKA.
Wasinetona, Iune 2. Ma ka wehe ana o ka Aha Senate i keia la, ua hooholoia ae ka bila i noonooia ai no ka hoolilo ana i ka mokuahi Kina o ka Hui Mokuahi Pakipika no ka lawe ana i ka hae Amerika.
---------
KU I KA POKA A MAKE LOA
-------
Me ka haupu mua ole ia e hoea mai ana na ulia o ka manawa, pela iho la i ili aku ai na haawina o ka ehaeha maluna o Emil B. Berger, kekahi o na pua ohaha iloko o ke kihapai ohana o Henry Berger, ke kumu puhiohe o ke aupuni, ma kona halawai ana me kekahi ulia manaonao, nana i oki pu ae la i kona ola mai keia noho kino ana, i ka aneane ana e piha na makahiki he iwakalua o kona mau la hanau.
Ma ke ahiahi Poalima iho nei, a me kakahiaka Poaono nei, ua ninau aku la kona makuakane ia ia ina paha e hele ana oia no lalo o Nanakuli, elike me kana i lohe ai iaia, e hele ana oia me kona mau hoa no ka uhai holoholona ma ia mau kaha, a oia kaua i pane mai ai, ae, no ka mea, ua haawi mua aku au i ko’u ae ia lakou mamua o ka hele ana, a he mea maikai ole no’u ka noho ana, me ka hoole ana i ka’u mea i ae ai.
Ma ke kakahiaka Poaono nei, ua haalele iho la oia i kona makuakane a me ka ohana, a kaukoo pu aku la me kona mau hoa o ka huakai hoohala manawa ma ke alualu holoholona, ma ke kaha o Nanakuli, ma kela huli o Puuokapolei, a ma ka huina hoi o 13 ko lakou nui.
Ua kau pu aku lakou me na haumana Kula Sabati o Waianae ma ke kaaahi paha o ka hora 8:30 a.m., a hiki i ko lakou wa i lele ai ma Nanakuli, me ka lakou mau pu i hoomakaukau ia no ia hana U @ manao lakou o ke ahiahi la sabati ko lakou wa e hoea hou mai ai i Honolulu nei, ina aole i loaa keia mau ulia i ka pilikia.
Mohope iho o ka pau ana o ka lakou paina awakea ana, ma ka auina la Poaono nei ua mahelehele ae la lakou i ekolu mahele, oia hoi ma kekahi mau mahele elua, he eha pakahi poe oia mau mahele, a o ke kolu o ka mahele, a o ke kolu o ka mahele he elima ia poe, a o Emil Berger hoi kekahi iwaena o lakou, a o kona mau hoa hoi oia poai, oia o Allan N. Jones, W. Schmidt, E.P. Chapin, a me J. W. Harvey.
Ma ka hapalua paha o ka hora 2 o ka auina la, ua hoea aku la lakou ma kekahi kualapa pali kiekie, e huli mai ana e nana i ke taona nei. Ua lilo hoi o Emil Berger i alakai ma keia alahele a lakou i naku hele mai la, a me he mea la, he 50 kapuai kona oi mamua o kona mau hoa. I keia wa no hoi i ike ai kona mau hoa eha i kekahi puulu kao, a oia no hoi ka wa i hoike koke aku ai lakou i kekahi hoailona ia Emil Berger. O keia hoi ka wa a kona mau hoa i kali iho ai no ka wa e hoonee ai o ka lakou mau apana hana.
O kekahi o keia poe eha e kali aku nei, ua ike pono aku la oia i ke kani ana o ka pu a ko lakou hoa ma kekahi aoao mai o ka pohaku, i koke hoi iaia, a ua ike pu aku la no hoi kekahi o lakou i ka pu-a ana mai o ka uwahi o ka pu raifela, a ike aku la oia i ka haule ana aku o Emil Berger mamua. Mamua iho oia manawa ua ike aku la o Schmidt i ka lele ana o ka papale o ko lakou hoa iloko o ke ea, a o keia hoi ka wa i holo aku ai o kona mau hoa no kahi a Emil Berger e waiho ana he kino puanuanu o ka mea i pau kona kuleana ma keia ao, o Hervey o lakou ka mea i hiki mua, a nana i hoike mai ua make oia, aia hoi he kiowai koko e hoopuni ana ma kona mau helehelena, a he hoailona hoi na ka maewaewa o ka pauda i waiho iho ai.
Ua hoike koke ia mai keia lono kaumaha mai ka mahiko mai o Ewa ma ka hora 5 o ke ahiahi, a oia no hoi ka wa i hoouna ia aku ai kaaahi kuikawa no Nanakuli no ka lawe ana mai i kona kino make, a ma ka auina la sabati nei i manele ia aku ai kona @po mai ka halepule aku o Sana Anaru, no ka ilina Bihopa ma Maemae.