Ke Aloha Aina, Volume IV, Number 23, 4 June 1898 — Page 8

KE ALOHA AINA

 

HE MOOLELO WALOHIA NO KE Keikialii Alabati

Ke Kaeaea o Pelekane A ME KA Ui Madelina

Ke Kukui Uwila o Ainapo

Hoohenoia no KE ALOHA AINA

      I ka haalele ana aku o ka kaua opio a me kahi koa, na mokio pololei aku la ko laua alahele no ka papu kaua, pehea aku nei la ka huakai a kona hoa, ua halawai aku nei paha oia me na ulia pakalaki.

      O keia manawa a laua nei e hele nei, ke ano maamaama ae nei, aole no hoi i loihi ia hele ana aku a laua hoea aku la laua mawaho o ka papu a hoolono iho la laua me ka manao e lohe ina paha he haunaele ko loko no kekahi mau minute keia hoolono ana, aole hoi he mau mea a laua i lohe aku, aka, he meha pu wale no mai o a o.

      Ia wa, ua lele aku la laua a ma ka puka pa, oia no ka manawa o ka opio i kikeke aku ai, no elua manawa o keia kikeke ana aku ana, ua lohe aku la laua i ka pa-e ana mai o ka leo kalakala o kahi koa kiai puka i ka pane ana mai:

      Owai kela mawaho, he enemi anei a i ole he hoaloha paha, a i na he enemi, e hoi hou aku ma kahi au i hele mai ai, oiai, eia malalo o na koa ponoi o ka aina ka mana i keia wa, aole i ka moi powa, nolaila, e hoike koke mai me ke hoohakalia ole.

      He hoaloha, wahi a ka opio i pane aku ai.  Ke keikialii Alaferede, i hele mai nei e hoopakele ae i ka lahui Pelekane.

      I ka lohe ana o kahi koa kiai i ka inoa Alaferede, ua mihi iho la oia i kana mau olelo kikoola i puka mua aku.  A he nakeke ana, ua hamama ae la na pani puka hao o ka papu kaua, a komo aku la laua no loko a hui pu me kahi koa kiai, a hoike mai la kahi koa i na mea a ka opio i hana ai, a me ka hoakoakoa ana i na koa o ke alii powa ma kahi hookahi, a me na koa Pelekane hoi e ku kiai ana ia lakou.

      I ka pau ana o ka lakou kukai olelo ana, ua hele aku la laua nei no ka hui ana me ka opio o ke kapakila, aole no hoi i loihi loa keia hele ana aku a laua halawai aku la laua me ka opio o ke kapakila, a hai maila oia i kana mau mea a pau i hana ai, a pela no hoi laua nei.

      I ka pau ana o ka lakou kamakamailio ana, ua hele aku la lakou no kahi a na alii kipu e noho ana a kauoha aku la ia lakou, mamua o ka puka ana ae o ka la, e hoomakaukau ia na pu no ka manawa o ka hana e hiki mai ai, a e hoohuli pono aku hoi maluna o na aumoku kaua e ku mai ana iloko o ke awa.

      Ua ae aku la na alii koa, a huli aku la na opio no ka halealii, no ka nana pono ana i ko laua mau makua a me ka ohana alii o ka aina aia lakou ihea kahi i noho ai.

      I ko laua hiki ana aku i ka halealii a puni, aohe he wahi meheu no lakou i ike ia, a olelo aku la ka opio i kona hoa, ke manao nei au, ua haalele iho lakou i ke kulanakauhale nei, a ua hele kau lakou no kekahi aupuni okoa, a hoopau ae laua i ko laua huli ana ia loko o ka halealii, a hoomakaukau iho ia laua no ka iho ana i ka uwapo, oiai, ke hele ae la ka la e puka maluna o na piko mauna.

      I ka puka ana ae o ka la maluna o na piko mauna, aia hoi ua mau opio la ke holo la malama o ke kaa moi ma na alanui o ke kulanakauhale alii no ke alahele e hiki aku ai i kai o ka uwapo, kahi hoi a na aumokukaua o ke keikialii Alevina e mo-ku ana.

      Oiai ua mau opio nei e hele nei ma na alanui o ke kulanakauhale, aia hoi, ua hoopuiwa ia ae la na makaaina e hele ana ma na alanui i ka ike ana mai ia laua nei maluna o ke kaa moi, a ua haawi mai la lakou i na hoomaikai ana ia laua, a ua panai ia aku no hoi.

      I ko laua hoea ana aku ma ka uwapo, ua hoouna aku la ka kaua opio he elele no ka lawe ana aku i ke kauoha no luna o ka moku o ka adimarala o ka aoao o ka moi Alevina, e penei na olelo o loko o ka palapala a ka elele lawe kauoha i ahai aku ai.

Ia Mr. Adimarala.

      Malalo o ka inoa o ka moi Uilama o Pelekane nei, ke noi ia aku nei oe a me kou mau mokukaua e haawi pio mai, a e haawi mai i ka pane iloko o elima minute i kou wa e ike ai i keia palapala, a ina aole e hooko ia keia kauoha, alaila, e luku ia aku no oe a me kou mau aumoku iloko o ka manawa pokole.

ALAFEREDE,

Ka weli o na hilana,

      I ka hiki ana aku o ka elele lawe kauoha ma ka aoaoa o ka moku, ua iho mai la kekahi aliikoa, a haawi aku la oia i ka palapala i uwepa ma ka lima o ka koa, a mai ke koa aku i ka adimarala.

      Ia wa ua wehe ae la ka adimarala i na palapala nei, a ike iho la e  noi mai ana e haawi pio aku ka ia i kona mau aumokukaua, a i kona ike ana iho i ka inoa Alaferede malalo oia kona wa i hoomanao ae ai i kana mau mea i lohe ai i ka lahui ponoi o ka aina i ka noke i ke kamailio no keia keiki.

      Oia kana i pane aku ai i ke aliikoa, ina paha ua lawa na koa maluna o na moku no ke ku ana aku e pale i keia kauoha haawipio, ua pane aku la ua aliikoa nei me keia mau olelo.

      Ke hopohopo nei au, oiai, ua pau aku ka hapanui o na koa i ka lele iuka no ka hauoli pu ana me na koa ouka o ka aina ma ka la inehinei, a aole lakou i hoi mai, a me he mea la, ua pau paha lakou i ka hopu pio ia ma ka po nei.

      Nolaila, wahi a ka adimarala, i wahi no ko kakou niau ola e pakele ai mai keia make weliweli mai, ua ahona au e haawipio aku malalo o keia kauoha.

      Mamua ae o ka pau ana o elima minute, ua kakau iho la oia i kekahi palapala, e hoike ana hoi, ua ae aku oia i ke kauoha no kona haawi pio ana aku, a haawi aku la ma ka lima o ke koa, a mai ke koa aku a i kahi elele lawe kauoha.

      I ka loaa mai o ua palapala nei i ka elele, oia no kona wa i hoi mai ai no ka uwapo, kahi hoi a na opio e kali aku nei, o kona hiki mai, a i ka pili ana mai o ka waapa ma ka uwapo, ua lele koke mai la kahi elele e lawe mai la i ka palapala i ka kaua opio.

      Ia wa ua wehe koke ae la ka opio i ua palapala nei, a ike iho la ua hooko ia kona makemake, oia no kona wa i haawi aku ai i ke kauoha i ko laua kalaiwa kaa, no ka hoi ana aku i ka halealii, a haawi aku la i na hoomaikai ana i kahi elele, a oia ka kahi elele i panai aku ai, a hala aku la lakou no ke alahele e hiki aku ai i ka halealii.

      I ko lakou hiki ana aku i ka halealii, o ka hora 8 ia o ke kakahiaka, a e hoomakaukau ia ana hoi ka mea ai na ka moi, a i ko laua komo ana aku iloko o ka paalii ua hookuihe ia na manao o na poe lawelawe o loko o ka halealii i ka ike ana mai i na opio, a ua kukuli hoomaikai mai la lakou a pau imua o laua nei me na manao hopohopo no ko laua nei mau ola, ina e ike mai ana ka moi lokoino ia laua.

      Oiai, aole lakou i mahui mua ua paa pio ua moi nei ia po, oia ko lakou kumu o ka hopohopo ana no laua nei, me ko lakou manao ua hele ua moi nei i ka holoholo e like me kona ano mau, eia nae, ua hoopau koke ia nae ia mau manao o lakou mamuli o ka hoike ana aku o ka opio, ua paa pio ka moi a me kona mau koa i na hora o ke kuluamoe.

      I keia lohe ana o na poe a pau o loko o ka paalii i ka paapio ana o ka moi, ua hoohauoli ia ko lakou mau manao, a haawi ae la lakou i na hoomaikai ana i na lani no ka hoihoi hou ana mai i na pono o ka lahui Pelekane ma ka poholima o ke keiki opio.

      Ua hoi loa aku la no na opio iloko o ka rumi hookipa, a i ko laua komo ana aku, e nonoho mai ana he 8 mau kaikamahine opiopio, he poe wahine hoi na ua moi nei, a haawi mai la lakou i na hoomaikai ana i na opio, a ua panai aku la no hoi laua nei, a noho iho la lakou malaila e hoonanea ai no ke kali ana o ke kani mai o ka bele aina.

      O keia mau kaikamahine opiopio he mau kaikamahine ia na ke Kiaaina, a ua kii ia aku lakou i mau wahine na ka moi, a o keia mau kaikamahine hoi, aohe o lakou makemake, aka nae, aole e hiki ia lakou ke pale ae, oiai, o ua moi aia ka mana maluna o ka lahui holookoa ia mau la e noho ana, a ina paha lakou e pale ana i ka makemake o ua moi nei, alaila, e hookau ia moi ana paha ka hoopai o ka make maluna o lakou, a ae aku la lakou me ke ano hoihoi ole.

      No kekahi mau minute ko lakou hoonanea ana, ua kani kapalili mai la ka bele aina,  e hoike mai ana hoi i na poe a pau, ua makaukau na mea a pau no ka hoopiha ana aku i ka lua o ka inaina, a oia no ko lakou wa i hoonaue aku ai no ka rumi aina, no ka hoopiha ana i ko lakou mau houpo lewalewa.

      I ko lakou hiki ana aku, ua noho iho la lakou a pau maluna o ko lakou mau noho pakahi i hookaawale ia, a mamua o ko lakou hookomo ana mai o ko waho iloko, ua ku hou ae la ka kaua opio iluna no ka hoomaikai ana aku i na lani, a i ka pau ana, ua noho iho la oia ilalo a h@u@a iho la lakou i na mea hoomakaukau ia maluna o ka papaaina, a hiki i ka holo ana o Hanale ia Keonibulu.

      I ka pau ana, ua haule aku la lakou no waho o ka lanai e hoonanea ai, a i ka hiki ana ae o ka manamana kuhikuhi hora i ka hora 10, ua hoi aku la ka kaua opio no loko o ka rumi kakau no ke kakau ana i palapala kuahaua aku i ka lahui ponoi o ka aina, no ka hiki ana mai ma ka paalii.

      I ka paa ana o na mea a pau, ua kauoha ia aku la kekahi poe elele e hiki mai i ka halealii iloko o hapalua hora mai ia manawa aku, me na lio holo loa, no ka lawe ana aku i ke kuahaua a ka opio, a he manawa ole, ua hoea mai la na elele, a ua hoouna ia aku la lakou ma na kihi eha o ka aina.

 

 

HE KUAI HOEMI NUI MA KAHI O L. B. KERR

He emi loa ke Kumukuai o na Waiwai i hoopakele ia mai mailoko mai o ka Pauahi Nui o Ladana

Dekemaba 1897

Malaila o  L. B. Kerr ia wa me kana mau dala a kuai aku la oia ia mau Waiwai a pau, a ke Kuai Hoemi ia aku nei i keia wa

      Na Lole Aahu ma na kumukuai e hoopuiwa ana ia oe.  Na Hainaka me na kaekae waihooluu he 20, 25 a me 35 keneta o ke Kakini.  Na Dimiti Keokeo he 5 keneta o ka i-a. Oganadi he 12 1/2 o ka i-a. Na Dimiti kahakaha maikai loa 15 i-a i ka $1.00,  Lawn Enelani 15 i-a i ke $1.00. Lihilihi Valenciennes he 25 keneta o ka  kakini i-a.

Mai hoohala i keia wa maikai:

Ka Rumi Hana Papale.

O keia hale ua lako ia me na Paikini Hou o na Papale i hoouna ia mai Parisa a me Ladana mai, e loaa no ia oe na papala Parisa mamua o kou hele ana ilaila.  Na Papale i kinohinohi ia mai ka 1.00 a pii aku.

L. B. KERR

Honolulu - Alanui Moiwahine - Honolulu

 

BOROKA.

$10,000 MA KA $10,000 Waiwaipaa

      Ua makaukau e Hoaie aku ma ka Moraki i ka poe a pau, he mau Waiwaipaa hihia ole ko lakou.

      Ua makaukau e huli maloko o na Buke Aupuni, i na Aina pohihihi ma na ano a pau a me ka hooponopono ana ina Aina e paaia nei me ke kuleana ole.

      Ua makaukau e hana i na Palapala Kuai, na Palapala Hoolimalima na Palapala Moraki a me na Palapala o kela a me keia ano i ku i ke kanawai.

      E ohi ia no na Aie o kela a me keia no ke waiho ia mai.  E hookoia no na kauoha me ka eleu.

      Ke kono aku nei i na makamaka a pau e kipa mai ma ko maua Keena Hana, ma ka Hale ma Ewa o ka Hale pule o Kaumakapili.  Alanui Beritania.

JOHN PRENDERGAST, (Kapamawaho.)

WILLIAM MOSSMAN, (Mokimana)

Honolulu, Mei 24, 1898.  3m dl wk

 

OLELO HOOLAHA.

      E iki auanei na kanaka a pau mai keia la aku, aole au e uku na aie i aie ia ma koʻu inoa, ke ole au e kakau me koʻu pulima.

GEO. W. PAHU,

Puunui, Mei 16, 1898  1m-dly

 

W. C. AKANA Kalauki

      He Loea Mahelolelo mawaena o ka Lahui Hawaii a me na keiki o ka Aina Pua.  He makaukau oia ma ka hana ana i na Palapala Hoolimalima, na Palapala Kuai a me na hana a pau e pili ana i na Waiwai Paa a me na Waiwai Lewa.  He waipahe ma ke kuka ana

Keena Hana: Ma Kanaana, kihi o na Alanui Moi a me Alakea

feb 21-1yr.

 

R. N. BOYD

He Ana Aina, a he Agena Hoopukapuka Aina, Dala, a pela aku.

KEENA: Ma ke Alanui Kalepa, pili pu me ke keena o ka Loio Kuhina W. O. Smith.

 

OLELo HOOLAHA

       Ke papa loa ia aku nei na mea a pau he mau holoholona ka lakou e hele ana ma ke kula o Kaelepulu, Koolaupoko, Oahu, aole e kii wale i na holoholona o ua kula la, e hai mau mai i na poo o ka hui kula, o ka mea i keia hana makou e like me ke kanawai.

      O makou no me ka oiaio,

J. MAULIOLA,

KAWELO,

KAIHENI