Ke Aloha Aina, Volume IV, Number 20, 14 May 1898 — Page 7

KE ALOHA AINA

 

POAONO,  MEI 14, 1898

_____________________

 

 

HE  MOOLELO  WALOHIA

--:NO:--

ALANADELA

________

 

Ka Wahine Hoopahaohao o ka

Aahu KeoKeo.

--A I OLE:--

Ka Loea Hookani Pila o ke

Kulu Aumoe.

 

______________

 

          I keia wa i halawai mai ai o na onohi maka o Rodufa me na helehelena o Alanadela a me Walata, ua ikeiai aku la ka naka haalulu ana o kona kino, a haule aku la hoi kana pahi i haukae me na kulu koko o ka mea e waiho ana mamua ona, no luna o ka papahele, a me ka leo nawaliwali o ka mea pika i ka makau, pane mai la oia:

          E na lani e hoike mai he akaku anei keia a'u e ike nei o ke kino wailua o Alanadela i hele mai nei e lau ia'u?  A owai hoi keia kana ka i piha na make i ka inaina i like ka enaena me ka loa ahi o Gehena?  E na lani e hoike koke mai he enemi anei oia no'u, a i ole he hoaloha paha i keia wa ano.

          A i ke kuu ana iho o ka leo o ua Rodufa nei, oia no ka wa i poha koke aku ai o ka leo o Walata me ka piha inaina nana hoi i hoopaiakuli ae ia loko o ua rumi la, i ka pane ana mai:

          Aole, aole loa maua he mau hoaloha nou, aka, he mau enemi e huli ana i kou meheu, a i keia wa he pio oe na maua, a aohe hoi mea mai a nui maluna ae o maua nana e hoopakele ae i kou ola, mamua nae o ka hookau ia ana aku o ka hopena o ka make maluna ou e hoike mai oe, aia ihea kela wahine au i lawe malu mai ai, nona hoi na helehelena nani i like me ka o mahina piha o Mahealani, aohe puu au o kamawae ae ai nona, e hoike koke mai oe ano, auhea, oe oia, ua lawe ae anei oe i kona ola, me kela pahi i pauma ele i ke koko e waiho mai la iluna o ka papahele, e pane koke mai, oiai ua piha a hu ko'u kiaha no ka inaina ia oe.

          Aole he leo; pae koke aku mai ia Rodufa aku, aka, me ka hikiwawe i loaa iaia kulou koke iho la oia ilalo a hopu aku la hoi i kana pahi a paa ae la me ka makaukau nui no ke pale ana aku i kona enemi, a ia wa no hoi i loheia aku ai o Rodufo i ka ninau ana.

          Owai oe e keia aeahaukae i komo hewa mai nei iloko o ko'u home, a e hoolilo mai nei ia'u i enemi, aole au e haawi pio aku ana malalo ou, e hai mai mai hea oe i auwana mai nei a hiki i anei?

          He mea oiaio aole io no oe i ike i ko'u mau helehelena mamua, aka, e hoike aku no au ia oe me ka oiaio, ua hui no kaua mamua, aole nae me keia kino kane au e ike mai la, no ka mea ua huna au ia'u iho, a i lohe pono ai kou mau puka pepeiao owau no keia ka wahine me ka uhi make eleele.

          Ae, ua ike io no au ia oe, a ke hoomaopopo nei au i kou leo, maa nei, ke hoike aku nei au ia oe me koiaio, aole loa au e haawipio a hiki i ko'u make ana, no kela wahine opio au i ninau mai la, ua mahuka aku oia mai ia'u aku, a aia la oia ihea i keia wa.  Aole oia i hoike aku ia Walata ke hoopu la no kana mea e huli nei ma kona aoao, mamuli o kona makemake ole ikeia kana mau hana homaewaewa maluna o Alanadela.

          I keia wa a Rodufa e kamailio mi nei oia na make o Alanadela ke kaulono pono la maluna ona me na noonoo like ole hoi e lelele ana iloko o kona houpo, mamuli o kona makemake ole e hoike ae oia eia no oia ke ku aku nei imua o Walata, aka, i ka wa nae a Rodufa i hooki iho ai me ka hoike ole ana aku i kekahi mea e pili ana nona; ua hoi ono iho la kona manao, a i ka wai ua lana malie.

          O ka manao nui wale no iloko ona i keia wa o ke kaawale aku o Rodufa mai kana wahi e ku nei, i hiki ai iaia ke holo aku a puili ae i kana mea i aloha ai, a haawi aku i kana mea i aloha ai i na kokua ana he nui, a nona paha keia wahi hooheno:

 

                   Hele mai nei loko a niua,

                   A poluluhi ka manao,

                   O ka hana ka ia ke aloha,

                   E huekoni nei ia loko.

 

          Oiai, ua Alanadela nei e hoonauki nei no ke kaawale ole aku o Rodufa mai kahi aku a kana ipo e waiho ana iluna o ka papahele me ka ehaeha nui, ua hiki iaia ke ike moakaka aku i ka hana paupauaho ae o Rodika, e hookokoke loa aku ana i ke kae o ka luakupapau, a iloko no oia manawa aia hoi ua hoopuiwaia ae la oi i ka leo weliweli o Walata i ka hoopuoho ana ae me ka piha inaina.

          E kuu enemi e hoike koke mai oe i keia wa ano, aia ihea oe kahi i huna aku ai i ka'u mea i aloha ai; e hoike mai ano, a i ola e make no oe i keia wa maka o ka'u pahikaua me ke kali hou ole aku.

          Ua  hoike mua aku nei au ia oe, ua mahuka oia mai ia'u aku, a no ke aha oe i ninau hou mai ai ia'u, wahi a Rodufa i pane aku ai me ka hopo ole.

          A iloko no o keia manawa, me ke kali hou ole aku i mau minute hou no Walata e kamailio mai ai, ua oniu ae la oia i kana pahikaua e hoike aku ana hoi iaia, uo kukala ia ae la ke kaua hookahe koko mawaena o laua.

          Me ka hakalia hou ole aku, aia ka pahi a ua Walata nei ke niniu la aia hoi ko laua mau maka ke haka pono la kekahi maluna o kekahi, a iloko o ka imo ana a ka maka, aia hoi, ua halawi ae la ka laua mau medala kila, a oiliili mai la hoi na luna ahi me ke kani oeoe ana o i a laua leo weliweli e o hele ana ma na paia o u hale la.

          No kekahi mau minute keia hooili kaua ana mawaena o laua, e hili ana, e alo ana, ua ike ia aku la ka hakipu ana ae, o ka pahikaua a ua kana Walata, aka, aole ne oia hopo iho i na hauna pahi e iho alapi e iho ana maluna ona, no ka mea; I keia ike ana mai o Rodufa ua poo moku ka pahi a kona hoa paio, ua hoao iho la oia ma na ano a pau e lilo iaia, ka lanakila, aka, ua hoohokaia aku nae ia manao ana ona pela.

          A i ka manawa ana i moe uhane mua ole ai, ua kokoke loa mai kona hopena, ua ikeia aku la o Walata i ka hapai ana ae i kana pahi poomoku a ua uhau aku la maluna o Rodufa, a i kona wa i pale mai me kana pahi, ua hemo aku la ia mai kona lima aku, a lele aku la ia po kekahi mau anana ke kaawale, a me ke kali hou ole aku o Walata i manawa no kona hoa paio e lalau aku ai i kana pahi, ua pahu aku la oia i kana pahi me ka ikaika no loko o ka puuwai o kona enemi, a i keia wa no i ikeia aku ai o Rodufa i ka hehee ana iho a waiho ana iluna o ka papahele.

______________

 

          Maluna o ka mokuahi Aorange o ka Poakolu nei i holo aku ai kekahi mau Hawaii no Loko Paakai.  He poe hoahanau lakou no ka hoomana moramona.

          Me keia kaua i malamaia mai nei mawaena o Amerika Huipuia a me Sepania, ua hoike ae na Sepania i ko lakou wiwo ole, mamuli o ko lakou makemake ole e lilo ko lakou mau mokukaua i na Amerika, ua puhi maoli ae la lakou i ko lakou mau mokukaua i ke ahi.

          Ma ka hookuku kinipopo i malama ia mawaena o Kamehameha a me na poe o luna o ka mokukaua Beninetona, mawaho o Makiki, ma ka auina la o ka Poaha nei, ua lilo ka eo i ka inoa mua mamuli o ka loaa ana iaia he 32 puni, a o kona hoa he 13 wale no puni.

          Ma ke ahiahi o ka auina la Poalua nei, ua puiwa mai la he kaapio no kekahi pake me kekahi keiki pake nuku e kau ana iluna, a o ke kalaiwa hoi nona ke kaa, aole oia maluna o ke kaa ia wa.  Mamua iho o kahi noho o J. B. Atherton, ua haule iho la ua wahi keiki pake nei, a o ka mea laki loa nae, aole oia i hoopoino ia.

          Mahope iho o ka pau ana o ka paikau, ua ikeia aku ia kekahi wahine opio e ahai ia ana e ka lio mai loko mai o ke Alanui Pai Palapala, ma kahi o ka hui kaa hotele i haule ai oia, aole no nona keia lio aka, mamuli nae o na  uilani ana a ka makemake, ua kii malu aku la oia i ka lio.  Ua laki nae aole i ku konukonu loa na palapu i loaa mia O ka hora 10 ia manawa o ka po Poaha nei.

______________

 

KA  BUKE  MOOLELO  HAWAII

I  HAKUIA  E  KA

MOIWAHINE  LILIUOKALANI,

ma WASINETONA.

____________

 

P@ a hoopuka la e Li a me Shepord

o Bosetona, Amerika Huipuia.

____________

 

(Unuhiia no ka pomaikai o na poe heluhelu o

KE  ALOHA  AINA)

____________

 

MOKUNA  IV.

 

Mele Hawaii, A Me Ka Hookipa Ana I Ke Dute.

 

          O na hora loihi a mehameha, ua maalo hikiwawe ae ia me ka hauoli i ka wa e lilo ae ai o ko'u noonoo no na mele, a i ko'u wa e hoole ai i ke kokua ana mai a na mea kani, ua hiki no ia'u ke kakau i ko'u leo maluna o kekahi apana pepa.

          Ina makahiki kinohi o ka noho moi ana o Kamehameha V., ua hoike mai oia ia'u i ka mea oiaio, aohe himeni lahui o na kanaka Hawaii.  O na lahuikanaka, wahi ane, aka, koe kakou, na hoopuka ae lakou i ko lakou makee a me ke aloha, i ka aina ma kona mele ponoi, aka, ia wa e mele ia ana ka himeni o Beritania, "E ola ka Moiwahine i ke Akua," no na manawa nui.  O keia kana i makemake ai e kulai, ma o kekahi mele a'u e haku ponoi a'i Maloko o ka manawa o hookahi pule, ua hoike aku la au i ka moi, ua pau ka'u hana i ka hana ia.  O ke Kama'liiwahine Vitoria, ke alakai o ka papa himeni o ka luakini o Kawaiahao, aka, i kona make ana ma ka la 29 o Mei, 1866,  ua lilo ae la, ia'u ke alakai ana.  A maloko o keia hale, a na ia papa himeni i hoopuka mua mai i ke, "Mele Lahui o Hawaii."  Ua hoea ae ka moi no ka manao ana e hooponopono i ka'u mele i haku ai, i na huaolelo a me ka leo, a ua haawi mai hoi oia i kona mau hoapono no ka holopono o ka'u mea i hana ai. Aole wale o ka leo kana i mahalo ai, aka, ua hoopuka ae oia i na huaolelo walohia nui o ka hoomaikai no ka pili pono o na huaolelo i ka leo mele.

          Ua lilo keia i mele lahui no makou no iwakalua makahiki, a mahope hoi oia, ua haku iho la ko'u kaikunane i na huaolelo "Hawaii Ponoi."  I kona wa hoi e noho moi ana, a ua haawi aku hoi oia i ke alakai o ka hana e hana i leo no keia mele.  He kanaka Geremania oia, a  ua loaa hoi iaia kekahi leo ponoi o kona aina ana i manao ai ua pili pono, a ua lilo keia he mele lahui no na makahiki mahope mai.

          I ka wa i lilo ae nei no na makahiki kakaikahi wale no, o na huaolelo a ka moi Kalakaua i kakau ai aole ia i ike hou ia imua o ke akea, a oiai no nae, ka leo mele eia no ia ke hookani ia nei, o na huaolelo nae elike "E nana i kou Lahui," u panai ia aku ia ma kahi e "E nana i kou Lahui," u panai ia aku ia ma kahi e "E nana i kou Moi."

______________

 

NUHOU  KULOKO.

________

 

          E loaa no na palule wahine maikai loa ma kahi o Iwakami no ke 50 keneta a pii aku a hiki i ka $2.00.

          Ua loaa mai nei ia Lui Ma he mau pahu kamano hou, a eia ke kuai ia nei me ka puahi nui, e hele koke ae e kuai i kamano hau o pau  e auanei.

          Eia makou ke oili aku nei me na mea hou o ke kaua o Sepania me Amerika Huipuia.  Nolaila e lawe nui i KE ALOHA AINA, puka la i ike mau i na mea hou.

          I ke kakahiaka o ka Poaono nei i hoea mai ai ka makuahi Rio Janiero mai Kapalakiko mai a ma ke kakahiaka o ke Sabati a hoomau loa aku ai oia i kana huakai no Iapana a me Kina.

          He mai puupuu ulalii kai oili ae iwaena o kekahi limahana Iapana o ka hoi mahiko o Oahu ma ka la inehinei, a ua iho aku kekahi mau kauka no lalo olaila no ka nana pono ana i kona mai.

          Ua nalowale he pine gula mawaena o ka alanui o Kakaako a hiki i ka Haleleta e paa ana iluna o kekahi lei a'i i hoailona ia K. U. F. P., e loaa ka ukana ke hoihoi ia mai i keia Keena.

          I ka wa i lohe ia mai nei o na lono kaua maluna mai nei o ke Transit, ua hoopuka ae ka papa pai Hoku he nupepa kuikawa ma ka hora 9 o ka po nei.

          Eia makou ke puka aku nei me na nuhou makamaka loa o ke kaua mawaena o Sepania a me Amerika Huipuia. Nolaila, e lawe nui i KE ALOHA AINA i ike ia mau mea hou.

          Na ka mokuahi kolo Eleu i hoike mua mai i na lono kaua i kona wa e hookomo mai ana iloko nei o ke awa me ka mokupea Transit mamuli o kona hookani pinapinai ana mai i kona oeoe.

          Ma ka Poalua nei i hooholoia ai ke kanawai e papa ana i na poe holoi lole a pau o ka Paemoku o Hawaii nei, aole e pipi hou ia na lole me ka wai e mumu ia ana ia ana iloko o ka waha, mamuli o ka ikeia ana mai laila mai nei kekahi kumu nui loa o ka mai.

          Ua hoohuiia ae ma ka berita laa@ o ka mare o Mr. Charles K. Hopkins me Miss Lola Bush, ma ke ahiahi Poakolu nei, a ia po no ia hala aku ai laua no kahi noho o William Hunt ma Wailupe, no ka hoohala ana i na la mua o ka laua noho mare ana.

          Maloko o ka nupepa Avalataisa o ka Poalima nei i ike iho ai makou, ua loaa mai nei kekahi leta pilikino i kekahi mea maanei mai ia Kanikela Waila mai, e olelo ana, o ka manao ma Kapalakiko, he hana hewa loa na Hawaii ke kuahaua aua ae e ku kaawale oia.

 

 

 

_____________