Ke Aloha Aina, Volume IV, Number 20, 14 Mei 1898 — Page 2

KE ALOHA AINA

2          KE ALOHA AINA, POAONO, MEI 14, 1898.

 

Ke Aloha Aina

Hookumuia no ka

Pomaikai o ka Lehulehu, a he Nupepa na ka Lahui Hawaii.

 

EDWARD L. LIKE

Lunahooponopono.

EMMA A. NAWAHI.

Pauka o KE ALOHA AINA.

HONOLULU ..............MEI 14 1898

 

HE MAIKAI NO KE OLA O KALANI AIMOKU.

            Ma na lono i loaa mai nei mai Wasinetona mai, he maikai no ke ola o Kalani  noho mai la i Wasinetona, aole he mau manao pihoihoi iloko ona no keia kukala kaua i poha ae la mawaena o Sepania a me Amerika Huipuia, a pela no hoi me kona mau ukali

            O Kana wale no i upuai e pule aku ka lahui no lakou, oiai lakou iluna o ka aina e noho la me ka pioo nui. A o ke aloha no ka mea nui i haawi ia mai no ka lahui.

 

AOLE KAKOU E KU KAOKOA ANA.

            Ina he oiaio na mea i hoopuka ia ae maloko o ka nupepa Examiner o Kapalakiko, o ka la 4 iho nei, a makou hoi e unuhi aku nei ma kekahi mau kolamu o ka kakou pepa i keia la, e ike maoli ana no kakou i na hana pohoialo maoli no a ke aupuni i ko kakou mau pono.

            Eia o Dole ke onou aku nei iwaena o ka enaena o ke kahua kaua i na mokupuni o Hawaii nei, mamuli o kona ae ole ana ae e ku kaokoa keia aupuni mai ke kokua ana aku i na aupuni e kaua mai nei.

            O keia ka makou i ake nui loa ai e lohe ahea la hoopuka ae oiaa i kana kuahaua ku kaawale, a e hookapu hoi i na awa kumoku o keia mau mokupuni mai ka haawi ana aku i na hoolako ana i na moku o na aupuni e kaua nei.

            Aka, i keia wa, akahi no a huai ia ae imua o ke akea ka no’a huna a ke aupuni e upu malu neii e hana, nana hoi e hoopilihua nei i ka manae o ka lahui Hawaii, no ka mea, ma keia haawi ana aku la o ka aupuni Hawaii i na kokua ana ia Amerika Huipuia, ua hooulu aku la oia i ka inaina iloko o Sepania.

            I keia wa aia na maka o Sepania me ka piha inaina ke haka pono mai la maluna o Hawaii, oiai, o na aupuni o Europa, ua haawi mai lakou i na kuahana ana e ku kaawale ana lakou mai ka haawi ana aku i na kokua i na aupuni e hakaka nei, a ua hahai aku la na aupuni o Kina a me Iapana, ma ia alahele hookahi, e hookapu ana i ko laua mau awa kumoku aole e hoolako i na moku o na aoao elua me ka ai, aka, o kahi aupuni Hawaii, ua hoololohe iho la oia mahope me kona manao ana e haawi i na kokua ana i kona hoaloha (Amerika).

            Ua hoomama  iki ia ae nae kakou i ka wa i hoopoino ia mai la o na mokukaua Sepania e na Amerika ma Manila, aka, aole nae i maopopo ia kakou ka hopena o keia mua aku.

            O ka makou e ninau ae nei ma keia wahi, ina e makemake ana o Amerika i mau koa hou oia Dole no ke kokua ana aku iaia e kauoha mai ana anei o Dole i ka lahui Hawaii e komo i ke koa, a e paa i ka pu? Ke manao nei makou, aole e hiki ia Dole ke kue aku, a e kuahaua mai ana oia i na kanaka o keia mau mokupuni e komo i ke koa, a e holo aku no ke kokua ana ia Amerika.

            O ko lakou nei ma makemake e lawe koke aku o Amerika i na paemoku o Hawaii nei nona, me ka ike aku no nae, aia oia ma ke kae o ka hookahe koko, noke aha lakou i hoomanawanui ole ai a pau ae keia mau pioo ana, alaila, onou pono aku lakou i ka lakou mau kumuhaua i makemake ai.

            Maanei, ke hoonani ae nei makou i ka Mea Kiekie Loa, no ka mea, aole oia i ae aku i ko lakou manao e lumai aku i ka lahui Hawaii iloko o ka noho ana hookahe koko a me ka honi ana i na ea o ka pauda. E mauna ia anei ko kakou mau ola makamae no ko hai pono. Pela paha hoi la.

 

UA KUOKOA AE LA O CUBA

            Ma ke kuahaua a ka Peresidena o Amerika Huipuia, ma o ka apono ana la o ka Ahaolelo lahui o kona aina, e hoikeana, ua ike ia aku la o Cuba ma ke ano he aupuni kuokoa, a o na hoao ana a ka mana hoomalu o Sepania e keakea aku ia mau mokupuni, e komo aku ana o Amerika e kinai ia mau hana, ma o kona kokua kino maoli ana me kona mau pualikoa, na mokukaua, a me kona mau aliikoa akamai, e kokua ana i na hana kipi a pau a Kenerala Gomez, ko Cuba pukonakona hoi nana e hoonioni mau nei ka wai ua lana malie o ka noho hoomalu ana o Sepania.

            Ua hoea mai na hoike no ko laua ooki ana ae la i ka piko o ka noho hoahanau ana o kekahia me kekahi, a eia o Sepania me kona mau mokukaua hao wikani ke pii la ka ihu i ka makani no ka hanu ana aku i ka meheu o ka poe nana lakou i hoomaewaewa mai, ma ka lepo o ko lakou aina panalaau, oia hoi o Cuba, kahi hoi a lakou  i noho hoaloha loihi ai me na kamaaina oia aina me ke kuee ole.

            Aka, ua ike no kakou, a ua kamaaina pu hoi, ma na wahi a pau a na kanaka Amerika e noho ai a lawelawe i kekahi mau hana e pono ai ko lakou mau pakeke ponoi, o ka hopena aku oia aina, e komo aku ana oia iloko o ka haunaele a me ka mokuahana, a o lilo ana na hoaloha kahiko i noho aloha pu ai i mau enemi no lakou, a mahope aku oia wa, e hoea mai ana he hookahe koko weliweli ana, a e lilo ana ka aina iloko o ka poholima o ka mea ikaika.

            O ka makou keia i hoomaopopo ae la, oia hoi, ua awiwi ia aku la no ka ike ana i kela poe kipi o Cuba, ma ke ano, he aupuni kuokoa, a e ala hou mai ana no kela mau hana hoomanaonao a kekahi hapa o Amerika Huipuia i hana ai, mai ka makahiki 1861-65, oia hoi ka wa o ke kaua o na Negero, a Aberahama Linekona i haawi ai i ke kuokoa a hiki i keia la, malia paha, o poha ae no ia mau hana awaawa iloko o kekahi poai Amerika imi pomaikai i keia mau la mai.

            O kekahi hoi, eia makou ke hakilo pono nei i ko kakou kulana, mai ka wa o ko kakou nonoi ana aku ia Amerika Huipuia e hoihoi hou ia ko kakou kulana aupuni onipaa mai kinohi mai, oia koi ke aupuni alii, a hiki i ka piha ana ae nei o na makahiki elima a oi, aole no i hoolohe iki mai ka mana kau kanawai a me ke mana kau kanawai a me ke mana hooko oia aupuni a hiki i keia la, a me he mea la, e hoohalike io ia aku ana no kakou me na poe kipi o Cuba, oia hoi, “o ke kipi i lanakila,” oia aku ana no ka Amerika e apono hou mai ai. Elike me ka lakou nei ma i olelo ae ai, o ke kipi i lanakila aole ia he kipi.

            Aka, koe wale iho no keia, o ko kakou kupaa mau ana, me ka naeueu ole, oia auanei ka ke Akua o ke ahonui oe paliola mai ai maluna o kakou a pau, a e hoolilo ai hoi i ko kakou mau enemi i mea ole. E manaolana mau, aia no me kakou ka ikaika i na wa a pau, a mai hoao  kakou e hoi hope.

 

KA MOKUKAUA BENINETONA.

            Eia ka mokukaua Beninetona ke kali nei no ka loaa mai o na kauoha no kona wahi e holo aku ai, ua nalohia aku ke pena keokeo mailuna aku o kona kino, a i keia wa eia oia iloko o ka aahu kaua, a ua hamo ia aku hoi kona kino me ke pena nanahu. Aole he kauoha i loaa mai nei iaia maluna o ka mokuahi Zealandia no ka haalele ana iho i keia mau kapakai, aka, ke ku makaukau mau nei nae oia i na wa a pau no ka holo aku i ka wa e loaa mai ai o ke kauoha.

 

HE MAU HANA POHOLALO.

E Haawi ana ia Hawaii i Luahi na na Poka.

            Eia makou ke unuhi aku nei i kekahi mau hana malu a lakou nei i hana iho nei me ka manao e nalo ana, aka, elike me ka olelo a ka Buke Nui, o ka mea i huna ia ma kahi malu, e hoike ia ae no ia ma ke akea, pela io no ia i puka ae la ma ka nupepa Examiner o Kapalakiko, a penei ka heluhelu ana:

            Honolulu, Apr. 27. Ua hoouna aku la o Peresidena Dole he palapala lihi ia Peresidena Makinile, e haawi aku ana i na mokupuni o Hawaii ia Amerika Huipuia, mamuli o kona manao kaua me Sepania, a e hoolako aku i na mokukaua Amerika maloko o ka wai o ka Pakipika me na lako nanahu, lako ai me na mea kaua. O keia hana ua lawe ia mai ia e ka Aha Hooko mahope koke iho o ke kuka malu ana o ka Aha Kuhina o Hawaii, i kahea ia no ka noonoo ana i ke kulana e lawe ia ae ai e ke aupuni imua o na lahui elua e kaua nei.

            O ka nuhou o ke kukaia ia ana ae la o ke kaua mawaena o Amerika Huipuia kue ia Sepania, na loaa  mai nei ia i keia la, ma ka Mariposa mai nei, i hoea mai nei mai na Panalaau mai o Auseteralia me na hoike mai Amerika Huipuia ma ka la 16 iho nei. O ke kupakako o ka Mariposa, ua olelo ae, o ke “Kanikela Amerika ma Aukelana, ua Loike mai oia i ka wa o ka moku e holo ana, ua loaa koke mai la kekahi lono telegarapa mai ke Keena Aupuni mai ma Wasinetona, a hei ana, ua kukala ae la o Amerika Huipuia i ke kaua.

            O J. A. King, ke Kuhina Kalaiaina o Hawaii, oia kekahi o na ohua mai Aukelana mai, ua ae oia, ua loaa mai iaia ia lohe like. Mamuli o ka ikaika o keia mau hoike, na hoopuka ae la ka nupepa “Evening Bulletin” he nupepa kuikawa, a ia wa ua hoopihoihoi loa ia na kanaka a pau.

            Ua kaliea ae la a Peresidena Dole he halawai malu o ka Aha Kuhina o Hawaii, no na noonoo ana i ke kulana e ku ai.  Ua kokua ae la ka hapanui o ka Aha Kuhina me ka manao kanalua ole ma o ka Peresidena ia hoike ia ana mai la, ua hoea io ae ke kaua mawaena o Amerika Huipuia a me Sepania. Aole he mea i hana ia no keia manao i hai ia mai ai.

            Ua noonoo ae la ke Kuhina Waiwai Damon, no ka hoopuka ana ae i ke kuahaua ku kaokoa, aka, ua kue ikaika ia aku nae keia manao e Peresidena Dole a me kekahi  mau hoa o ka Aha Kuhina, a unuhi ia mai la.

            Mahope o ka hoopahee ana o ka halawai a ka Aha Kuhina, ua hoomakaukau iho la o Peresidena Dole i kana palapala malu ia Peresidena Makinile, a ua hoouna ia aku maluna o ka Mariposa, ma o ke Keena o ke Kuhina Hawaii ma Wasinetona, a nana e haawi aku i ka Mana Hooko Kiekie o Amerika. O ka lehulehu a me na Senate, e noho nei maloko o ka Ahaolelo, aole i hoike ia aku ia lakou keia mau manao i hana ia.

            Ua manaoio ae kekahi poe he lehulehu wale, o ka hoohuiia ana o Hawaii, he lawe koke ana mai ia i ka haina o ke kaua. O na alanui ua hoopiha ia ia me na lono like ole i keia la, o ka manao nui wale no e kamailio ia nei oia paha ka hooholo ia mai o ke kuikahi hoohuiaina ma Wasinetona ma ke ano he hopena no ke kana.

            O Charles Wilder, ke Kanikella Hawaii ma Kapalakiko, ua kakau aku la oia i kekahi leta pilikino loihi ia Peresidena Dole o Hawaii ma ka po nei, e hai aku ana iaia no ke kaua, a e haawi aku ana hoi i na manao i ke alahele kalaaiaina a ka mokupuni Rapubalika e hahai ai no ka launa pu ana me Amerika Huipuia. O keia leta ua hana ia ma ke ano pili aupuni, o na mea i hoea mai wai ka wa mai o ka hoopuka ia ana o ke kuahana a Peresidena Makinile.

            “Ua ao aku au ia Mr. Dole e wehe hamama ae i na awa kumoku no na moku Amerika, “wahi a Kanikela Wilder, “a e hookuu aku i na moku e hooili panahu , a e hookahua malaila.”

            O na mokupuni ma ke ano i kahua hoolulu moku, he pomaikai nui loa ia no na moku Amerika. Aohe a’u kuleana e a’o aku ai ia Mr. Dole, aka, oiai au maloko o ke kulana e ike aku i ka mea kupono loa no Hawaii, na kiola aku la au iwaho i keia manao. A ua a’o pu aku la hoi au ia Peresidena Dole, aole e kuahaua ae e ku kaokoa.

            Nolaila, e ka lahui Aloha Aina holookoa, na poe heluhelu o KE ALOHA AINA, ke ike ae la kakou la, eia ka make ma na ipuka ou e Hawaii, o keia mau mea a makou e unuhi aku nei, e ike iho ana kakou i na hana poholalo a ka poe pakaha, powa hilahila ole, a i hoopuka ia ae la ma kekahi nupepa o Kapalakiko.

            O ka mokuahi Auseteralia kekuhi i manao ia i moku lawe koa i Manila.