Ke Aloha Aina, Volume IV, Number 20, 14 May 1898 — Page 1
| This text was transcribed by: | Maggie Butterfield |
| This work is dedicated to: | Awaiaulu |
KE ALOHA AINA
UA MAU KE EA O KA AINA I KA PONO
Hookumuia i Mei 20, 1895
BUKE IV HONOLULU, POAONO, MEI 14, 1897 HELU 20
KA NUPEPA KE ALOHA AINA
E hoopuka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ka Sala kuike. Aole nupepa ma ka owili pakahi e hoouna ia ke ole e hookaa mua ia ka uku pepa
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
Ke – Aloha – Aina
Hookahi makahiki .... $2.00
Eono mahina ...... $ 1.00
Ekolu mahina ... .50
Hookahi mahina ... .20
EMMA A. NAWAHI.
Puuku o
Ke – Aloha – Aina
EDWARD L. LIKE.
Lunahooponopono a Hope Puuku
S. P. KANOA
Hope Lunahooponopono.
O na kauoha Nupepa me na hookaa Dala, e hoona pololei mai i ka Puuku ma Honolulu.
HOIKE PIHA O NA DALA O KA LUAU I HOOLILOIA NO NE ELELE.
Waikiki, Mei 8, 1898
MR. LUNAHOOPONOPONO, Aloha oe:
E oluolu oe e hoike ae i ka lahui no ka hoike piha a Keo Kaaka (J. O. Carter), no na dala o ka Luau Kokua maloko o ia hoike e ike mai ai ka lahui holookoa ua like ka hoike a Keo Kaaka me ka’u i wehewehe a hoakaka mua ai iloko o ka nupepa KE ALOHA AINA, o Maraki la 10, e ike pu iho no hoi na makamaka a pau i ke ano ka hoohana ia ana, ua kaana like ia ia mau dala uuku no na Elele eha, elike no hoi me ka lako mua o kekahi mau Elele peia no i emi mai ai ko laua haawina, a nui no ka haawina o na Elele i uuku ka laua a me ke koe o ke koena i hoihoi ia mai nei, he $67.75, a oia hoi ka’u i hoihoi aku ai ma ka lima o ka Puuku o na Elele Miss Lucy Peabody, ma ka la 5 o Mei, 1898.
Owau no ka oukou kauwa haahaa
MRS. KUAIHELANI CAMPBELL.
Honolulu, Mei 8, 1898.
NA LOAA
Dec. 15, ka huina i loaa mai ia Mrs. Campbell ma ke gula ... $ 460 00
Dec.15, ka huina i loaa mai ia Mrs. Campbell ma ke siliva .. 1,013 10
Dec. 21, ka huina i loaa mai ia Miss McIntyre ... 1 00
Huina a pau o na loaa .... $1,47410
NA HOOLILO
Dec. 18, ukuia ia Mrs. Kakulia, ma ke kakuoha $ 700
Dec. 23, ukkuia i ka Banako no ka malama ana 10 10
Dec. 27, ukuia ia Mrs. Kaulia, ma ke kauoha 7 00
1898:
Ian. 1, ukuia ia Mrs. Kaulia, ma ke kauoha 7 00
Ian. 5, hoouna ia Liliuokalani no na dala i haawi ia ae i na Elele Kaulia a me Kalauokalai ma Wasinetona mamua o ko J. O. Carter hiki ana aku 500 00
Ian. 5, ukuia ia Mrs. Campbell no na lilo o ka Luau 800 00
Ian. 5, ukuia ia Mrs. Campbell no ka waihona o Mrs Kaulia 75 00
Feb. 9, ukuia ia Kalauokalani i ka wa o J. O. Carter i hiki ai i Wasinetona 50 00
Feb. 9, ukuia ia Kaulia 50 00
Feb. 11, ukuia ia Rikikini 50 00
Feb. 22, ukuia ia Kaulia 75 00
Feb. 22, ukuia ia Kalauokalani 75 00
Feb. 22, ukuia ia Auld 25 00
Feb. 25, ukuia ia Rikikini 75 00
Feb. 26, ukuia ia Kalauokalani 100 00
Feb. 26, ukuia ia Kaulia 100 00
Feb. 26, ukuia ia Auld 100 00
Feb. 26, ukuia ma Wasinetona no na lilo $700 3 50
Apr. 29, ukuia ma Honolulu no na lilo o $700 10 50
Apr. 30, koena i hoihoiia ia Mrs. Campbell 67 75
Huina a pau o na hoolilo $1474 10
J. O. CARTER
Honolulu, Apr. 30, 1895
P. S. – O na dala i hoouna ia aku ia Liliuokalani, ua haawiia aku ia Kaulia he $250, a ia Kalauokalani he $250.
KUKALA IA KE KAUA MAWAENA O AMERIKA HUIPUIA A ME SEPANIA
Ma na lono i loaa mai nei maluna o ka mokupea Transit ma ke ahiahi o ka Poaha nei, oia no keia, ua hoea ae la ke kukala kaua mua loa a Amerika Huipuia ia Sepania ma ka la 22 asku nei o Aperila. I ka wa o ka poka mua loa a ka mokukaua Amerika Nashville i ki aku ai i kekahi mokuahi hali ukana i piha me ka papa o holo ana no Rotterdam malalo o ka hae Sepania a nona ka inoa o Buena Ventura.
I keia manawa no i moku ae ai o ke kaula e hoopaa ana ia laua i mau hoaloha pilipaa, a lilo ase la laua he mau enemi e hoohana ana maluna o ko laua ikaika a me ka noeau ma na mea kaua, a na ka mea auanei o laua e liko pio ana, e lawe ae i na kaumaha o na koi poho koikoim elike me kas kona hoa paio i makemake ai e hookau mai maluna ona.
Mamuli o keia hoao mua ana o na aumokukaua o Amerika Huipuia e hopu wale i na moku i lako ole i na mea kaua, a e kipu wale aku me ke kue ole ia mai, i wehe hamama ae i na puka e kono like aku ana i ke aupuni o Sepania e hana aku ia hana hookahi maluna o na moku e holo ana malalo o ka hae Amerika, a me he mea la, oia no ke kumu o ka hopu pio ia ana o ka moku Shenandoah.
E nui mai ana na moku powa ma keia mua aku e holo ana maluna o na ale hulala o ka moana, e pakaha anas hoi i na waiwai a na moku halihali waiwai e lawe asna a e puhi wale aku ana i na moku i ke ahi, e like me ko lakou makemake, a ma keia mua aku e kau ana ka weli o ka moana Atelanika a me ka Pakipika nei i na poe moku hali waiwai, no keia mau moku powa, e like me ka moku powa Alabama e kau ia ana ka weli i kona mau la i hala aku la.
Ke kani mai nei ka aka a kekahi poe i ka lohe ana mai nei ua hopupio ia he elua mau mokukakua Sepania, aka, alia nae e pupuahulu, no ka mea, aole oe i ike i ka mea e hoea mai ana i ka la apopo.
Nolaila i keia wa i poha ae la o ke kaua e noho hamau e ka lahui a mai hana hoi i na hana e ulu mai ai o ka inaina o kekahi o na aoao e kue nei, oiai, ua piha laua me ka huhu, a he uuku wale no kau mea e kamailio aku ai e okalakala mai no auanei oia a makemake e hoohaunaele.
UA MAHUKA MAI KA PA HOOMALU MAI O KALIHI
Ma ka hora 7 o ke ahiahi Poakahi nei, ua mahuka mai he Kilipaki mai mai ka pa hoomalu ma’i mai o Kaliho. He oopa keia Kilipaki, a ua manaoia aole oia i kaawale loa mai ka pa hoomalu mai. Ua hoea aku na makai ma kona home maloko o ke kulanakauhale nei, aka, aole nae oia i loaa. Ua hoike mai kana wahine i na makai, ua hooholo kana kane ua oi aku kona pono e lawe i kona ola ponoi iho mamua o kona lawe ia ana aku i Molokai, eia no na makai ke huli nei i kona wahi i pee ai. He Kilipaki oia i loaa i ka ma’i hookaawale ohana, a e hoomalu ia ana hoi ma Kalihi me ka makaukau no ka lawe ia ana aku no Molokai.
UA HOOLAHA AKEA AE LA
Ua hoolaha mai la ke Kuhina Beritania Kenney i kona mau kupa e noho nei ma Hawaii nei, na ku kaawale loa o Beritania m ai ke komo ana aku e kokua, ma keia kaua mawaena o Amerika Huipuia a me Sepania. A o ka makou e kali aku nei a hea la hoi hoolaha akea ae o Dole, ua kuokoa ke aupuni Hawaii mai ke komo pu ana aku iloko o keia kaua.
EIA HOU NO KEIA AIHUE
He elua mau aihue maloko o keia pule a ka oihana makai e huli nei. He hookahi ma kahi o S. Philips, he kanaka opio e noho nei ma Garden Lane a ua lilo aku he $40 nana a me kona hoaloha.
O Mr. Beardmare o ka hui o Irwin o kona wahi kekahi i komo aihue ia a lilo aku la he pahu pooleta nona ka waiwaiio maluna aku o $200. Mai kona home i lilo aku ai o keia pahu poo leta, ma kahi kokoke i ka Ema Kuea.
NA MAKE O KEIA MAU LA
May 3 – Kalanui (w) 1 mk no Kamanuwai
“ 4 _ Keoni, 70 mk no Kapalama
“ 5 – Joe 3 wks. no Manoa
“ 6 – Kalilioku, 50 mk. no Kakaako; Kalani, 2 wks. no Kalihikai.
“ 7 – G. W. Keaweamahi, 45 mk, no Kalihi.
Ua hoopai ia o Libeka (w) ima ka Poalua nei, n ka limalima i ko hai mau pono, he hookahi mahina hoopaahao maloko o Kawa.
Ua hoea aku la ke alahao i ka uwapo o Waialua i keia wa, a ua manaoia mamua o ka la 1 o Iune ae nei e kapalulu loa aku ai ke kaaahi i lalo o Waialua.
Ua lilo i ka Regimana ka eo o ka hookuku kinipono i malamaia ma ka Poaono nei, mamuli o ka loaa ana iaia he 21 puni a o ka Honolulu he 6 wale no puni, ma ka auina la o ka Poaono nei.