Ke Aloha Aina, Volume IV, Number 19, 7 Mei 1898 — Page 6

KE ALOHA AINA

 

6         KE  ALOHA  AINA   POAONO,   MEI   7,  1898.

 

KA  BUKE  MOOLELO  HAWAII

I  HAKUIA  E  KA

Moiwahine  Liliuokalani,

ma Wasinetona.

 

Pai a hoopaka ia e Li a me Shepord

o Bosetona, Amerika Huipula.

 

(Uauhua ia, ka pomaikai o na poe

heluhelu o KE  ALOHA  AINA)

 

  Mahope o ka hora 5:30, ua hoea mai la ka Moiwahine Emma, a haawi mai la i ke aloha, a ninau mai la i na paha ua lohe oia i kekahi mea e pili ana i kona kaikuahine, ua hoole aku oia. Ua hoike mai la oia me ke ano hikilele, o ke kamaiki i hoea mai i keia ao, ua lawe ia aku la ia ma ke ano nana ponoi e Mrs. Bishop he hora a oi mamua aku. O keia hana ia ana, aole ia i kuikahi me ka manao o ke Keikialii, a hoopuka ae la oia, aole he mea ana e hana aku ai no ke kamaiki opio. Ua hooko oia i kona manao iloko o hookahi pule, me ke koi aku i kona kaikuahe Ruta, e lawe mai i kuu kaikunane William Pitt Leleiohoku i keiki ponoi nana ma ka hoohiki ana ma ke kanawai, ana hoi i lawe hanai ai i kona wa i hanau ae ai no. He elua ana palapala i waiho a aku ai i kona kaikuahine no ke kakauinoa ana. He hookahi e haawi lilo ana oia i kana keiki ia Mrs. Bishop, me ka hookaawale loa ana aku iaia mai kona mau waiwai aku a pau, a o ka lua e lawe mai ana oia ia William Pitt Leleiohoku i keiki, a i hooilina no kona mau waiwai a pau. O ke keiki i lawe ia ai e Mrs. Bishop, ua kapa ia aku kona inoa o Keolaokalani a iloko o eono mahina ua make aku la ola, ua noho kuu kaikunane a hiki i kona lilo ana i hooilina moi, a e lawe ae hoi i ka nohoalii ka wa e kaawale aku ai o Kalakaua.

  Mahope iho o ka huakai kaapuai a ke Keikialii Lota i ukali ia e kona mau hoahele, ua hoea mai la makou i ka mokupuni o Maui, a malaila makou i manao ai e noho loihi, aka. mamuli o ka ma'i o kona hoahanau ka moi e noho ana ia wa. Ua hoike ia aku o ka lohe iaia ke hookokoke mai la ka hopena o ka make maluna ona, a ua makemake ia oia e hoi mai i ke kapitala, nolaila, ua hoi mai la ke alii me ka hakalia ole no Honolulu, a malaila i make ai o Alexander Kamehameha IV, ma ka la 30 o Novemaba 1863, mahope hoi o kona noho moi ana no eiwa makahiki, a i kona wa i make ai he kanaka opio wale no oia o 29 makahiki. O ka Moiwahine kanemake  Emma, aole oia i hoea hou mai imua o na anaina akea. Ua holo aku oia no Enelani i ka 1865, a ua hookipa ia aku oia elike me kulana i loaa iaia. Ua huli hoi mai oia ka 1866, maluna o ka mokukaua o Ameril a Huipuia Vanderbilt, o alakai ia ana e Adimarala Henry Knox Thatcher, a ua hoea hou aku he lono kaumaha imua ona. oia hoi, ka make ana o kona mahuahine hanai, Mrs. T. C. B. Rooke.

  Ma ka pii ana aku o ke Keikialii Lota ma ke auo o Kamehameha V, oia ka hope loa o na Moi Hawaii e lawe ana ia inoa o na Moi Hawaii e lawe ana ia inoa, a ua koho koke ia no hoi ka'u kane kakauolelo pilikino a i hoakukakuka nona, a ma ia kulana hoi oia i noho ai a  hiki i ka pau ana o kona nohoalii ana. Ua hoopuni ia ka moi mo kona mau kanaka ponoi, me lakou hoi i hoike aku ai oia i kona manao lokahi, aka, ua hoike aku nae ke alii i kona paulele i ka'u kane, no ka mea, nana e ao aku iaia no ka kumuhana ano nui e pili ana no ka lehulehu. O kuu kane, ua hoolilo ia oia he Kiaaina mahope mai no ka mokupuni maloko o laila o Honolulu e ku nei, a oiai, oia hookohu ia ana no eha makahiki wale no, aka, na koho hou ia aku i na wa a pau, me ka hoohakalia ole ia ai ole no ka noonoo ana elike me ka loihi o kona ola ana.

  O kekahi apana hana oloko o kana oihana aupuni, oia no ke kaapuni ana i ka mokupiuni i hookahi manawa iloko o ka makahiki, he hua kai oluolu keia a ua ukali mau aku au iaia ma keia huakai. Mawaho ae o keia kulana he lehulehu wale na keena ano nui i paa ai malalo o ke aupuni Hawaii, i kekahi wa he Kiaaina oia no ka mokupuni o Maui, he Komisina no ka hooponopono ana i na aina Leialii, he ukali oia no kuu kaikunane, ke Moi Kalakaua i make, i kona wa i kipa mai ai i keia aina i ka 1874 no ka manao i ke kuikahi panailike, a mahope mai he hoa elele Hawaii, a kipa mai i keia aina a me Beritania Nui i ka 1887, e hoike aku no ko makou lahui ma ka Iubile o ka Moiwahine, Aka, ma ka haule lau o ka 1891, o Kiaaina Dominis, he Lutane'a Generala no ke aupuni Moi a me ke kulana o Ka Mea Kikie Hoa o ke Keikialii, ua hoomaka mai la ka emi hikiwawe ana o kona ola kino, a ma ka la 27 o Augate oia makahiki no, he ehiku mahina mahope o ko'u pii ana ae'i ka nohoalii, ua make iho la oia. O kona kino make ua waiho ia me ka hanohano maloko o ka halealii, a ma ke Sabati, Sept. 6, ua kanu ia aku oia me na hoohanohana alii.

  O kona make ana, ua hoea mai ia i ka wa o kona ike lehulehu, kona ano aloha a me kona ike ia ma na wahi a pau, i kupono e lilo i mea alakai no'u, a nona aole he pani e hiki ke loaa. Ua olelo mau ae au, ua oluolu i ka Moi Kiekie o na lahui kanaka ka lawe ana aku iaia mai ia'u aku i ka manawa a'u ike iho ai ua makemake i kana mau kukakuka a me ko maua noho pu ana.

 

MOKUNA  V,

MELE HAWAII, A ME KA HOUKIPA ANA

I KE DUTE.

  O na kanaka Hawaii mai ka wa i maopopo ole he mea aloha na lakou ke mele a me ka haku mele ana, a ua pili pono na mele no na moolelo na mele hoalohaloha, a me na mele no ka pule ana, nolaila, o ke hoomaikai ana i na poe ola a me ka uwe kumakena i na poe make aia me lakou, aka, e like me ka nui o ka manao aloha e hoopuki ia ana. O ko'u mau makua, ua makana ia lakou me keia haawina. a he kakaikahi loa na mea i hakuia me ke mele o Hawaii, koe wale no na mea i hoopuka ia ae nei e a'u.

  I ko'u mau la e hele ana i ke kula o ko'u aapo ma ka heluhelu ana i na hua mele ma ka ike wale aku no, ua hoomaopopoia ia e ka'u kumu. ma na kula a'u i komo ai, a'u hoi i hoike mua ae nei, he hookahi keiki ma kuu aoao i hiki ke heluhelu aku i ka leo oia hua mele a ke kumu i makemake loa e haawi aku i na haumana. O kona inoa a'u e hoomanao nei o Willie Andrew. O na mele i hoao mua ole la ua haawi ia mai ia ia makou, a ua himeni aku makou ma na hua mele, a o ke koena aku o na haumana, ua ukali mai lakou ma ka hoolohe ana me ko lakou mau pepeia a hiki i ka wae maopopo pono ai i na mea a pau i akoakoa mai i ka leo o ua mele hou la. Mahope o ko'u haalele ana'i ke kula, ua hoomau aku no au i ke a'o ana i ke mele i na wa kupono e loaa ana ia'u aka, aole nae au i hoomanao o hoea mai ana ka la e kakau ana au i na hoaolelo a i ole o na mele no na wa oia mau mele i makemake ia. O ka haku ana ua like no ia me ka hanu ana, o keia makana i loaa wale mai, aole ia i kaawale aku, a ke waiho nei ia me ka lana o ka manao a hiki i keia ia. Aole @au i helu i ka nui o na mele a'u i haku ai, aka, ua maopono no ia'u aia ia maluna aku o na haneri. O keia mau mele aole i oi aku maluna o ka hapaha i pai ia, aka, he lehulehu wale o lalou e makemae ia nei a ua pau loa.

 

NA  MAKE  O  KEIA  MAU  LA

 

    May 2--Kalanui, 1 mk. no Kamanuwai.

    May 3--Tabun, 12 mk. no Leleo.

    May 4--Keoni, 70 mk, no Kapalama Mariano Pedro 35 mk, no Pauoa Iaovani Hanghtailing, 1 m. no Kapalama.

 

  Ua weheia ae la ke Keena o ke Kanikela Amerika Heywood, i na poe a pau e makemake ana e hele aku e hoopaa i kona inoa no ka hele ana i ke kaua i ka wa e leheia mai ai, na poha ae la ia mawaena o Amerika Huipuia a me Sepania. ua kupono loa ia lakou nei ma ae e komopu aku e kokua i kona hoaloha e hookokoke aku la i kau wahi o ka hookahe koko.

 

E  HOOMANAO  IA  ANA.

 

  Eia na poe Pelekane o ke kulanakauhale nei ke liuliu mai nei no ka haawi ana aku he mau hoohiwahiwa ana i ka la hanau o ko lakou moiwahine Vitoria, ma ka ia 24 ae nei o keia mahina. A o ka piha ana hoi ia o na makahiki he 79 o kona ola ana i moiwahine no Beritania Nui a me na Pahalaau he lehulehu wale e noho hoomalu ia nei e ia.

  Ma ka po oia la i hoike ia ae la, e haawi ana kona mau makaainana ha aha huluhula nui ma ka Paka Kuokoa, a o na pomaikai e loaa mai ana e waiho ia aku ana ia iloko o ka waihona o ka Hui Kokua o Beritania.

  O ka Moiwahine Vitoria oia hookahi ka moi kahiko loa maluna o ke kalaunu e nohoalii nei i keia wa, aka, he oia mau no ka ikaika o kona mau lala, a e ike aku ana no ia i kona la i poni ia ai i moi no Beritania Nui. O ka makou e kalokalo ae nei e ola loihi ka'moiwahine i ke Akua.

 

EIA  HOU  NO  KEIA HOLOHOLONA

 INO.

 

 Ua hoike ia aku ka lohe ia Porofesa Koebele, ka haole nana e hookomo mai nei i kekahi mau holoholona liilii iloko o na mokupuni o Hawaii nei, no ka hoopau ana aku i na eleao a me na auhuhu ai laau e hoopoino mai, nei i na laau. O ua lono la i hoike ia aku iaia, mai a Mr. Mendoca o Kaneohe a me Mrs. Jaeger o keia kulanakauhale.

  Ua like loa me ka nalo nunui ke ano o keia ano nalo, a ua hoopilikia aku hoi lakou i na bipi. O ko lakou wahi e noho ai maloko no ia e ke kiwi o ka bipi aka, ua hiki no nae ia lakou ke hou i ko lakou kui no ke omo ana i ke koko ma na wahi a pau o ka bipi. Ua lawe ia mai keia nalo mai Amerika Huipuia he elima mahina i hala ae nei. Aole he nui loa kona hoopoino ana i na holoholona e ae, aka, o ka bipi, ua hoowiwi ia aku e keia ano holoholona. Ua lohe ia mai ke huli nei ka o Porofesa Koebele i ka holoholona nana e luku aku i keia ano holoholona omo koko

 

KA  AHA  KAAPUNI.

 

  Ma ka hora 10 o ke kakahiaka Poakahi nei i wehe ia ai o keia kau o ka aha kaapuni, imua o Lunakanawai Perry, a mahope o ke kahea ia ana o na hihia o keia kau, ua lawe ia mai la ka noonoo hou ia ana o ka hihia o Henry Laning, a o ka hopena ua hookuu ia oia.

  Na hihia i hoolohe ia ia la Chas. Oio, no ka pili waiwai uku i ka hoopai.

  Geo. Malins, no ka hoeha ae i ka hewa.

  Kaapaua, n ka hoeha, uku i ka hoopai.

  Mahoahoa, no ka aihue, hool@ i ka hewa.

  Ah Loy, hoopaneeia a Poakolu

  Ma ka Poalua nei i hoolohe ia ai o ka hihia o Helen Hilo a me John Hilo, no ka hana i banako si-fa, hoopai ia ka mea mua he $100 o ka mea hope he $50.

  O Kaeo no ia hewa hookahi no ua hoopai ia oia he $100.

  O J. Gilman, no ke komohewa i ko hai wahi me ke kuleana ole ahewa ia oia o na kiure, ua hoohalahala aku la nae kona lolo e hookolokolo hou ia.

 

HE  BILA  KANAWAI  ANO  NUI

 

  Maloko o ke Senate ma ka Puakahi nei, ua heluhelu ia mai he bila kauawai no na poe e paa nei i na oihana aupuni, na ke Senate Kepoikai o Maui, a ua hooholo ia ma ka heluhelu mua ia ana. O ka manao o ua bila la, aole he pono o kekahi mea o hookohu ia ma kekahi oihana malalo o ke aupuni Repubalika o Hawaii, koe wale no na poe i hanau ia ma keia mau mokupuni o Hawaii, a i ole o na poe i hookupa a i ole o na poe i loaa ka mana kuikawa no ka hookupa ana a i ole he palapala e hooia ana iaia he kamaaina.

  Ina e hooholoia ana keia bila a Senate Kepoikai e ka Ahaolelo. he mea maopopo loa e pau ana ka hapanui o na makai dute awa o ka Hale Dute. O na Keena e ae kekahi, e hanaia aku ana e like me ia

  Ma na apana kuaaina, koe o Hilo aole mau kanawai kuikawa, koe wale no o na poe i hanau maanei i Ialo no o na poe i hanau maanei i Iawe i ka hoohiki ma ka wa o ke kakauinoa oia kai ae ia. Ua olelo ia e hooholoia ana keia e ka hanaui o na Hale elua, a i ka wa e kakauinoa ai o ka Peresidena, mahope kokoke aku no oia manawa e hoohana ia aku ai o na kanawai la a pau aku kekahi poe malihini i ke pekuia mai na oihana aupuni aku.

 

  He elua mau kanaka Iuu e hoomaemae mai nei i ka iwikaele o ka Beninetona i keia mau la.

  E malama ia ana he hukihuki kaula maloko o ka hale keiaka lio ma ka po o ka Poalua ae nei.

  Ma ka Poalima a i ole Poaono aku e hoomau aku ai ka mokuahi Paroo i kana huakai no Vitoria ina nae e pau koke ana ka nanahu i ka hoolei ia mai.

  Eia na poe o Puowaina ke hoohalahala mai nei i ka loaa ole ia lakou o ka wai i ke ao holookoa no ka mea, i ke kakahiaka a me ke ahiahi wale no i ae ia ai lakou e loaa ka wai.

  Ua hoopau loa ia ka hui kinipopo Uniona mai ka paaui hou ana i ke koena o keia kau kinipopo, mamuli o koua nawaliwali loa i ke kue ana aku i na hui @i@aipono Regimana a me Honolulu