Ke Aloha Aina, Volume IV, Number 19, 7 May 1898 — Page 5

KE ALOHA AINA

POAONO, MEI 7, 1898

 

popoia ai o ko kakou hakaka ana me Sepania, aole ia i hookahuaia maluna o ko kakou makemake ana e lawe mai i ala i teritori hou.  Oiai, na hiki i kekahi hupo ke ike o ko kakou kailiku ana mai i na mokupuni o Hawaii, he hookau ana iho ia maluna o ko kakou mau poo na manao hoowahawahaia a me ka huhu o na lahuikanaka. 

     "O ka moolelo e kaili ia ana o Hawaii ua hookumuia ia iloko o ka lolo o ke kanaka hupo."

 

He Ipu Alabata ka wahine noho pono na kana kane.  A he aniani kilohi hoi ke kane noho pono na kana wahine.

 

     He mau hoahanau mahoe na hopuna olelo a ko kakou poomanao keia la, a i hoohanau ia mai hoi imua o ko kakou mau kii onohi maka i wahi inamona komikomi i ka welelau lima no ka mea heluhelu. 

     A wahi a Solomona ka noeau, "he papale alii ka wahine noho pono i kana kane," a wahi hoi a ka mea kakau, he poi uouo kaohi puu, a he lawalu i ʻ a halelo ke kai ka wahine noho pono na kana kane. 

     Aia he mau auiui ale mawaena o ke kane a me ka wahine noho pono a e like me ke ko ana a ke au o ka moana i o a ianei, pela no ke ko ana a ke au o ka manawa, mawaena o ke kane a me ka wahine, oiai ko laua mau la e ola pu ana me ka olioli hookahi ana. 

     He oiaio no hoi ma na ano a pau ua hana io ia mai no ke kane na ka wahine i aniani kilohi no kona lumi hookipa, a o ka wahine hoi, i wai mapuna huihui e hookena ana i ka mea makewai, a ua like no hoi oia me kekahi kumu laau maikai, lupalupa, uliuli lipolipo kona ulu ana, a e hohola ana hoi ka malu o kona mau lala maluna o ke kahua ana e ku ana, pela no ka wahine noho pono e pahola ana i kana mau hana maikai imua o kana kane. 

     O kona mau maka nanaina aloha he opu malumalu ia no kana kane a me kana mau keiki, a o kana mau hooponopono ana me kana hana no ka pono o kona home, he kihapai hoonani ia e ulu pohai ia ana e na wehi like ole o na pua aala kupaoa, a o na hopuna olelo a pau e puka mai ana mailoko mai o kona waha e maona no auanei ka pepeiao o ka mea lohe i ka momona.

     O keia iho la ke kulana oiaio o ka wahine noho pono imua o ke ao holookoa, a o na kamaaina o kahi ana e noho pu ana a me kona lahui kanaka na hoike no kana mau hana, a pela no hoi me ke kane noho pono, kohukohu na hookaunu ana o kekahi a me kekahi, na hoohali olelo ana, a me na hana a pau i makemake ia laua, a o na keiki no e loaa mai ana mai na makua maikai mai, he mau keiki maikai wale no ka hapanui o lakou, oiai ko laua mau la e ola ana, he oiaio, o ka pono a me ka hoopono, oia auanei ke kahua e ko laua mau kapuai wawae a ua kukulu ia hoi maluna o ke kahua o na luna olelo a me na kaula o Iesu Kristo iho no ka pohaku kumu o ke kihi. 

     I ka hoopau ana i ka ʻ u epizetole, e ae mai ia ʻ u i kau wahi kaawale o kou waihona hoahu waiwai no nei wahi puolo aloha, e pahola ia aku la imua ou e ka mea heluhelu, a ua ka lokomaikai o kona uhane aloha e hoolewa loa aku ia oe i na mea i koe aku. 

 

HE MAU LEDE HAWAII MIKIALA HANA.

     He mea hauoli no makou ka ike ana aku i kekahi mau lede Hawaii e wehe ae ana i mau hale oihana ponoi no lakou me ke kaukai ole ana aku a na na kane wale no e huli i ka pono o ko lakou noho ana, aka, ua hapai ae lakou i na hana e huli pu ana i kahi loaa e mahuahua mai ai o na pomaikai o keia noho ana. 

     Aole i liuliu ae nei o kekahi mau lede Hawaii i wehe ae nei i hale oihana humuhumu lole no lakou ma kahi kokoke i ko makou nei keena hana, nona ka inoa o Makalei, aia hoi, ua wehe hou ia ae la kekahi hale humuhumu lole e kekahi mau lede Hawaii ma kekahi rumi maloko o ka Hotele Occidental, a nona hoi ka inoa o Lei Ilima, ma ka Poakahi nei.  He mau hana maikai keia a keia mau lede i hoomahui ae la, a o ka makou e upu nei, e hooholomua ia aku ka lakou oihana e lawelawe nei, a e hooholomua ia hoi me na pomaikai he nui. 

 

UA MAKAUKAU NO KA HULI HOI.

     Eia ka mokukaua Beninetona ke ku nei me ka makaukau no ka haalele ana iho i keia awa a huli hoi aku no ka home, a e kali wale ana no ka hoea mai o kahi mokukaua Beritania no ke kiai ana i keia mau mokupuni.  E huipu aku ana oia me na mokukaua e kiai nei i ka moana Pakipika, oia hoi ka Piledelepia, Kaletona, Mohikana, Monterey, Mariona, Wheeling a me kekahi mau mokukaua e ae.  Ua makaukau oia i na wa a pau no ka holo aku.  Aole i maopopo i na luna aupuni ka mokukaua Beritania e hoea mai ana, aka, ua manao wale ia no nae o ka mokukaua Beritania Leander, o keia mau lono i hoea mai ia ma o Adimarala Mila la, mamua o kona haalele ana iho nei ianei no Amerika Huipuia maluna o ka mokukaua Pekina. 

 

     O na poe a pau e makemake ana ia Kanamu, e hookani ae i ke telepona helu 84, a i ole, i kona kaa pio helu 143, e loaa no au ia oukou mai ke ahiahi a hiki i ke ao ana, mai ka hora 5 a hiki i ka hora 7 o ke kakahiaka nui. 

 

KUHIHEWA IA UA MAKE I KA LAAU MAKE.

     Ma ka Poakahi nei, ua malama ia ae he aha koronero maluna o ke kino make o kekahi wahine Pake nona ka inoa o Li See i make hikiwawe ma ka la Sabati nei. 

     He nui na mea i kamailio ia nona, ua olelo ae kekahi poe, ua make oia mamuli o ka hooinu ia ana i ka laau make, a o ka kekahi poe hoi, ua make no kona kaumaha i kana kane i make he mau la aku mamua. 

     Ua lilo keia mau olelo he mea na ke aupuni e kanalua loa ai, nolaila, ua kauoha ia aku na kauka a me ka aha koronero, i ke kumu o ka make o keia wahine pake, aka, mahope o ka huli pono ana o na kauka a me ka aha koronero, ua hooholo iho la lakou na make oia mamuli o kona piha kaumaha no kana kane, no ka mea, aole he mau hoailona maewaewa e kau ana maluna o kona kino.  Ua hoopuiwaia ae kekahi poe Pake i ka lohe ana i ka make hikiwawe ana o keia wahine pake, no ka mea, i ka hora 2 no oia auina la, ua ikeia no oia o ola ana, aka, he hookahi wale ho hora mahope mai na loaa aku la oia e waiho ana iluna o kona wahi moe na make. 

 

NA MAKE O NA HAWAII.

     No ka pomaikai o ko makou poe heluhelu ke hoopuka aku nei makou i ka papa inoa o na make o ke kulanakauhale nei o na kanaka Hawaii me na lahui e ae. 

Apr. 29--Balentin Watson (w) 6 m. Kewalo; Wm. Paalua, 2 m. Kukuluaeo; Kuikani Waiau (w) 45 mk. Halewaapa Healani; Bebe Cornwell 11 m. Kakaako.

Apr. 30--Mary Kaalawai Pearson 54 mk. Honuakaha; Samuel Kanelaau, 8 m. Waikiki; Makalapua (w), 1 mk. Waikahalulu. 

Mei 1--Jas. Stephen, 59 mk. Kawaiahao.

Mei 2--Kapo, 40 mk. Kunawai.

 

MAKE MA KA MOANA.

    Ma ke ku ana mai nei a ka mokuahi Pekina mai Kina a me Iapana mai, ua lawe pu mai la oia i ke kina make o kekahi wahine opio Geremania nona ka inoa o Miss Noack.  Mai Iokohama mai keia wahine i kau mai ai, me ka manao ana e holo mai ianei e imi ai i ola no kona kino, aka, mamua ae nae o ka hoea ana mai o ka moku ianei ua make iho la oia.  Aole ona ohana maanei, ua haawi ia aku kona kino make ia H. H. Williams, a ua lawe ia mai ke kanu ana iuka nei o ka aina. 

 

KE HOOMAKA MAI NEI KA AIHUE.

     Elike me ka makou i hoike mua aku ai e nui mai ana ka aihue a me ka powa e hoea mai ana ma keia hope aku, pela io no ia e hoea mai nei.  Ua komo aihue ia aku kahi o T. H. Davies mamua koke aku nei no, i ka po o ka Poalima nei.  Ua komo aihue hou ia aku la kahi o Waila Ma a lilo aku la he $34. 

     Ma ka po o ke Sabati nei ua loaa aku la ka puka aniani a ka aihue i komo mua ai ma hahi o T. H. Davies, e hamama ana i kekahi makai, ua hoike ia aku ka lohe i ka oihana makai, a i ke komo ana aku a na makai e huli i na he mau mea kekahi i nalowale o loko, ua ikeia iho e waiho maikai ana no na mea a pau. 

     A ia po hookahi no, ua loaa aku la ka puka aniani o ka halekuai o Hakapila Ma, ma ke alanui Moiwahine, e hamama ana, aka, aole nae he mau mea i hoomaopopo ua lilo aku i ke kolohe. 

     He keu ka maka ʻ u ole o keia mau hana kolohe i ke poo o ka oihana makai, a ua lilo no hoi keia he mau hana e kono aku i na makai o ke aupuni e ku mau me ka makaala, i ole ai e nui na poino e loaa i ka poe nona ia mau hale waiwai a ke kolohe e hiaai nui la. 

 

KOMO AIHUEIA KA HALE OIHANA O WAILA MA.

     Ua komo aihue ia ae ka hale oihana o Waila Ma, e ku nei ma ke kihi o na alanui Papu me Moiwahine, ma ka po o ka Poalima nei, a ua lilo aku la he $34.  O kahi o ka aihue i komo mai ai, ma ka puka aniani no ia ma ka aoao makai mai o ke alanui Moiwahine.  Eia ke huli ia nei ka mea nana keia mau hana kolohe e David Kaapa.

 

UA HALA IA PUA ALOHA.

     Hora 9:05 p. m. o ka po Poalima nei, Apr. 29, i kuu mai ai i keia ao mauleule o Juanita Aea Keonaona Cornwell, ka elua o na kaikamahine mahoe a Mrs. James Cornwell, ma Kakaako. 

     He mau la helu wale no koe iaia a piha ka hookahi makahiki ma ka la 12 o Mei nei, hala e aku la nae ma kela ao.  I ka hora 4 o ke ahiahi Poaono mai i manele ia aku ai kona kino wailua no ka ilina o Koula e hoomaha iloko o ka maluhia.  Aloha wale ia opuu i ako e ia ae la e ka make.

 

            O na poe a pau i makemake ia Jos. Kalana, a i ole i kona Kaapio, e hookani ae i ke Telepona, Helu 319.

 

Nuhou Kuloko. 

     Ua hoopai ia o Koo Poo he $100 no ka malama opiuma.  Pokeokeo no. 

 

     Mai na Panalaau mai o ka Hema i upu ia ai e hoea mai ai ka mokukaua Beritania Leander. 

 

     E loaa no na palale wahine maikai loa ma kahi o Iwakami no ke 50 keneta a pii aku a hiki i ka $2.00.

 

     Ua hoeha ia kekahi kanaka ma ka la Sabati nei, mamuli o ka pii ia ana e kekahi kaa pi ʻ o e kalaiwa ia ana e kekahi Pake.

 

     E holo hou aku ana o Kuhina Kalaiaina Kini no ka hoolana ma ʻ i ana ma Hawaii, oiai, aole ka i loaa iaia ke ola kino maikai. 

 

     O ka hoopalau mawaena o Alice L. Hutchinson (Kaikamahine hoi a Afong) ia Kauka C. Thompson o ka mokukaua Mohikana, ua hoopuka ia ae la ia. 

 

     Maluna o ka mokuahi Pekina he mau aliimoku Iapana kekahi e holo ana no Kapalakiko no ke kii ana i ko lakou mokukaua hou i kapiliia mai nei ma ia wahi. 

 

     Ma ke awakea Sabati nei i hoea mai ai ka mokuahi Paroo mai Kikane mai me 51 ohua, a maloko oia huina he 49 e holo ana no Kolonodaika.  He 5 poe mahuka maluna ona.

 

     O ka nui o na make o ke kulanakauhale nei o ka mahina o Aprila wale no he 108 he heluna nui keia o na make i ike ole ia mamua, ua oi keia mamua o ke Kolela ai he 90 a oi o ka mahina.  Aloha no! 

 

     Ma ka hookuku kinipopo o ka Poaono nei mawaena o na hui kinipopo Honolulu a me Regeimana, ua lilo ka eo i ka Regeimana mamuli o ka loaa ana he 10 puni, a o ka Honolulu he 5 wale no. 

 

     Ua loaa mai nei ia Lewis & Co. he mau pahu kamano momona, a eia ia ke kuai ia nei me ka makepeao, mamuli o kona ake ane e loaa i na mea a pau he i ʻ a mamua o ka lohe ia ana mai o ke kaua.

 

     Maluna o ka Rio de Janeiro e loaa mai ai o na lono hope loa no ke kukala ia ae o ke kaua mawaena o Amerika Huipuia a me Sepania, ma ka po o ka Poalima ae nei e kapalulu mai ai oia ianei,

 

     E malamaia ana he hookuku kinipopo mawaena o na hui kinipopo o Kamehameha a me ka Beninetona, a o na pomaikai e loaa mai ana, e hoahuia aku ana ia no ka waihona o ka Maine, ma ka Poaha ae nei. 

 

     Ma ke kakahiaka la Sabati nei, hora 9:10, i kuu mai ai i keia ola ana o J. L. Steven, i ke 50 a oi o kona mau makahiki o ka hanu ana i na ea inea o keia ola ana.  Ua haalele iho ola he wahine, ka laua keiki hookahi a me ka ohana, e paiauma aku nona ma keia aoao o ka lua kupai au.  Ke komo pu aku nei makou e u pu me na mea i hoonele ia i ka makua ole, a ke kalokalo pu ae nei hoi i na Mana Lani, e hoomama mai i ko olua mau naau luuluu.  I ka hora 4 o keua auina la e manele ia aku ai oia no kona home lua ma ka pa ilina o Kawaiahao.  Aloha wale oia.