Ke Aloha Aina, Volume IV, Number 19, 7 May 1898 — Page 3

                                                                                                                                    KE ALOHA AINA, POAONO, MEI 7, 1898.                                                                                                         8                      

 

Nuhou Hope Loa. LIULIU O SEPANIA NO KA HOOPUEHU LIILII ANA AKU I NA MOKUKAUA HOLOMAMA

            St. Vincent, Cape Verde Islands, Apr. 14. He ekolu mau mokukaua hou o na aumokukaua o Sepania i hoea mai nei ianei i keia kakahiaka, mawaena oia mau mokukaua, na mokukaua Critobal Colon a me Infanta Maria Teresa, a ua ukaliia e na aumokukaua topido elua i haalelel aku ia Sepania. O keia ulu moku topido, ua hookuipuia ia mai na moku topido a me na waapa topido wawahi moku.

            O na aumoku topido i ku mua mai nei ianei no kekahi manawa i hala ae nei, ua pena eleele ia lakou ma ke kauoha a ke alakai, Senor Villami.

            Eia na moku ke ku makaukau nei no ka holo aku i na wa a pau e kauolia ia mai ai, a ua hooili ia aku he 40 tona nanahu iluna o ka moku halihali ukana a me na moku liilii. O na luna aupuni o Sepania eia lakou ke koao nei i kahi e lawa ai o ka nanahu no na aumoku topido i hoea hou mai nei a me ko lakou mau ukali. Ua makemake hoi lakou e loaa hou on a mau haneri tona.

            Nu Ioka, Apr. 14. He lono kuikawa kai hoea ae i ka nupepa Herald mai Wasinetona mai, e olelo ana. He oi loa ae ka weliweli o keia mau moku topido hope i ko na aumoku topido mua. He ekolu mau moku topido wawahi, ka Destructor he 386 tona, ka Osada a me ka Prosperina he 400 tona pakahi, a o na waapa topido Haleon 108 tona, Oriona 85 tona, Retamosa 75 tona, Barcelo 66 tona a me Habana 59 tona. O keia mau moku topido wawahi, ua hana ia e Enelani me ka paa loa o keia au hou. O na waapa topido, he 12 makahiki o ko lakou hooliana ia ana, aka, he oia mau no nae ko lakou kulana maikai.

            Ua manaoia, e haalele aku ana ka moku topido Andaz, he hoahanau no ka Osada, ia Queenstown i ka wa e pau ai o kona mau hemahema i ka hooponopono ia, no Cape Verde Islands, mai Sepania mai, a i kona wa e Hoea mai ai, ua hoomahuahua hou ia ae la ka ikaika o na amoku topido.

            O na lono I hoaa mai i ke  Keena Kaua, o ka moku holo lealea Giralde ka moku i holo pu aku me na aumoku topido elua, mahope koke iho no o ka holo ana mai o ke Cierdad de Cadiz me na aumoku topido mua. Ua manao ia iwaena o ka poai o ka oihana kaua moana, e kali ana lakou ma Cape Verde Islands no ka hoea aku o na mokukaua Vizoaya a me Oquendo mamua o ko lakou nee ana aku.

            Ua manao wale ia i keia la, o ka houluulu ana ae la o Sepania i kona ikaika kaua moana ma Cape Verde Islands mamuli no ia o kona makemake ana e loaa iaia kekahi ulu mokukaua nui i lawa ka ikaika no ka hoolilo ana aku i na aumokukaua holomama o Amerika i mea ole, a oia ka manao maoli o ke aupuni Madarida no ka hoohana ana aku ma kona aoao maluna o ka moana Atelanika.

            Ua hoopohihihi ia na luna aupuni i ka makaukau mau o Sepania me ke dala no ke kuai ana i na momkukaua, aka, ua manaoia no nae, ua loaa mai ia mai na kanaka waiwai mai o ka aina, i lohe wale ia ae, ua lulu ae lakou he puu dala no ka hoomahuahua hou ana ae i ka ikaika kaua moana o Sepania.

            Ua hoike mai nei o Mr.Woodford i ke Keena Aina, aole i hoopuka ae o Sepania he mau aie hou, aka, ua manaoia nae i keia pule ae.

 

HE LEHULEHU WALE NA PAA MARE E KALI LA.

            Ua hoohauoli ia ae ka lahui Korea i ka wa i pahola ae ai o ka lono, e mare hou ana ka moi o Korea i ka wahine. Ua hoopuka iaae ke kanawai e hookapu ana i ka mare ana mahope o ka powa ia ana o ka moiwahine he elua ae nei makahiki i hala. O ka manao mare ana o ka moi he mea nui ia i kona lahuikanaka, no ka mea, ua olelo ke kanawai aole he mea e mare maluna o ka aina a hiki i kona mare ana. Nolaila, o na poe Korea a pau ua kali malie iho la lakou a hiki i ka wa e loaa ai o ka wahine a ka moi. A o na poe i mare malu i ka wa o ka moi e noho hookahi ana, ua pani ia ka puka ia lakou e ko lakou mau hoaloha, mai ka make ana o ka moiwahine, aole he ohana maikai i mare, aka, ua kali aku lakou me ka malie a hiki i ka wa e mare ai o ka moi, a oia ko lakou wa e mare like ai.

            He makahiki i hala ae nei, ua komo mai la na manao uluhua iloko o kona lahuikanaka, a ua hoea aku kona mau hoa kuka no ke koi ana aku iaia e mare, a i ole pela, e hoea mai ana he hopena awahia.

            Ua homo aku moi ka moi i ka makemake o kona lahui, a koho iho la i kekahi kaikamahine opiopio nona na makahiki he 16 i wahine nana me ka nana ole ae he 60 ka nui o kona mau makahiki. Ua kue loa ka nui o kona aha kuhina i keia makemake o ko lakou moi, a hooholo iho la ua oi loa aku no ka pono o kona noho hookahi ana mamua o ka mare ana i kekahi kaikamahine opiopio.

            Ua ae aku ka moi i ko lakou makemake, a ua hoole hoi i ka lawe ana aku i kekahi wahine a kona aha kuhina e onou mai ai mawaho ae o ke kaikamahine. Aka, mahope mai ua hoomaka mai ia ka uluaoa iwaena o na kanaka no ke ake nui ana a e mare hou ko lakou moi, a i keia wa i haawi pio aku ai ka moi malalo o kona aha kuhina a ae aku la i ka wahine a kona aha kuhina i huli ai wahine nana.

            Ua olelo ia ae, o ka wahine a ka aha kuhina i wae ai na ka moi o Korea, he 30 ka nui o kona mau makahiki, he ui hoi mamua o ka wahine i make, a he naauao hoi oia, o ka moi wahine i make, he oi ae kona akamai mamua o keia moiwahine hou. A he lili loa hoi oia i na Iapana. Aole oia i huna iho i kona makemake ole i na Iapana ma kahi malu. Me kona ohana mana nui maloko o Korea, ua hana lakou i na hana pono ole i na Iapana, a pela oia i ohumu ia ai e make.

            A ma kekahi po, ua komo aku kekahi mea me ka malie iloko o ka rumi moe o ka moiwahine a pepehi aku la iaia. Ua olelo ia he Iapana no kona mea nana i powa. Oia no ka hoike a kekahi kanaka Amerika. Ua ike oia he Iapana i ke komo ana iloko o ka halealii, a i kona hemo hou ana mai iwaho, ua haukae loa ia kona aahu me ke koko.

            Ua manao loa no ka lahui Korea, na ke Kuhina Iapana no keia mau hana, a mai ulu hou no ka haunaele i na aole i kauoha koke ia mai ke Kuhina Iapana e hoi aku, me ke pani ia mai i Kuhina hou.

            I ka wa i make aku ia o ka moiwahine, na hiki wale no i ka aha kuhina ke hoohulihuli i ka manao o ka moi, a o ka ohana hoi o ka moiwahine ua pau ko lakou mana, ua mahuka aku lakou no ka hoopakele i ko lakou mau ola ma Kina.

            Aole e lawe ae ana ka moiwahine hou i ke kulana hooponopono e like me ka moiwahine mua. Aole ia he mea nui i ka lahui kana mau hana e lawelawe ai, aka, o ka lakou wale no i ake nui ai e mare ko lakou moi.

 

            Ma Kawaiahao ae nei, ma ka la i nehinei, ua hoolilo ae kekahi keiki opio nona na makahiki he 17 i kona makuahine nana oia i hanai i hoa nakaka nona, a ua kau aku hoi kona mau lima kakauha maluna o kona mea nana i luhi me ka menemene ole. E akahelel e ka opio, mai hoao hou e hana pela i kou mea nana i luhi anui ae la, a i iho la oe nau kau loaa.

 

HE LETA NA KEKAHI HOALOHA. (Mai ka Independent mai)

            Ma ka la 1 iho nei o Mei, ua loaa mai la he leta i ka Lunahooponopono o ka Independent (Kuokoa Namu), mai ia Adimarala Mila mai, ka mea i huli hoi aku la maluna o ka mokuahi Kulanakauhale o Pekina, mamuli o ke kauoha pili oihana a kona aupuni, a e heluhelu ia penei:

            Honolulu, H. I., April 30, 1898. E ka hoaloha Mr. Norrie;

            Ua pa kukonukonu loa mai au me na manao maikai o kau pepa o keia ahiahi e pili ana no ko'u kaawale aku mai Honolulu nei, a aohe hoi he hiki ia'u ke haalelel iho i keia mau mokupuni nani a piha aloha nui wale, me ka hoonele i ka haawi ana aku i ka hoomaikai no ua hana aloha a pau i haili mua ole ia. E paa mau no auanei iloko o ko'u mau hoomanao ana na launa oluolu a me na mea no a pau a'u i ike ai oiai au ma Honolulu nei, a pela pu hoi ko'u launa hoaloha ana iwaena o na lahui a pau. A aole hoi e nele ko'u puana ana ae, aia he wahi nui okoa o loko o ko'u puuwai, no na poe Hawaii.

            Me ko'u iini nui e hoomau ia aku ka holomua a me ka pomaikai o keia mau Paemoku, a ke puana hou ae nei au i ka mahalo no kou lokomaikai. Owau iho no, Me ka mahalo, J. N. MILLER. Mr. Edmund Norrie, Lunahooponopono o ka Independent, Honolulu.

 

KA IKAIKA KAUA MOANA O SEPANIA MA PILIPINE.

            O ka ikaika kaua moana o Sepania ma Pilipine, ua hoopukaia ae nei ia e ka nupepa Hongkong Weekly, elike me keia malalo iho:

            Aragos, 508 tona, 600 lio ikaika huki, 2 pukuniahi, Kapena R. Cabegas.

            Castilla, mokukaua holomama 3,260 tona, 2,690 lio ikaika huki, 22 pu. Kapena A. Martin de Oliva Cebu, moku lawe koa, 532 tona, 500 lio, 2 pu, Lutanela A. Barrea.

            Don Antonio de Ulloa, mokukukaua 1,160 tona, 1,523 lio ikaika huki, 12, Kapena E. Robiou.

            Don Juan de Austria, mokukaua 1,159 tona, 1,500 lio, 13 pu, Kapena J. de la Concha.

            Elcano, mokukaua liilii, 560 tona, 600 lio, 7 pu, Lutanela Kapena F. Escudro.

            General Alva, moku halihali koa, 1300 tona, 1000 lio, 2 pu, Lutanela Kapena R. Rodriguez Trujillo.

            General Lezo, mokukaua liilii 520 tona, 600 lio, 6 pu, Lutanela Kapena K. Benavente.

            Isla de  Luzon, mokukaua holomama, 1,048 tona, 2,200 lio, 10 pu, Kapena F. Barreto.

            Isla de Cuba, mokukaua holomama, 1,048 tona, 2,000 lio, 10 pu, Kapena D. Regalado.

            Manila, moku lawe koa, 1,900 tona, 750 lio, 2 pu, Lutanela Kapena J. J. Ozania.

            Marquis del Dnero, mokukaua liilii, 500 tona, 550 lio, 5 pu, Lutanela Kapena S. Moreno del Guera.

            Reina Cristina, mokukaua holomama 3,520 tona, 3972 lio, 21 pu, Kapena L. Cadarso.

            Velasco, mokukaua 1,152 tona, 1,600 lio, 7 pu, Kapena F. Rebaul.

 

HE HOOMAIKAI

            E aloha ia ka poe a pau i aloha io aku i ko kakou Haku ia Iesu Karisto, Amena.

            Ke hoomaikai aku nei au i ka poe a pau i haawi mai i ko lakou mau kokua aloha no ka hoomaemae hou ana i ka luakini o ka Haku ma Popopiia, Kona-waena, no lakou keia mau inoa:

            Mrs. C. J. Robinson, $50.50; W. C. Achi, $25; W. J. Yates, $15 J. K. Nahale, $10; Mrs. Mere Achi, $5; J. W. Kuaimoku, $5; J. K. Kekaula, $5; Kaukaiwa, $3; J. W. Keliikoa, $2; S. W. Kekuewa, $2; S. M. Kalaiwaa, $1; Mose Hu $1; S. Haanio, $1; Mrs. Kaikainalii, $1; D. Makainai, $1; J. H. M. Kukahuna, .50.

            Ano, e na hoaloha, ua huli hoi mai nei au mai ka'u misiona aku nei imua o oukou mo ka hauoli maluna iho o kuu paahana, e amo ana i na pua aala onaona mai ko oukou mau puuwai hamama mai no ka maemae o ka hale o ka inoa o ko kakou Akua.

            A nolaila hoi. Na ke Akua no e hoopomaikai mai ia oukou ma ka oukou mau hana a pau e lanakila ai ka pono a e nani ai Kona inoa.

            Ke koto pu aku nei ka ekalesia o Kona-waena i ka hoomaikai ana ia oukou. Me ka mahalo, W. N. LONO, Komite. Keauhou, N. Kona, Apr. 30, '98.

           

            Ua hoopau wale ia ka hihia hoeha o H. wlaters, kekahi o na luina o ka mokupea Andrew Welch i na makai ma ka Poalua nei.

            Ua ulu ae ne hakaka mawana o kekahi pake a me kekahi Iapana ma ke alanui Pauahi ma ka hera 10 o ka po Poalua nei, a ua haawi aku ka pake i kekahi o kana mau mana kalo paa mamua o ka hoea ana mai o na makai.