Ke Aloha Aina, Volume IV, Number 14, 2 April 1898 — Page 7

KE ALOHA AINA

            POAONO, APERILA @ 1898.              7

HE  MOOLELO  WALOHIA 

-:NO KE:-

Keikialii Alabati

Ke Kaeaea o Pelekane.

-:A ME KA:-

Ui Madelina.

Ke Kukui Uwila o Ainapo

Hoolienoia no KE ALOHA AINA

  I ha wehewehe ana mai o kaiao, ua ike ia aku la kela a me keia i makaukau no ka hela ana, e linohau mai ana me ko lakou mau makaukau i kupono no ka lakou huakai hele, a oia no hoi ka wa i ike ia aku ai na opio eleu e hele mai ana ma kahi o ko laua mau lio i hoomakaukau ia ai.

  O ka ui hoi o ke kapa kila, nana aku la oia i kona lio me na helehelena o ka hauoli, oiai hoi, he huakai keia nona e ike hou ai i na maka o kona mau makua a me kona mau hoaloha hoi o ka wa kamalii.

  Ulu mai la iloko ona no hoomanao ulumihiehie ana, e ike hou ana ka oia i ke Kakela ana i aloha ai, ma ke kapa o ka muliwai Tamesa, kahi hoi ana i puka mai ai i keia ao malamalama, a ike i na inea o Ie a noho ana.

  I ko laua wa i kau aeai maluna o ko laua mau lio pakahi, oia no hoi ka wa i ike ia aku ai o kela a me keia, ua makaukau loa no ka nae ana aku ma ka lakou huakai hele.

  Oia no hoi ka wa i huli hou mai ai o ka opio o ka ululaau a pane mai la i ka poe e noho iho ana i na home kauhiwi o lakou me ke aloha penei:

  Eia makou ke hele nei mamuli o ko’u makemake e ike i na maka o ko’u mau makua a me na kupuna hoi, ka mea hoi a’u i hoike aku ai imua o kuu makuahine aloha, e hele aku ana no au e ike iaia iloko o kekahi manawa kupono a’u i makemake ai e ike ia laua.

  A o ua manawa la, oia no keia a oukou e ike mai la, ka manawa kupono loa hoi a’u i manao ai, e hui aku me lakou iloko o na apo pumehana ana o ke aloha, ka mea hiki ole ke mawehe ia ae mailoko ae o ko kakou mau puuwai pakahi.

  Nolaila, i ko makou wa e kaawale aku ai , o na mea ulu, na mea kolo, a me na holoholona e loaa ana ia oukou, e lawe oukou ia mau mea i mau waiwai ponoi no oukou.

  Aole hoi he mea nana oukou e papa ia okou ma ia mau mea a pau, oiai, o ko oukou ola no ia o ka noho ana, oiai ko’u manawa e hele nei.

  E noho oukou ma ke ano he ohana hookahi, me ka hoao ole o kekahi o oukou e hoopilikia aku i kekahi, a i ole ma ka imihala ana paha, i wahi e poino ai kou hoalauna.

  E hoomanao ia mea he enemi ia no’u i ko’u wa e hoi mai ai, ke loaa ole iaia ka @au mihi, a i ole, hoakaka mai paha i ke kumu o kona hana ana pela, i wahi e hiki ai ia’u ke keana i ka’u olelo hooholo maluna o ka mea hana hewa.

  E pono oukou e noho like, aohe i oi aku kekahi mamua o kekahi, a aole no hoi o oukou mea e noho poo ana maluna o oukou a pau.  E hoomanao i keia a e malama aku.

  I ka wa no i pau ai o keia mau olelo a ua opio la, oia no ka wa i ani aku ai o kona mau lima no ka hoomaka ana o ka huakai e hele, a oia no hoi ka wa i ike ia aku ai o na mea a pau e kamoe ana noloko o ka ululaau, no ka hele ana aku i ke kulanakauhale alii.

  O keia a me keia, no hoolawaia ia me na mea ai kupono no ka hele ana ma keia huakai, a pela pu no hoi me na opio a elua, eai no hoi maluma o ko laua mau lio, ua hoolawa no laua i like me ka ko laua mau hoahele i hoomakaukau ai.

  He elua pule a oi o keia hele ano, ua hoea aku la ke huakai a na alii opio ma ke kulanakauhale a ke keiki opio i lawe pio ai, a ua hookipa ia aku la ka huakai holookoa e ke kanaka puhi o-le a ke keiki opio i hoohanohano aku ai.

  Ua hoolawa ia lakou me na mea ai o kela a me keia ano a lakou i makemake ai, a ua haawi aku hoi ke keiki opio i na hoomaikai kiekie ana a pau maluna o ke kamaaina eleu a piha lokomaikai, ka mea nona ka puuwai hamama me ke ohohia nui.

  I ka pau ana ae o ka lakou paina ana ua haule aku la lakou no waho o ka lanai, a malaila lakou i hoonanea iho ai me na kukai olelo pu ana me ke kamaaina, ma na mea hoolaulea, a ua hauoli maoli no hoi ka lakou mau kukai olelo ana.

  I keia wa, ua kauoha aku la ke keiki opio o ka ululaau i kona mau hoa o keia huakai huli hoi no ke kulanakauhale alii, e hele e wehewehe i na noho o ko lakou mau holoholona no ka hoomaha ana, a e hookuu aku hoi ia lakou e hamu i na weuweu e ulu kokoke mai ana ma ia mau wahi.

  I ka pau ana o kana mau olelo, oia no ka wa a kona mau hoa i uleu aku ai, he manawa ole, ua pau na mea a pau i ka hana ia, a e holo ana hoi ko lakou mau holoholona iloko o kekahi pa nui.

  No kekahi mau la ko lakou luana ana iho ma ka home o ke kanaka puuwai hamama, a ma ke ahiahi o kekahi la malie,  oiao lakou maluna o ka papaaina, e haupa ana hoi kela a me keia i na mea i hoomakaukau ia maluna oia papaaina, a i ka hope loa, oiao hoi, ua piha aku la ku lua o ka inaina, ua hoike aku la ke keiki opio i kona mau hoa.

  Ano, ua manao au, ua lawa paha ko kakou nanea ana ma keia home kahi hoi o ke kanaka puuwai hamama a piha lokomaikai a ma ke kakahiaka o ka la apopo e kamoe loa aku ai ka kakou huakai no ke kulanakauhale alii, kahi a kakou a pau i manao nui ai.

  Ua lilo kana mau olelo i mea maikai i kona mau hoa, a pela pu no hoi me ke keiki o ke kapa kila, a ua hoolilo ia hoi na hora loloa oia po i mea pokole wale no ia lakou, ma o ke ala wale ana no, a i ka wehewehe ana ae o kai ao, ua liuliu ae la na mea a pau, a no ke keiki hoi o ke kapa kila, ua pau mua no kona mau opeope, a ua makaukau hoi no ka hele ana aku.

  A i ka pau ana o na mea a pau, ua hoi aku la lakou no ka hoopiha ana i ka lua o ka inaina mamua o ko lakou hele ana aku ma ka lakou huakai no ke kulanakauhale alii, a i ka pau ana o ka lakou paina ana ua liuliu ae la na mea a pau no ka hela ana, e kau ana hoi kela a me keia maluna o ka lakou mau lio pakahi, a pela hoi me keiki opio a elua.

  Mamua nae o ka nee ana aku o ka huakai hele, ua haawi aku la na mea a pau i na hoomaikai piha ana i ke kamaaina puuwai hamama, a o na opio hoi, ua lululima pu iho la lakou me ko laua haawi pu ana aku hoi i na mahalo piha ana nona, a hoomaka aku la ka huakai e nee no ka hele ana.

  Oiai lakou e hele nei, a he mau mile hoi ka mamao mai ka hale mai o ke kanaka puhi o-le, aia no na opio a elua ke hele like mahope loa mai o ka huakai, e kamailio ana hoi lua no na mea pili i ko lakou hiki ana aku i ke kulanakauhale, a i ka hope loa, ua pane aku la ke keiki opio o ka ululaau i ka ui huna o ke kapa kila.

  Ke hakukoi ae nei na manao hoehaeha iloko o’u, me he kui kele la e houhou ana i kuu puuwai, oia hoi keia a’u e hoike aku nei ia oe e kuu hoa alo o loko o ka hihipea o na ululaau, ka hoa paio pu hoi o’u ma na holoholona hihiu o na la i hala ae nei, a oia keia:

  Ke manao nei au, wahi ana: eia kakou ke hookokoke aku nei i ke kulanakauhale alii o Pelekane, a me he mea la, i ko kakou wa paha e hiki aku ai, alaila, o kou wa paha ia e haalele mai ai ia’u, a hoi aku paha oe no kou home kou mau makua.

  A oiai hoi, i hoomau aku ai oia i kana ka nailio ana; ke hiki mai paha ko’u wa e makemake ai e hoi no ka home ululaau aole paha oe e hoi pu mai ana me a’u, a oia ka hoi ka mea nana e hoehaeha loa mai i ko’u mau noonoo, a oia ka ka opio o ke kapa kila i pane aku ai.

  Auhea oe e kuu hoa, mai manao oe pela, oiai hoi, i auwana mai hoi keia kino mahope ou, a pehea la oe i hoao ai e hookomo i na mano o ke ano hehena iloko o kou puuwai a hoopuka mai hoi imua o’u ka mea hoi i iini nui, e lilo mai oe na’u, a owau hoi nau.

  Oiai hoi, ua manao anei oe, i ko’u wa ike iho ai ua lilo oe na’u, a owau hoi nau, ma o kou ae maikai ana mai imua o’u, i kela la au i ike mua loa ai i ko’u ano, ma ke kae o kela kahawai a’u e auau ana, au hoi i hele mai ai, a hoopaa kaua i ka kaua mau olelo ma ia wahi?

  Ke hai aku nei ae ia oe me ka oiaio, aole loa au e hoao e hana pela a aole no hoi au e hoowale mai ana i ko’u noho ana mai a oe mai, oia aole o’u makemake e nalowale aku oe mai ko’u ike ana aku no hookahi la, a nolaila, e hoopau koke ae i kou mau manao ana pela.

  Ia wa, ua hoopau ae la ka opio o ka ululaau i kona mau manao ano e, a hoi mai la hoi na hoomanao ana iloko ona no kona makuahine a me kona makuakane, oiai hoi, eia lakou ke hookokoke loa aku nei e komo i ka uluwehi o ke kulanakauhale alii. 

  Ma keia wahi, ua hoauau aku la ko lakou hele ana, oiai, ke hele aku la ka la e lawe o Lehua, a he mau mile hoi ka mamao i koe, alaila, komo aku lakou iloko o ke kulanakauhale, a ua hoomau aku no lakou i ka hele ana a hiki i ka napoo ana aku o ka la.

  Aka, ua hoomau aku la lakou i ko lakou hele ana a hiki i ka molehulehu loa ana, oia ko na keiki opio wa i ninau aku ai i ko laua mau hoa hele, ina paha e hoaumoe iho ana lakou ma ia wahi, a i ole, e hoomau aku no paha lakou i ka lakou hua kai ia po.

  Oia ka ko laua mau hoa i pane like mai ai, e hoomau aku no lakou i ko lakou hele ana ia po, oiai, aole no hoi he loihi i koe a komo aku kakou i ke kulanakauhale alii, a he aha hoi ko kakou mea e hoaumoe iho ai ma keia wahi.

  Ua lilo no hoi ia mau olelo ia laua i mea maikai, a hoomau aku la no hoi lakou i ko lakou hele ana ia po a hiki ko lakou komo ana iloko o ke kulanakauhale, a ma ka hora 12 oia po, ua kaalo aku la ka huakai mawaho o ka pa alii, a ua hoopuiwa ia hoi na koa kiai o na puka pa o ka pa alii.

  Ia wa, ua holo aku la kekahi koa kiai a hoike aku la i ko lakou poo ae, no keia huakai nui ke kuluaumoe, a ua hoohikiole ia ae la kona manao no keia mea, a ua haawi aku la oia ke kauoha i ka puali holookoa no ka makaukau ana, he manawa ole, ua makaukau ae la na mea a pau, a e ku ana hoi ka laina holokoa me ka makaukau piha no ka hana e haawi ia aku ana.

  Iloko o keia wa a ka pualikoa i makaukau ai, ua hoopuiwa ia aku la ke ke kialii Alabati a me ka Ui Madelina mamuli o keia mau halulu ano e e halulu nei, a hele aku la hoi laua e nana ma wa ka puka aniani, ia wa, ua ike koke aku la laua i ka pu alikoa e ka laina ana me ko lakou mau makou piha, a ua hoanoe ia, hoi ko laua noonoo no keia mau mea a laua e ike nei.

  Oiai hoi ka haleahi e pioo nei, oia no ka wa o ka opio kikeke aku ai ma ka puka pa, a oia no ka wa o kahi koa kiai i ninau koke aku ai e like no hoi me ko lakou anao mau he malama maluhia.

  Owai mawaho, a heaha ka makemake o ka hiki ana mai o ke aumoe a ina he enemi e hookaawale aku, a ina he hoaloha, e hoike mai i kou inoa, a i ole o ka mea paha nana i kauoha aku e hiki mai i keia mau hora kulipolipo o ka pa.

   A iua ka ka opio i pane aku ai me ka hoohakalia hou ole iho, o Alaferede keia, ka opio o na ululaau o ka uka waokele a me kona mau hoa hele, a na ke aloha makua hoi au i kono ae nei e hele mai i ke kulanakauhale alii nei, a ua makekame au e like ia laua i kela manawa ina nae ia he mea hiki.

 

N uhou Kuloko!

Eia ko makou Hope Lunahooponopono ke waiho nei maluna o kahi moe me ka nawaliwali i keia mua la.

  Mamuli o ka makou piha u loa me ka haiolelo a James K.Kaulia nalaila, ua hoopanee iho makou i ka nuhou kuwaho a hoopuka hou aku.

  Mamuli o ka piha loa o na rumi o luna o ka mokuahi Alameda, ua haule iho la kekahi poe aole i kau aku maluna ona ma ka po Poakolu nei.

  Ua hopuia he keiki nona ka inoa o Harold Kanuha, no ka hoao ana e aihue ia loko o kekahi halekuai, i ka wa o ka ona hale kuai i kaawale ai ma kekahi wahi okoa aku.

  Ma ke ku ana mai o ka mokuahi Kimo Maki, i loaa mai ai he lono no ka nui o ka ino me Kauai, o na pou telepona ua pau i ka hina ilalo o ka wapo o Hanapepe ua lilo aku ia i ka wai.

  Ua lilo i ka wai ka uwapo o ke aupuni ma Keanae, Maui, i kekahi la o kela pule aku nei, a ua lawe loa ia aku ia no kahakai, a aia malaila ia e waiho nei i keia mau la.

  Ma ka Poaono nei, ua haule iho la kekahi wahi keiki nuku iloko o ke kai, makai ae nei o kekahi o na uwapo, ua lele aku la kekahi loio nona ka inoa o W.S. Edings iloko o ke kai, a hoopakele ae la i ke ola o ke keiki opio.

  Ua manaoia e hoopanee ia aku ana keia kau kinipopo, aole hoi e paani ana ma ka la 9 ae nei o Aperila, mamuli o ka nui loa o ka ua o keia mau la, a ua hiki ole hoi ke hoomau aku i ka hoomaamaa ana .

  Ma ka hookuku kinipopo o ka auina la Poaono nei mawaena o na kula Kamehameha a me Punahou, ua lilo ka lanakila i ka inoa hope, mamuli o ka loaa ana iaia he 17 puni, a o kona hoa hoi he 7 wale no wahi puni.

  E haawiia ana he ahamele nui maloko o ka luakini o Kaumakapili ma ka po o ka Poaono ae nei a o na pomaikai a pau e loaa mai ana e haawiia ana no na hemahema o ka halepule o Kalihi, e komo ana na haumana o na kula Kamehameha a me Kawaiahao, ma ke kokua ana i keia ahamele nui.