Ke Aloha Aina, Volume IV, Number 5, 29 January 1898 — Page 5

This text was transcribed by:	Karen Mah-hing
This work is dedicated to:	Awaiaulu

KE ALOHA AINA

NOONOO IA @A NINAU O HAWAII

Waiho ia iloko o ka Aha Senate.

IKAIKA KA HOOPAAPAA O NA AOAO ELUA.

Kanalua loa ia ka Holo o ka hoohuiaina.

KUNANA KEKAHI MAU HOA O KE SENATE

Hopohopo na Hoaloha o ka Ninau Hoohuiaina.

Maluna mai nei o ka mokuahi Belgie o ka po Poalima nei i loaa mai ai na lono e pili ana no kaninau o Hawaii, ka ninau hoi a na aoao a elua e pa’o la me ka hahana maloko o ka Aha Senate, a kakou hoi e ka lahui i kau nui ai no ka hoea mai o kona hopena, a penei na lono i loaa mai ai ia makou:

LAWE IA MAI KA NOONOOIA ANA O KA NINAU HOOHUIAINA.

Wasinetona, Ian. 10. O ka paio ana no ke kuikahi o Hawaii, ua hoomaka ia i keia la. Mahope o ka pau ana o na hana o ke kakahiaka, ua hoonee mai la o Senate Davis o Minesota, ka lunahoomalu o ke komite o na aina e, e noho ke senate iloko o kekahi aha hooko a ua hooholoia. Ua kipaku ia aku na poe a pau o luna o kahi o ua poe makaikai, a ua pani ia hoi na puka. Ua ulu mai na hoopaapaa ana mawaena o kekahi mau senate no ke pani ia ana o na puka mai ka lohe ana mai o ka lehulehu, a no kekahi mau hora ko lakou paio ana, ua hooholo ia e noonooia keia ninau e ka aha hooko ma kahi malu.

KANALUA IA KA HOLO O KA HOOHUIAINA

Wasinetona, Ian 11. I keia la e ike ia ai he ekolu a i ole he eha i helu ia no ka aoao hoohuiaina, ua hoopuka ae lakou i ko lakou mau manao kue, o keia mau Senate oia no o Senate Spooner o Wisconsin, Gear o Iowa, Thurston o Neberasaka, a me Mantle o Montana. Ua olelo ae o Senate Spoooner a me Gear i kekahi mea kakau nupepa i keia la, e koho kue ana laua i ke kuikahi. Ua kamailio ae no hoi o Senate Mantle e like me ia, a o Senate Thurston o Neberasaka, ua hoike aku oia i kekahi Senate i kona kulana, a wahi ana, “aole he hiki ia’u ke koho no ke kuikahi.”

Ma keia e ike ia ai ua emi iho malalo o elima a i ole eono poe koho e hiki ai ke loaa ka elua hapakolu. Ua hoomaopopo loa ia ina e haule ana ka ninau hoohuiaina, o ka bila a i ole o kekahi kumuhana e ae e pili ana i ku ninau hoohuiaina, aole ia e lawe ia mai ana. Ua hiki hoi ke olelo ia ae, aole e holopono ana ka hoohuiaina o Hawaii i keia kau ahaolelo.

HOPOHOPO NA HOALOHA O KA HOOHUIAINA.

Wasinetona, Ian. 13. Ma ka helu ia ana o na poe kokua, ua ike ia he kanalima-kumamalua i maopopo loa e kokua ana i ka hoohuiaina, he haule ana hoi o ewalu poe koho, no lakou inoa Aldrich, Allison, Baker, Cannon, Carter, Chandler, Clark, Cullom, Deboe, Elkins, Fairbanks, Hansbrough, Hawley, Hoar, Jones (o Nevada), Kyle, Lodge, Murphy, McBride, McMillan, Mason, Money, Morgan, Nelson, Penrose, Perkins, Pettis, Platt (o Nu Ioka) Platt (o Konetikuka), Pritchard, Proctor, Quay, Rawlius, Sewall, Shoup, Smith, Stewart, Teller, Turner, Turpie, Warren, Wetmore Wilson, Wolcott, Burrows, Davis, Foraker, Frye, Gallinger, Hanna, Gorman, a me Hale.—52.

Na poe i maopopo loa ke kue, eia iho ko lakou mau inoa: Allen, Bacon, Bate, Berry, Caffery, Chilton, Clay, Cockrell, Faulkner, Gear, Gray, Harris, Jones (o Arkansas), Lindsay, McEnery, McLaurin, Malloy, Martin, Mills, Mitchell, Morrill, Pasco, Pettigrew, Spooner, Thurston, Tillman Turley, Vest, Walthall a me White.—30.

He ehiku poe kanalua no lakou na ino: Daniel, Butler, Hertfield, Kenney, Mantle, Roach a me Wellington. Ua hoohauoliia na poe kue i ka hoohuiaina i keia la, i ko lakou maopopo lea ana e komo pu mai ana o Butler, Smith a me roach, i ke koho pu ana me lakou. Ma keia helu ana i ike ia ai he 51 poe kokua hoohuiaina, he 33 poe kue, he 5 kanalua, aka, ina paha e lilo ana i ka poe kokua hoohuiaina keia poe senate kanalua he elima, e loaa ana ia lakou he kanalima-kumamaono poe koho, he eha hoi ka emi iho malalo o ka elua hapakolu o ka hale.

NAWALIWALI KE KULANA O KA HOOHUIAINA.

Nu Ioka, Ian 14. Ua olelo ae ka nupepa Manawa o Wasinetona E haule pio ana ka ninau hoohuiaina ina e lawe koke ia mai ana e koho i keia wa imua o ke Senate. O ka manao keia o na Senate o na aoao a elua. Oiai, eia ke kuikahi ke noonoo ia nei, aole he hiki i kekahi Senate ke kamailio i ke akea, me ka loaa ole mai iaia he uku hoopai koikoi, no ka mea e pili ana i ke kulana o ka ninau hoohuiaina, aka, ua maopopo loa nae ka mea oiaio, aole e hiki ke hooholo ia ke kuikahi ma ke koho ana a na poe e kokua nei iaia.

He nui na kukakuka ana nana i hoike mai i ka mahele ana o na Senate no ke kuikahi. O ka hapanui o keia mau kuka ana ma ka manao alakai no ia o ka poe kokua i ka hoohui, no ka mea, aohe poe inoa kanalua, a he poe inoa o ka poe kanalua, e koho ana lakou no ka hoohuiaina. O ka mea oiaio nae, ua hooia ia mai o na inoa o ka poe kanalua maoli mai loko mai no ia o na inoa o ka poe e o ka poe e oleloia nei he poe kokua i ke kuikahi, a o na poe inoa i oleloia he kanalua, he mea maopopo e koho kue ana lakou i ka hoohuiaina.

UA HAALELE IHO MA KA AUSETERALIA

O kela haole nona ka inoa o Herbert, a o kekahi inoa hoi, o Orpen, i manaoia, oia ka pepehi kanaka o Nu Kilani, i haalele iho maluna o ka mokuahi Alameda i keia awa, a mahope iho o ka hoohala manawa ana no kekahi mau la kakaikahi maanei, na kau aku oia maluna o ka Auseteralia no Kapalakiko.

I ka wa i ku aku ai ka Alameda i Kapalakiko, aia ka Ilamuku Baldwin o Amerika Huipuia i ka uapo kahi i kali ai, me ka palapala hopu no Herbert, no ka pepehi kanaka, aka, aole nae ua kanaka la maluna o ka moku. Ua hoike ia ae, me he mea la, ua haalele no oia i ka moku i ka wa no e ku ana ma Honolulu. Ua hoikeia ae kekahi manao ano nui, e pili ana no keia mea mahuka, a aia ke kiai paa ia la na wahi a pau o ke kulanakauhale.

Eia no hoi ka Hope Ilamuku ke huli nei, a ua manao oia, me ke mea la, ua hala aku oia maluna o ka Auseteralia, a he kanalua ole ko kekahi poe, oia hoi, na kii aku oia i rikiki uku moku nona, ma kahi o na ohua o mua, a nolaila, ua maopopo loa, ina ua kau io aku oia maluna o ka Auseteralia, alaila, aia kona mako ke kali ia mai ia e ko o poe, i kona wa e hoea aku ai ilaila.

Ua hoopuka ia ka palapala hou e ke Komisina o Amerika Huipuia ma Kapalakiko, ma o ka palapala hoahewa la a ke Kanikela Nui Warburton i loaa ae ma ke telegarapa mai Nu Kilani ae, e olelo ana, na hala aku o Herbert ma ka Alameda.

O ke Karaima a keia Herbert i hana ai @ kohoia ma kona ano Kauka, ua hanai oia i kekahi wahine i ka laau make, a pela i huli ia ai oia a hiki i @ona wa e loaa aku ai.

Eia kekahi oe i ka pali o Nuuanu @ mau nei e makaikai a ua loh@ makou, ua oi ne ka maikai o @ o ka mea kahiko.@

O DOLE IA MAKINILE

Ua maopopo mua no kona holo aku ilaila.

Aole ia he mea e hoopuiwa ia ai o na Luna Aupuni

Wasinetona, Ian 14. O ka hoike mua ia ana mai, mai Honolulu mai, e holo mai ana o Dole i Wasinetona, aole ia he mea ano nui e hoopuiwa ia ai ma ke Keena Aina, a ua haupu lo ia e hoea mai ana oia. I ko Dole wa e hele mai nei no ke kokua ana i ke kuikahi a e haawi hoi i kona manao alakai no ia mea ua hoomaopopo ae ka poai o na Iuna aupuni o onei, o kona kipa ana mai, he manao no kekahi mea i oi ae. Ua olelo ia e hele mai ana oia me ka hoaahu ia me ka mana i maa mau ole mai ke aupuni Hawaii mai no ka hana ana nona ma ka ae ana aku i na hooponopono ana a i ole i na hoololi ana e hana ia ana i ke kuikahi.

Ua hoomaopopoia o ka hooponopono a Turpie i noonoo ole ia i keia wa, oia hoi ke kau ana aku he hoohaiki maluna o ka hookomo ana mai ia Hawaii i Mokuaina, me he mea la, e kokua ia aku ana ia. I na o keia, a i ole, o kekahi hoololi e ae e hana ia ana no ke kuikahi e hooholo ia no ia e ke aupuni Hawaii.

No ka hoopau ana i ke uloloni ua noonoo ke aupuni ma Honolulu he mea pono e hoouna ia o Peresidena Dole i Wasinetona me ka mana no ka hoololi a i ole hooponopono ana i kaua mea i ike ai he pono.

HALAWAI ME KONA HOPENA

Ma ka auina la o ka Poaha nei i halawai ai o Martin Olsen, he kupa no ka hau anu o Norewai me kona hopena manaonao, ma ka Lae o Kaena, e huli mai la ke alo i Waianae, mamuli o ka haule ana mai o kekahi apana pohaku i pa-hu ia mai kekahi wahi a lakou e hana ana me na kanaka, no ka hoomoe ana i ke alahao mai Waianae aku a hiki i ka lae hala o Kahuku.

O Martin Olsen, he luna hana oia malalo o Chas. Jansen & Co., ka mea hoopaa aelike e ka Hui Alahao o Dilinahama ma, ua ha lawai koke oia me kona hopena i noonoo mua ole ia ma ka hora 1:30 p.m., o ka Poaha nei, mamuli o ke pa-hu ana o kekahi lua pohaku i hookomoia i ka pauda uo ka hoo@ ana a hoomaemahoi i ke alahao.

O Martin Olsen, e ku ana oia e naua i ka hana a na poe paahana, a he mamao no hoi e manao, ole ia ai loaa ana ka pilikia, @ ke kaawale o 250 kapuai mai kahimai o ka lua pauda e hoopa hu ia ana, a he 50 kapuai hoi ke kiekie mai ka aoao mai o ka mauna.

He luna nui oia no na paahana e hana la ma ka Lae o Kaena, a mamuli o ka loaa ana iho la i keia haawina pilikia, mamuli o kana kauoha ponoi, a ua lawe ia aku he elima pahu pauda eleele a hookomoia iloko e ekolu mau lua i pao ia a puka a o ka wa no hoi ia i hoomakaukau ia ai o ka hookomo ana i ka uiki, a kani koke aku la ia me ka hakalia ole.

Ua ike koke aku la o Olsen i ka lele ana mai o na apauapana pohaku mai kahi mai i kuni ia ai o ka pauda, a haule mai la maluna ona, me ka hiki ole ke alo ae, i keia make e iho iho nei maluna ona, nona hoi ke kaumaha o 5 paona, a pa iho la ma kona lae ke kumu nui hoi i hoea mai ai o kona make ana.

Ua lawe ia mai kona kino wailua no Honolulu nei maluna o ke kaa mua loa i hoea mai i keia kakahiaka nui wale, a ua kaa hoi na hooponopono ana malalo o H.H. Williams ka mea hana pahu, a i keia ahiahi no hoi e nalo aku ai kono kina wailua ma ka ilina o Maemae.

Aohe ona pilikana a ohana hoi ma hawaii nei, oiai, he wahi hua hookahi wale iho no oia na ka A@o. Waiho i Kaea na iwi o kamahele.

NA HEIHEI KAA HEHI WAWAE

Ua malamaia ae na lealea heihei kea hehi wawae ma ka po o ka Poaono nei mawaho o ka Paka Cyclomere, no keia kau elua. Ua hoopihaia o luna o ka hale me na poe makaikai, a pela pu no hoi me ke kahua olaio. Na ka bana aupuni i haawi mai i ke anaina i na hoolealea ana. Eia ka poe na lakou i kaili ae i ka hanohano oia po:

Heihei 1. 1 mile—Eo ia Cornwell, manawa 2.48 1-3, elua Treadway, ekolu Sousa.

Heihei 2. ½ mile—Eo ia Manoa, manawa 1 13, elua Terrili, ekolu A. Jones.

Heihei 3. 2 mile he ekolu manawa i holoia ai o keia heihei, manawa mua—Eo ia Gilman, 5.30 elua Giles, ekolu Higgins. Manawa elua—eo ia H. Giles, elua King ekolu Sousa. Manawa ekolu—Eo ia H. Giles, elua Sousa, Higgins,

Heihei 4. 2 mile – Eo la Manoa manawa 5:14 1-2 elua Whitman ekolu Sylvester.

Heihei 5. 1 mile no na opio—Eo Batchelor, manawa 2.58, elua Botelho, ekolu Rice.

He omaimai o Keo Kaaka i ko@ i hoea aku ai i Kapalakiko a mahope o kona hoomaha ana @ no kekahi mau la, ua hoo@ aku la oia i kana huakai no Wasinetona.

Ua hoonanee hou ia aku la ka ahamele a ka Hui Himeni Hawaii a ka la 12 o keia mahina ae mamuli o ka nui loa o na hana lealea o keia mau po e hele nei, pela na lono i loaa mai ai ia makou.