Ke Aloha Aina, Volume IV, Number 4, 22 January 1898 — Page 8

KE ALOHA AINA, POAONO, IANUARI 22, 1898.

 

@E MOOLELO WALOHIA

NO KE

Keikialii Alabati

 

Ke Kaeae a o Peleane.

A ME KA

Ui Madelina.

 

Ke Kukui Uwila o Ainapo

Hoohenoia no KE ALOHA AINA

 

            No ka nui o na lealea e malamaia ana, ua loaa ole he wa no kela a me keia e haawi ai i wa hooluolu no ko lakou mau kino, a ua haawi pu io aku no hoi me ka keiki opio iaia iho no ka hoolaulea pu ana me na poe e lealea nei, ma na wahi a pau o ke kulanakauhale alii o Ledana.

            I ka wa a ka Hokaloa e pii ae ana ma na ao opua o ka lewa lani, oia no ka wa i kukala ia mai ai ka lohe i na mea a pau, mahope iho o ka pau ana o ka paina awakea oia la, e huli hoi aku ai ke keiki opio no kona wahi ponoi.

            A e ukali pu ia aku ana hoi kana huakai hele e ka Hooilina Moi o ke aupuni a me kona mau ukali, mamuli o ka makemake o ke Keikialii no ka hele hoolanalana ma na ululaau o kona aina makuahine.

            ka wa i puka mai ai o keia mau olelo mai ka waha mai o ka Moi Uilama, oia no ka wa i ku koke ae ai o ka ona ke Kakela o ka lokowai Tamesa, a nana hoi i ku ae ua ku pu ae la no hoi me kana kaikamahine, no ka hoi ana no ko laua home Kakela.

            Ua haalele iho laua i na hana lealea e malamaia ana, me ka pau ole o na manao hoohihi o ka Ui o ka Lokowai maluna o ke keiki opio.

            Aka, i wahi e hiki ole ai ke ike ia keia mea huna iloko o kona puuwai, aole loa oia i hoao iki e hoike aku i na manao konikoni o ka makemake e hana mao ole la iloko ona, imua e kona makuakane.

            O ke kumu nui o keia hoi ana, oia no ko ua kanaka nei makemake e hana i kekahi mau hoolala ana, ana hoi i manao ai, oia ke alahele e hooko ia ai kona makemake, a ke pono hoi ia i ka manao o kana kaikamahine kamakahi.

            I ko lakou wa i hiki a ku ai i kauhale, ua komo koke aku la oia maloko o kona rumi hookipa, a kahea mai la i ka kana wahine a me ka laua milimili pu ho,, no ka hookokoke ana aku e hoolohe i kana mau olelo.

            A oiai hoi oia e makaukau ana e hoopuka mai i kona manao, aka, ua ulu hou ae la ka noonoo iloko ona, aole i kupono ia wahi ana i makemake ai e hoike mai no kekahi manao huna i makaukau hoi e hoike ia aku.

            Nolaila, ua hoololi hou ae la oia i kona manao, a hoihoi loa aku la oia ia laua a ma k@ na keena mehameha loa iluna hoi o kekahi ruma kakau o ua ona la o ka lokowai.

            I ko lakou noho pono ana iho maluna o'ko lakou mau noho pakaoia no ka wa i pane koke mai ai o ua kanaka nei i keia mau olelo imua o kana kaikamahine a me kana wahine pu hoi.

            I keia po, ua hoohanau hou ia ko'u mau manao iloko o ka ulumahiehie o ka manao hauoli, mamuli o ke eo ana o ko'u puuwai o haawi aku ia oe, i hoa kuilima pu no ke keiki opio noho kuahiwi, ka mea hoi i kulike kona mau hiohiona nani e like me kou, e kuu kaikamahine.

            A nolaila, ua kali ko'u kamailio ana aku i keia mea huna ia olua, a hiki i ko kakou wa e hoi mai ai i kauhale nei, a ia wa au e hoike aku ai i ko'u mau manao a pau imua o olua, a na kakou no hoi e kaana pono iho i keia wa.

            I keia wa, i pane koke mai ai kana wahine, me ka i ana mai.  Ua like no a like ko kaua manao no keia mea, a o kana wale no, o ka ninau pono aku i ka manao o kana lei kamakahi o keia mau ia.

            I ka wa i pau ae ai na olelo ana a ka wahine, o ka wa no hoi ia i ninau mai ai o ua kanaka nei i kana kaikamahine, i ka i ana mai:

            Pehea la kau i manao ai no keia mea a maua e olelo nei, ua kulike paha ia me kou makemake, aole paha?

            Ua noho hamau iho la lakou a pau, me ke kali ana hoi, heaha la na olelo pane e puka mai ana mai ka lehelehe mai o ka laua kaikamahine, a mamua hoi o kona hoopuka ana aku i kona manao, ua nonoi aku la oia i kona makuakane, ina paha e ae mai ana oia i na mea a pau ana i makemake ai e hana.

            Ua pane mai la kona makuakane penei:

            O na mea a pau au i ike ai he mau mea ia i kulike me ka@ i makemake ai, e hooko ana au ia mau mea a pau me ka hookaulua ole, ina ia he mea e hooko ia ai ka makemake o kou makuakane nei.

            Ua pono, a e hoike aku au ia oe a me kuu makuahine aloha, e hooko ana au i ko olua manao i na wa a pau.

            Heaha la hoi, mai keia wa aku a kakou e kamailio nei, a maopopo loa, ua paa ko olua manao no ka hoomoe ana ia'u me ke keiki opio o ke kuahiwi, ka mea hoi a kakou a pau i papa leo pu ole ai me ia no kekahi manawa.

            Nolaila, pehea la e kohu ai, a e pili mai ai hoi kela keiki malihini i kahi a olua e makemake nei e hoomoe mai ia'u, aole anei ma ka lawelawe lima maoli ana ka mea e pono ai.

            A oiai hoi, he nani ia na olua no i hoike mai la ia'u, o ka'u kane ia e mare aku ai, nolaila, e noi aku au ia ol@, e ae mai olua @ mea @ p u alu i makemake ai.

            Oia hui, e hoolako mai olu@ i lio no'u me na pono hololio a pau maluna ona, a e hana koke ia hoi i p@a lole hololio no'u ma na ano a pau o ke kulana kane, a e pu koke ia hoi kuu lauoko a paa, i hiki ai ke hoopaa ia iho kekahi lauoho ku'i maluna iho o kuu poo i wahi e manao ole ia mai ai he wahine au ma na ano a pau.

            E uhi holookoa ia hoi ko'u kino me ka paleumauma kila, a pela hoi me ka lio a'u e kau aku ai, me kou hoolako pu mai hoi i mau lako kaua na'u e hele aku ai ma ka'u huakai hele, ka mea hoi a'u e ike nei, e hooko ia ana ia mau imi ana a pau @ i makemake ai me ka holopono.

            I ka wa i lohe pono ai o ka makuakane a me kona makuahine i keia mau olelo a ke aiwaiwa launa ole a ka laua kaikamahine i pane aku ai imua o laua, ua hoanoe koke ia ae la ko laua noonoo, a ike ia aku la hoi ka hiolo makawalu ana mai o na waimaka maloko mai o na lihilihi maka me he mea la:

            Ua eha maua i ka eha lima ole a ke aloha.

            Kulou iho la ke poo o kona makuakane ilalo, oiai hoi na waimaka makee keiki e hiolo mau ana i kela a me keia sekona ana e haupu ae ia no ke ano o ka laua malama ana i ka laua lei hookahi wale no mai ko laua puhaka mai.

            Mahope o ka hoi pono ana mai na noonoo maikai iloko o kona kino a me na leo haluha'u uwe o ka mea i piha i ka minamina, pane mai la oia i kana kaikamahine me keia mau olelo ku i ka walohia penei:

            O oe e kuu kaikamahine, ka hilu hookahi iwaena o na mea a pau i hanau ia mai ma ke ano he wahine ma keia ao, a ke huli aku au a nana pono i kau mau hana, me he mea la e i okoa mai ana no ia'u, aole ou lua e like ai.

            Aka, heaha ka waiwai oia mau mea a pau, ina aole he kokoolua ma kou aoao, ka mea hoi e kohu ai ka noho ana o na mea ola hanu a ke Akua i hama ai.

            Aohe waiwai, aole hoi he kupono kona noho ana e like pela, nola la maua i manao ai, ua kupono oe ke noho pu me ke kane, aole nae o ke kane lapuwale.

            No kau noi, e hele oe e hooko i ka mea a ka naau a kou mau makua i makemake ai, a e like me kau e noi mai nei, e hooko koke ia no ia i keia wa me ka hakalia ole.

            Huli hou mai la kona makuakane a ninau mai la, i ka wa hea la i makemake ia ai keia mau mea a pau ana i hai mai ai?

            Ua makemake au e pau akoakoa mai keia mau mea a pau, i elua hora mamua ae o ke kani ana o ka hora 12 o ke awakea o keia la, a i hiki ai hoi ia olua ke hoomaopopo mai, ina paha, ua hiki ia'u ke aahu ia mau kahiko a'u i makemake ai me ka holopono.

            O keia no hoi ka wa i haalele koke mai ai o kona makuakane ia laua, a kamoe aku la oia no ka hale o ke kanaka hana kapa kila, a iloko wale no o ka wa pokole, ua hoea aku la oia a kikeke aku la ma ka puka.

            A oia hoi ka ua kanaka aoo la i pane mai ai maloko.  Owai kela?

            A oia no hoi ka wa i panai ia aku ai ka ninau me ka haina i kupono i ka manao o ke kamaaina mea hale a hemo io mai la hoi ka puka.

            Me ka leo ohaoha o na mea ua kamaaina mua, pane mai la ke kamaaina nona ka hale ana i kipa aku ai, me keia mau olelo hoolauna o na hoaloha elua i kaawale loihi, i ka i ana mai:

            Ke hoopahaohao mai nei kau huakai hele ia'u, o keia kakahiaka nui poniponi , ua halawai ia anei oe me kekahi pilikia e hiki ai ia'u ke kokua aku ia oe i keia wa, ma ke ano, he mau mea kaua a i elua i hoopaa malalo o kekahi aelike, e kokua kekahi i kekahi iloko o na minute o ka popilikia?

            O ka make, oia ka hopena o ua hoohiki paa la o ke koko, a o kau mau hana maikai no ko'u ola iloko o kekahi wa aneane loa a ka make e hookokoke iho ana maluna o'u, oia kou wa i lilo ae ai i hoopakele no kou hoaloha nei.

            A ke poina ole nei au i kau mau hana maikai a pau, a hiki i ka wa e iho mua aku ai o kekahi o kaua iloko o ka luakupapau, ka hopena loa hoi o ko ke kanaka hanu ana i na ea piha i ke kaumaha a me ka ehaeha o keia ao.

            Ua hooki koke iho la oia i keia mau olelo, ma ke kau pono ana mai o kona mau nanaina maluna o ka Haku o ke Kakela o ka Lokowai.

            Aole au i hele mai nei e hai aku no na lono o ka ehaeha, aka, he mau mea hoohauoli a hoolana manao no ko'u mau la aoo, no ka hele hoolanalana ana aku ma kekahi wahi kaawale mai ke kolanakauhale nei aku, me ko'u ohana pu.

            Nolaila, ua ulu ae ka manao iloko o'u e hele mai e kauoha aku ia oe, e hana ia i kapa kila manoanoa, nona na pono a pau e uhi ana i ke kino o ka mea nana e aahu ana, a e paa hoi i ka hora eiwa o keia kakahiaka a mamua iho paha.

            I ka wa no i pau ai o kana olelo ana, unuhi ae la oia mailoko ae o ke eke ili ana e paa ana, i ka huina o elima haneri dala lelo ma ke gula nona ka huina waiwai io o $10,000.

            E hooko aku ana au i kou makemake, a e hooko aku ana au i ka hora ewalu ponoi o keia kakahiaka me na mea a pau i makemake ai a i kulike hoi me kau i hoike mai la.

            Mahope iho o ka pau ana o na kukai olelo ana mawaena o laua, ua haalele koke aku la ke kanaka aoo nona ke Kakela, a huli hoi koke aku la oia no kona home, me ka hauoli o ka manao, no ka holopono o na mea a pau ana i makemake ai.

            A o ka wa no hoi ia i noho koke iho ai o ka mea hana pale umauma kila a i lawe koke ae i na hooko ana o kana apana hana, hoala koke aku la oia i kona poe paahana a pau, no ke alu ana i keia hana nui, no lakou hoi ka huina he 1,000.

 

HALA I WASINETONA NO KE KUE I KA HOOHUI AINA.

 

Los Angeles , Jan. 8.  O Konela Haarison Gray Otis, ka lunahooponopono o ka nupepa Los Angeles Times, ua hala aku oia i Wasinetona no ke kue ana aku i ka hoohuiaina.  E hoike aku ana o Konela Otis i na hoa o ke Senate a me ka Hale o na Makaainana i na manao kue o na kanaka o na kapakai Pakipika i ka hoohiaina.  Ua kamaaina o Konela Otis i kekahi poe Senate, a nolaila, ua hiki iaia ke hoonee aku imua i kana kumuhana me ka ikaika.  I kona wa ma ka Hikina e hoea loa aku ana oia i Colmbus, Ohio, a e kokua ana hoi oia i ke koho hou ana ia Mark Hanna.

 

OLELO HOOLAHA.

 

            E IKE auanei na kanaka a pau i keia, owau o John Mitsuhashi Iapana, e noho ana ma Pahoa.  Puna Ke papa aku nei au i na mea hale kuai o kela a me keia ano, aole e hoaie i kuu wahine i mare ia, oia o Mrs. Piipii w. Ina oukou e hoaie ana iaia, alaila, maluna no o oukou ko oukou poho, no ka mea, ua haalele kumu ole mai oia ia'u a me na keiki a maua, a ua mahuka aku oia me kana kane manuahi.

                        Owau iho no,

                        John Mitsuhashi.

 

Wikiwiki!!  Wikiwiki!!

Keia ka wa e Kuai ai i na i ole Huluhulu

NA KAHUO

L. B. KERR

KA MEA HOOLAKO I NA KANAKA.

 

Eia ke kuai nei me ka hoemi nui i ike oleia mamua.

 

HE LEHULEHU O NA WAIWAI HOU.

 

Me he mea la e haawi wale ia ana.  Mai kali hookahi minute.

E hele mai mamua o ka pau loa ana o keia mau kumukuai.

            Na MIKINI HUMUHUMU e hooliloia aku no ma na uku liilii ia no ma ka mahina.

                                   

L. B. KERR.

                        HONOLULU—ALANUI MOIWAHINE--HONOLULU