Ke Aloha Aina, Volume IV, Number 4, 22 January 1898 — Page 5

KE ALOHA AINA

 

 

KE ALOHA AINA, POAONO, IANUARI 22, 1898.

 

HAMAU KA LEO O KE KAI.

Poha ka Leo o ke Kuhukuku.

OILI KA LA I KA UHIWAI.

Ua Ao o Hawaii Nuiakea.

 

E ka Lahui, Kulia i ka Nuu.

 

            Ma ke ku ana mai o ka mokuahi Moana i ke ahiahi Poaono nei i loaa mai ai ia makou kekahi leta i kakau ia me ka awiwi, e kekahi o ko kakou mau Elele e noho mai la i ka ehuehu o Wasinetona, a no ka pono a me ka pomaikai o ko makou mau makamaka heluhelu, ke pahola aku nei makou me ka hookaulua ole, i ua leta ala i anoi ia, a oia iho keia malalo:

            Ebbitt House, Dec. 31, 1897.

I kuu ALOHA AINA ahonui

            Aloha! Aloha!! Aloha Happy New Year oe.

            Mamua ae o ka o ana mai o na kukuna malamalama o ka la o ka makahiki hou, ke haawi e aku nei makou i ko makou aloha hauoli no ia makahiki hou e hoea mai ana, a e like ana hoi ia hauoli ana a makou ma keia aina malihini me ko oukou hauoli makahiki hou ma ka aina hanau, e kuu ALOHA AINA, e halawai aku ana keia leta me oe, iloko o ka makahiki hou, a pela pu no hoi me ka lahui.

            A o kahi oi loa aku paha o ka hauoli a'u e hoike aku ai imua o oukou, oia no ka lilo ana o na e-ka mua o ka hana, a makou i hele mai nei, i mea e hauoli pu ai me ka makahiki hou, a e ukali ia na hopena o ka hana a ka lahui i hoouna mai ai ia makou ma keia aina malihini, i kamaaina mua ole, i mea e hoopomaikai ia mai ai ka hana i kaulana ai ko kakou aina. Huro!

            E hoolei mai ana ka makahiki hou i kona nani maluna o Hawaii Kuauli, elike me ka malamalama o ka la i ke awakea, me ka ponalonalo ole, a me ka hiki ole hoi ke huna ia.

            Na Iehova ka lahuikanaka, a no Iehova o Hawaii, a e hoonani ia kona inoa.

            Eia no makou ke noho ae nei e hana me ka hooikaika nui ana, e hooi aku i na mea a pau e holomua ai ka hana a kakou a pau i hoomanawanui ai, a oiai no hoi, o ka la hope keia o keia makahiki, ke manao nei au, e lawe pu ia aku ma kona alahele na kinaunau a pau e pili ana no ka kakou hana, a ke puka mai hoi ke ao o ka 1898, me kona mau kahoaka hauoli, e hiki ole ai ke paa iho i na manao mahalo i ko Iehova alakai ana ia kakou a pau, e kupaa mau no ke aloha i ko kakou Alii Aimoku, ko kakou aina hanau, a me ko kakou lahui pu.

            O ka'u wale no e hoike aku ia oe e kuu ALOHA AINA, o ke kulana no na mea pili i ka Ninau Hoohuiaina, eia oia ma ke kulana mauleule, a oiai hoi, he mau la hoomaha keia no na Senate a me na Lunamakaainana, mai ke Karisimaka mai a ka Hapenuia, nolaila, ua hiki ole ia'u ke hoike aku i na mea i hanaia iloko o ka hale i keia mau la iho la i hala akula, aka, ma ko makou hoomaopopo ana, i ke kulana o na hoa a pau o na hale a i elua, ua hiki ia'u ke hooia aku imua o kuu lahui, ke ko nei ke au o Halaea mahope o ko kakou aoao, a manao no hoi au, aole no paha e hala ae keia mau la e nee mai nei a lohe aku oukou, ua make, a ua nalo loa ka hoohuiaina, mai ke kulanakauhale nei aku o Wasinetona.

            He maikai no ko makou mau ola kino a pau e noho nei, a ua oi palua iho hoi ka ikaika hana maluna o kela a me keia Elele, e hele ana i o a ianei, me ka hooikaika pauaho ole, he mea ole ke anu o ka po, ke poha mai ka leo kauoha no kahi o ke ola, e hiki ana makou a pau ia wahi, a pela wale no makou a pau e uhaiaholo nei i ka po a me ke ao, aia no ka pono, a akaka ke kauna lawaia olu iho la ka manao, pela na la a pau e noho ia nei i Wasinetona nei.

            E hoike aku i na manao hoolana imua o ka lahui, ua kokoke loa mai ka wa e hookoia ai ka makemake a lakou i hoouna mai ai i na Elele, a aole no hoi e liuliu na la, a hui hou aku no kakou he alo a he alo, iloko o ka lokomaikai palena ole o Iehova, ka mea a makou i kukulu ai mamua o ko makou alahele, i pakana oia no ka hana a ka lahui i hoouna mai ai ma ko makou lima.

            Nolaila, kulia i ka nuu, hoomoe ia na leo pule ma ka paepae kapu o Liloa, a hoolana mau iho i ka manao o ka lahui, no Iehova ka aina, a no Iehova no hoi ka lahui Hawaii, a no Iehova no hoi keia mau alakai a makou e hoike aku la ia oukou.

            Aloha Happy New Year kakou

            JAMES KEAUILUNA KAULIA

 

            O keia ae la ke kope o ka leta a makou e hoopuka aku nei, a e like no hoi paha me ko makou hauoli, pela no hoi ka lahui e hauoli like ai, aka, o ka makou no nae e hoomanao mau aku ai i ka lahui, oia no ko lakou hoomau ma ka hoahu mau ana, i ola no na Elele a kakou, ka mea e mau ai ko lakou noho hana ana ma ka aina malihini.

 

            The Ebbitt House,

                        Washington D.C.

                                    Dec. 30, 1897.

 

IA MRS. EMMA A. NAWAHI,

                        Aloha nui:

            Ua loaa hou mai kau leta elua ia'u me na manao ulumahiehie no ka oukou hana hoopahaohao imua o ke ao holookoa, no ka imi ana i alanui no ko oukou mau Elele e noho ai he mau mahina, a i ole e pau ai ka Ninau o Hawaii i ka noonooia maloko o ka Aha Senate, a i ole, i na hale no paha a elua.

            Ae! Nui ke ahonui o ka Peresidena wahine o ke aloha aina, a me kona Papa Hooko a'u hoi e olelo ae la: Na puuwai hao kila mageneti naue ole o ka lahui Hawaii, aole oia wale no hoi ka'u e mahalo ae na lala oia Ahahui, ka poe nana i hookumu ka hana, aole ia lakou wale i na halii hanau o ka aina, na poe hanohano, na poe waiwai, a me na poe a pau i hana ia hana maikai, mai na lala o ka Ahahui Aloha Aina o na kane a me ko ke Kalaiaina, me lakou ko'u mau hoomaikai palena ole, owau wale, o makou no a pau, maia Kalani a ia makou na Elele, a e mau aku ia hana ma na mokupuni a pau ina he mea hiki. Mahalo! Mahalo Nui!! Mahalo mau loa!!! a e ola ka poe a pau i haawi i na hana kokua maikai i ke Akua oiaio, ko kakou Haku Iesu Karisto, Amene.

 

KA MOHAI LANI

 

            Oluolu ke ola kino o ka Mohailani a ka lahui, ka Moiwahine Liliuokalani, mohaha mau Kona mau helehelena, hauoli mau Oia i na manawa e ike mai ai ia makou, me he mea ala, eia no ka lahui Hawaii imua Ona, ke ike mai ia makou.

            Ikaika Kona kino, e ala kakahiaka nui ana Oia a me Vakiki, a hele holoholo aku la iloko oia anu nui e kauhola ana maluna o ka aina, aole makou e ike aku, lohe mai la, aia ke 'Lii i ka holoholo, ua hoi mai la mai ka holoholo mai.

            Nolaila, e ka lahui Hawaii, ke hoike ia aku nei ia oukoui he oluolu Oia, he ikaika ke kino, a ke aloha aku nei i ka lahui mai Hawaii a Kauai, mai poina i ka pule i ke Akua Nona a me makou no a pau, a me ka makou hana no ka pono o ka aina,

 

NA ELELE.

 

            He oluolu maikai makou a pau, mai na kamaaina Joseph Heleluhe a ia makou, he oia mau ka ikaika o ko makou mau kino, me he poe la ua maa i ka noho ana o keia wahi, ke konekonea a pauhakaki o ko makou mau kino, aohe mea omaimai.

 

[E nana ma ka aoao eono.]

 

KE KEIKIALII HENERI O PERUSIA.

 

            Aole no paha i hoopoina loa ia ka noonoo o ko makou mau makamaka, a i ike hoi i na helehelena o ke Keikialii Heneri o Perusia, a i lilo ae nei hoi i Alihikaua Nui no na mokukaua o na aupuni nui o Geremania, ma na wai akea o ke aupuni o Kina, a i kipa mai hoi ma ke kulanakauhale o Honolulu nei, no hookahi manawa ma Honolulu nei, malalo o ka malu o ke Kanikela Geremania a me J.F. Hackfield, kekahi o kona mau makaainana e noho ana ma Honolulu nei, ia wa ana i kipa mai ai, a penei kekahi wahi moolelo e pili ana i kona wa i hoea mua mai ai ma na kapakai o keia aina malihini, a oia iho keia malalo iho nei:

            O ke Keikialii Henere o Perusia, he Alii Pikimana oia no luna o ka mokukaua o kona aina hanau, ka Prinz Adalbert, Kapena Maclean, a ua hekau mai hoi oia i ke awa lulu o Kou nei, i ka la 19 o Aperila, 1879, mai Acapulco mai.

            O keia mokukaua e hii ana me kana ukana makamae maluna o kona kino, ua haalele iho oia i keia awa, no elima la wale no o kona ku ana iho a holo koke aku no Iokohama. O keia huakai hele a ke Keikialii opio, he mea ia e ao aku ana iaia i ka ike ma ka oihana kaua moana a me kona ao pu ia hoi no ka haawina hoomaamaa ana ma ka hoolohe i na mea a pau i ao ia aku ia lakou. O keia huakai no hoi, he huakai kaahele ia a puni ke ao, malalo o na hoouna ana a kona aupuni iaia e hele makaikai.

            I kona wa ma Honolulu nei, ua hoea mai la ka lono imua ona, no ka make ana o kona hoahanau, ke Keikialii Waldemar, a no ia kumu, aole i haawi ia he mau ike alii ana no ka lehulehu, aole hoi na ahaaina hoohauoli manao, elike me ka mea i kuluma ia kakou ka lahui Hawaii.

            Ua kipa ike aku oia i ka Moi Kalakaua, a ua ukali ia hoi kana huakai ike e ke Kanikela Geremania J.C. Glade a pela pu no hoi me J.F. Hackfeld. I ka manawa mahope iho o kona kaapuni honua ana, ua mare iho la oia i ka wahine, oia hoi ke Kama'liiwahine Irene o Hesse, ka hoahanau hoi o ke Kama'liiwahine Alixe o Hesse, a o ka mea hoi i lilo mahope mai, i wahine na ka Emepera hou o Rusia e noho nei i keia wa.

            O ke Keikialii Heneri, iloko wale no oia o ka oihana kaua moana o kona aina, mai kona mau la opiopio mai, a o kona huluaa loa no hoi ia maluna o na wai akea o ka moana, ina ia he mea e hoea mai ana mamua o kona alo, a pela no hoi me ka oihana kaua aina ua like a like no ia iaia.

            O ka mokukaua Prinz Adalbert, ua hookuu iho oia i kona heleuma maloko nei o ke awa o Kou i ka Poaono. A ma ka hora 11:45 a.m. o ke kakahiaka Poakahi, ua haalele aku la oia i kona mokukaua no ke kipa ana aku e ike ia Kalani Kaulilua. Ma kahi o ka waapa o ke Keikialii e pae mai ai i ka aina nei, o Konela W.F. Alani, kekahi hoi o na Ukali o ka Moi, a Hope Kiaaina hoi no ka mokupuni o Oahu, a ua haawi mai hoi na koa o ka Pualikoa Hawaii i ko lakou aloha elike me ke ano mau. E ku ana hoi na kaa i hoomakaukau ia nona, ma kahi i hookaawale ia, a malaila i kau aku ai oia a me kona mau Ukali a holo pololei aku no Aliiolani Hale, kahi a na pualikoa pualu Princes Own a me na koa kiai ponoi o ka Moi. Ma keia wahi i hui kino aku ai ke Keikialii me ka Lunakanawai Kiekie o ke aupuni, a me ke Kuhina o ko na Aina E, a malaila aku iloko o ka rumi nui oloko o Aliiolani Hale, kahi ana i hui aku ai me ka Moi Kalakaua, a nana hoi i lawe aku a hoonoho iaia maluna o kekahi noho i hookaawale ia nona.

            O ke Alii ka Moi Kalakaua o ko Hawaii Paeaina, ua kahiko ia oia me kona aahu aliikoa a me ke kea nui hoohanohano o ka Aeto Ulaula o Perusia. O ka Emepera o Geremania, e noho nei i keia wa, ua lilo ia mau mea iaia maloko o kana mau haiolelo pili aupuni ana i mea nui.

            Ua haawi ia no hoi he mau haiolelo ana mawaena o ka Moi a me ke keikialii iloko o na puili pumehana ana o na poe i maa i ka noho ana malalo o ke kapukapu alii, a oia hoi kana i pane aku ai imua o ka Moi penei:

            Ua hoopiha ia ko'u puuwai me ka makemake nui, no na kaana hoaloha ana mawaena o Hawaii a me Geremania, ma ke ano he mau hoaloha pili paa, a ke hauoli nei hoi au, mamuli o ka loaa ana oia mau haawina pomaikai, mamuli o ko'u ike ana ia oe e ke Alii ka Moi, a me kou lahuikanaka pu.

            O ke kuikahi kalepa a me ka noho hoaloha ana mawaena o na lahui elua, e pono no ia e nana pono ia, a ke manaolana nei, e hooi ia aku ana ka pumehana o ka noho aloha ana mawaena o na aina elua. Me ka oiaio hookamani ole, ma ka aoao o ka ohana alii, ua hoea mai au e ike aku ia oe e ke alii, no ke kipa a makaikai ana i kou aina.

            A ua panai aku no hoi ke alii i kana mau olelo wai meli imua ona, elike me ke ano maa mau oia alii he puuwai piha mau i ka lokomaikai a me ka hauoli.

            Malia paha, o ulia ae no ka wa a hoea hou mai oia ma na kapakai o Hawaii nei ma keia mua aku.