Ke Aloha Aina, Volume IV, Number 2, 8 January 1898 — Page 3

KE ALOHA AINA

 

HE WEHI HOOHENO MAKAHIKI HOU NO LILIUOKALANI I WASINETONA.

 

Kaulana mai nei o Liliuokalani,

He Kuini a he koa no Hawaii,

Puuwai hao kila makeneki,

Nana i alo aku i ke ehuehu,

A na kupuino a o Hawaii nei,

Mea ole ia hana a ka enemi,

I ka pua kaulana a Kamehameha,

Nana i na’i aku puni na moku,

Kohu Olali oe i ka ike aku,

Ka pahee ka pakika i ka ili kai,

A waho ae oe a o Mamala,

Hapai ko Hae welo i ke kia.

E hai mai ana i ka aina,

Eia hoi au ke alo nei,

Na ale nupenupe a o ka moana,

He moana kai loa kai hohonu,

Mea ole ia loa i ka manao,

Kou aloha paa i ka lahui,

Haina ka puana a i loha ia,

No Liliuokalani i ka lanakila.

            LAHUI ALOHA AINA.

            Honolulu, Ianuari 6, 1898.

 

HOOKUUIA O C. W. AKEPOKA E HOI MAI.

 

            Ma ka halawai ana a ka aha kuka o ke aupuni ma ka Poakolu nei, ua lawe ia mai ka noonoo ana no ke noi a Akepoka e hoi mai i Hawaii nei. Ua kohoia e hookuu mai iaia e hoi mai i keia mau mokupuni, aka, aole nae he leo ae, aole hoi he hoole, aole no hoi he leo kuei lohe ia mawaena o lakou.

            Aole i huikalaia mai o Akepoka, no ke kumu aole oia i hoopai ia. Ua hopuia oia e keia aupuni no ke kipi, a na ae e haalele i keia aina a hiki i ka wa a ke aupuni e kala aku ai iaia. Ua kokua loa ka mana hooko e hookuu iaia e hoi mai.

            Ua manao ia e hoea hou mai ana oia ianei maloko o elua pule, a hoomau hou no i kana oihana loio ma keia kulanakauhale. O V. V. Akepoka aia pu no oia i Kapalakiko, a ua hoohala ia ka hapanui o kona manawa maluna o kahi moe, mamuli o kona loaa mau i ka ma’i.

 

E HOLO ANA ANEI O DOLE I WASINETONA?

 

            Ua ike iho makou makou maloko o ka nupepa, ua hui ae kekahi poe kokua ikaika loa i ka hoohuiaina maloko o Iolani Hale ma ka auina la o ka Poalua nei, no ke kuka ana i ka hoouna ana aku ia Peresidena Dole i Wasinetona, i mea ka e ike mai ai o Amerika Huipuia a haawi mai i na kokua ana no ka hoohuiaina. Aole nae i maopopo kona holo io i keia wa, o ke kumu nana i keakea, oia keia kau ahaolelo o ua Repubalika nei, e wehe ia ana ma keia mahina. He elua hora a oi o keia halawai, aole nae i hooholo ia ma ke koho ana.

 

            Ua haawi makana Karisimaka aku o T. H. Davies he $500 i ka home hoohanau keiki Kapiolani.

 

Nuhou Kuwaho.

 

            Ma ke ku ana mai nei a ka mokuahi Auseteralia ma ka Poalua nei, i loaa mai ai ia makou na mea hou makamaka loa o na aina mamao, a no ka pomaikai o ko makou poe heluhelu, ke hoopuka awiwi aku nei makou penei:

 

UA HOOKUEMI IA NA ENEMI.

            Havana, Dec. 27. He ekolu kolamu o na pualikoa Sepania malalo o ke alakai ana a Keneraia Linare me Vara de Rey a me Lutanela Kolonel Chagel, ua hoike pili aupuni ia ae i keia la, ua hoopuehu aku lakou i na enemi ma ka apana o Santiago de Cuba mai ko lakou mau kahua ikaika aku, a ua puhi ia i ke ahi he 200 pupupu hale ma Jua Varona.

            O ka nui o na make ma ka aoao o na Sepania he 1 intanela me 18 koa a me 53 poe i hoeha ia.

 

LAWE O RUSIA I KE KULANAKAUHALE O KIN CHOW.

            St. Peteroboro, Dec. 27. Ua lawe ae o Rusia ia Kin Chow, he kulanakauhale ma ka aoao akau o P@ta Ata. He elua mau mokukaua me na heluna nui o na koa Rusia kai kauoha ia aku no ka holo ana aku i na wai o Kina no ka hoopuipui ana aku i kona mau aumokukaua e kiai la malaila,

NA MOKUKAUA HOU O IAPANA.

            Wasinetona, Dec. 21. Ua loaa mai nei he hoike i ke Kuhina Iapana, o na mokukaua elua o Iapana e kapili ia nei e keia aupuni, ua kokoke loa laua e paa a he mau pule wale no koe a hoolana ia aku laua. O ka mokukaua e kapili ia nei ma ka pa kapili moku o Cram@s, ua kapa ia aku kona inoa o Kasagi Khan, a o ka la i manao ia no kona hoolana ia aku, oia no ka la 20 o Ianuari. O kuhina Hoshi a me kona mau ukali me kekahi poe i kono ia e hoea ae ana lakou malaila. O ka mokukaua e kapili ia nei ma Kapalakiko, o Chitos kona inoa, iloko ana ia o Feberuari ‘s hoolana ia ai. He 5000 tona ko laua kaumaha pakahi, a he like loa hoi ko laua ano. He iwakaluakumamalua mile ko laua holo i ka hora.

 

POWAIA KE KUHINA KAUA O BERAZILA

            Ua make mai nei o Marshal Bitterscourt, ke Kuhina Kaua o Berazila, i kona wa e hoao ana e hoopakele i ke ola o ka Peresidena Prudente de Moraes ma ka hoao ia ana mai nei e powa ma Rio Janeiro. E hele ae ana ka Peresidena me kona ukali mawaho o ka hale hoahu pauda, oia no ka wa i lele mai ai o kekahi koa o ka puali helewawae, nona ka inoa o Macellino Bispo de Mello, a kau mai la i kana pu panapana i ka Peresidena, a oia no ka wa ona i ki mai ai i kana pu panapana, aka, aole nae ka Peresidena i ku i ka poka, ua uhau aku o Konela Mondez de Moraes i kana pahikaua a haule aku la ka limakoko iluna o ka Iepo. Ua hoao ia aku ke kaili ana mai i ka mea make a Marcellina, aka ma ia aumeume ana nae, na unuhi ae la ua limakoko nei i kana pahi a hou aku la he ekolu manawa i ke Kuhina Kaua, nana i kaili aku i kona ola mai keia ili honua aku.

 

HE PUULU HOOHAUNAELE.

            Ladana, Dec. 24. Ua olelo ae ka mea kakau nupepa Daily Telegraph e noho nei ma Viena, na hoopoino aku kekahi poe hoohaunaele Czechs i ka halekula o na poe Geremania ma Werechorowitz, he wahi e kokoke ana i Parague. Ua hoea ae na makai makai malaila no ka hoopuehu liilii ana aku i na poe hoohaunaele, a ua make he hookahi iloko o keia uluaoa ana.

 

KE HOOLAIA NEI I MAKUKAU LELE I KA LEWA.

            Nu Ioka, Dec. 23. He lono kai hoea mai nei i ka nupepa Tribune mai Indianapolia e olelo ana, o William S. Roberts o Hartford City, Ind., ua hoouna aku la oia he mau hoolala ana nana no kekahi makukaua lele i ka lewa, mahope koi o kona imi hoomanawanui ana no 15 makahiki, i ke poo nui o ka Hui Hoailona o Amerika Huipuia, ma ke noi a Kenerala Alger, ke Kuhina Kaua. Ua hoea aku oia i Wasinetona i kela kau hooilo aku nei, me kana mau hoolala ana, a ua apoia mai ia me ke ohohia nui.

 

I’AKELE MAHUNEHUNE MAI LILO I MOEPUU NA KE AHI.

 

            Ma ka hora 12 o ka po Poakolu nei, ua ikeia aku la he ahi e lalapa ana iloko o ka lua ukana o ka mokupka a. W. Spies, e ku nei ma ka uwapo o Dilinahama.

            Ua kaheaia na kokua mai na luina mai o na mokupea e ae e ku ana malaila, a he 25 kanaka pakahi o na mokukaua Balatimoa a me ka Beninetona, a he poe mai no hoi kekahi mai ka mokukaua Adamu mai, a iloko o ka manawa pokole ua hoopiha ia ae la o luna o ka moku pauahi.

            Ua lawe pu mai na kanaka o luna o ka makukaua he mau pauma wai no ka hoopio ana i ke ahi, a iloko o ka manawa pokole, ua pio iho la ke ahi, aole maopopo ke kumu i hoea mai ai, ua laki nae aole he nui o na poina i loaa iaia.

 

E LILO AKU ANA NA POMAIKAI.

 

            O ka hoohui ana mai ia Hawaii he hoolilo ana aku ia ma ke kanawai, ina 21000 Pake, 31000 Hawaii me na kanaka koko hapa a me na Iapana he heluna nui i mau Amerika, a pela pu hoi me na lahui e ae e komo wale mai ana lakou me ka hiki ole i ko kakou mau kanawai hoopae limahana ke papa aku. O keia iho la ke kahua ma keia mua aku ana. – Boston Transcript.

 

NOI O AKEPOKA E HUIKALA IAIA.

 

            Ua ike iho makou maloko o ka nupepa Avalataisa o keia kakahiaka Poakolu, e waiho ia aku ana ka palapala noi a C. W. Akepoka e huikala iaia a e hoi hou mai oia i keia mau mokupuni imua o ka Aha kuka o ka aupuni.

            O C. W. Akepoka, he loio i kamaaina i na poe o ke kulanakauhale nei, a mamuli o ka ulu ana o kela haunaele o ka makahiki 1895, i kipaku ia aku ai oia mai keia mau kapakai malalo o kona hoahewa ia ana he kipi.

            Eia no oia i Kapalakiko e noho mai nei me ka lawelawe ana i kana oihana loio malaila.

 

HE KUE NA POE O KALEPONI I KA HOOHUIAINA.

 

            Aole he kokua o na poe o Kaleponi i ka hoohuiaina o Hawaii, aole no hoi he maopopo o ke Senate Perkins manao. O na ona wale no o na laina mokuahi a me kekahi mau kanaka kalepa helu wale no o Kapalakiko kai manao, o ka hoohuiaina ana me Hawaii, oia ka mea e pii mahuahua ae ai o ko lakou waiwai, aka, o ka heluna nui hewahewa nae o na kanaka mahiai o Kaleponi a me na kanaka hana e ae o Kaleponi he kue ikaika loa lakou ia mea. – Sacramento Bee.

 

KA OHUMU HOOHUI AINA.

 

            O ka Nupepa Bee, he kue ikaika lo@ oia i ka hoohuiaina o na mokupuni o Hawaii mai kinohi o ka hoopuka ia ana o ia kumuhana, a a hauoli hoi i ka ike ana aku i na nupepa e huii mai ana me na kanaka naauao he lehulehu wale e kakoo pu mai ana ma ka aoao o ka pono a me ka pololei. Ua komo kuhohonu loa keia pepa iloko o na kalaimanao ana no keia kumuhana ma na manawa he lehulehu wale, aka, o kona manao ikaika, oia no ka hookaawale ana aku i keia ohumu hoohuiaina weliweli – O keia lahui aole loa lakou he pono e lawe mai i kekahi waiwai aihue ia, me ko lakou ike aku no he waiwai iai i aihue ia. – Sacramento Bee.

 

HE KEU A KA MAKA’U OLE.

 

            Mamua o ka poha ana mai o ka malamalama o ka la i ke kakahiaka Poaha nei, ua puka mai la na lono no kekahi aihue mama’u ole i hanaia ma ka halekuai laau o Hollister ma, ma alanui Papu, a me ka halekuai lole o Ehlers ma, a i koho wale ia aku hoi, me he mea la, he hookahi wale no paha kanaka nana i hana keia mau hana a i ole he lehulehu aku no paha ka poe i komo pu iloko oia hana.

            O ke komo ia ana iloko o ka halekuai laau o Hollister ma, me he mea ala, aole ia na ka mea malihini, oiai mamua aku nei no i komo aku ai ka aihue a lawe aku la he $20 mailoko aku o ka ume o ka pakaukau kuai, a haneri a oi mau ciga puhi, a he mau omole wai ala kumukuai nui. O keia ka wa a ke kolohe i mimo aku ai a nalowale loa.

 

E MALAMA PONO E NA KALAI WA KAA.

 

            Ua ike a ua kamaaina mau makou i kekahi o ko kakou mau poe kalaiwa kaa mai ka poe kalaiwa kaa pi’o a ka poe kaa lawe ukana o na ano a pau, e holo hookelakela ana ma na alanui, me ka nana ole i ka pono o ka lehulehu, e hele ana ma na alanui akea. Aole makou e kamailio hoino ana no ka poe kalaiwa kaa noonoo maikai, a e malama pono ana hoi i ka lakou mau hana no ke ola o na mea a pau.

            O ke kumu nui o ko makou lawe ana mai i keia manao, oia no ka hoea mau ana mai o na ulia poina maluna o ka hemahema a me ke kupono ole maoli o kekahi poe kalaiwa kaa i haawi ia ai o na laikini kalaiwa i kekahi poe, a oia hemahema, aia no ia maluna o ko ke aupuni nana pono ole ana a ka poe kupono, alaila haawi aku. A mamuli oia hemahema i ae ia e ka mana o ke aupuni, i puka mai ai he nui a lehulehu wale o na poino oia hoi, ua ku hoohemahema wale ia na lio, ua ia ka poe ona e kalaiwa elike me ko lakou makemake. Ke ole makou e lohe hewa, elike me ka lono i hoike ia mai ia makou no ka poino ana o kekahi kaa pi’o i ke ahiahi Poaono nei, nona ka Helu 16, a o Keoneula ka inoa o ke kalaiwa, a he makuahine a me na keiki ko luna, ua inu ka keia kalaiwa kaa, a ina io pela, alaila, e pono e a’o ia keia kalaiwa kaa, a i ole, e lawe koke ia kona laikini, Koe wale no, ina aole oia i hana pela, alaila, aole e ili aku ke koikoi o kela mau olelo hoahewa mua a makou maluna ona.

 

            Ua malama ia ae no na hana keaka o luna o ka mokukaua Baltimore i ke ahiahi Poaono nei.

 

He nui ka ino o ka moana i keia mau la, pela ka hoike a na kapena o na mokuahi holo piliaina e ku mai nei.

 

            O ka Moana ka mokuahi e hoea mua mai ana mai Kapalakiko mai i keia Poaha ae, me na mo@ hou like ole.

 

            He 20 ka nui o na hihia ona i hoopai ia e Lunakanawai Wilikoki ma ka Poakahi nei, no ka hapenuia mai no ke kumu.

 

            Ma ka Poalua nei, ua lawe hewa ia ae kekahi haole iloko o ka Halewai me ka manao ia he opiuma ko loko o kona poli, aka, i kona wa i hiki ai i ka Halewai, ua loaa aku la he mau maia ko loko o kona kuka a hookuu ia mai la.