Ke Aloha Aina, Volume IV, Number 1, 1 January 1898 — HE ALOHA AINA ILOKO O KA PAKEKE. [ARTICLE]

HE ALOHA AINA ILOKO O KA PAKEKE.

O ka makou ia e hoomaopopo nui nei, o na poe i hoike ae ia lakou iho i na la kinohi o ka hookahuli ia ana o ko kakou aina he poe kue lakou i na hana lima nui a me ka hoohuiaina, ua hoike mai ko lakou mau manao i kahi e manaoio ia aku ai he aloha aina maopopo, ma na ano a pau, a ua alakai ia hoi kekahi poe o ka lahui, e manaoio aku, ua komo pono io ia poe iloko o kapuahi a Uli, mamuli o ka pahee o na olelo ana, na kalai olelo a me na kuilima pu ana, ma na hana no a pau e hiki ai ke kaualako holookoa ia aku ka noonoo ana, he oiaio ia mai waho a komo loa aku iloko o ka iwihilo. Aka, no makou iho, ua ike no i ke ano oia poe, he aloha aina ma ka lehelehe, aole hoi ma ka puuwai, a oia ka poe a makou e ike nei, he mau Ona mahiko lakou no keia Paeaina, a o lakou a pau ka hapauui, he poe manu hulu like lakou, lele like lakou e hoopuipui i ko lakou mau pakeke, me ke kokua ana o kekahi i kekahi, aia ka pono o ke ko o ka makemake, maha ka naau. No ka mea, ke hoike nei kekahi o ua auna manu hulu like la, ina haule ka hoohuiaina, alaila, o ka lilo ana no ia o ke kuikahi Panailike i mea ole, a ehia ka hoi mea aloha, o ke poho o na mahiko a lilo ko lakou kumuwaiwai i

noho hoopukapuka ai maluna o ka lepo o Hawaii, i na makahiki loihi ae nei i hala i mea ole, a o ka nee ana aku hoi ia o ka poe maikai mai ko lakou mau waihona hoahu aku i hoekepue ia no ka wa o ka pomaikai e kau ana. He aloha aina keia i hilinai i i na la i hala aku, a i manao ia hoi he oiaio ka puuwai iloko ona aka, ma ke kakahiaka Poaha iho la, maloko o ka nupepa Avalataisa, i puka mai ai kana mau kamailio ana me ka mea kakau oia nupepa, a akahi no poha pono ae kona leo me keia mau olelo, 'ina haule ka hoohuiaina a i ole, hoopanee ia paha a no kekahi wa aku, alaila, e lilo ana ke Kuikahi Panailike i mea ole," wahi a Davies i pane aku ai imua o ka mea kakau nupepa. Ke ike pu ae la no kakou, aole i huna keia hoa mahiko o lakou i kona manao, ua hoike io ae la no oia i ka mea oiaio a me ka pololei maoli no hoi.