Ke Aloha Aina, Volume III, Number 49, 4 Kekemapa 1897 — Page 8

KE ALOHA AINA

 

            8                                                          KE  ALOHA  AINA,  POAONO,  DEKEMABA 4,  1897

 

HE  MOOLELO  WALOHIA.

 

---: NO  KE :---

 

Keikialii   Alabati

 

---

Ke  Kaeaea  o  Pelekane.

 

---: A  ME  KA :---

 

Ui  Madelina.

 

---

Ke  Kukui  Uwila  o  Ainapo

---

Hoohenoia  no  KE  ALOHA  AINA

 

            O keia kulana honee kaua awiwi a na enemi e ake aku nei e lele poipu maluna o kekahi wahi a lakou i makemake loa ai e hookahi koko, me ko lakou manao, aohe a e nana e ke ʻ u keia mau hana a lakou.

            Aka, e ike aku ana kakou i ka hoolilo ia ana o keia hoolala kana ana a lakou nei i mea ole, ma o ka wawahi ana o ke keiki opio i ka lakou mau laina kaua iloko wale no o ka wa pokole.

            Oiai na pualikoa e hoolohe ana o ke kani mai o ka leo o ka o-le, no ka haalele ana iho ia wahi, oia no ka wa i hooiho aku ai o ke keiki opio i kona lio no ke kahua e hoolulu nei o na enemi,

            Me ko lakou ike ole mai, ua kokoke loa mai ko lakou wa e komo aku ai iloko o kekahi luku weliweli loa a lakou a pau i halawai ole ai maluna o kekahi kahua kaua hamama, elike me keia e hookokoke mai la imua o ko lakou alo.

            I ka @uhi ana mai o ka poeleele o ka po, oia ka wa i lohe ia aku ai o ke kani mai o ka o-le no ka liuliu ana e haalele koke iho ia wahi, a o ka hora 8 hoi ia o ua ahiahi ala a ke anoano eehia e hookokoke loa aku nei i ka pahu hopu o ka lahui hoomainoino.

            Lohe pu ia aku ia hoi me ka leo kani o na pahu, e liuliu, a e makaukau ana hoi ia wa no ka hele, elike hoi me ka makemake o ka Moi o

Denemaka a me kana keiki puuwai uahea o ka lokoino.

            O keia no hoi ka wa i lohe ia aku ai ka leo kahea o na aliikoa no ka hele ana a ike pu ia aku la hoi na lamalama kukui mamua o ka huakai, e wena mai ana me he ululaau ala, ua pau i ke puhi ia e ke ahi, ka hele a kauluwela ka nahele.

            A o keia hoi ea wa a ke keiki opio i kau pono aku ai iluna o kekahi wahi kipapali haiki loa, kahi hoi a keia mau pualikoa e hoomaka aku nei e pii ma keia wahi.

            A o keia no ka wa i huli mai ai o ke keiki opio, me ka holo o kona lio a me ka wini oi o kana maka ihe, i ulupa aku ai oia i keia poe e pii aku nei malalo aku nei.

            A iloko wale no o ka hapalua hora, aia hoi, o ka hapalua o na koa o ka Moi o Denemaka a me kana keiki, eia lakou he waiho nei ma ke waiho @noi ma ke alahe ʻ e e kau aku ai iluna o ke ahua, he poe aohe hanu ola iloko o ko lakou mau kino.

            A o na kukui lamalama hoi i ike ia aku ai i na minute mamua iho, aole loa hookahi o lakou e a mai ana iloko oia konauli poelelele o ka po.

            A o keia hoi ka wa a ke keiki opio i lohe pono aku ai i ka leo o ke Keikialii o Denemaka, e kauoha ana e hele imua, no ka hele ana e paio me ka mea nana lakou i hoolilo ia po i mea nawaliwali haalele loa.

            O keia leo hoeueu a ke Keikialii e kahea, oia ka wa i hookolo malie aku ai keia keiki opio puuwai konahao, me ka hoomaopopo ole mai hoi o ke Keikialii, ua kokoke mai kona hopena ma keia ao.

            A i kona wa i kokoke loa aku ai ma ka aoao, ike koke aku la oia i ka mea nona keia leo, e kau ana maluna o kekahi lio i uhi ia kona kino mai ge poo a ka huelo me ga pale kila i wahi e komo ole ai ka ihe a me ka wini oi o ka pahikaua iloko o ke kino o ka lio ana e kau ana.

            Me ka hookaulua ole, ua uwai aku la oia a pili kona lio ma ka aoao o ka lio o ke Keikialii, a me ke kali hou ole iho i manawa nona e ola ai oia, oia no kona wa i hoomoe aku ai i kana pahikaua maluna o ke poo o ke Keikialii, a mahele pu ia ae la kona kino iloko o elua apana, a haule aku la oia mailuna aku o ka hokua o kona lio, he kino puanuanu oia na ka make.

            I kona wa i ike aku la ua haule aku la ke kino o ke Keikialii mailuna aku o ka lio, oia no kona wa i  @kuupau aku ai i ka holo o kona lio iwaena o ke aluka o na pualikoa e nee mai nei no mua.

            Me ko lakou kuhihewa pu o ka lio keia o ke Keikialii e hoi hope aku nei iwaena o lakou me ka puahi nui, aka, o ka lakou mea pahaohao wale no, aole leo i pane ia mai, o na kino make he lehulehu wale ke muu mokaki ana iluna o ka ili o ka honua.

            A o ka wa no hoi ia o ke keiki opio me kona mea hooholo e kau ana maluna o kona kua, i kupono ole hoi ke manao ia aku, ua kupono oia e hoohana i keia hana weliweli me ka loaa ole o ka ulia o ka poino.

            O kona maalo ana ae me he wahi aka la mamua o ke alo o na koa, ua lilo ia i mea nana koa e nee nei no luna o ke kiekiena, kahi hoi a ke keiki opio i noke mai la i ka ulupa a one-a kai o Mamala.

            Hoopau ae la ke keiki opio i kona manao luku, a hookahi wale no ana mea i koe e hana ai, oia hoi kona huli ana a loaa aku ka makuakane o ke Keikialii, ke kumu mai hoi o keia hoea ana mai o keia poe.

            Aka, oiai nae oia e ake ana e ike pono, aia hoi, ua hoonele ia mai la kona ike ana aku i ua kanaka la, oiai, ua mahele lua iho la laua i na alahele a laua e komo aku ai no loko o ke kulanakauhale, a pela iho la i nele ai oia i ka mea ana e huli nei, a oiai hoi, ua kokoke loa oia no ke kulanakauhale o Ladana, kahi ana i upu ai e ko kona manao ino.

            No keia mea ua komo mai la na manao iloko ona, ua hala paha oia ma kekahi alahele okoa, ke kumu hoi o ka loaa ole iaia.

            Me ka hookaulua ole iho hoi holo o kona lio, ua haalele iho la oia i ke kino make o ke Keikialii a me kona mau kea e waiho ana malalo o ke awawa no ka manawa mau loa, a o na koa hoi, e puhee liilii ana io a ia nei.

            O keia ka wa ana i haawi iho ai i ka palua a pakolu o ka ikaika hoonee o kona lio e hanu ana ma ka meheu o ka Moi o Denemaka.

            A he mea oiaio, e kuu makamaka heluhelu, iloko wale no o ka manawa pokole, ua lohe aku la oia i ke pahupahu o na kapuai lio a me ka nakeke o ka lakou mau mea kaua, iloko o ke konouli poeleele e halii ana maluna o lakou a pau.

            A me he mea la, o ka manawa o ka uwati i kela wa, oia no ka hora 12 o ka po, a no lakou wale no hoi ke kowa a komo aku iloko o ke kulanakauhale, he ekolu mile.

            No ka lohe pono ana aku la o ke keiki opio, eia kona mau enemi mamua ona kahi i hele ai, nolaila, aole oia i kaohi mai i ka holo o kona lio, aka, ua hooi mau aku la oia i kona ikaika holo nui me kana ihe i makaukau e lumai aku i ke ola o ka mea e hoao mai ana e kue iaia.

            No keia pohapoha aku o na kapuai lio mahope o na pualikoa, na ia mea i hookaulua iho i ka nee ana o na pualikoa o ka moi o Denemaka me kona manao, a o lakou no hoi a pau, he Elele keia e holo mai nei mai ke Keikialii mai.

            Nolaila, kaohi iho la lakou a pau i ko lakou mau lio pakahi me ka manao e loaa ana la hoi he leo pane mai keia hololio mai e holo mai nei mahope o lakou.

            Aka, ua kuhihewa nae lakou, mamuli o ko lakou manao ana, o keia hololio la e uhai mai nei mahope, he elele la ia i hoouna ia mai e ke Keikialii, a nolaila, hoi ke kumu o ko lakou kaohi ana i ko lakou mau lio.

            Aka, i kona komo pono ana mai iwaenakonu o na pualikoa, ua hoeha pakahi aku la oia i kela a me keia koa, i wahi no lakou e ike ai, aole keia he elele, aka, he kipi keia i ko lakou aoao.

            Ua holo koke ae la na leo hooho iloko o na pualikoa, e hoike ana, aia he kipi iloko o na pualikoa, kahi i haulani ai, a e pono hoi e hopu koke ia me ka hoohakalia ole.

            O keia leo kauoha e wawalo nei ma o a maanei o ka aoao o ka lio o ua wahi keiki nei, oia no ka wa i ike ia aku ai o na pahikaua o kela a me keia koa kaua lio e hulali ana ke kanouli poeleele o ka wanaao.

            Aka, aole nae o ko lakou nui ana a me ka lawa hoi i na pahikaua kaili ola, he mea ia nona e kuemi hoipe mai ai ihope.

            Oiai, ua lawa kona wahi pauku kino nuku e alo iloko o ka ehuehu no ka hoopakele ana i na kanaka o konaaina ponoi, mamua hoi o ka luku wale ia no ma naalanui o ke kulanakauhale, me he poe ilio medala ole la.

            Na keia mea i hookikina mai iloko o kona umauma, e hele oia e luku i kela poe a pau me ka hookoe ole i kekahi mea hookahi o lakou.

            A oiai hoi nakoakaualio Denemaka ke uhai mai nei mahope, oia no ka wa a ua wahi keiki opio nei i holo pololei aku ai no ke kulanakauhale alii o Ladana.

            Aoleno hoi i hookuemi hope mai keia poe i ko lakou uhai ana mahope o ua wahi keiki nei, oiai lakou eia iwaena o ke kulanakauhale kahi i holo ai.

---

AHEWAIA  HE  EKOLU  POE  I  KOMO  PU  MA  KA  PEPEHIKANAKA  O  KAUAI.

---

            Ua ahewaia he ekolu poe i manao ia ua komo pu, a o ka eha, ua hookuuia e na kiure ma ka auwina la o ka Poalima nei, no lakou hoi na inoa a me ko lakou mau hoopai pakahi :

            Kapea no ka pepehikanaka,

            Kaio no ke kokua pepehikanaka mamua o ka hookoia ana oia hewa.

            Upapa no ka huna hewamahopeo ka hana ia ana o ka hewa, a ua hoopaiia oia he ekolu makahiki hoopaahao me na koina e Lunakanawai Perry.

            John Rathburn, ua hookuuia oia e na kiure.

            Aole i kauia ka hoopai o na mea mua elua, oia o Kapea a me Kaio, a ua waihoia aku la kolaua hoopai no kelakau kiure hou aku.  Ua hoike ae ka loio o Kapea a me Kaio e hoopii hou aku ana oia i keia hihia imua o ka Aha Kiekie, a me he mea la e hoolohe hou ia ana ko laua hihia ma keia mua aku.  Eia ke manao ia nei e weheia iku kiure kuikawa mamuli o ka nui o o na hihia i koe, aole i hookolokoloia.

---

KIPUIA  HE  ALIHIKAUA  NUI.

---

            Nu Ioka, ov. 13.  He lono kai hoea mai i ka nupepa Herald mai Panama mai, e olelo ana :  O ka mea kakau o ka nupepa ma Guayaquill, Ecuador, ua telegarapa mai oia, ua kipu aku la ke Kuhina Berazila, he elua manawa i ke AlihikauaNui o na pualikoa o La Tachunga.

---

            Eia ka Halekuai o W. H. Schmidt & Son, ka haawi makana nei i na Alemanaka o keia makahiki ae i na poe e kuai ana ma kona halekuai

 

HOPUIA  NO  KA  HAKAKA.

---

            He  @lono telepona kai hoea mai i kka halewai i ke ahiai o ka Sabati nei, mai ke kanaka kiai mai o Peresidena Dole no kekahi mau wahine e hikaka ana maloko o kekahi pahale mauka iho o ka halekula o Kahehuna, ua hoouna kokeia aku he mau makai ilaila, a lawe mai la ia laua no ka halewai, no laua na inoa Elena a me Kekela, ma ka halewai, ua uku aku la o Kekela kona bona a hookuu ia mai la, ma kona hoikeike ana aku i na makai he $ 350 ma ke gula ,aka, aole nae i komo ke aloha iloko ona no koa hoa, a haalele aku la oia ia Elena e paa hookahi maloko o ka halewai, no ka mea, aole he hookahi keneta iloko o kona pakeke no ka bela ana iaia.  He ona mai no ke @kninu  i hoea mai ai o keia haunaele.

---

            Mamuli o na palapu i loaa i ke kupakako o Noeau ma ke awa o Kalaupapa, nolaila ua pani ia aku la kona wahi e ke kupakako o luna o Mikahala.

 

OLELO  HOOLAHA.

---

            Iloko o ka Aha Apana Hookolokolo.  Ekahi o ko Hawaii Pae Aina, ma ka Hooponopono Waiwai.  Ma ka hana o ka waiwai o Kaeo Aki ( k ) o Honolulu i make kauoha ole.

            No ka mea, ua waihoia mai e Kaio na ( w ), ke kaikamahine, he palapala noi no ka Hookohu Lunahooponopono no Waiwai no ka waiwai i oleloia, a e hoopuka ia aku la iaia, nolaila, ma keia, ke hoolaha ia aku nei i ka poe a pau i kuleana ma ua waiwai la, o ka Poalima, Dekemaba 24, 1897, ma Aliiolani Hale, Honolulu, hora 10 o ke kakahiaka, oia kahi a me ka manawa e hele mai ai lakou, a e hoike mai i na kumu, ina he kumu ka lakou e ae ole ia ai ke noi.

            Honolulu, Novemaba 19, 1897.                      Na ka Aha,      GEORGE  LUCAS.   Kakauolelo.

 

OLELO  HOOLAHA.

---

            Ke hoolaha aku nei au o ka Waikiki ( k ) ma Honolulu, Oahu, i keia palapala hoolaha kuleana pili aina o Kamalenui, ( k ) i make ma Waimea, Kauai, nolaila, owau o ka inoa mua iho i ike ia ae la maluna, oia o Waikini, ( k ) ka pili koko ponoi o ka mea i make ua makemake au, o ka inoa mua, e ike ina he mau pili e ae kekahi o ka mea i make, e hoike mai ia ʻ u, i ka inoa mua Waikini ( k ) ma ka mokupuni Honolulu, Oahu, nolaila, ua makemake au i kona kahu waiwai, oia o J. M. Spencer a me na poe e ae kekahi, i na he mau aie kakehi o ka mea i make ia lakou, alalia, e hoike mai ia ʻ u, la ka Waikini ( k ) mai ka la 29 o Novemaba a hiki i ka piha ana o na malama eono.            Owau no me ka oiaio,     WAIKINI ( k )           Honolulu, Oahu, Nov. 29, 1897.

 

HOOLAHA  PA  AUPUNI.

---

            E ike auanei na kanaka a pau o na holoholona i hoikeia malalo iho nei e paa nei ma ka Pa Aupuni ma Makiki, Honolulu, Oahu, e kudala @aina ia aku ana ke hiki aku i ka la @19 o Dekemaba 1897, hora 12 awakea, ma ka Pa i oleloia ae la, koe wale no ina e uku kokeia ka uku Pa a me na poino.

            He hookahi lio wahine ahinahina hao kuni ano e, ma ka uha hope akau, helehelena keokeo me na wawae eleele eha.

            Hookahi lio ulaula hae kuni ano e ma ka ha hope akau, maka akau keokeo, kaha keokeo mai ka lae a hiki i ka ihu, na wawae hope keokeo.

            Hookahi lio eleele, hao kuni ano e ma ka uha hope akau, he eha ma ke kua, kiko keokeo ma ka lae, na wawae hope keokeo.

                                    K.  KEKUENE,         Luna  Pa  Aupuni.                 Honolulu,  Nov. 26, 1897.     nov. 29.                        3tms-dly.