Ke Aloha Aina, Volume III, Number 43, 23 October 1897 — Page 1
| This text was transcribed by: | Jean Howard |
| This work is dedicated to: | Awaiaulu |
KE ALOHA AINA
BUKE III HONOLULU, POAONO, OKATOBA 23, 1897 HELU 43
KE ALOHA AINA
E hooopuka mau ia aku ana mai ka Poakahi a ka Poalima o na pule a pau o kela me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pe@a.
E pai ia no na Olelo Hoolaha, na Kanikau me na Mele Inoa, me ke Dala kuike. Aole nupepa ma ka owili pakahi e hoounaia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoola @a, na Kanikau a me na Mele Inoa i ka Lunahooponopono o keia Pepa.
Aole loa e hoopukaia a hoolahaia kekahi manao ma na kolamu o keia Pepa, malalo o kekahi inoa kapakapa ke ole e hoike mai i ka Lunahooponopono i kona inoa ponoi.
Ka Nupepe Puka Pule
E – ALOHA – AINA
Hookahi Makahiki $ 2.00
@ono Mahina 1.00
@ oia mahina .50
Hookahi Mahina .20
EMMA A NAWAHI
Puuku o
E – ALOHA – AINA
EDWARD L. LIKE
Lunahooponopono a Hope Puuku
S. P. KANOA
Hope Lunahooponopono
O na Kauoha Nupepa me na hookaa Dala, e hoouna pololei mai i ka Puuku ma Honolulu.
----------------
NUHOU KUWAHO
---------------
KE HULIIA LA KA AILA HONUA MA BORNEO
Tacoma, Oct. 4. O kekahi poe o ka Samuels, e hoouna mau nei i na aila honua mai na lua aila honua mai o Rusia i Iapana, Kina a me Inia, eia lakou ke hoao nei e huli i ka aila ma ka aoao hema o ka mokupuni o Borneo, a ua manao ia @ miliona dala no na hoolilo ana. He kanaha poe enegini akamai, ma ka nana ana i ka aila, he kanakolu o lakou he poe Amerika, he lehulehu wale o na mekini eli i hoolele ia aku i Borneo, me na alahao no ka halihali ana i na mekini.
UA LOAA AKU KE KINO MAKE O KA LIMAKOKO ME KE BEBE.
Antwerp, Oct. 2. Eia ke kulanakauhale iloko o ka ulua oa mamuli o ka hoea ana ae o kekahi mea huna nana i hoopihihi i na makai a me na kanaka.
He kanaka huki bele no ka Luakini St. Paul, nona ka inoa o Nuyens, ua hoohiki iho oia no ka hookau ana i kekahi hoopai no kekahi kanaka nona ka inoa o Derollus me kana wahine no kekahi mea a laua i hoehaeha ai iaia, he mau mahina pokole i hala ae nei ua aihue iho la oia i ka bebe o eha makahiki mai na makua mai, mahope mai ua kakau aku la oia i na makua, aole laua e ike hou ana i ka laua keiki me ka hanu ola.
Ua hoomakaia ka huli ana i ke kanaka huki bele me ka bepe, aka, aole nae he loaa. He pule i hala aku nei, ua loaa aku la ke kino make o ua loaa aku la ke kino make o ua kanaka nei, e lana ana iluna o ka wai, ma ke alawai o Brussels nana i hoopau ae i ke pohihi i kona wahi i nalowale ai. Ma ke ahiahi nei i loaa aku ai ke kino make o ka bepe e lewalewa ana ilalo o ka hale malalo o ka luakini o St. Paul.
----------------
UA PAHOLA AE HE MAKANI INO NUI
---------------
Ma ke ku ana a ka mokuahi Dorika, ma Kapalakiko ma ka la 29 o kela mahina aku nei, ua lawe pu aku oia i kekahi mau mea hou e pili ana i ka pahola ana ae o kekahi makani ino nui i kapaia he taifuna ma Iapana.
Ma ka la 9 o ia mahina, ua pahola ae la kekahi makani ino nui, a luku iho la he lehulehu wale o na hanu ola me ka hoo hiola pu ana i na hale. O ka nui o na make he 38, na poe i h@@haia he 42, na hale i okaoka liilii he 1060, na hale i kanahai mai na poino he 1040.
He nui na moku i alako ia aku mai ko lakou wahi i ku mua ai, a ua nui pu no hoi me na moku i hookui ae. O ka mokupea Alette, ua ili oia, a he umi poe i make.
O ke kapena, ka malama moku elua a me eha sela o @ ka mokupea Alette i pakele mai. Ua loaa ka mokupea i ka makani ino ma ka moana, a ua weluwelu hoi kona mau pea e like me ka rinbine, ua haki pu me kona hoeuli, nolaila, ua laweia aku la oia no luna o na puu pohaku, a malaila, oia i nahaha ai.
Ua kapiliia ka mokupea Alette i makahiki 1870. He papa kana ukana e lawe ana no Iokohama.
--------------------
AIHUEIA HE $ 105
----------
Eia o J. N. K. Keola, kekahi o na kanaka laki loa ma keia ilihonua, mamuli o ka hoihoi hou ia ana mai o kona mau manao kupikipikio a paa me ia, oia hoi, ma ka Poalua aku nei o kela pule aku nei, Oct. 12, aia maloko o ka pahu ume o kona home noho he $105, no ka Hui Hoopukapuka a Hoaie Dala o ka Ahahui o na Hawaii Opio.
I ka auwina la o ka la i olelo ia, ua komo aku ia oia maloko o kona rumi, me ka huina dala o $105, maloko o kona lima, a helu iho la me kona mau maka elua, a kau iho la maluna o ka pahu ume, me ka lawelawe hou ole aku a hiki i ke kekahi @ka o kekahi la ae, ka wa hoi @na i ku aku ai, aia hoi, ua lele ka m@ mai ka punana aku.
I ka wa ana e helu ana, a mamua iho oia wa, aia no he kanaka opio iloko o ka hale, he hoaloha no hoi no ua Jimmy nei kekahi maloko o ka hale ia manawa, a i kona wa e helu ana ua puka aku la keia kanaka opio a komo aku la he hale mawaho aku, kokoke i ka puka aniani a@a e helu ana i ke dala.
Mahope iho o ka liko ana o ke dala, iloko o ka lima o ka aihue, ua haawiia aku ka hana ma ka @ ma o David Kaapa me ka huna ia me ka malu loa me ka hoke oleia, a ma’ke kakahiaka Poakahi nei, Oct. 18, ua paa iho la i ka hopu ia malalo o ka palapala huli, ke kanaka opio hoaloha, a ma kona wahi i noho ai, a nana no hoi i hoike ae i ka moolelo piha mai ka mua a ka hope, a mahope iho o na @oii ia ana, ua loaa aku ia he $104 wale ao, a he $1 i haule. Ua hookuuia aku no hoi ka lawehala me ka lanakila mamuli o ke aloha o ka mea nona ka waiwai. E hoopau loa i kela nana ino a na na lani e kokua ia oe.
KA HALAWAI A NA LALA O KA HALEMAI MOIWAHINE
-----------------
Ma ka Poalima nei, i malamaia ai ka halawai hapaha a na lala o ka Halemai Moiwahine ma ia halawai no hoi i waiho aku ai o Kauka Kupa a me Kauka Wahie i ka laua hoike hapaha makahiki i ka nui o na poe i kome mai, i hookuuia, a i make iloko o ka Halemai no ekolu mahina e pau ana i ka la 30 o Sepatemaba, penei:
O ka nui o na mai iloko o ka halemai i keia wa he 72, he 45 Hawaii (35 kane me10 wahine), 1 Pake, 4 Iapana a me 22 o na lahui e ae, he 24 o lakou e uku nei.
O ka nui o na ma’i i komo iloko o ka Halemai i keia hapaha he 149, he 80 Hawaii (57 kane, 23 wahine) 2 Pake, 20 Iapana a me 47 o na lahui e ae.
O na poe i hookuuia he 137 he 70 Hawaii (44 kane, 26 wahine), 5 Pake, 19 Iapana a me 43 o na lahui e ae.
O ka nui o na make he 17, he 12 Hawaii (11kane, 1 wahine), 3 Iapana me 2 o na Iahui e ae.
O na kumu i make ai io ulu m@ka a i a me ka waha 1, naha ka iwi poo 3, palalauhala 2, palahehe 1, numonia 2, ulia kaa ahi 1, fiva 3, mai puuwai 2, mai ino 2.
O keia poe ae la maluna he 4 i make maloko o 12 hora, he 2 i make maloko o 24 hora mahope o ke lakou komo ana iloko o ka halema’i.
O ke kiekie o na mai he 85 o ka haahaa loa he 61, o ka averika he 71, o ka nui o na palapala laau i hoopukaia he 468.
He 15 poe makua a me 10 keiki liilii i kaha ia a me 2 i nana ia.
O ka nui o na mai i Iapaauia ma ka Halemai i ka mahina o Iulai hd 131, Augate 108, a me Sepatamaba 116.
----------
O Kanikela-Keperala Beritania o Apia, Samoa, oia o Cusack Smith, @ ana oia @ kulana ma ka ano Kan@ Nui no Valaparaiso, me ka uku mokahiki @ 3000.
HE KEIKI OPIO WIWO OLE
------------
Nu Ioka, Oct. 1. O Carlos Bermudas, he keiki opio Cuba, nona na makahiki he 14, eia he lawehala ma ka Hale Hookolokolo Harlem, 1 keia la. Ua holo malu mai oia mai kona kahu hanai mai, Manuel Loss, kakauolelo a Estrada Palma, he lunamakaainana Cuba maanei. Aia hoi ka makuahine o keia keiki ke noho nei ma Santiago de Cuba.
He wahi keiki helehelna ui o Carlos, a maloko o ka hale hookolokolo ua hoike ae oia, ua makemake oia e hoi i Cuba, no ka hookau ana i ka hoopai maluna o na poe nana i pepehi i kona makuakane Rederigo, he alihikaua malalo o Keneral Maceo i make maluna o ke kahua kaua. Ua oleleo pu ae oia, he ekolu ona manawa i komo ai ma ua kahua kaua no ke kue ana i na poe Sepania, a no ia kumu, ua hoouna mai kona makuahine iaia i Nu Ioka i ole ai hoi oia e komo hou iloko o na hakaka ana me na Sepania.
He pule i hala ae nei, ua hoao aku oia e hoi hou no Cuba, ma ka pee ana iloko o kekahi moku e holo ana no ia wahi, aka, ua ike koke ia oia a kipaku ia aku la no uka o ka aina.
Mai ia wa mai, ua auwana hele aku la oia ma na alanui a hiki i kona hopu ia @ e Delaney, ma ka po nei. U@ hoihoi aku o Kakauolelo Ross i @ keiki i kona home, a me keia pule aku e hoihoi ia aku ai oia ia ka home o kona makuahine.
--------------------
KA MOKU OKOHOLA IOSEPINE
-----------
O ka moku lawaia kohola i hoea mai ai i anei he mau makahiki i hala ae nei me na poe ma’i samola poki @ luna, oona ka inoa o Iosepine, ua hoea aku la oia i Nu Bedefoda, mahope o kona kaawale ana mai no umikumahiku makahiki me ke piha i ka aila kohola. Aia ma kona eneki malalo he 1100 barela piha me ka aila kohola, a ua hoihoi mua ia mai hoi e kekahi mau moku e ae he 1500 barela.
I ka makahiki 1880 i haalele aku ai oia i Bosetona no ka oana Pakipuka, a akahi wale no hoi oia a huli hoi i ka home. O ka nui o na moku okehoia a lakou i haalele like ai ia laila, ma kahi no ia o aneane 40, aka, ho elima wale no mawaho ae o Iosepine i hiki hou aku i Masekuseta, o ke koena iho, ua pau i ka ili a nahaha, a i ole hoolilo ia ma na kapakai o ka Pakipika.
Ua hoea aku oia i ka wa pii o ke kumukuai o ka aila, he 50 keneta o ke galani.