Ke Aloha Aina, Volume III, Number 41, 9 ʻOkakopa 1897 — Page 1
This text was transcribed by: | Cyndi Defenbaugh |
This work is dedicated to: | Kaelene Ahu Rey |
KE ALOHA AINA
(in banner...) HOOKUMUIA I MEI 20, 1895
BUKE III HONOLULU, POAONO, OKATOBA 9, 1897. HELU 41
KE ALOHA AINA
E hooopuka mau ia aku ana mai ka Poakahi a ka Poalima o na pule a pau o kela me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe
Pepa.
E pai ia no na Olelo Hoolaha, na Kanikau me na Mele Inoa, me ke Dala kuike. Aole nupepa ma
ka owili pakahi e hoounaia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele
Inoa i ka Lunahooponopono o keia Pepa.
Aole loa e hoopukaia a hoolahia kekahi manao ma na kolamu o keia Pepa, malalo o kekahi inoa
kapakapa ke ole e hoike mai i ka Lunahooponopono i kona inoa ponoi.
Ka Nupepa Puka Pule
KE ALOHA AINA
Mookahi Makahiki ...............$2.00
Keno Mahina......................... 1.00
Ekolu mahina........................ .50
Hookahi Mahina................... .20
EMMA A . NAWAHI
Puuku o
KE ALOHA AINA.
EDWARD L. LIKE
Lunahooponopono a Hope Puuku
S. P. KANOA,
Hope Lunahooponopono
O na kauoha Nupepa me na hookaa Dala, e hoouna pololei mai i ka Puuku ma Honolulu.
NUHOU KUWAHO
Ma ke ku ana mai nei a ka mokukaua Amerika Wheeling i loaa mai ai kekahi mau hunahuna mea hou o na aina manao, a no ka pomaikai o komakou poe heluhelu, ke lawe mai nei makou a hoopuka aku ma ke ano nui penei:
PIHOLO HE MOKUKAUA GERMANIA.
Hamburg, Sept. 22. Ua hoopuka ae ka nupepa Hamburgishe Boersenhalle, he lono no ka huloi pu ana a piholo o ka mokukaua lawe topido “S26,” ma Cuzhaven, a he 8 poe o luna i piholo pu me ka moku. He hookahi o loakou ola no ke Duke Federika Uilama, he hoahanau no ke Duke Nui o Mecklenburg-Schwerin, i make he mau mahina wale no i hala ae nei, mamuli o kona haule ana mai luna mai o kekahi uwapo, maloko o ka pa alii. He lutanela ke Duke Federika Uilama no k aoihana kaua moana, a he 26 hoi k anui o kona mau makahiki.
UHA HOOHANOHANOIA KE KUHINA
IPANA HOSHI.
Wasinetona, Sept. 22. O ke Kuhina Iapana Torn Hoshi, ua loaa mai kona aupuni mai no ka huli hoi ana aku i Iapana. E haalele iho ana oia la Wasinetona iloko o Okatoba ae nei, a hoi hou mai hoi no kahi o kana hana ma ka mahina o Dekemaba ae nei. Ua loaa mai nei he lono teregalapa i ke keena o Iapana maanei, e hoike mai ana, ua hookau aku la ka Emepera o Iapana, maluna o Mr. Hoshi i ke Kea Hanohano o ka La Hiki, no ka hoike ana i kana oihana he Kuhina no keia aina.
ME OIA MAU NO KA HAKAKA
MAWAENA O NA PELEKANE
A ME NA INIA.
Ladana, Sept/ 21. Ua loaa mai nei he kauoha no ka hoouna ana aku he ewalu regimana koa kaua loio no Inia, @luna o na mokuahi.
He lono mai Simla mai, e olelo ana o Hada Mula me kekahi heluna kanaka nui o na o na poe kipi i wae ponoia, ua lele kaua aku lakou i kahi hoomoana o Keneral Sir Bindon Blood ma ka hora 9 o ka po nei.
He hakaka kahana ka i malamaia, no aneane 5 hora. ua kukonukonu na palapu i loaaa la Kenerala Woodhouse.
MAKE KE KADINELA BIHOPA
O MESSINA.
Rome, Sept. 22. He lono kai hoea mai Messina, Sicily mai, e hoike mai ana i ka make ana o Mgr. Guiseppe Guarino, ke Kadinela Bihopa o Messina. Ua hanauia oia ma Sicily ma ka makahiki 1821, a ua hookau ia hoi i Kadinela i ka makahiki 1893.
Ua loaa mai nei he lono no ka ili ana o ka mokuahi Helene ma Kalepolepo, ma ka Poaono nei, a ua hemo no me ka poino ole o kona kino.
HE KAAWE MA KAUAI.
Ma ka hora o ka auwina la o kela Poalua aku nei, ua kaawe ae la kekahi Pake, i hoopaaia ma ka halepaahao o Koloa, Kauai, i hoikela ae e Kauka Kamika i make, he Pake ma’i lepera oia, maloko o kona rumi paahao, i ka wa hoi e kaliia ana kekahi moku no ka lawe ana mai iaia i Honolulu nei.
Ua hoopaa ae oia i kekahi kauloa ili i kona pua i, a meia mea i lawe ae ai oia i kona ola. A ma kekahi la ae i kanu ia ai kona kino make.
MALOOHAHA NA PUNAWAI KA
MIKO O KAMOILIILI.
Ua hoike ia mai makou e ka hoaloha Hiram Kaaha, o Kamoiliili, e olelo ana: Ua emi iho ka wai o kekahi mau punawai wai mapuna kahiko a i ka elua kapuai, he mea i ike ole ia i n akau papaa la i hala aku, a o ka oi loa aku keia. Ma kekahi wahi no hoi, ua maloo loa ka wai, a aole hoi he heluna i koe no ia mau punawai kahiko mai na kupuna mai. He kauluwela nui keia o Kamoiliili, ke hele la a pikao ia mau wahi. Elike no me ka maloohaha o na hana o ke aupuni e ku nei, pela no hoi ka aina. Ha-o-e.
KA HOTELE HAWAII.
Ua lilo ae nei ka noho poo ia ana o ka Hotele Hawaii ia E. C. Makapolena, kekahi o na keiki Hawaii kuonoono iloko o ka aina, nona ke kumukuai o $46,000. He mea maopopo loa, o ka lilo hou ana ae la o na hooponopono hana ana o kela hale iloko o ka lima oia keiki lalawai o ka aina. Malia paha, e hooololiloli hou ia aku ana na kulana hana o ua home noho la a ka malihini e kipa mai ai. O ka makou e kahoahoa ae nei, e uhai ia kana mau hana e ka holomua a me ka pomaikai.
UA HULI HOI AKU LA NO
KA HOME.
Ma ka hora 7:30 o ke kakahiaka Poalua, i haalele iho ai ka mokukaua Piledelepia i ke awa lai o Kou nei, a hoohemo aku la no waho o ka nuku o Mamala, me kekahi hae loihi e kilepalepa ana iluna o ka ili o ke kai ma kona kia hope, e hoike mai ana hoi e huli hoi loa ana hoi oia no ka home.
Ua hiki ae ka bana aupuni makai o ka uwapa, ahaawi aku la i na leo kani o ka lakou mau hokeo, no ka hoolealea ana aku i na kanaka o luna o ka Piledelepia, a ua panai pu ia mai no hoi me ka bana o ka mokukaua Piledelepia ma ka haawi ana mai he mau leo mele.
Ua manao wale ia o ka pule mua o keia mahina ae e hoea mai ai ka mokukaua Balitimoa oiai, oia e kali la no ka hiki aku o ka Peledelepia, i hiki ai hoi oia ke hoolawa ia me na kanaka.
UA KOMO AIHUE IA AE.
Ma kekahi manawa o ka Poaha nei, ua komo aihue ia ka hale kauka o Kauka Wayson ma ke alanui rikeke, a lilo aku la kekahi eke waiho laau me kekahi mau mea paahana, aole i maopopo ka mea nana i aihue.
@o kahi a ke kolohe i komo mai ai, ma ka puka ponoi mai ao ia o mua o ka hale, ma ke kakahiaka nui o ka Poaha nei ua lohe o kauka Wayson i kekahi nakeke maloko o ka hale a i kona wa i hele aku ai e huli, aole he mea hookahi i loaa iaia.
I ka auina la ae, ua hoihoi ia mai la ua eke ia me ka laau a me kekahi mau lake paahana kauka e Mrs. Hanna i loaa aku maloko o kona pa.
Ma ke kakahiaka o ka la Sabati nei, i hoea mai ai ka mokuahi Claudine me 4462 eke kopaa, mai kana huakai hope aku nei i kona mau awa, a eia oia ke liuliu mai nei no ka hole ana aku i Kapalakiko.
UA HOEA MAI NEI.
Ma ke ku ana mai o ke Kalaudine i ke kakahiaka la Sabati nei, i hoea mai ai na koena pepa kakauinoa o ka Apana o Hana, ma o ko lakou Komite la i hoounaia mai, Mrs. G. P. Wailehua, ka Peresidena Kuwaena o na Ahahui Aloha Aina o na Wahine o ka Apana o Hana, a nana i hii pau mai i na koena inoa o na poe a pau oia Apana, a ke haawi aku nei makou i na mahalo kiekie ana a pau he nui maluna o ke Komite ahonui, nana i halihali mai la me ke kunukunu ole, mai ko na kane a na wahine. Eleu no ka Apana o Hana ma na hana ku i ko ka lahui pono.
Ma ka lokomaikai o ko makou makamaka a hoaloha maikai, John Mahiai Kaneakua, ke liuliu ala ko ka Malu Hekuawa o Nawaieha, ka Ua Ukiukiu o Makawao a hiki i ka uluwehi o ke paina o Ulupalakua, a me ko ka Malu Ulu o Lele, no ka hoihoi mai i ka lakou mau makana milolii o ke aloha aina onipaa, no ka Aha K@ ena o ka Paeaina, a ua kohoia na Komite o na kane a me na wahine nana e hoihoi mai keia mau makana, a me he mea la, e hoea mai ana lakou i keia mau la iho. O ka makou ia e kahoahoa aku nei, na’i la ka pono a na kupuna o kakou i luhi ai, i hele ai a kanikoo a pala lauhala ke ola a ke Akua.
KA NUI O NA MAKE O HONOLULU NEI.
O ka huina nui o na poe make ma ke kulanakauhale o Honolulu nei, no loko o ka mahina o Sepatemaba i hala aku la he 53.
Mailoko mai o keia huina he 29 Hawaii, 6 Pake, 7 Pukiki, 4 Iapana, 2 Beritania, 4 Amerika a me 1 o na lahui e ae, a he 22 o keia poe aole i lapaau ia e ke kauka.