Ke Aloha Aina, Volume III, Number 39, 25 September 1897 — KA LEO O KA LEO NO O MOGANA NA LIMA NA LIMA O KA REPUBALIKA O HAWAII. [ARTICLE]

KA LEO O KA LEO NO O MOGANA NA LIMA NA LIMA O KA REPUBALIKA O HAWAII.

Ma ka nupepa Hoku o ke ahiahi nei i ike iho ai makou, i ke kaualako ia o kela elemakule Senate o Amerika e na poe pakaha ia Hawaii aina, Hawaii lahui a me Hawaii Alii, e hoikeike ana iaia i na kuaau kahi a Kaahupahau i hakaka ai me Kahiuka, ka mano mai Hawaii mai, ua kaapuni ae ka mokuahi Kaena e kaihele ana i ua Kolopupu la, ma na kuaau, ma na kakai one, a e hoolei ia aku ana ma kona mau pepeiao na huaolelo lehulehu, no ka pomaikai o Amerika ke ae mai e hoohui ia Hawaii me ia, no ka mea, e loaa wale ana ia Amerika kela ana hookalakupua i noho ai o Kaahupahau, a e piha ana na manuwa o Amerika me na opihi koele e kakau ana ma na paia a ke ole makou e kuhihewa, ua omo ia aku ia mau ao ana iloko o ua kani-koo-pala-lauha 'la. Aohe no au nana ana ae, ua aui na hora o kou ola ana, o na pomaikai ka paha o na wahi keiki e ola aku ai iloko o ka mauleule, a hala ae keia mau la, oia ka mea nana, no ka holo a me ka holo ole o ka hoohui aina, aole ia o kou kuleana, o kau no ka hana aku i ko lakou makemake, e nalo hoi e puhee ana ke anaina i ka hoihoi ole i kau haiolelo mauluulu, aohe no au nana ia, o ka lakou ka paha a pau aku, kani ka aka a ua kanaka i ae he loaa ka poe nana e uku kou mau lilo o ko makaikai ana ia Hawaii nei.