Ke Aloha Aina, Volume III, Number 39, 25 Kepakemapa 1897 — Page 3

KE ALOHA AINA

 

POAONO,  SEPATEMA  25, 1897.

_____________________________

 

 

KE  HOOMAHA  LA  O  KALANI  MA

KA  HOTELE  KALEPONI.

________

 

          Maloko o ka nupepa Karoni kala o Kapalakiko i ke iho ai makou i keia mau m@ malalo iho nei, i hoopuka @ maloko oia nupepa o ka la 12 iho nei, a no ka pomaikai o ko makou poe heluhelu, ke hoopuka aku nei makou ma ke ano nui penei:

          O ka Moiwahine Liliuokalani ua hoohala ae Oia i ka la inehinei i la hoomaha Nona maloko o Kona Keena, ma ka Hotele Kaleponi, me ka ae ana i kekahi poe kakaikahi i kipa aku e ike Iaia, me Kona noho paa ana iloko o ka Hotele ia la a me ke ahiahi.  Ua hooholo ka Moiwahine Liliuokalani, oiai.  Oia e noho ana iloko o Kapalakiko, aole Oia e ae ana i kekahi kono, no ka hele ana aku i kekahi mau aha lealea o ka lehulehu, a i ole, o ka poe kakaikahi hoi.  O Kona manao o ka hoomaha i Kona wa e noho nei iloko o keia kulanakauhale, aole no hoi Oia e ike ia ana imua o ke akea, koe wale no, i Kona wa paha e holo aku ai i ka Paka a i ole, i Kona wa paha e hele ai i ka pule, i kekahi o na luakini o nei.  Ua hoike ae Oia i Kona manao, ma ke ahiahi.  Ona i hoea mai ai, no ka hele ana i ka pule i ka la apopo.

          Ma ka la inehinei, ua hoololi ae Oia i Kona noonoo.  Aole he oluolu maikai o ka Moiwahine, e like me Kona haalele ana i ho mamua aku nei no ka Hikina, a ua hoike ae.  Oia ma ke ahiahi nei, e hoololi ana Oia i la hoomana Nona.

          Oiai ka Moiwahine e olelo ana i Kona maluhiluhi ma keia huakai loihi mai nei Ana, mai kahi aoao mai o ka aina, aia no nae na hiohiona makalapua, a he mau makahiki hoi Kona opio ae i ko ka wa Ana i k@ mua mai ai i Kapalakiko nei.  He maikai Kona ola kino, aole  hoi Oia i komo nui iloko o na ahaaina a me na lealea e ae e like me na makahiki Ana i noho moi ae ai, mahope o ka make kana o Kona kaikunane, Moi Kalakaua.  I keia wa, ke malama pono nei Oia i Kona kino O Kona noonoo i keia wa, oia no ka hoi hou ana aku i Wasinetona a hiki i ka wa e hooponopono ia ai o ka ninau hoohui aina, i hiki ai hoi Iaia ke ike pono i ka wa e lawe hou ia mai ai o ke kuikahi hoohui aina mamua o ka Ahaolelo no ka ae ia ana aku, ua hooholo Oia e hoohala i Kona manawa i wa hoomaha me ka hooikaika hou ana ae Iaia.  Aole ka Moiwahine Liliuokalani i hoolala i Kana apana hana i Kona wa i ike ia ai ma ka auina la o nehinei.

          "O Ka'u mau hoolala ana?" wahi Ana i pane mai ai i Kona wa i ninau ia aku ai.  O ka mea oiaio no ia mea, aohe Au hoolala, e hiki ai hoi `Ia'u ke kamailio aku.  Aole Au i hoomakaukau i Ka'u mau hoolala ana a hala loa imua.  E noho iho ana Au i Kapalakiko nei no kekahi wa pokole, he mau pule kakaikahi paha, alaila, hoi hou aku no Au i Wasinetona.  Oia wale ae la no ka mea hiki Ia'u ke olelo aku.

          Ua hoike ae ka Lede Kiekie i Kona hauoli i Kona hoea hou ana mai i Kapalakiko, a hoopuka ae la, he maikai loa ka ea o Kaleponi Nona.  A ua hoike pu ae no hoi Oia, o Kana huakai i holo mai nei he maikai loa.

______________

 

HEIHEI  WAAPA  MAWAENA  O  NA  WAHINE.

________

 

          Eia kekahi poe lede o loko o ka Hui Heihei Waapa Matala, ke makemake nei e kukulu i hui heihei waapa no lakou no ka heihei ana me na hui wahine e ae a pau e makemake aku ana e heihei aku me lakou, ma ka la heihei waapa hou e malamaia ana ma keia makahiki ae.

          E waiho ia aku ka manao o o kela poe lede ma ka hui hou ana aku a na lala o ka Hui Heihei Waapa Matala, a me he mea la, aole no paha e kue mai ana na kane.

          O kekahi keia o na heihei ano hou loa ke hookoia ma keia mua aku ka makemake o keia poe lede.

________________

 

E  HEIHEI  HOU  ANA  I  KEIA  AHIAHI.

__________

 

          Mamuli o ka ulu ana he hoopaapaa mawaena o ka Leilani a me ka Matala, ma ka heihei waapa i malamaia mawaena o laua, ma ka Poaono nei, nolaila ua hooholo na lunakanawai na lakou i malama na heihei o ia la e heihei hou laua i ka hora 5:30 o ka auina la Poakolu, a ua ae aku hoi laua e @hoihoi hou.

          Ua hoomaka ka heihei i ka manawa i hoikeia ae la, ua hoea hou ae ana hoi na lunakananwai malaila, no ka nana pono ana i keia heihei, a ua hoopiha hou ia ae hoi na uwapo me na poe makaikai.

          Ua lilo ke alakai ana o ka heihei i ka Leilani, aka, i ka hoi ana mai ua lilo ke alakai ana i ka Matala a hiki i ke eo ana.

          Manawa i holoia e ka Matala he 12:50 7-8.  Leilani 12:53 7-8.

______________

 

          I ka Poalua nei i hookuu ia mai ai na poe a ka Pekina i lawe mai nei, mai kahi hoomalu mai, no lakou hoi ka huina o 174 Iapana a me 115 Pake.

          Ke hoikeia aku nei ka lahe na mea a pau, ua haule kekahi leta i kakau ia ka inoa o J. T. Waterhouse maloko o ua leta la he mau bila kikoo nona ka waiwaiio o $37, aohe hoi he waiwai oia mea i kekahi mea okea@ aku aka, i ka ona wa'e, nolaila, ke kauoha ia aku nei e hoihoi mai ia palapala i ke Keena o Ka Aloha Aina, a e loaa no ka uku makana kupono.

______________

 

NUHOU  KUWAHO

________

 

          Ma ke ku ana mai nei a ka mokuahi Mariposa i keia kakamaka nui Poaha mai Kapalakiko mai, ua loaa mai la ia makou na mea hou like ole o na aina mamao, a ne ka pomaikai o ko makou poe heluhelu ke hoopuka aku nei makou me ka puahi nui, a e heluhelu ia penei:

 

HOOUKA  KAUA  HAHANA  MA  GUATEMALA.

 

          Panama, Sept. 15.  Eia o Guatemala iloko o ke okooko o ka hoouka kaua i oi ae i ka hakaka mua iloko o keia mau mahina aku nei, wahi a kekahi mea kakau nupepa i telegarapa mai ai.  Ua alakai ia ke kaua kipi e kekahi poe kanaka wai wai loa, e ke pilimahuahua mau ae nei hoi ko lakou ikaika i kela a me keia la.

          He Ione kai hoea mai, mai Guatemala mai, ua lele kaua aku la he 3000 poe koa kipi i ke kulanakauhale o Qnezaltenango, ma ke kakahiaka o ka la 13 o Sepatemaba.  O ka pa kaua malaila, he 1000 wale no ka nui o na koa, aka, ua paio mai no nae lakou me ka wiwo ole.  Ua hoomau la ka hakaka a hiki i ka po ana, ua kuemi hope aku la na kipi.

          Ma ka hora 9:30 o ke kakahiaka  o ka la 14 ae, ua lele kaua hou mai lakou me ka hahana nui, aia no na koa o ka pa kaua ke kue la i na enemi, a me he mea la, e lilo pio ana ke kulanakauhale, ina aole e hoea koke aku ana na kokua, maloko o kekahi mau hora.

 

HALAWAI  KA  MOI  O  DENEMAKA

ME  KEKAHI  ULIA  POINO.

 

          Ladana, Sept.  15.  He lono kai aoea mai nei i ke Daily Mail, mai Kopenahegana mai, e olelo ana, oiai, ka Moi Christian e pii ana i kekahi alapii pakaawili no luna o kahi o ka ipu kukui nui hoomalamalama o ka Papu Middleguilde, ma Oro, ua hookui aku la oia, a hina iho ia, me ka halawai ana o kona auwae a me kona waha me kekahi eha kukonukonu loa.  Ua hoihoi koke ia aku oia no Barnttorff, mokupuni o Silana, a malaila, hoi oia e lapaau ia la e kona kauka.  O ke kanawalu keia o ka nui o kona mau makahiki.

 

UA  ULU  HOU  AE  KA  HAKAKA.

 

          Simla, Sept. 13.  Aia ke lele kaua la na enemi i na papu kaua o Lockhart a me Gulistan.  Ua hoounaia aku la he elima mahele koa a me eha pukuniahi.

          Ua hoea mai kela lono hoopuiwa mai ka papu Lockhart mai, ua hoohui ae la na poe Atridi a me na Orakazai, no lakou ka huina o 47,000.  Aia lakou ke hoouluulu la ma na awawa o Khan-Ki, a nee aku ana i keia po no Samana no ka lele kana ana aku.

          I keia kakahiaka, ua lawe pio ia e na enemi, kahi a na makai Sarhargari e kiai ana.  Ua lele kaua aku he tausani a oi Orakazai, aka, ua kue mai no nae na koa Saika o iwakalua kumakahi wale no, me ka wiwo ole, no eono hora me ka hapa o ka hakaka ana, iloko o ekolu manawa i hoao ai o na enemi e nee mai imua me ka hahana nui.

          I ke kolu o ka manawa i hoao ai e nee mai imua, ua hoea mai la lakou i ka puka o ka pa kaua a hoao ae la e wawahi, a ia wa no na Saika i haalele ai ike kiai ana i na enemi a holo mai la no kahi o ka puka, ua pii koke mai na enemi maluna o na alapii a lawe ae la i ka papu kaua.

          He hookahi Saika e ku kiai ana ma ka puka o ka rumi kiai, ua pepehi aku oia he iwakalua o kona mau enemi, mamua o kona hopuia ana.  Ua puhi ola ia oia e na enemi i ke ahi.  O ka mea haawi hoailona oia hookahi wale no ka mea i hoola ia, i ka wa i haule pio ai o ka papu i ka hora 4:30.

HE  UMI  TAUSANI  MAINA  I 

HAALELE  I  KA  HANA.

 

          Hazelton, Sept. 14.  O ka nui o na poe maina i haalele aku i ka hana, aole i maopopo loa, aka, ua koho wale la nae, aia no ia ma kahi o 10,000 a oi, a he mau wahi e ae no hoi kekahi i haalele aku na maina i ka hana, aole i maopopo ka heluna.

          Ua hoounaia aku na koa o ka Puali Kulanakauhale Ekahi o Piledelepia, no kahi o ka haunaele ma Eckley i keia kakahiaka nui, a ma ka hora 3 o ka auina la i hoea aku ai lakou ilaila.  He mau haneri o na maina i olohani mai, mai ka mauna Buck mai, i kai huakai aku no na maina o Eckley, ua hoololohe iho kekahi poe o lakou, aka, ua lawelawe ia aku lakou me ka oolea a haalele like aku la lakou i ka hana.

______________

 

KA  MOKU  HOLO  LOA.

________

 

          O ka waapa topido wawahi moku holo loa o ka honua holookoa, oia no ka waapa topido Whiting, no Beritania Nui.  Ua hoike ae na poe luna kiekie o ka oihana kaua moana o Beritania, o kona mamo holo i ka hora he 32.8 nota.  Ua like hoi ia me 37.5 mile, he umi kumalua mile hoi ka oi ae o ka holo, mamua o na kaaahi lawe ohua o Kaleponi.  Ua kapilia oia ma ka pa kapili moku o Jarrow-on-Tyne.  Ua hoouna ia aku la oia mai Enelani aku no na kai o Kina no ke alualu ana i na moku aihue ma na kai o Kiaa.

______________

 

HE  POINO  KE  HIKI  MAI  ANA.

________

 

          Eia ka hapanui o na poe e noho koke nei ma kahi hoahu pauda o ke aupuni ke hopohopo nei, he poino ke hiki mai i na aole e hookaawale kokeia kahi hoahu pauda ma kahi e poino ole ai ke ola o ka lehulehu.

          Ma ke kakahiaka Poalua nei oiai, o kekahi kaa ukana e lawe ana i kekahi mau pahu pauda eleele a me kekahi mau pahu kiana pauda, mamuli o ka hoohemahema o ke kalaiwa kaa, ua haule aku la he pahu kiana pauda iluna o ka lepo, ma ke alanui Vitoria i haule ai keia pahu  a ina i pahu keia pahu kiana pauda, i na ua nui na ola a me na waiwai e poino.

          He hookahi wale no wahi kupono e poino ole ai ke ola o ka lehulehu, oia hoi, ke hoonee ana aku iloko o ke awa ae nei e kukulu ai.

______________

 

UA  HOPUIA  NO  KA  AIHUE.

________

 

          Ma ka hora 2 o keia wanaao Poakolu, ua hopuia iho la o John Duncan a me Henry Old e ka makaikiu pake Chun Poon a me kekahi poe e ae, no ka aihue i ka rama o ke Komisina Pelekane Hawes i make.

          Ua wawahiia kekahi mau papa o ke keena i waihoia ai o ka rama, a lawe mai la he elua mau omole kamepena, me ka manao e nalo ana, no ka mea ua hiamoe loa ia ke Iapana kiai, aka, i ko laua hemo ana mai ua paa aku la i ka hopuia e na makai.

______________

 

KA  HAUKIPILA  O  NA  PUKIKI.

 

          Eia ke lulu dala nei na Pukiki o Honolulu nei, a me na mokupuni e ae o Hawaii nei, no ke kukulu ana i Haukipila no na Pukiki.  Mamuli o ka ae ole ia o na lahui e ae e ke aupuni e noho maloko o ka Haukipila me ka uku ole, ke kumu i ulu mai ai o keia manao iloko o na Pukiki, no ke kuaala@ ana i h ale ma'i no lakou.

          Ma ka halawai ana a na Pukiki ma ka Poakahi nei, ua noonooia ka hoolilo ana i ka Lusitana Hall e ku nei ma ke kihi o na Alanui Alapai a me Quarry, i halema'i ma keia mua aku, a ua nui na poe i apono ia manao.

          Ua manaoia ma kahi o $10,000 ka nui o na dala e hiki ai ke kukulu i keia Haukipila hou.

______________

 

KA  NUI  O  NA  POE  I  HOOLILO

I  NA  MOKU  I  MAU

HOME  NO  LAKOU

________

 

          Ma ka hoike a Hon. Maurice J. Power, ke Komisina Kepa Kanaka o Amerika Huipuia ma kana hoike makahiki no ke awa o Nu Ioka wale no, ma ke ano luina he @ 3,111 poe i kepa ia, mailoko mai o keia huina, he 6,633 Amerika, @, 658 Norewai, a me Denemaka 6,934, Beritania, 5,175 Geremania, 64 Italia, 123 Farani a me  1,523 o na lahui e ae.  O na poe i hoopauia e paa nei ma ke Keena Kepa Kanaka he 20,369.  Ua hopii ia ae ko lakou uku hana i ko na makahiki i hala ae nei.

 

 

 

______________