Ke Aloha Aina, Volume III, Number 33, 14 August 1897 — KE NUI MAI NEI NA POE AI LOAA. [ARTICLE]

KE NUI MAI NEI NA POE AI LOAA.

Aohe hewa ia makou ke hoopuka ae, eia hou ae no keia mau hanai a lakou nei a hoea mai, iloko o kekahi mau la o keia pule ae, oia hoi kekahi hoa o ka Aha Senate e hoouna ia mai ana, no ka nana ana, kiei ana, a halo ana iho i ka aina nani o Hawaii i kapipi ia

me na hunahuna maemae o ka mura a me ka libano, na waiwai makamae o ka aina hemolele o Palesetina. E hoea mua mai ana kekahi i ka la 17 ae nei, a i ole mahope aku, a oia auanei ka wa a ua poe nei, e kii ai e milimili i ua malihini la, me na hookipa hiwahiwa ana mai a lakou nei aku ka mea hoi a lakou nei e ke-ke ai na niho i ka wa o ke aupuni Moi e ku ana. I keia wa, he alahula ia na Kaahupahau a lakou nei e hana nei, he mimo ma na kukai olelo ana, a he oi loa aku hoi ma na hoahaaina ana. Oia ka makou e olelo ae nei e hoouna ia mai ana keia poe aole no ka imi pono maoli ana i ka mea oiaio, aka, o ka hele mai, hahao a piha, ku ae no hoi i ka home. He kakaikahi loa paha ka poe i loaa na manao kuokoa e hana ai ka pono o kela a me keia, elike me ko Mr. Balana ano, ka ai pu, hele pu, a kamakamailio pu mawaena o na aoao elua, e noii ana i ka mea oiaio, me ka nana ole ia mau hookipa kelakela a na aoao elua. A i ka hiki ana i ke alo o ko na haku a waiho aku i ka hoike, ua lilo ia he poka pa-hu nana i hoolilo i ka Hoohui Aina i ninau make a hiki i keia la, a pela makou e kau aku nei maluna o ke kanaka mua e hoea mai ana, ke kanaka hoi i akaka ole kona aoao kalaiaina i ku ai, no ka hoohui aina paha, a i ole, no ke aupuni alii paha o Hawaii. No kona kokoolua hoi, he anee ipuka oia no ka aoao Hoohui Aina, aohe no nae hoi he hewa, ina no hoi laua e hoea kino mai ana, na ko ka lahui noho malie no me ka eueu ole aku, e haawi ia mai ai na kuka pu ana ma ke ano hoaloha, a e kaa ai hoi ia kakou ka lanakila kamahao mai ka lokomaikai mai o na Lani.