Ke Aloha Aina, Volume III, Number 28, 10 July 1897 — Page 7

KE ALOHA AINA

KE ALOHA AINA, POAONO, IULAI 10, 1897.                           5

 

HE MOOLELO HOONANEA.

NO

ALAN ADELA.

Ka Wahine Hoopahaohao o ka Aahu Keokeo.

A I OLE

Ka Loea Hookani Hapa o ke Kuluaumoe.

 

            I ka paa ana aku o ka wahine opio iloko o ka rumi iluna loa o ua hale la, na kanaka ekolu i ko lakou mau kapuai wawae, a iho aku la no lalo o ko lakou mau rumi moe, no ka hoaumoe ana iho ia koena po.

            Hoi aku la ka elemakule no loko o kona rumi moe, a maluna o kona moe noho iho la oia me ka noonoo ana, mai hea mai la kela wahine opio i lawe ia mai ai e keia mau kanaka.

            Hoao iho la ola e hoopoina i kona noonoo ana no ka wahine opio, aka, aole nae he nalohia aku, a me he wai mapuan la e puapuai mau ae ana iloko ona, pela na noonoo like ole e puapuai mau ae nai iloko o kona puuwai, no ka wahine opio i hoopaa ia aku maloko o ka rumi.

            Piha ae la he minute o keia noho ekumu ole ana, oiai, kona mau noonoo a pau ke lalau hele la mahope o kela ui a ka aoao pahupahu, a ia wa i lohe ia aku ai kona puana ana ae me ka malie.

            O, aole e hiki ia'u ke nana maka aku i kekahi wahine opio, i loaa na haawina i ka ehaeha maluna ona, e hoopakele no au iaia i na ia he mea e hoopokole ia ai o ko'u mau la ma keia ilihonua.

            Ano, ua hoea mai he wahine opio iloko nei o kuu home me na haawina o ka poino, malalo o ka pakaha ana o ke kapena a me ka malama moku a'u i piha aloha ai.  E hookuu aku ana au laia, e lawe i na haawina kaumaha o keia mau kanaka lapuwale.

            O, aole, aole loa au e nana maka aku laia, e na lani, e kokua mai ia'u ma ka'u hana nui e hoao nei e lawelawe, oia hoi ko'u hoao ana aku e hoopakele i ke ola makamae o kekahi mea i hoopoino ia.

            Ku ae la ua elemakule nei, a holoholo ae la maloko o kona rumi moe me kona poo e kulou ana ilalo, me he mea la, e hoike okoa mai ana no, aia he hana nui ke lauwili la iloko o kona puuwai.

            Hala ae la he mau sekona o keia holoholo ana a ua elemakule la, ku malie iho la oia, me ka leha ana aku o kona mau maka i ka paia, ma kahi a ka uwati e kau mai ana.

            Aohe manawa hou aku i koe, o ka hora 3:15 keia o ka wanaao, a he elua wale no hora i koe, o ke ao ae no ia, a heaha hou aku auanei la ua hana lapuwale a kola mau kanaka maluna o ka wahine opio, aole e hiki ia'u ke hoohakalia hou iho maloko nei, oiai kela wahine opio e kali mai la no kekahi ke kua e hoea aku ana e hoopakele iaia.

            I ka hooki ana ae o ka elemakule i kana kamalio ana, me na kapuai mama, haalele iho la oia i kona rumi moe ma kona lima e paa ana eia i kekahi pu panapana.

            I kona wa i hookokoke aku ai i ke alanui pii, nihi malie aku la oia, me kona mau maka e aloalo ana ma o a maanei, no ka nana ana i na he mea e ae paha kekahi e hoohalua ana iaia.

            I kona wa i ike ai he mau kuko palaualelo wale no ia, pii aku la oia no kahi o ka rumi i hoopaa ia ai o ka wahine opio.

            Kikeke aku la ioa mawaho, aole nae he leo i pa-e mai ia wa, me ka ikaika i loaa iaia, peku aku la i ka puka a noha ae la ia me ka hoonaueue pu ana ae i ka hale holookoa.

            A oia no hoi ka wa a ka elemakule i ike aku ai i ka kaua Lusia e hiolani ana iluna o ka papahele, a me ka hookaulua ole iho, komo aku la oia iloko o ka rumi, a ma ka aoao o ka wahine iloko o ka poino, kukuli iho la oia me ka hoala ana aku.

            E ka wahine opio e moe nei, e ala ae eia he kokua nou ua hoea mai nei e hoopakele aku ia oe mai keia wahi aku o ke kupilikii.

            Kaakaa ae la na maka o Lusia i ka lohe ana ae i keia leo malihini, a ike ae ia oia aole keia he mea okoa aku, aka, o ka elemakule no ia nana lakou i hookipa pumehana aku iloko o ka haie.

            E ka elemakule maikai, pehea oe i hiki mai nei i anei, a pehea oe i lohe ai he wahine au aia iloko o ka poino? wahi a Lusia i ninau aku ai.

            Aohe mea nana au i hoike mai ia mau mea, aka, mamuli o na helehelena kaumaha e hekau ana maluna ou i hoomomo mai i na manao hoohuoi iloko o'u nou.

            A mamua ae o ka pau pono ana ae o keia mau huaolelo i ka hoopuka ia, aia hoi, ua lohe like aku la laua i kekahi mau kapuai wawae e pii mai ana ma ke alanui pii.

            O ke kapena puuwai eleele paha keia e pii mai nei, wahi a ka elemakule i hooho ae ai, me ka paa pono ana ae i kana pu panapana.

            E poino ana oe e ka elemakule maikai, ma oe e loaa pono mai ana iloko nei o ka rumi, wahi a Lusia i pane mai ai me ka leo hopohopo.

            Aole ia he mea no'u e kanalua ai, oiai, ua oi aku ko'u pono e make, mamau o ko'u nana maka ana aku i kekahi wahine e hoehaeha ia mai ana oia e kekahi mau kanaka.

            Aole, aole e ka elemakule maikai, e hookuu mai no ia'u e auamo hookahi i ko'u mau ehaeha, a e hoopakele aku hoi oe i kou oia ano.

            E ka wahine opio i hoehaeha ia, aole loa au e haalele ia oe, no ka mea, elike me ka nui o na haawina kaumaha e haawe la maluna ou, pela no na haawina kaumaha e hekau nei maluna o'u nou.

            I keia manawa, aia na kapuai wawae o ke kapena ke hookokoke loa mai la i ka rumi o Lusia i hoopaaia ai, me ka pu panapana no hoi e paa ana ma kona lima akau, no ka makaukau hoi e lawe ae i ke ola o kona enemi.

            I ka lohe ana aku o ka elemakule ua kokoke loa mai na halulu kapuai wawae mawaho o ka rumi a laua e noho ana, ia wa, me ka hakalia ole, unuhi ae la oia i kekahi pahi, a oki ae la i na kaula i hoopaa ia ma na lime a me na wawae o Lusia.

            A iloko o ka manawa pokole wale no ua moku ae la na kaula i hoopaa ia ai ka kaua Lusia, a oia hoi oia ke ku la he wahine lanakila i keia mau sekona.

            I ka wa i hemo ae ai o na kaula i hoopaa ia ai ma na lima a me na wawae o Lusia, oia no ka wa i hoea mai ai o ke kapena a pane mai la, me ka leo kakana o ka mea i piha i ka inaina.

            Owai keia aeahaukae o ka po i hoea mai nei iloko o keia rumi, e pane koke mai, a i ole, e lawe koke no au i kona ola.

            Owau no o Senora, wahi a ka elemakule i pane mai ai me ka wiwo ole.

            Heaha kau hana maloko o keia rumi e ka elemakule?

            I hele mai nei au e hoopakele i keia wahine opio.

            O, e ka elemakule lapuwale, aole loa au e ae e hookoia kou mau noonoo lalau, a nolaila, e hookaawale koke aku oe mai keia wahi aku, o pau koke kou hanu ana ina ea oluolu o keia ao.

            Aole ia he mea weliweli nalu ka make, oiai, ua elemakule au, a aole hoi e hoi hou ae ana ko'u mau la i ke awakea, aka, e hoao ana au e hoopakele i keia wahine opio hala ole, mailoko mai o ko olua mau lima e na kanaka puuwai eleele.

            Mamua o ka hooki ana ae o ka elemakule i kana kamailio ana, aia ka lima o ke kapena me kana pu panapana ke kaulona pono la ma ka lae o ka elemakule, me kona manamana lima e kulai aku ana i ke kiko o kana pu.

            Aka, i ka ike ana o Lusia i keia kulana poino o ka elemakule, lele mai la oia me kona mama a pau, a pai ae la i ka lima o ke kapena, oia no ka wa i kani ae ai o ka pu, a lele aku la ka poka, ma kahi hoi he iniha wale no ke kaawale mai ka lae ae o ka elemakule.

            I ka ike ana o ke kapena ua hoohoka ia kona manao puuwai eleele, me ka hakalia ole, lele mai la oia maluna o ka wahine, a hopu mai la hoi ma ka pua i o ka kaua Lusia, a kulai aku la hoi iaia no luna o ka papahele.

            Aka, e like me ka anapu ana a ka uwila, pela ka hikiwawe o na lima o ka elemakule i hopu mai ai ia Lusia a paa ae la iaia mai ka hina ana aku no luna o ka papahele.

            Na keia hoohoka hou ia ana o ua kapena la i hoopii hou ae i kona inaina a e like me ka hae o kekahi liona wahine i ka wa e hana ino ia ai o kana mau keiki, pela ka huhu o ua kapena nei i keia manawa.

            Lele hou mai la oia maluna o ka elemakule a haawi mai la i na puupuu wela iaia, aka, ua lilo no nae ia i mea ole i ka elemakule, oiai oia e hoao ana me ka pauaho ole e hoopakele i ka kaua Lusia.

            Hala ae la he mau minute o keia hakoko ana a ka elemakule me ke kapena ua hina aku la laua no luna o ka papahele, a paa iho la ua elemakule nei malalo o ke kapena.

            I ka ike ana ae o ka elemakule aohe ona wahi e pakele ai, oiai, ua oi aku ka ikaika o ke kapena mamua ona, ia manawa oia i kahea ae ai me ka leo nawaliwali i ka wahine opio penei:

            E ka wahine opio, e holo no kou ola ano, no ka mea, aole e hiki ia'u ke hana hou aku nou, a mai hookaumaha no'u, e holo, e holo no kou ola ano.

            Aka, aole nae o Lusia i ae e haalele i ka elemakule e make.  Noho o ka lima o ke kapena, nolaila, hapapa ae la oia maloko o ua rumi nei, no kekahi mea oolea, a ua hookaio ia no hoi kona makemake, mamua o ka loaa ana aku iaia e kekahi au pulumi.

            Paa ae la ua Lusia nei i ke au pulumi a me ka leo nawaliwali pane ae la oia penei:

            E uhau anei au i keia au pulumi mai luna o ke poo o ke kapena?  He kumu anei ia e pakele ai ke ola o kela elemakule puuwai oluolu?  O, e hoao no au e hoopakele i kou ola e ka elemakule ina no he hopena poino ke ili mai ana maluna o'u?

            Me ka hookaulua ole iho, holo pololei aku la ua Lusia nei a uhau aku la i ke poo o ke kapena, oiai oia e uumi ana i ka elemakule, me ka mahui mua ole ae, eia kona poino ua hiki mai.

            I ka pa pono ana aku o ke au pulumi maluna o kona poo, oia ka wa i ike ia aku ai ka manana ana ae o kona lima a hehee aku la no luna o ko papahele.

            E ka elemakule maikai, e ala ae ano a e haalele koke iho kaua i keia wahi, oiai ke kanaka puuwai eleele e waiho nei me ka poniuniu.

            Ae, wahi a ka elemakule i pane ae ai.

            Hoao ae la oia e ala mai iluna, aka, aole nae e hiki, mamuli o ka nawaliwali i loaa iaia mai na lima mai o ke kapena Modeka.

            Aole i ku nana wale aku ka kaua Lusia, aka, kolou koke iho la oia ilalo a hoala mai la i ka elemakule, ma keia kokua ana a ka kaua Lusia, ua ku ae la oia me ke ano kunewanewa, a me ka leo palupalu, pane mai la:

            E ka wahine opio, ke aie nui nei au i ko'u ola iloko o ka poho o kou lima, no ka mea, mamuli o kou wiwo ole i pakele ai ko'u ola.

            Mai hookaumaha i kou noonoo no ia mea e ka elemakule Senora, o ka'u mea wale no e makemake loa nei, e haalele iho kaua i ka hale nei, a mahuka aku no ka hoopakele ana i ke kaua mau ola.

            Ae, oia wale no ka kaua hana hope i koe, no ka mea, aole loa kaua e ike hou ana i ka malamalama o ka la ke hoopanee hou aku kaua, ae kahi wa okoa aku.

            Hemo aku ia ua elemakule nei no waho o ka rumi a hahai aku la no hoi ka wahine opio mahope ona, a na kapuai palanehe e lohe mai ka malama moku, iho aku la no lalo o ke alapii, a i ko laua wa i hoea aku ai no lalo, oia no ka wa i huli mai ai o ka elemakule a pane mai la i ka kaua Lusia.

            E ka wahine opio, e hoi aku no loko o ka rumi hookipa no ke kali ana ia'u malaila a hoea aku au, a owau hoi, e hele ae au e hoomakaukau i mau wahi mea ai na kaua ma keia huakai maopopo ole.

            Ua pono, wahi a ka wahine opio i pane mai ai, a hele aku la oia no kahi o ka rumi hookipa, e like me kekauoha a ka elemakule.

            Hoea aku la o Lusia maloko o ka rumi hookipa, a iaia i noho iho ai maluna o kekahi noho hulu, aia hoi, ua hoopuiwa ia ae la oia i ka pa ana iho o kekahi mea oolea malalo ona.

            Ku ino ae la oia iluna a hapapa iho la kona mau lima, a oia no kona wa i ike iho ai, aole ka ia he mea okoa aku, aka, o kana pila hapa punahele no ia.

            Kahaha, o kuu pila hapa punahele no keia, auwe, nawai la i lawe iaia la nei, a e e hoonani ia na lani, ala ao ko'u hoapii ua imi mai no ia'u.

            Me ka naau i piha i ka hauoli, hoopapa iho la oia i na kaula keleawe a ike iho la oia, he oia mau no ke kani honehone.

            E haohao ana paha oe e ka mea heluhelu i ka mea nana i lawe mai i keia pila hapa, aole he mea okoa aku ka mea nana i lawe mai, aka, na ka malama moku no, mamuli o kona hiaai nui e lohe hou i ka leo honehone o ka kaua Lusia.

            I keia wa a Lusia e hoopapa nei i ke Kaula o kana pila hapa, oia no ka wa i hoea mai ai o ka elemakule me kekahi puolo e paa ana ma kona lima, a e lei ana hoi ma kona ai kekahi eke ili, a me ka leo pihoihoi, pane mai la oia:

            E ka wahine opio, e holo i keia manawa ano, ua pohala ke kapena, a eia oia ke iho mai nei ma ke alapii, me ka pu panapana e paa ana ma kona lima.

            Ae, wahi a Lusia, lei ae la oia i kana pila hapa ma kona ai, a me na kapuai mama, haalele iho la laua i ka rumi a hemo aku la no waho o ka hale.

            Aka, aole no laua i mamao loa aku, ua ike mai la laua i ka malamalama o loko o ka hale i na kukui, me ko laua ike pu ana mai hoi i kekahi mau kino kanaka e maaloalo ana, me he mea la, e hoike okoa mai ana no, he mau mea ano nui ka laua e huli nei.

 

NA HOOPOHIHIHI ANA A KA EHAEHA.

No ke aha ko Lakou Kumu i Hoea mai ai a Pehea i Hookuuia ai.

Na Hana Nui a na Poe Naauao no ka hoomama ana i na Kino Kanaka i Hoehaeha ia.  He mea i Hoehaehaia.

[Mai ka Nupepa Hoku mai o Honolulu.]

 

            Mai ka hookumuia ana mai o na kanaka ma ka honua nei a hiki i keia la, ua nui na hoopohihihi ana a ka ehaeha i hoopiha aku i ka puuwai o na mea a pau me ke pahaohao a me ka weliweli.  No ke aha ko lakou kumu i hoea mai ai, a pehea i hookuu waleia ai, heaha ka lakou waiwai?  O keia mau ninau a pau ua ninau ia ia e na kanaka iloko iho no o lakou, a i kekahi mea okoa aku, aka, oia mau ninau ana nae aohe i loaa aku ko lakou mau haina.  Ua nui na poe naauao i imi no ka hoopau ana ae i keia mau haawina ehaeha.  A o na poe i loaa i na haawina ehaeha e ake ana lakou e hoola ia mai keia mau haawina popilikia mai.  Mai waena mai o na poe i hoopakele ia o Mr. S. Londen o ka Wahington Feed Co., i loaa ka oluolu a me ka maha i ikeia e na poe kupa o kakou nei.  I ka 1889 ua hoea mai o ia i Honolulu nei, a lawelawe iho ia i na oihana like ole, o ka hope loa o kana oihana i lawelawe oia no ka hoala ana he halekuai mea ai a ua nui no hoi na poe kuai i kona halekuai.  Ua hoopuka ae ua o Mr. Londen, no kekahi mea e pili ana no kona ma'i penei.  "No elima makahiki i hala ae nei, owau kekahi mea i hoehaeha ia e ka ma'i nalulu a me ka haalulu, e hoea mai ana i kekahi manawa no hookahi pule, aole e hiki ia'u ke moe i ka po, oiai ka eha e hana ma o ole ana i kau kino.  Ua hoao au i na laau a pau, i kuu ike ana i ka hoolaha a Dr. Williams Medicine Co., ua heluhelu iho la au, a maloko o laila i ike iho ai au, ua hiki ke hoola i na po ma'i nalulu o ke poo a me ka haalulu ke ai i ka Pink Pills (Huale Akala), nolaila, ua hoao iho ia au.  Ua loaa ia'u na pomaikai mai keia laau mai, Pink Pills a no oko no pahu a'u i ai ai, ua loaa mai la ka oluolu, a ua manao au o keia laau Pink Pills a Dr. William, he laau maikai loa ia."

            O ka Pink Pills a Dr. William ua hoea aku ia i ke kumu o ka ma'i, e hoehu ana hoi i ka ma'i mailoko aku o ko lakou wahi i noho ai me ka hoihoi hou mai i ke ola kino maikai a me ka ikaika.  O na ma'i lolo, kua eha, kua haneenee rumatika, pehu, a pela aku.  O keia hua ale nuhoi, ua hiki ke hoola i kekahi mau ma'i o na wahine i hookau mahaia, a me ka hoihoi hou mai i na @ lahuahi ma ka papalina.  O na poe uwaliwali a pau e hoao i kau Pink Pills a e loaa no ke ola.  Noalila, e hoao mau i keia laau mamua o ka hele ana i na kauka.

            O ka Pini Pills (Huaale Akala) a Dr. Williams ke huli ua nei ia e na poe kuai laau a pau.