Ke Aloha Aina, Volume III, Number 28, 10 July 1897 — Page 1

KE ALOHA AINA

UA MAU KE EA O KA AINA I KA PONO

HOOKUMUIA I MEI 20, 1895

 

BUKE 111                  HONOLULU,  POAONO,  IULAI 10, 1897.           HELU 28

 

KE ALOHA AINA

 

            E hoopuka mau ia aku ana mai ka Poakahi a ka Poalima o na pule a pau o kela me keia mahina.

            Ka Uku Pepa, he ao keneta  o ka pule.  No ke kope hookahi, he 5 keneta.

            E loaa no ka pepa mai ke Keena aku o KE AOLOHA AINA, a mai ka lima aku o na luna Lawe Pepa.

            E pai ia no na Olelo Hoolaha, na Kanikau me na Mele Inoa, me ke Dala kuike.  Aole nupepa ma ka owili pakahi e hoounaia ke ole e hookaa mua ia ka uku pepa.

            E hoouna pololei mai i na Nuhou na Kumumanao, no Olelo Hoola ha, na Kanikau a me na Mele Inoa i ka Lunahooponopono o keia Pepa.

            Aole loa e hoopukaia a hoolahaia kekahi manao ma na kolamu o keia Pepa, malalo okekahi inoa kapakapa ke ole e hoike mai i ka Lunahooponopono i kona inoa ponoi.

           

Ka Nupepa Puka Pule

 

KE ALOHA AINA

 

Hookahi Makahiki.............................$2.00

Eono Mahina.......................................1.00

Ekolu mahina....................................... .50

Hookahi Mahina................................... .20

EMMA A. NAWAHI

Puuku o

KE ALOHA AINA

EDWARD L. LIKE

Lunahooponopono a Hope Puuku

S. KP. KANOA,

Hope Lunahooponopono

O na kauoha Nupepa me na hookaa Dala, e hoouna pololei mai i ka Puuku ma Honolulu.

 

NUHOU KUWAHO

 

            Ma ke ku ana mai a ka mokuahi Rio de Janeiro, ma ke kakahiaka o ka Poaono nei, i loaa mai ai na lono like ole ia makou, a no ka pomaikai o ko makou poe heluhelu ke panee awiwi aku nei makou imua o ko makou mau tausani poe helu helu.

 

KIPU IA MAHOPE O KE ANAINA IKE.

 

            Bombay, Iune 23. Oiai o Komisina Rand a me Lutanela Ayerst i haalale aku ai i ke anaina ike a ke kiaaina, no ka hanohano o ka la iubile o ka Moiwahine ma ke ahiahi o nehinei, ma Ganeskind, ua ki mai la kekahi kanaka oia aina, e poe ana mahope o kekahi kumulaau, ia laua i kaalo ae ai ma kahi o ke kumulaau e ulu ana.

            Ua make o Lutanela Ayerst mai na palapu i loaa iaia, a o ke Komisina, aia no ia ma ke kulana kupilikii loa.

 

HE ULIA POINO.

 

            St. Louis, Iune 23.  Ua loaa mai nei he lono i ka Repubalika mai Alton, e olelo ana ua lono la, ua loaa mai nei he lohe e Kanikela Amerika, Col. Edw. L. Baker, e noho ana ma Buenos Ayres, mai ka ma kahiki 1894 mai, ua halawai oia me kekahi ulia poino ma ka Poalua nei, ma ka hu ana o ke kaaahi mailuna aku o ke alahao.  Ua moku pu kona lima akau, a he mau palapu e ae kekahi i loaa pu iaia, aia oia ma ka halema'i o ke aupuni kahi i waiho ai.

 

HAUNAELE MA KEKAHI APANA AINA O SEPANIA.

 

            Madrid, Iune 24.  Ua ulu ae he haunaele ma Oueido, ke kulanakauhale kau kanawai o ia apana.  O na poe koa i hoouna ia aku no ka hoopau ana i ka haunaele, ua ki aku lakou maluna o na poe hoohaunaele, a make iho la he elua mau kanaka hana me elima mau poe i hoeha ia.  A ke hopohopo ia la e ulu mai ana he kaua ma keia hope aku.

 

HOAO E LAWE I KONA OLA.

 

            Sidane, Iune 16.  O kela hihia o Butler, ke kanaka pepehi kanaka, nana i lawe i ke ola o Kapena Lee Weller, ma ka laua huakai imi gula, ua hoea mai ia i ka hopena i keia la, a ua hooholo hoi na kirue e ahewa ana iaia.

            O ka pane ma ka aoao o ka lawehala ua lawe maoli ae no o Lee Weller i kona ola.

            Ma keia kakahiaka,ua hoao ae o Butler e lawe i kona ola ma ka oki ana ikona pu ai me kekahi apana tini, aka, ua ike e ia nae mamua o ka hookoia ana okona makemake.

            Ua hoohaunaele ae oia i kona wa e lawe ia ana noka hale hookolokolo, a e hakaka ana elike me kekahi holoholona ahiu.

 

KA HOOKAHKAHA NUI O NA MOKUKAUA.

 

            Nu Ioka, Iune 25.  Ua loaa mai he lono telegarapa i ka nupepa Sun mai Portsmouth mai.  O na hale a pau e ku kokoke ana maloko nei o 20 mile, ua hoopiha ia lakou me na poe makaikai ana i ka hookahakaha nui o mokukaua, ka panina hoi o na hana hiwahiwa o ka la iubile, ma ka la apopo.  A no poe i hiki hope mai nei mai Ladana mai, eia lakou ke hoaa mai nei i kahi ole e hoaumoe ai.

            Eia na aumokukaua o na ano like ole no lakou ka huina o  150 mokukaua, iwakalua waapa topido, ke hoolulu mai nei.  Eia alkou ke ku mai nei iloko o na laina he elima, a o ka loihi o ka laina he elima mile.  O na moku nunui ua hookokoe ia aku lakou ma ka mokupuuni o Wight.  E haomaka ana ka la ina mai ka papu aku o Spithead a hiki i ke kaikuono o Osborne.

            O keia huina ae la, aole i huipu ia me na mokukaua o na aupuni e ae, maluna o ka mokukaua Renowa, ka mokukaua laawehae o ka Adimarala Sir Newell Salmon, ke alakai nui o na mokukaua ma Portsmouth aia ia iwaena kou o ka laina mua.

            O na mokukaua o na aupuni mana nui e ae, i ka la apopo lakou e ku laina ai, a o lakou ana ka eono o na laina, ma ka hema aku o na aumokukaua Beritania.

            Ua makaukau na me a pau no ka hookahakaha o ka la apopo.  He lehulehu na hoohiwahiwa e luhiehu mai nei, aia ma ka puka pa o ka uwapo pu kahi o na pukuniahi kelea we e kau ana, e ku kiai ia ana e na poe me ka ihe loloa iloko o ko lakou mau aahu kaua, a maluna ae o ka puka pa he naha me ka aahu kaua o ke au o ka Moiwahine Ane.  He poe kekahi iloko o na @ahu koa i ke au o ke kene@aria, umikumamaono a me umikumamahiku.

 

KUE O RUKINI I KA HOOHUIAINA

 

            St. Petersburg, Iune 24.  Ua hoopukaia ae kekahi manao ma loko o ka nupepa Morning Post e olelo ana, ua kue ikaika loa ka Novoe Vremya i ka hana Amerika Huipuia ia Hawaii, i huipuia me kona hoao ana e hoohui aku ia Cuba.

            O Europa, wahi a ua nupepa la, ua loaa he mau kumu kupono no ke kue ana aku i ko Amerika hooikaika ana aku mawaho o kona mau palena, a ua makukau oia e kokua ia Sepania ina e haule ana o Cuba.

 

HAUNAELE NUI MA SEPANIA.

 

            Nu Ioka, Iune 24.  Ua hoouna ia ae he lono ika nupepa Herald mai Madarida mai, e olelo ana:  Ua ulu ae he haunaele nui ma Mieres, iloko o ka apana aina o Ovied, i manao ia mamuli o ka auhau koikoi ia ana o na mea ai ke kumu i ulu mai ai o ka haunaele.  He 8000 poe maina e kue la i na koa o ke aupuni.  He elua o ka poe hoohaunaele i make a me elima poe i hoeha ia, a he elua o na koa uapuni i make, a he lehulehu wale i hoeha ia.

 

MAKE I KA UWILA.

 

            Ladana, Iune 24.  O ka ikiiki wela o ka La i keia la, ua lawe pu mai oia  i keia ahiahi i na malamalama a ka uwila e anapu ana me ka ikaika, na ia mea hoi i hoopoino aku i kekahi mau apana o na kuaaina.  O na hoohiwahiwa a pau o ka la iubile, eia ia ke waiho mai nei ua pulu i ka ua,  o na kaupoku na puoa a me na halelole ua hoopoino ia.  Ma Norwich, ua make he elua kanaka i ka uwila.

 

PAKELE MAHUNEHUNE KE OLA O KEKAHI MAKAIKAI.

 

            Bombay, Iune 24.  oiai kekahi makaikai e noii pono ana i kahi i ki ia @ o Lutanela Ayerst i ka pu a me kona hoa kokoolua Komisina Rand ma ka Poalua nei i ko laua @a o hoi ana mai ke anaina ike i malamaia ma Ganeshkind na pepehi ia iho la e kekahi mea a ua loaa aku oia ua nahoahoa kona poo.

 

 

            KA HEIHEI WAAPA.

 

            Ma ka hookuku heihei waapa ana mai nei o na Kula Nui iloko o Amerika Huipuia, oia hoi o Cornell, Harvard a me Yale, ua kaa ke eo i ka inoa mua, a ia Yale aku ka helu elua a o Harvard ka helu ekolu.

            O ka loihi o kahi a lakou i heihei ai, oia hoi, he hookahi mile me ka hapa, a ua holo ia, ia loa oia mile a oi e ko Cornell poe, iloko o 20 minute a me 34 sekona, a i ko Yale hoi, he 20 minute, 44 sekona, a he 21 minute hoi ko Harvard.

            Ua malamaia keia heihei waapa ma na wai o ka mokuaina o Nu Ioka, ma ka la 25 o Iune aku nei, oia hoi ka Poalima.

 

MAKE KE COUNTESS O AYLESFORD

 

            Ladana, Iune 25.  O Edith, ke Kauna wahine kanemake o Aylesford, ua make mai nei.

            He kaikamahine oia na ka Lutanel-KOnela Poore Williams M. P. a ua mare i ka ehiku o na keiki a ka Earl of Aylesford i ka 1871, a i make e hoi i ka 1885, mahope iho o ka piha ana o ka 14 makahiki a oi o ko laua noho pu ana.

 

KEEKEEHI KULANA IA IAPANA.

 

            Wakinekona, Iune 16.  Mamua o ke kakauia ana o ke kuikahi, ua waiho ia mai imua o ke aupuni o Amerika, he olelo kue na ke aupuni o Iapana ma o kona Kuhina la, e kue ana i ka hooholoia o ke kuikahi.  Ua hookumuia keia kue a Iapana mamuli o kona kuikahi mua me Hawaii, oiai, i na e hooholoia ka hoohui ana, he mea auanei ia e hoopilikia ia ai na pono kuikahi mua i loaa ia Iapana, nolaila, ke hoike mai ia no ka makaala o Iapana no kona mau pono iho, a ua olelo ia ae, ua lilo0 keia waiho ana aku a lapaua i kana kue i ka Hoohui Aina, he mea i nune nui ia @ e ko A@eriko Amerika, a pela no me ke komite wae i waiho ia aku ai ma ko lakou ina ka noonoo ana.