Ke Aloha Aina, Volume II, Number 49, 5 December 1896 — I NA AHAHUI KALAIAINA A PUNI KA PAEAINA. [ARTICLE]
I NA AHAHUI KALAIAINA A PUNI KA PAEAINA.
E kupaa maluna o ko oukou mau kahua alakai me ka nana ole i na wanana, na kalai manao, na ao ana a na Ahahui e ae. Mai nana i na olelo makani kue a manaoino i ko oukou kupaa ma ka Ahahui i koho ai he pono ia a he ola no ka aina, ka lahui, ka moi a me na alii o ka aina. A ke noi pu ia aku nei oukou e hookokoke aku i ke Akua ma ka leo o ka oukou mau pule ana, me ka mihi oiaio, a manaoio me ka haahaa o ka naau, aiaila, hookokoke mai ke Akua ia kakou, ma ko kakou hele ana, noho ana ma ka hale, ma kahi mehameha, i na manawa a pau o kela a me keia la, a Nana e uku ae ia kakou ma ke akea. Ina he pono, a ina paha he hewa. O ka lokahi, oia ka ikaika. Na ke Akua e kokua mai ia kakou. Amene. DAVID KALAUOKALANI, Peresidena o na Ahahui Kalaiaina o ko Hawaii Paeaina. Honolulu, Dec. 2, 1896.