Ke Aloha Aina, Volume II, Number 48, 28 November 1896 — KA MOHO KUPONO I [Illegible] E [Illegible] [ARTICLE]
KA MOHO KUPONO I PERESIDENA.
Malalo iho nei ike ia i ka inoa o ka mea kupono e lilo i Moho Peresidena no na Ahahui Aloha Aina apau o ka Paeaina Hawaii, oia hoi o Kev. E. S. Timoteo. O na kumu lehulehu wale i hoike ia iloko o na nupepa, e kuhikuhi ana a e alakai ana i ka manao kuokoa o na Elele no ka noonoo ana a me ke kaupaona pono ana i ka mea kupono e lilo i Peresidena nui no na Ahahui a pau ua lawa, a ua kupono loa ia mau kumu hana e hiipoi me ka maalahi, mamua o na moho e ae e holo ana, hiki ole ke hooko pono ia ka makemake oia mau kumu. Nolaila, e na Elele mai ka hikina a ka la i Haehae, a ka welona a ka la i Lehua, e ku ae a nana, a hoomaopopo a koho iho me ka manao ohohia o ke Aloha Aina oiaio i ka mea nona ka inoa i hai ia maluna, a pela ke Akua e kokua mai ai. Me ke aloha, ALOHA AINA. Kapalama, Nov. 17, 1896.