Ke Aloha Aina, Volume II, Number 48, 28 Nowemapa 1896 — OWAI LA KA MOHO PERESIDENA O KA LA 28 E HIKI MAI ANA. [ARTICLE]

OWAI LA KA MOHO PERESIDENA O KA LA 28 E HIKI MAI ANA.

He wahi ninau paha keia i ulu ae iwaena o ka puuwai o kela a me keia Aloha Aina Oiaio, iloko o keia mau la e ninau ana. Owai la ka Moho Peresidena o ka la 28 o Novemaba e hiki mai ana? Ae, aole no paha e loaa ana ka haina pololei ma keia ninau, e hooia mai ana, eia iho ka moho o J. K. Kaulia, a i ole o kekahi mau hoa Peresidena ona paha, ke oili pulelo mai ana ke hiki mai ana i ua la kulaia la. Aka, koe aku paha ka poe kilokilo a a me ka poe makaula, o lakou paha kai ike i ka moho o ua la nui la e hiki mai ana, ua hiki ia poe ke wanana e mai mamua, a hooaiai imua o ke akea, eia ka moho la o J. K. Kaulia oia ka moho nana e kaili ka la o ka lanakila e hiki mai ana. Nolaila, no ka hiki pono ole ke koho pololei i ka haina pololei i ka haina pololei o ka ninau, nolaila, ke waiho aku nei au na ka la 28 o Novemaba e hiki mai ana, na ia la a me ka hora hope oa o ua la la, e hai mai i ka haina o ka ninau. Nolaila, o ua la la e hiki mai ana, he la kulaia (Kuokoa) ia nou e ke kanaka Hawaii, mai ka elemakule a ka opiopio a he la poina ole na ka lahui e hoomanao ai, a ua lilo ia la he la kulaia Aupuni no kou pono kuokoa i loaa mai ai. A nolaila, o ua la 28 la e hiki mai ona he elua mahele hauoli iloko o ke kanaka, oia hoi hauoli la Kuokoa, hauoli koho Peresidena. Nolaila o ua la e hiki mai ana, he la ia o ka hakoko, a me ka aumeume no ka moho e lanakila ana, a o ua moho la ke noho poo mai ana no ka Hui Aloha Aina o Ko Hawaii Paeaina. A owai ka moho? O J. K. Kaulia, ina e hopu like na Ahahui Aloha Aina a pau me ka lokahi maluna o ka inoa J. K. Kaulia, alaila, ka Napoliona Bonepate iho la no ia.

Oiai hoi, oia kai ike i ke ki o ka nane huna, a kona mua i hala aku. Nolaila, o ka lala i pilipono aku i ke kumu, aole nele kona ulu maikai, hua mai kona hua he ohaha maikai. A pehea hoi o J. K. Kaulia? Oia no, no ka mea o laua wale no kai ike i ka laua koena hana i koe. Hala aku la o J. Nawahi, ke poo o ka Hui Aloha Aina, ma ke ala koilua a Kane, a owai iho la ka hooilina o ia mau hana i na he mau hana kekahi i koe i hana ole ia? O J. K. Kaulia no. Owai hoi ko J. Nawahi hoa kuilima pu ma ia hana ? O J. K. Kaulia no. Owai hoi kai ike i na poopoo o ko laua mau keena hana? O J. K. Kaulia no. A ina o ]. K. Kaulia kai ike i ka laua nane huna i hana ai, aole anei e pono e lilo o J. K. Kaulia i Peresidena no ka Hui Aloha Aina o Ko Hawaii Paeaina, ua kupono loa oia ma ia wahi he kakaolelo piha ma ke kanawai. Aka, na ka la a me ka hora hope loa o ua la la e hoike mai i ka puana a ka moe. J. E. A. KAIEWE. Holualoa, Kona Akau, Nov. 28, 1896. Mamuli o ka loaa ana o Dole kekahi o ko makou luna lawe pepa, i ke onawaliwali, nolaila, ua hookohu mai la oia ia Sam. Kanaana, a hiki i kona oluolu ana.