Ke Aloha Aina, Volume II, Number 41, 10 October 1896 — Page 4

KE ALOHA AINA

Hoopukala no ka

Pomaikai o ka Lahulahu, a ka Nu pepa no na Lahui Hawaii.

EDWARD L. LIKE

Lunahooponopono a Hope Puuku.

E.A.NAWAHI, Puuku.

Honolulu, OCT. 10, 1806.

E HOOMANAO MAI

            Eia kakou ke hookokoke aku nei i na mahina hope o keia makahiki, a o ka poe no lakou na wahi hipuu i wehe ole ae a kokua mai i ke ola o ka kakou wahaolelo, ke nei ia aku nei ko lakou oluolu, e uku koke mai e like me na rula o ka kakou pepa e puka mau nei.

            E hoomaopopo iho na makamaka, he nana nui keia, aka, lua lokahi kakou i ka uku ana i kona ola, he mea oiaio, e maalahi ana kona alahele e hoea aku ai imua o kona mau makamaka heluhelu, a oia hoi ka makou e ake aku nei e ike i ka hooko ana o ka lahui ma ko lakou aoao, no ka hoomau loa ana aku i ke ola o ka kakou wahaolelo nei.

            E hoolohe e ko makou mau e ko makou mau makamaka i keia leo paipai, i mea e lanakila mau loa aku ai ka nee ana o ko kakou wahaolelo imua.

UA HALA OIA, AKA, O KONA INOA UA PUNI MA MOKU

            He mea oiaio, ua hala o Nawahi, ua moe aku la i ka moe kapu a Niolopua, aka, o kona inoa a me kana mau hana, eia no ia ke ola mai nei iloko o ka puuwai o kona mau hoa kanaka o ke one oiwi hookahi, ka mokupuni hookahi a me ka lahui hookahi, ka mea nona ke kaulana i ahai ia aku e na aheahe makani kolonahe e pa puhea mai ana, mai na kukulu mai o Kahiki, ua hala, ua nalo a ua moe kau aku la oia iloko o ka hopena o ko ke kanaka ola ana.

            Ae Nani ke kupanaha o kana mau hana iloko o keia wa kupikipikio o ka aina, mamuli o ka wae ana ae o ke Akua Kahikolu iaia i alakai a i Kuhikuhi Puuone e pale aku ai i na hana hoolauwili a ka poe nona na lima i paumaele me na aweawea o ka hoino ia.

            Ke ku mai nei oia me kana mau hana hoopakele i kona lahui, i keia hoomanao na kakou a pau e nana aku ai ma keia hope aku, me he mea la, e ola ana no oia, a e noho ana no oia e hooponopono maluna o kona pakaukau no ka haawi ana aku hana mau kauoha imua o kona lahui aloha.

            Lihaliha a maeele ka puuwai ke ike aku makou i kana mau apana pepa e kakau mai me ka paia o ko makou hale hana, me na huaolelo e ao ana o kupaa, e hoomanawanui, no ke aloha i ke alii, ka poe no lakou na manao i awaiaulu pu ia me kona.

            Ua kulu iho ko makou mau waimaka me ka haawi ana ae i na hoomaikai ana he nui, i ka mea nana i hana na mea a pau a o ka ehaeha, ka lia ana, a me na hoomanao ana iloko o ko makou mau puuwai, aole, loa ia e mokuhia i na waikane he nui ma keia hope aku.

            No ka mea, he mea ua hookumu ia iluna o ke kahua o ke aloha oiaio, iloko o ke apo lokahi o ka manaolana, ka mea nana i hoohui ia kakou iho i hookahi hana, i hookahi manao a hiki i ka hopena a kakou i ike ole ai me keia mua aku, no ka pomaikai mau loa o Hawaii nei.