Ke Aloha Aina, Volume II, Number 25, 20 June 1896 — Page 2
| This text was transcribed by: | Francene H Aarona |
| This work is dedicated to: | To our classmate Darrell Asing, who keeps us well informed!~mahalo nui. |
KE ALOHA AINA
KE ALOHA AINA, POAONO, IUNE 20, 1896
KE ALOHA AINA.
Hoopukaia no ka
Pomaikai o ka Lehulehu, a he Nupepa na ka Lahui Hawaii.
J. NAWAHI, Lunahooponopono a Puuku.
E. L. Like, Hope-puuku.
HONOLULU, IUNE 20, 1896.
E LOHE KA LAHUI HAWAII.
---
Mai keia wa aku a i ka manawa pau ole, aole oukou e hookikinaia e hele e kakauinoa, a hapala ina manamanalima nui o oukou Ua pau ia mau hana kolohe, e ua hoohoka mai ke Akua i keia poe pakaha, i ko oukou mau pono pili paa Ana i haawi mai ai ia oukou. Noho aku me ka maluhia, a me ka mahalo i ko ke Akua Aloha a me Kona kokua ana ia kakou iloko o ka wa pokole loa.
---
NA OLELO PAIPAI AKU
---
E hoomanao mai na poe e noho aie nei i ka nupepa KE ALOHA AINA, e hookaa mai.
Aole nupepa e hoouna hou ia aku ana ke ole e hookaa ia mai ka uku mua no na mahina ekolu a eono paha.
He makehewa ka olelo mai mahope e hookaa ai; no ka mea, he mau haneri oia ano poe i olelo pela, a ke noho aie nei no no ka nupepa.
Mai kuhilani ai me ka olelo, aia a loaa aku ka nupepa, alaila, hoouna mai i ke dala. Aole loa makou e puni hou ia mau olelo.
He mea hikiwawe ka nupepa a pau i ka heluheluia, aka, he paakiki loa, ka hookaa pono ana mai o na poe lawe nupepa.
He nui na lilo a me ka luhi e kiola wale ia ana no ke ake i ka pono o ka hoomalamalama ana aku i ka lahui, aka, he lokoino, a he aloha ole ko kekahi poe i ko makou hoomanawanui ana no keia hana kaumaha.
He mea hoopailua ia makou ka hoao mau o kekahi poe e hana apuka mai ia makou, ma ka hoouna ana mai i kona dala aie i ka nupepa ma ka inoa o kekahi mea okoa, me ka olelo mai, he mea lawe hou oia, a e hoomaka ana i keia hapaha.
He nui na poe i hoao e hana mai pela, aka, mamuli o ko makou maa i na leta, ka pepa a me ka inika kakau, ua manao o makou he kanaka kolohe keia.
I ka hoounaia ana o na palapala ninau i kona wahi i noho ai, owai la ia mea, o mea ka inoa ?
Alaila, ua hoike ia mai, oia no ua kanaka la, a mahope, ua ae mai oia, oiaio no ia. E hoao e hooko pono e like me na olelo hoakaka, a i ole, e paa ia ka pepa. JOSEPH NAWAHI. Lunahooponopono. Honolulu, Iune 18, 1896.
HE IUBILE NO KA LAHUI HAWAII.
---
Haehae ka Manu ke Ale Nei Ka Wai.
---
Ohuohu Halemano i ka Lau Lehua.
---
E ka Lahui Hawaii hoomanawanui palena ole, i kupaa no ke aloha i ko oukou aina Makuahine, ka poe i nana ole ae i na inea, ka hune, ka pololi a me na popilikia he nui. Ua kupaa oukou a hiki i ka minute hope loa, alaila, ua hoolei mai ke Akua maluna o ko oukou mau poo i ka lei nani o ka mahaloia, no ko oukou aloha i ko oukou aina. A ua haawi mai Oia i ka lanakila ma ko oukou aoao, a ua haulepio ka poe nana oukou i ohumu e kuni i ka ʻ ili o ko oukou manamanalima nui, i lilo oukou i kauwa kuapaa mau loa na lakou, no ka wa pau ole.
---
Ua hoikeike mau aku KE ALOHA AINA i na wa a pau loa e like me ka hiki iaia ke pulama mai i kona Lahui ponoi, me ke noi nui ana e akahele kakou, a e hilinai i ko ke Akua kokua ana mai.
Ua hoolohe mai oukou i kana kahea ana aka ia oukou a puni ka Paeaina o Hawaii nei.
---
Ua hoikeike aku oia i ke kue maoli o keia Kanawai ( 13 ) Kakauinoa Lahui, mai ka mua a i ka hope, a ua nui na poe i kulike ka manao me ko KE ALOHA AINA ma ia mea.
No ka like ole o ka hana a keia Kau Ahaolelo, me ko kawa Aupuni Moi, nolaila, ua ike ole ia ua kanawai hoopau nei, a o lakou wale iho no kai ike i ka lakou kanawai i hana ai, koe wale no ma na olelo hoakaka a na nupepa e ikeia ai ia mea. Aka, i keia wa, ua hoea maoli ae nei ua kanawai 76 nei, e hoopau loa ana i kela Kanawai 13.
Nolaila, mai keia la aku, ua panikuia na Hale Hopaa Kakauinoa aole Kakauinoa hou aku Ua lilo na mea i hanaia na buke, a me na hapala inika ana i mea ole loa.
---
Na ka Mana o ke Akua
---
Ua nui na poe i hoopuka manao ae, me ka olelo ana, " he mea oiaio maoli no, na ka Mana o ke Akua keia hana. " Pela io no.
---
Pau i ke Puhiia i ke Ahi.
---
Ma ka la 15 nei o Iune, A. D. 1896, oia ka la a ka Peresidena Sanford B. Dole i kakauinoa ai malalo o ke kanawai hoopau loa i ke Kanawai Kakauinoa Lahui ana A i mea e ike maopopo mai ai ka Lahui Hawaii, mai Hawaii a Niihau, ke hoopuka aku nei makou i ke kope o ua kanawai la a penei no ia.
---
KANAWAI 76.
---
" He Kanawai e hoopau loa ai i ke Kanawai 13, o na Kau Kanawai o ka 1896, i hoakaka ia. He Kanawai e hoomakaukau ai no ke Kakauinoa ana o na poe kane e noho ana maloko o ka Repubalika o Hawaii. "
E hooholoia e ka Ahaolelo o ka Repubalika o Hawaii:
Pauku 1:---O ke Kanawai 13 o na Kanawai o ke Kau o 1896. He Kanawai e hooponoponno ai no ke Kakauinoa ana o na kane e noho ana maloko o ka Repubalika o Hawaii, ma keia ua hoopau loa ia.
Pauku 2:---E lilo keia Kanawai i mea mana, mahope iho o kona hoolahaia ana.
Aponoia i keia la 15 o Iune, A. D. 1896. SANFORD B. DOLE. Peresidena o ka Repubalika o Hawaii.
---
He Hoomaikai Nui.
---
Ke waiho aku nei makou ko makou mau manao hoomaikai i ke Akua, no keia hana hoola kupaianaha loa ole, i hanaia e Kona Mana iloko o na minute hope loa o keia Kau Ahaolelo.
Hoomanao mau makou i kela olelo a ka hakumele kaulana i olelo iho ai.
" O Iehova ka puuhonua a me ka ikaika o kakou, he kokua kokoke loa Oia i ka wa popilikia. "
---
Hilahila no Hoi.
---
O na poe i hapala iho nei i ko lakou mau lima, ua ukuia no lakou; no ka mea, na pipili mai ka inika i ka manamanalima nui, a hoi i kauhale e holoi ai me ke sopa i pau ke kohu o ka inika.
O kela poe o Keauhou i hoouna mai ai ma o Henry Kawewehi la i ko lakou manao makemake e hapala i na manamanalima o lakou a hoole ai makou aole e hoopuka, aka, ua hoopuka ia no nae ma ke Kuokoa.
Ke hoike aku nei makou ua hoohilahila no oukou ia oukou iho, a e pono e mihi ma ke akea i mea e ikeia ai ka oukou mea i hooholo naaupo ai.
O ka poe hoopuukahua mai i ka makou mau olelo hoike, ano, ua ike pono lakou i ka pololei loa o keia mau alakai a KE ALOHA AINA.
---
He lanakila ana keia no ka Lahui Hawaii, a he Iubile hoi, e hookuu ana ia kakou mai na hoohana a hoopilikia ana ia kakou.
E waiho i ko kakou hoomaikai ana i ke Akua Mana Loa.
NUI NO KE KUPAA O KO HONOLULU.
---
Ae, aole ia he mea hoole ia, e lohe mau ia ana na olelo, na kamailio, na hauwawa ma na alanui o ke kulanakauhale, e ui ana, e ninau ana, pehea kakakou ? Eia la, ke kokoke loa mai nei ka pilikia ! He $ 50 ka hoopai ke ae ole aku e hapalaia na lima ?
---
Eia ka pane mai a kekahi mau hoa: O ! No kea, hele i ka Hale Paahao, hiki no ! Aole makau ia mea, makemake wale no keia poe e hoopilikia ia kakou.
Pela mawaena o na poe ma ka Makete, e puka ana na olelo a-a, a ake no e hoopaaia i ka Halepaahao.
Ua kali like na mea a pau loa me ka hele ole e hapala ina manamanalima.
Heaha ka hopena o ko oukou manao koa, manao a-a, a manao kupaa no ke aloha i ko oukou aina ?
Eia, ua hoolohe ke Akua o ka Lani i ka oukou mau pule, me ke kaumaha no keia mau hana. A i keia la, mamua o ka puka ana mai o na kukuna o ka La, aia hoi, ua haule pio a make loa ua kanawai la, a ua lanakila oukou.
Aole oukou e hele ana e kakauinoa aku, mai keia la aku a mau loa aku no. Amene.
---
UA KUU KA LUHI
---
I keia wa ua kuu ka luhi o ka lahui, a ua hoihoi pono ia mai ka manao a ka manao, ka noonoo a i ka noonoo, a ua pau na olelo hoonuinui a hoopuiwaiwa a na Luna Aupuni hookano a hookiekie launa ole mai.
Kukala iho ma na alanui, e hele na kanaka e kakauinoa i ole lakou e hoopaiia i ke $ 50. Aka, aole nae he pane ia aku, no ka mea, ua oi ke aloha i ka aina iloko o ka puuwai, mamua o ka pane wale ana aku i na olelo waiwai ole.
Ae, mai ka Lani mai no ko ke Akua mana a komo ana iloko o kekahi wahi uhane keokeo, a hookonokono Oia i ua wahi uhane nei e hana i kanawai, a hoopau loa ai i kela kanawai kakauinoa. A e emo ole iloko o elua la wale no, na pau na mea a pau loa i ka hookoia.
Auhea kela $ 50 hoopai mai ? Ua kiola ke Akua iloko o ke kai. Auhea na hookikina ana mai ? Aole hana hou lakou. Ninau aku nei ma na Koolau, pehea, ke kakauinoa mai nei no oukou ? Hoole mai nei me ka olelo mai, ua hoopau a ka @ke kakauinoa ana.
---
He Hauoli Laulana
Aole o ka @poe ( Royalist ) Aloha Alii wale no keia piha hauoli, aka, o na @ G. @ kekahi. Aole no @ makou @makemake i keia @ kanawai aka, ( wahi no a lakou nana ae hoi a na makou hoi i kukulu pu i keia ino, nolaila, @moepono ai. I keia wa, ua hoomaha ka Lahui Hawaii.
---
NO V. V. AKEPOKA
---
( Mai ka Independent ma o @ )
Kapalakiko, Iune 4 Ua ku mai nei o Beritania Nui ma kekahi kahua ma ka mea e pili ana i ka hihia o Volney V. Akepoka, kekahi o na hoahanau Akepoka, i komo, a i ole ia, ua manaoia ua komo pu he mea hoeueu iloko o ka hooulu haunaele ma Hawaii iloko o ka 1895.
Ua loaa mai ia @ @ena Dole he manao kou maopopo mai Enelani mau @ @ ia Akepoka, e pae aku @manao ka aina o Hawaii.
O na manao @h @ o ka palapala, aole ia @ @na akea ia ae: aka @ @, maopopo ia no @pa @ @manao, ua wiaho @ @ kekahi ano @ @ @ maopopo @ @ @ hoopoino mai @ @ @ kona helehelena @
O ka Loio @ @ Akepoka hoi i kou @ ilio ia aku ai, na @h @ e like me keia @ @
Ua hoahewaia o @ @ Akepoka e ka Aha @ Koa, no ka hewa @ @ ( ua hiki ole nae @ kona ike i ke @kip@ @ kekahi poe e ae. )
@ @Aupuni o Beritania @ @ i hoopii aku ai @ @ ke Aupuni Hawaii @ @ hoopauia ka olelo @ @ mamuli o ka lawa @ @ hoike ku ole i ke @ @ ua koi mai e kapae @ @ hoopai, a o na hoop@ @ e hoole loa ia.
Ua hoomaopopo @ @ kela koi ana mai @ @ pane pihaia aku e @ @ Hawaii, nolaila, @k @ na kukaiolelo ana @ @
na Aupuni a elua, @m mea e hiki mai @aoao @ @ mau mahina.
O na olelo ana, @ @ kona hoahanau, a @ @ aeia mai oia e pae@ @ Hawaii, he mea hoop@ @ ia.
Ua hoole e o @ @ ka no ka olelo pili i ka @ kaua Beritania no ka @ @ I ka wa a kona heaha @ e makemake ai e hoi i Honolulu ua hiki no iaia ke hana pela. A nolaila, i keia wa ke upuia aku nei no kona hoea mai i keia mau la aku.