Ke Aloha Aina, Volume II, Number 20, 16 Mei 1896 — Page 2

KE ALOHA AINA

KE ALOHA AINA,  POAONO,  MEI 16,  1896

 

KE - ALOHA - AINA

Hoopukaia no ka Pomaikai o ka Lehulehu, a he Nupepa na ka Lahui Hawaii.

 

@ NAWAHI, Lunahooponopono a Puuku.

E. L. Like, Hope-puuku.

 

HONOLULU, MEI 16, 1896.

 

Ke Kanawai Kakau Inoa.

 

            Ua hooholoia ua kanawai ne a ke hoomaka nei ke kakau inoa ana o na kane mai ka 15 makahiki a maluna aku.

Ka Manawa e Hele ai e Kakau

            Ua hoakakaia, mai keia wa aku a hiki i ka la mua o Augate 1696 nei; maloko o na wahi a apana paha i hoolahaia, no ka noho ana oia apana, a mahele apana paha e kakauinoa.

Na Poe Kokua Aku

            He mea pono loa ina poe makaukau, a aloha aina, aloha lahui, e makaala a e kokua aku ina wa o na ninau a kakau inoa hoi a hoailona paha.

Ka Manao Laulaha

            Ua nui na olelo e laulaha nei, he kanawai kue kumukanawai keia, a ke manao nei kekahi poe e hoao i ke ku a me ke ku ole o keia kanawai imua o ka Aha Kiekie.

Ina i Hooholo ia

            Ina i hooholoia mai ua kue Kumukanawai keia kanawai, alaila, ua pau ae la keia mau hana hooluhi kuanui wale.  A ina hoi e paa iho ana paha alaila, ua ikeia ke alanui e hele ai.

Mai Pupuahulu wale aku

            Noho malie loa, aole pane aku i ka mea olelo mai aia a hiki ae i kau mea e hana ai, alaila, hana aku.

 

HE OIAIO OLE MAOLI

 

            Aia iloko o ka olelo hooholo palakai a ke Congress o keia mau la iho la, i hoopukaia ae ai kekahi mau hopuna olelo oiaio ole maoli, a ku no hoi i ke ano hoopunipuni lua ole mai, oi hoi keia penei: *  *  *

            "Ua hoike ae lakou aole i ko lakou mau manao wale iho no, aka, o ko ka hapanui loa o ka poe kupono i ke koho balota ma ke kanawai o Hawaii."

 

            O wai ka hapanui o ka poe kupono i ke koho balota o Hawaii nei?  O ka poe hookahuli aupuni anei?  Aole loa.

            Eia no ka hapanui o ka poe koho balota o hawaii nei ke ku nei mawaho mai o ka hapa uuku loa o na poe koho balota aeahaukae mai o na aina e mai.

            Hilahila makou i na poe mamo a na poe misionari i kapa aku ai i ka hana hewa a me ke kolohe, he mau hana pono, a i ka poe aea i hele lmai e kokua i na hana hookahuli aupuni, o lakou ka ka poe nona ka aina, ka lani a me ka honua, a o na poe Hawaii ponoi, he poe aea mai lakou?

            He mau olelo wahahee maoli kela, a he mea hiki ole ke hoopukaia e na poe o ia kulana!  Aka, aole nae pela.  Ua lawe mai lakou me ka hilahila ole maoli, a olelo mai, o ka hapanui o ka poe kupono i ke koho balota ma ke kanawai o Hawaii nei, oia ke apono nei i keia hoohuiaina.

            E pau ana ka poe e olelo nei i ka nalowale, aka, aole loa e hoohuiia o Hawaii nei me Amerika Huipuia.

 

KE KUAWILI HOU NEI NO.

 

            Ma ka la inehinei Mei 12, ua lawe mai la o Senetoa Lyman o Hilo i ka olelo hooholo hui a ke Senate a me ka Hale Makaainana, e pili ana i ka hoohuiaina

            Ua lawe mua ia mai no keia mau olelo hooholo i kela mau kau aku nei, a heaha la ka mea i ikeia?  A heaha la hoi ka mea i hanaia?

            Aohe mea i ikea, aole no hoi he mea i hanaia a hiki i keia la.  Ke hoole mau nei no o Peresidena Cleveland ia mea a hiki i keia la.  Ua olelo ae hoi ko Hawaii nei poe, e holo ana ka hoohuiaina iloko o keia Kau Ahaolelo o Amerika, no ka mea, ua lilo ka hapanui o ka Hale Ahaolelo i na poe Repubalika.  Aka, heaha la ka lakou mea i hana ai?

            Ua lawe mai anei lakou he olelo hooholo hoohui i keia Paemoku me Amerika Huipuia Aole loa!  Aole loa ia mea i loheia iloko o ke Congress a hiki i keia la.

            He maunu ekaeka ka hoohui aina ia Amerika i keia la.  Ma Hawaii wale iho na na olelo no ka hoohui aina, aole ia mea ma Amerika holookoa.  Ke hookomo nui mai nei ke Aupuni Repubalika ina poe Asia kuli, ka mea a Amerika e kue nei.  Alaila, he apuhi keia olelo ana, he makemake i ka hoohui aina.

 

NA OLELO A KA HILO TRIBUNE O MEI 9, 1896.

 

            O ko kakou Ahaolelo eli kuahiwi, ua hoopau wale aku i ka manawa o aneane ekolu mahina, a lawe mai la iwaho he wahi iole liilii loa, ma ke ano o elua a ekolu mau wahi hana ano nui, ma ke ano e hoololi aiia kakou i mea hoohenhene ia imua o na maka o ke ao holokoa.

            Aole loa he Ahaolelo malalo o ka wa o ke Aupuni Moi i hoohana ia i oki loa ka hana ana e like me ka keia poe e hana mai nei i keia wa.

 

            Ua like a like ko makou mau manao me ka nupepa maluna ae nei.  A oia no ka makou nei, aole he wahi mea pono nui no ka lahui a lakou e hana nei.  Aole loa

            O na mea a pau loa i oleloia, ua puhiia e ka makani, a lilo a nalowale loa aku la.  A eia lakou ke hoa-a nei i ka ike ole i kahi e hana aku ai e pono ai.

 

Mai Pihoihoi ka Lahui.

 

            Mai pihoihoi ka Lahui i ka lakou nei mau hana, no ka mea aia ke Akua ke alakai nei i ka Lahui Hawaii i hoopea wale ia, a o ko lakou uwe ana, ua komo aku iloko o na pepeiao o Iehova Sabaota.

            Na ka poe hana newa e hana ina hana hooluhi o ka hewa, aka na ke aloha o ke Akua e pale ae ia mau hana ino.

            O keia ko kakou hoomanawanui hope loa ana ina hana a ka poe pakaha, alaila, mamua aku o laila, aole mea a lakou e hana hou mai ai ia kaou.

            O keia ke kuanalu hope loa alaila, ua kaa aku la iloko o kahi malino maikai loa, ke ola ia, a me ka poaikai no ka Lahui hoomanawanui.

 

            Ke hoomaopopo nei anei ka Lahui i ka ahaiolono e laweia la ia Kaiulaui?  No oukou ia kuleana a me ia pono mai ke Akua mai!

            Aia no i ka Lahui kona kuleana e olelo ai, a e hana ai, a e haawi ai i ka lakou mea i makemake ai.  Aole loa he kuleana o kekahi mea e ae malalo iho o ka Lani e kaili aku ai ia mea.

           

            E hoomaopopo oukou, o ka Lahui oia ma o kona hapanui la, ka mana mai ke Akua mai malalo o ka oiaio a me ka pololei, a pela na maa lahui o ke ao holokoa.

            He mea ole loa ka mana i kukuluia maluna o ka manao alunu a me ka pakaha limaikaika me ka mana kaua.

            Nolaila, mai hopohopo a mai makau, e kupaa mau me ka lokahi a hiki i ka loaa ana o ka lanakila mai ke Akua mai.

 

EHA MAU WALE NO

 

            Iloko o na nana ano kapakahi a me ka hoopilikia wale, ua hooholoia iho la ka auhau kaulana a ke Kuhina Waiwai no na iliowahine he $3.00 no ke poo.

            Ua hoike ae ke Kuhina i ke kumu i lawe ia mai ai o ka auhau ana i $3.00 no ke poo ilio wahine.  Heaha la ke kumu?  Eia wahi ana, no ka mea, he mea hoolaha aku na iliowahine i na ilio e hoopoino ai i na ohana hipa, ma na aina hanai hipa.

 

            Ke olelo nei makou, he wahi kumu oleloa keia a ke Kuhina i ake ai e auhau i na iliowahine ma na wahi a pau loa i $3.

            Aia he aneane he 60 mau makahiki i hala ae nei, aole loa i ikeia, a i lawe ia aku, a i hoonohoia na hipa ma kekahi mau apana, aole no a hiki loa i keia la, aole no e hiki ana ma keia hope aku ke kanai hipa, no ka mea, ua maheleheleia na apana i mau kuleana mahiai kope, kulina, uala, maia, lemi alani, apala a me na huaai e ae.

            A pehea la?  A ma ke kumu hea la e hiki ai i ka noonoo kamalii papau o ke Kuhina ke olelo mai.  Ua pono po ka auhau ana i na iliowahine o ia mau apana, no ka mea, aole he ano hipa a kino hipa i ikeia ma ia apana no 50 makahiki a hiki i keia la?  Aole no hoi ma keia mua aku iloko o 50 makahiki?

            No keaha, aole i hoopololei ia keia ma kahi o na aina hanai hipa, a pela aku.

            Ina ma Maui a ma Lanai a ma Niihau wale no na wahi hanaiia na hipa, heaha ke kuleana e auhau ai i ko Kauai poe iliowahine he $3.00?  A ina hoi ma Waimea ma Hawaii a me Kona paha na wahi hanai hipa.  Heaha ka mea i hanaia e ko Puna mau iliowahine?

 

            No makou iho, aole o makou hanai i ka ilio, aole no he makemake ia mea; aka nae, no kekahi poe i makemake no ia mea aole ia makou ka lawe ae i na hana lima oolea, a auhau aku maluna o ka poe he mau iliiowahine ka lakou.

 

            Aole oia auhau o $3.00 maluna o na iliowhaine he mea i kauia ma ka pololei a ma ka hoopono, aole hoi he mea e hoopau ai i ka aie o ka Lahui aka, he mea keia e hoike mai ana keia i na hana kaomi maluna o na poe ilihune, a hoopakele wale no i na poe waiwai.

 

            Aole e hiki ke hoohanauia na iliowahine, ke ole he ilio kane, a na ka ilio kane i moe aku i na iliowahine, a lilo i mea laha nui.

            Penei:  Ina he 10 iliowahine a he 1 iliokane wale no, alaila, e moe aku keia iliokane hookahi i na iliowahine a pau loa he 10, alaila, ina he 6 keiki a ka ilio hookahi, alaila, he 60  keiki ilio i loaa mai mamuli o kela iliokane hookahi.

            A no keaha i auhau ole ia ai ke kumu io maoli o ka hooulu illio i $30 a $60 o ke poo?  No ka mea, ina aole iliokane, aole paha laha na ilio.  Penei: Ina he 10 iliokane, a 1 wale no iliowahine, alaila, e hanau mai ana paha oia he 6 a 10 wale no ilio!  A he lohi loa ka pii ana aku ma ia alapii no ka hoonui ilio.

 

            I ka wa e noho Kiaaina ana e Herode no Iudea malalo o ka Emepera o Roma, He kauoha ano e kana e luku i na keikikane a pau, a koe no na kaikamahine.  O keia hoi.  O na iliowahine ke auhau i $3.00 o ke poo, a o ka iliokane ke kumu o ka hana e laha ai ka ohana ilio, i $1.00 no ka auhau.  Kupaianaha no hoi!!

 

UA HALA AKU IA KAMAAAINA KAHIKO OIA O HENRY ROOD HOLLISTER

 

            Ua make aku oia ma ke kakahiaka o ka Poalua nei, ma kahi o kana hunona H. A. Parmalee ma Alanui lBeritania, a ua kanuia ma ka Ilina o ka poe Hui Malu i ka auwina la o ka Poakolu nei.  He hookahi wale no pule ae nei no kona kaa ma'i ana a hala ak@ la.

            Ua hanauia oia ma Saulisbury, Kanetikuta, Amerika, i Sepatemaba 13, 1824.  Nolaila ua piha iaia he 71 makahiki ma keia ola ana.

            Ua mare oia he wahine a hanau mai he elua ma@ keiki o ke keikikane ua make opio no oia, a i ka wa he 3 mahina o ke kaikamahine, @ make aku la ka makuahine, @ koe keia makua me ke kaikamahine.  A ua hele hana oia ma Amerika a mahope ua hoea loa @ Hawaii nei iloko o ka 1865 a noho pu me kona makuakane naanei nei.  Aka, oia ka hopena no na mea a pau loa, a ilaila kakou e hele aku @ aole koe iho hookahi.

 

UA HALA AKU O EMALAINA KAHOIWAI

 

            Ua oluolu i ka Makua Lani ka lawe ana aku i ka ha@ ola o Mrs. Emalaina Kahoiwai ma ko laua wahi noho ma Kalia, Honolulu Oahu, ma ka la 8 o Mei 1896, a iloko hoi o ka hoomailo ana a ka mai i kona kino.  Ua hanauia oia ma keia kulanakauhale o Honolulu nei, ma kahi i kapaia, o ka Bay Horse, kahi hoi i noho ai o  G. W. Hougtailing, ma ka makahiki 1859, a ua piha iaia ke 37 @ na makahiki o kona ola ana a hala aku la ma o.

            He makuahine oluolu oia, he heahea, a he lokomaikai wale.  ua haalele iho oia i ke kane aloha a me elua keikikane a me ka moopuna, na makamaka a me na hoaloha, e kanikau aku mahope nei.

            Ke komo pu aku nei makou iloko o na kumakena ana me ka ohana o ka mea i hala aku a na ke Akua no e hoomama mai ia kakou.

 

            Ma Punaluu, Kau, Hawaii ma ka la 4 o Mei, na hanauia he keikikane na mr. a me Mrs. Adlia Akiu, o ka elua ia o ka laua mau @ua i loaa mau.  E haawi ke Akua i mau keiki hou aku, a ulu hou ka Lahui Hawaii.