Ke Aloha Aina, Volume II, Number 11, 14 March 1896 — Page 3
| This text was transcribed by: | Beatrice Lawelawe Santiago |
| This work is dedicated to: | PuakeaN |
KE ALOHA AINA
POAONO, MARAKI 14, 1896.
___________________________
@OUMAU ANELA KIAI
@ [ All of first column illegible; 2nd column starts as follows;]
loaa mua mai ai hoi na dala hoaie mai kahi manawa a i kekahi manawa, ma ka hoaia ma ke ano i oi aku mamua o na kikoo i hoopuka ia ma na helu, e oi ole aku ana maluna o ka huina o $150,000 i ka manawa hookahi, i mea e hoopuu ai ina hoolilo o ke Aupuni.
Ko Makou Manao Iho.
He mau hana no keia e hoao ia ana, e loaa hou aku ai wahi e noho hana ai e kekahi poe hana ole e noho mai nei.
He wa pilikia keia o ka aina a he wa emi nui o na loaa pomaikai; aka nae, i ka hoomaopopo ana aku, eia he mau hale hau ke kukuleia nei maloko a Hale Nui @ mea aha la?
I mea no e loaa ai he hana e hana ai lakou, a e loaa ai he mau paa dala hou e koiia ai e aie ka Lahui i mau dala hou.
________
O ka aie ana i $150,000 i ka manawa hookahi, a ina e loaa he ekolu manawa e hana ai pela, alaila, ua aneane e Hapalua Milion@ mamuli o keia kanawai a e lilo ana he $27,000 no ka uku ana i ka makahiki @.
________
Aole wale ae e hapai nui ia nei na h@ dala ana, e like me kela wa@. Aia na Bila Aie elua a ke Kuhina Waiwai, e pili ana i na Uku Luna Aupuni a me na Lilo hana hou o ka aina, he Elua Miliona a oi aku; a aia no kela. A@e Lahui e ku nei he aneane 4 miliona dala.
Ke hoomahuahua wale ake nei no lakou i na aie, no ka mea, aole i maopopo ka papai ia mai ma kahi o ka hoolilo ana aku.
Aka, e like me ka me ka rula mau, ha ke Au o ka manawa e hoike mai i ka hopena o na mea a pau loa.
__________
KE KULANA O AMERIKA.
__________
Ma ka nana ana i ka hana a kona mau Mana e lawelawe mai nei, eia oia ke hele loa aku la mawaho aku o kana mau mea i hoopaa mua loa ai.
Ua kokua iho nei ka Ahaolelo o Amerika i ke koi a Peresidena Cleveland e ikeia mai ke kahua hana a Monoroe, a pela hoi na haawina kokua no na ulia kaua, a no na hooopuka ana ina bona dala a pela aku.
Pau ia. Eia hoi keia hana hou, e nakiikii ana, a i ole, e hookomo maoli aku ana na Luna Ahaolelo i ko lakou Peresidena iloko e kekahi kulana kupilikii maoli, ina aole na kona ike a me kona naauao e pale aku i keia mau hana a kona lahui.
Ke ku mau la no nae o Enelani, a ke nana mai nei i na hana a na kanaka Amerika -- Ua hoopau aku lakou ia Emebasedoa Bayard mai kona noho Luna Aupuni ana ma Ladana. A malia, o like pu mai me ia ko Hawaii nei Kuhina Noho i keia wa.
Ke hele nei na hooko hana Aupuni ana, maluna o na aoao a elua; nolaila, aole he aoao pale ma keia mau hana ana, e loaa ana i na poe Amerika, ke lawe ia kela a me keia aoao i kahua hoopii, a i ole ia, i ka hua pale mai.
Ua papa aku oia i na Lahui e hana ana i na hana komo wale, a hooweliwili aku, he hana hoaloha oleia, wahi ana. Aka, aole nae ia olelo i malama ia eia me ka laahia loa.
A PEHEA HOI KEIA?
Ina e kaua ana o Beritania me Venezuela, e aa anei o Amerika e kokua ia Venezuela, a e hoopakele ae iaia mai na poino mai a ke kaua?
Pela paha, aka, ke hoike mai nei o Amerika i kona komo mua ana iloko o na hana kokua ina enemi o koha hoaloha, ka mea ana e olelo mau ai, he hana hoaloha ole ka hele ana aku o kekahi aupuni a komo kuleana ole iloko o na hana o kekahi lahui okoa aku. Aka, pela kakou e ike ai i ke kulaoa kalai aupuni o Amerika inehinei, a i keia la, a i ka manawa e hiki mai ana.
____________
HE KARISTIANO ANEI OIA ?
__________
Heaha la ke ano o kekahi mea e olelo ana iaia iho, he Karistiano oia, Aka, (1) Ua ae no oia e hana i na rula, a me na kanawai e laikiniia ai ke kuai ia ana o ka waiona. (2) A e hoole loa ana hoi i ka laikini ana i ka opiuma?
E hai mai na poe Karistiano. Heaha la oi? Heaha la kona ano?
__________
Ua nui ko makou hoomaopopo maoli ana. Aole loa oia he Karistiano. Aka, he mea hookamani maoli e kokua maoli ana i ka hana hewa, a ua like pu no kona hewa me ko ka mea e lawelawe hana hewa maoli ana. Aole anei pela? Oia maoli no.
A pehea la, a ma kahi hea e hele mai ai ka mea hookamani e uhi ia nei me na uhimaka powa , e apono ana e Laikiniia ka Waiona, a e papa ana i ka Laikini ana i ka Opiuma, a olelo mai he "Karistiani Au."
O ka makua e olelo ana i kana keiki; -- e inu no oe i ka waiona, penei a penei, a mai ai nae oe i ka opiuma. -- Heaha ia ano makua? Wahi a oukou, he Karistiano?
Aka, ia makou hoi, he humabaka! Aole he Karistiano.
___________
E hoole like i na ino a elua, alaila, e ahona auanei ke loaa iaia ka inoa o ke Karistiano.
___________
Ua holo aku kahui keaka lio no Yokohama i ke ahiahi Poaha nei.
____________
NA LONO HAUWAWA.
__________
He nui na lono hauwawa no na luna kiai ma ka Hale Dute o Honolulu nei i keia mau la. Ua hopu ia he mau Iapana e noho hana ana maloko o ia wahi, no ka hoohuoiia, ua komo iloko o na haua haawi Opiuma.
O ka manawa keia o ka Bila Kanawai Opiuma e noonooia nei e ke Senate a he wa hoi o na haiolelo kue no ka Opiuma mai ia Rev. Peck mai, a ua nui no na hana mana ano e o keia /// kupua e hoohana mau ia nei iloko o keia manawa.
He lohe wale no aole he oiaio ua komo pu no kekahi poe haole iloko o keia mau hana pahaohao, aka, ke noho hamau loa nei nae na kiai o ke aupuni no ka huli maoli ana aku ina poe maoli i komo pono iloko o keia mau hana.
No Keia Kumu Paha.
__________
Ua ala mai nei na poe Kalepa Kuonoono mawaena o na Iapana a kakau i kekahi pala -- pala hoopiii e koi ana i ka Luna Dute Castle, e hoonohoia i kanaka Iapana kupono loa, ma kekahi wahi iloko o ka Oihana Dute, mai waena mai o kekahi Iapana i aponoia e ka lehulehu o na poe Kalepa Iapana, e noho ana ma Honolulu nei, no kona kupono a me kona ano makaukau ma ia Oihana. Ua waihoia aku ka palapala
hoopii, a o ka pane mai koe, a mahope paha loaa mai.
____________
NUHOU KUWAHO.
__________
Ma ke ku ana mai o ka mokuahi Miowera i ka Poalua nei March 10, ua loaa mai na mea hou o na aina e a hiki i Feberuari 28; a penei na mea hou nui i hoikeia mai.
NO CUBA.
Wasinetona Feb. 28: Ua hooholo ke Senate i keia la ma ke koho ana o 64 poe ae, ia 6 poe hoole i ka ike ana aku ina poe kipi o Cuba, a e loaa ia lakou ka noho kuokoa /// ana. He nui ka hauoli i ili iho maloko o ka Hale, a me na wahi makaikai o na poe i kipa aku e ike.
KE HOOMAU LA NO.
Ke hoomau ala no na Luna Mana Aupuni o Sepania ma Cuba i ka lakou hana, a ua hopuia kekahi poe hoolaha nupepa Amerika no ke kue ina rula a hele a komo pu iloko o na wahi noho o na poe kipi. A mamuli o na koi ana aku a ke Kanikela Amerika Williams ua hookua ia mai na poe nona keia mau inoa, o Charles Michelson a me L. Betancourt.
____________
NA MANAO MA LADANA.
______
UA PAA LOA O PERESIDENA CLEVELAND
MA KAHI HAIKI.
Ladana Feb. 29: O ka mea a ke Senate o Amerika i hana ai i nehinei, maluna o ka ninau o Cuba, ua hoala mai ia i na manao uluku iloko o na papa-pai o keia kulanakauhale.
He manao pepa ma ke Standard e olelo ana. Ua hookomo aku ke Senate ia Peresidena Cleveland ma kekahi kulana hoopilikia loa iaia. He mea ole paha ina poe lahui Sepania ke koi aku, ina na Amerika keia mau hana hooweli kaua e kokua ana ma ka aoao o Cuba.
Ua manaolana ia, e hana aku ana o Peresidena Cleveland me ka oluolu loa.
He manao pepa hoi kekahi ma ka nupepa Time, e olelo ana. O ka olelo hooholo, he mea hoopoino loa kela ia Sepania ma ka ike ana aku hoi, he hana hoaloha ole ia, a aole no hoi he kuleana no ia mea i hanaia.
Aole e loaa ana iaia he lanakila ke kukala kaua aku oia ia Amerika Huipuia, ka mea na ua i pakui mai la a lilo i hana, ka mea i manao ia aku he mea maikai wale no, eia nae, he hana ulolohi pupu loa ka ike ana ma na kumu hiki ke hoopaiia aku.
O ka olelo hooholo pakui, he hooia wale no ia i pakuiia i mea e ike ole ai i ka poe i olioli e hoohaili kaua me Sepania.
O na kumu i hoonohonohoia no ke kuakoa o Cuba, ua hoike mai ia i ke kulike ana me na haiolelo Kalai-aupuni a na Amerika i hoopilikia mau ai. Aole nae ia he mea e hiki ole ai e hooia mai i ke ano hana ma na kulana kiekie i hanaia i kekahi lahui kanaka koa a aloha no hoi.
Ma na mea a pau a ka Peresidena e hooholo ai e hooko, alaila, o keia olelo hooholo a me na huaolelo hoouluulu, iloko o ka wa e hoopaapaaia ana, e koi mai ina ia i na hooholo manao koikoi loa mai ia Sepania mai. O kona kulana, oia kekahi o na kulana anoninoni loa, e hiki ai iaia ke hoomalu i ka manaolike loa, ina no o na poe e apono ole ana i ka mooolelo o Cuba.
He hoike mai Maderida mai, e olelo ana, ua hoolaha ae na nupepa malaila, i kekahi mau mea a no e loa e pili ana no na lilo no ke kaua ma Cuba.
Ua kokoke ka he 118,000 na kanaka i hoounaia aku i kela mokupuni o Cuba, mai Sepania aku, a o na lilo no keia kaua kipi he $50,000,000.
Ua lohe ia mai ua hoololohe iho ia no no Honolulu nei kela haole ikaika o ka hui keaka lio, mamuli o kona ukali ana mahope o kona hoaloha Price, kela haole lele baluna i lele ai i Manana.
_________