Ke Aloha Aina, Volume II, Number 8, 22 February 1896 — Page 4
| This text was transcribed by: | Beatrice Lawelawe Santiago |
| This work is dedicated to: | PuakeaN |
KE ALOHA AINA
POAONO, FEBERUARI 22, 1896.
_______________________________
KE ALOHA AINA
Hoopukaia no ka
Pomaikai o ka Lehulehu, a he Nu-
pepa na ka Lahui Hawaii.
______
J. NAWAHI,
LUnahooponopono a Puuku
E. L. Like, Hope-puuku.
______
HONOLULU, FEB 22, 1896
______
Ua Oiaio no ka Mea i Hoikeia.
O ka mea a Ke Aloha Aina i olelo ai ma kona Helu 6, i hoakakaia malalo o ke Poomanao@ "Na Kumukanawai o Hawaii". Ua oiaio no ia, a ua pololei no hoi. Aole loa e hiki i ka noeau a me ke akamai o Joseph Mokuohai Poepoe, ke hoohiolo i ka oiaio o ia olelo ana.
A oiai, ke hooili mai nei o J. M. Poepoe i na olelo hooia maluna o Joseph Nawahi, e olelo ana, he kipi o Nawahi, a pela aku.
Ke hoole maoli nei o Nawahi, ma ka oiaio a me ka pololei maoli, aole loa oia he kipi i kona aina hanau, kona Lahui a me kona mau Moi, mai mua mai a hiki i keia la, a i ka manawa i koe o kona ola ana.
He aloha oia i kona aina i hanau ai, kahi i ewe mai ai kona mau kupuna, a me na Alii hanau o ka aina a me na kanaka o ka Lahui Hawaii ana i aloha nui ai.
Aole @ Hawaii, nona na kahua i hoonoho mua ia mai ka Po@mai. Aole hoi i hookikina aku i kona Lahui e kumakaia i ko lakou aina, a e pepehi maoli i ke ola ana o na kanaka Hawaii maluna o Hawaii nei. Aole loa!
______
Heaha la ia mea he kipi?
O ke kipi: -- Oia no ka hooikaika maoli ana o kekahi poe me na lakokaua, e kaua kue i ke Aupuni, a i ka Moi hoi, me ka makemake e hoopau i Kona Noho Aupuni ana.
A pehea, ua hana anei o J. Nawahi ia mea? Aole loa! Ua imihalaia o J. Nawahi no ka ohumu kipi ma ka la 14 o Augate a me Okatoba 4, 1894, e na wahi haole kiu epa Van Giesen a me MacEvoy, a hoopaaia oia ma kahi hoopaa o ke Aupuni i Decemaba 8, 1894, a hiki i Feberuari 28, 1895 a ua hookuuia ma ka bela, a ma ke Kau o Mei 1895 imua o ke jiure o ka aina, ua hookuuia mai oia me ka hewa ole,
-- Oia no ia e noho nei a hiki i keia la.
__________
Aka, pehea la o Joseph M. Poepoe? Heaha kana mea i hana ai? Heaha kona hopena?
Na Joseph Nawahi e hoike aku me ka wiwo ole imua o ka Lahui Hawaii i kona ano, kana mea i hana ai a me kona hopena maoli.
He kipi o J. M. Poepoe i ke Aupuni Moi, ike au o ka Moi Kalakaua e noho ana ma ka la 30 o Iulai A. D. 1889. Ua hopuia oia e ke Aupuni no ke kipi, a ua hookolokoloia no ka hewea kipi, a ua ae maoli o J. M. Poepoe he kipi oia imua o ka Aha Hookolokolo, a ua hoopaiia he $400. A ina aole e hookaaia ia uku hoopai, alaila, e hoopaahaoia oia ma ka hana oolea a kaa ia hoopai.
O ka uku hoopai no ke kipi, he make no ia; aka, mamuli o kona ae maoli ana i kona hewa a mamuli hoi o kona hoike maoli ana ae i kakahi mau hoike e kokua ai no ka hoomaloeloe ana i ka aoao o ke Aupuni, oia ka mea i hookahuliia ae ai o kona hoopai, ma @ kulana oluolu loa he uku dala. A ua noho hooikaika hana aku oia malalo o kekahi poe, no ka hookaa ana ia mau dala $400!
Aia ka moolelo no kana mau hana hooulu kipi i hana ai i ka 1889; kona hopuia ana, kona hookolokoloia ana, kona ae maoli ana ua hewa oia no ke kipi a me kona hoopaiia ana i na dala he eha-haneri, ke paa nei iloko o ka buke moolelo o ka Aha Hookolokolo o Honolulu nei, o ka A. D. 1889.
Pehea la e pee nei o J. M. Poepoe me kona hana i ka hewa kipi, alaila, e kuhikuhi mai oia o J. Nawahi ke kipi, ka mea aole loa he wahi moomai ana he kipi oia. Ua poina paha iaia kona moolelo, i ka wa ana e kakau ana i na manao pane mai ia J. Nawahi, ka Lunahoopuka o Ke Aloha Aina?
Mai manao kuhihewa oia, ua poina ia Nawahi na moolelo o na hana ano nui, i hoouluia e ke au o ka manawa. He Buke nui ia a J. Nawahi e heluhelu nei i na la a pau, iloko o kona mau hoomanae poina ole ana; mau hoomanae poina ole ana; a i ka wa e hoea mai ai o kekahi pane nona, ua hiki koke i kona hoomanao ana, ke hoike koke aku i ka mea a kela a me keia kanaka i hana ai, oiai oia e ola ana, me ka hikiwawe loa.
__________
NA MEA PILI OLE MAOLI.
He mea lalau loa ka J. M. Poepoe lawe ana mai i ka hoohiki ana o Liliuokalani malalo o ke Kumukanawai o ke Aupuni Repubalika o Hawaii nei.
Heaha ka pili o kona hoohiki ana ia Alapaki, a i ole ia, ia Nawahi hoi?
Aole ia he mea e hoole ai i ko Alapaki kipi, aole no hoi he mea e hooia mai ai he kipi o Nawahi ma ia mea, no ka mea aole i hoohiki aku o Nawahi i ke Kumukanawai o ke Aupuni a Alapaki ma i kukulu ai, a J. M. POeoe hoi i kokua ai, a e kokua nei.
E hiki no i na mea a pau loa ke hookomo mai i ka ninau ana, oia hoi. Ua like anei ko Liliuokalani noonoo lawe hooko ana i ka hoohiki ma ia Kumu@kanakanawai, me ko Alapaki a me ko Poepoe hoi?
Ua hana anei o Liliuokalani ia mea mamuli maoli o kona makemake alii ponoi iho?
Aole anei he mea paahao oia iloko o ka lima o ke Aupuni Repubalika ia wa ana @lawe ai i ka hoohiki?
Aole anei i onoonou ia oia, a i hoohikikina ia hoi, me ka hoo haiki maeliia e ka mana aupuni e kakau inoa aku a e hoohiki aku hoi malalo o ua Kumukanawai la? A oia kona mea i kakau aku ai i mea e hoopakele ia ai oia i na hoehaehaia?
A ina ua hana o Liliuokalani ia mea, i mea e loaa ai ka maha a me kona hooluolu ia mai, mai na hana hoopilikia mai a kona poe enemi, alaila, aole loa ona hewa, aka, ua ili aku no na hewa maluna o ka poe nana ia mau mau hana ino, i hana aku maluna o Liliuokalani, e like me ka ili ana o na poino maluna o na hoahanau o Iosepa, ka poe i hoino kumu ole ia Iosepa.
O ke kanaka i hoole maoli, aole ona makemake e hana malalo o kekahi palapala aelike hana a ke aupuni i hana ai, a e hele e noho nana aku ma kekahi mahiko aka, lalau ia oia, a hoopaahao ia i mea e ae mai ai, a ma ia hana ana, ua ae aku kona makemake ole maoli, a mahope, ua lawe na makamaka o kela kanaka i ka hoopii imua o ka Aha e hoopau i kona palapala aelike, a ua loaa na hoike e hoomaopopo ana no ia mea. Pehea, aole anei e ae ana ka Aha e lawe i ke noi e hoopau i kela aelike? Oia no. A heaha la ke kumu? No ka mea, aole kela i ae e hele e hana no kona manao maoli iho, aka, no kona hooweliweliia mai. A heaha la ka hopena? E lilo no kela palapala aelike i mea mana ole.
_________