Ke Aloha Aina, Volume I, Number 28, 30 Nowemapa 1895 — Page 6

KE ALOHA AINA

 

6 KE ALOHA AINA, POAONO, NOV. 30, 1895.

 

(Mai ka aoao 3 mai.)

Stevens iloko o ka Iolani hale ma ka manawa mamua ae o ka wehe hookuu Ahaolelo ana ia la.

            Aole oia i hiki mai ma ke Keena Ahaolelo o ke anaina hookuu Ahaoleo a ka Moiwahine e like me na rula mau o na luna Aupuni ma ko lakou wahi.

            Ua noho aku oia e kuka me na poe hookahuli aupuni, a ma ia mea, ua mapopopo kona kulana, e like me ka olelo a Gresham i hoopuka ia, "ua hui ohumu kipi pu ke Kuhina Stevens me na poe hookahuli aupuni."

            2. O keia John L. Stevens ke Kuhina Amerika, oia ka mua loa o na Luna Aupuni i kukala ae i kona ike ana aku i ke Aupuni Kuikawa, a lakou i kukulu pu ai me na poe hookahuli aupuni.

            Ua hiki pono ke oleloia pela, no ka mea, ua loaa na hooia e maopopo ai ia hana ana.

            3. O J.L. Stevens ke Kuhina nana i kukala ae i ke kuahaua noho o ke Aupuni Kuikawa malalo o Amerika ma ka la 1 o Feberuari 1893. Oiai, mamuli o na palapala i loaa, ma ke Keena Oihana Kakauolelo o ko na Aina E o ke Aupuni Amerika, ua hooia mai ia i na mea i hooholo mua ia e Stevens a me ka Aha Kuhina o Harisona e noho ana ia wa, no keia mau hana kaili aina i hoolala mua ia. Malaila no i loaa ai ka Stevens palapala ano oiaio ole loa, i kulike ole ai me na mea i hanaia ai maanei nei.

            4. Ua hoopauia mai oia e kona Aupuni ponoi. No ke aha la? No ka mea, ua  huipu oia me ka poe kipi, e ohumu e hookahuli i ke Aupuni o ka Moiwahine Liliuokalani, ka mea kupono ole i kekahi Luna Aupuini o kekahi aupuni e noho hoa'loha ana ma na Kuikahi, e hana ai.

            5. A no ia mea, a mamuli o na hana e hoahewa ana ia Stevens iho, ua hiki ole iaia ke ola hou aku e kue i ka hoahewa mau ana a kona lunaikehala. I ko makou hoiliili ana ae i keia mau mea, ua ike makou i ke kupaianaha o ka ke Akua hana i hoikeia ma na mea a ke kanaka i hana ai.

            O ka Stevens mau hana a pau ma Hawaii nei, kona noho ana, kana hana ana, a hiki i kona haalele ana mai ia Hawaii nei, aole anei ia i kakauia ma ka buke hoomanao o na naau o na poe Hawaii? Oia no, ua paa loa ia mea, a ua kaulana oia he kanaka Kahunapule Kuhina, @ make mainoino loa me kekahi o kona ohana, he uku no kana mau hanaino i hana mai ai i ka Lahui Hawaii.

            Heaha lealea ka na kaikamahine ula o Kawaiahao i ka po nei.

 

Ka La 28 o Novemaba nei.

            O ka la 28 o Novemaba, he la kulaia ia no ke Aupuni Moi o Hawaii nei, i hooholo like ia e na Aupuni o Farani a me Enelani. He la hauoli ia a hoomanao no ka hoihoi hou ia ana mai o ke Kuokoa o Hawaii nei i lilo aku ia Haku George Paulett ma ka A.D. 1843, he 52 makahiki mai ia wa mai a hiki i keia la.

            Ua kuahaua ae nei ke Aupuni Repubalika i keia la, i la haipule hoomaikai i ke Akua, no na pono a me na pomaikai a pau i loaa mai i keia aupuni iloko o ka makahiki i hala iho la.

            Aole keia e malama ia ana, ma ke ano i malama ia e ke Aupuni Moi iloko o na makahiki he aneane kanalima ana i ku ai. Aole loa!

            Ua hoopili aku nei ka Repubalika liilii o Hawaii a hoohalike me ka Repubalika o Amerika Huipuia, e like me ka hoopili like ana aku i ka la 4 o Iulai, i la e kukulu like ai i na Repubalika a elua.

            Aole he mea e nalowale ai i ka poe aloha aina oiaio, na hoomanao ana ae no na hana o keia la mamua, aka, i keia wa ua loli ae na hana no ke au o na manawa a pau, e like me ko ke Akua ike e hana nei, a e hooponopono nei ma ka honua a pau loa.

            Nolaila, i keia au, aole keia he la kulaia e like me mamua, ua kapae ae lakou ia mea no ka mea, he pili keia la i ka hoomanao, no ko na Mana Nui ae akea ana mai, e Kuokoa mau o Hawaii!

           

            Ma ka puka ana mai o ka la i ka Poaha nei, ua hoike mai la hoi oia i kona nani, a pahola ae la i kona mau kukuna wela ma o a maanei o ka aina, e hoike mai ana i ka Lahui Oiwi. Ua hiki no i na mea a pau loa o na poe Hawaii ponoi, na mamo a na poe i ike pono maoli i na la o ka popilikia iloko o ka 1843, a i hoopomaikaiia mai mamuli o ko ke Akua alo ha ia lakou ia wa. He mea oiaio, ua piha ko na kupuna o kakou uhane i ke aloha i ke Akua, a ua noho hoohaahaa lakou me na Alii o ka aina ia wa. Ua hoopomaikaiia mai ka lakou mau hana imua o ke Akua, no ka mea, ua ae ka Akua i ka lakou pule a ua hoihoi hou ia mai ke Kuokoa.

            O ka makou i manao ai, ua hiki no ia kakou, ke hoololi ae i ko kakou hana ma keia la, aole ma ka mea i maa mai mua mai, mai na la o ka noho Aupuni Moi ana, aka, e hana ma ka mahele o ka nonoi aku i ko ke Akua aloha e kiai a e, malama mai ia kakou mai na poino mai he nui e upuia ana e hana mai maluna o kakou. A e hoomaikai aku i ke Akua no kona hoopakele ana mai ia kakou i na poino a me na ma'i, iloko o na la i hala aku nei.

            E noho kakou, a e hele kakou i keia la me ka manao maloko no na mea i hoikeia maluna ae nei, a e nonoi aku i ko ke Akua aloha no keia Lahui.

 

            NO NA PIO KALAIAINA.

            Ma ka Poaha nei i hookuuia mai ai kekahi poe pio kalaiaina, he oia mau no ko lakou ulumahiehie, ma ka makou nana aku, a eia na inoa o ka poe i hookuu ia ia la. W.H. Rickard, T.B. Walker, R. Palau, Kauai, Aberahama, T. Poole a me Damiana.

 

KA PAANI KINIPOPO PEKUPEKU.

            Ma ka hora 3:30 o ka auwina la Poaha i malamaia ai he paani kinipopo pekupeku wawae ma ke kahua kinipopo o Makiki, a ua hiki ae ka bana aupuni malaila no ka hoonanea ana i na makaikai. Ua lilo ka eo o ka pekupeku kinipopo i ke Deiender, ua loaa ia kekahi o na poe paani me na palapu iloko o ka hakoko ana o na aoao a elua no ka lanakila.

 

Auhau Aupuni.

            Ma na nupepa namu o ka aoao e kakoo nei i ke Aupuni Repubalika, e ike mau ia iho ai na manao o ua poe anela nei e paa nei i ke Aupuni; malalo o ka mana elaupu, e hoomahuahua ae i ka auhau Aupuni, i wahi e loaa ai he mau dala hou iloko o ka Waihona Aupuni, no ka uku ana i na hoolilo o ke Aupuni.

            Ua hookahaha loa ia mai makou no keia manao ana o keia poe e hookau hou mai i keia mau hana hookaumaha na ka Lahui Hawaii e auamo, oiai nae, ua heluia ka waiwai o ke kanaka ilihune a oi loa aku mamua o ka waiwai e waiho ana, aka, o ka waiwai nae o ka poe waiwai loa, aole i pau pono i ka heluia.

            Ua hoike ae hoi o P.C. Jones, (kekahi o na koo ikaika o ua Aupuni nei,) aia ke waiho nei he $30,000,000 o ua poe waiwai nei, aole i heluia e ke Aupuni:

            Ma ko makou manao ana, he mea pono no i ke Aupuni e ku nei e noii aku a pau pono keia huina maluna ae, a e loaa ana he $300,000, a pela auanei e paleia ae ai keia manao hookaumaha o keia poe e manao nei na ka lahui e auamo i na koikoi o ka lakou mau hana aihue aina.

            Ua olelo ae kekahi o keia poe waiwai, ua ae oia e hoomahuahua ia ae kona auhau no ekolu a eha paha makahiki, i wahi e loaa  ai he palekana i ke Aupuni elaupu e ku nei i keia manawa. Ua pono no na oukou no e uku, no ka mea, ua nui ka oukou dala, a ua lako no hoi oukou i na mea a pau. O ko oukou manao ana, na ka lahui e auamo aku i na koikoi o ka auhau hookuanui, he mea kupono ole ia e kau ia mai maluna o ka Lahui Hawaii, a o na hanaino, na hana hoopilikia a me na hana hookaumaha wale e manao ia ana e hookau aku maluna o ka lahui, oia ka makou e hoike mau aku ai me ka wiwo ole i na manawa a pau.

            Eia kekahi poe i kokua i keia aupuni ke mihi nei iloko o keia mau la, mamuli o ka pilikia loa o ka lakou mau oihana kalepa. a o kekahi poe hoi, ua hoonele ia aku i ka hana ole. Wahi a kekahi o lakou, he mau haneri o makou i puni i keia poe mikanele, a ke mihi nei makou i keia manawa no ko makou kokua ana i keia poe, o lakou ala ke huki i na a-la i kela a me keia malama, a o makou hoi o ka poe i luhi ke hoonele ia mai.

            Ke mihi nei o ka ulu iki ma, no ka lakou mau hana i hana ai ua hala nae ka wa kupono.

            He hopena kupono keia i kau mai maluna o kela a me keia mea i kokua i na hana aihue aina. Pela auanei e ike ai ka poe pakaha i ka hopena a me ka hoopai kupono e kau ia maluna o lakou a pau e ka Mea Mana Loa, no ka hewa a lakou i hana ai maluna o ka lahui puuwai hamama. O ke Akua ka mea i ike i ka mea kupono e kau mai ai maluna o kela a me keia kanaka.

 

            I ka auina la Poaha i haalele mai ai Coptic i keia awa no Kina a me Iapana.

            Ma ke ahiahi Poakolu i kapalulu ma ka mokuahi Coptic mai Kapalakiko mai.

 

HE OLELO HOALOHALOHA.

 

He-u, he aloha Walohia no Poomaiaelani.

 

"I aloha ia mai oe,

E na Lehua o Haili,

Ilihia i ka waimaka,

Hakuko'i i ka Lihilihi,

I aloha ia mai oe,

E ka makani Puulena,

Aia la o Puna,

Ua po i ke oanona."

 

            I ke Alii ka Moiwahine Kanemake Kapiolani a me au lei i aloha nui ia.

            O makou iho no me ka haahaa na makainana o Hilo Taona Hawaii, ma o ko makou Komite la.

            A no ka mea, ma Honolulu Oahu i haalele mai ai i keia noho ana o kou Pokii Alii i aloha nui ia, a hele aku la i ka huakai moe i ka moe kau moe hooilo.

            Aloha wale, aloha o Niolopa i ka lai, kahi au e luakaha ai, me ou mau kaikuaana Moi, a me ou mau hoaloha, na kini o Kauokanilehua o Hanakahi.

            Aloha wale ka wai o Wailuku e nei halulu ana iluna o Pukea, akea ka aloha a ka manao e u nei.

            Aloha Mokuoiai i ke ehu o ke kai, kahi au e luakaha ai me ou mau kaikuaana Moi, eia makou la, mai ke nui a ke liilii ke noho nei me ke kaumaha ia oe e Poomaikelani, ke Kiaaina i i noho aloha ia e makou na Makaainana o Hilo o ka Uakanilehua, a ma keike waiho aku nei makou imua ou, e ka Moiwahine Kanemake Kapiolani, a me au mau lei i aloha nui ia, e komo pu kakou iloko o ke apo aloha paumako, oiai, ua nalo, ua hala kou Pokii i aloha nui ia.

 

HE KANIKAU I ALOHA NUIIA.

 

Kanikau ia e aloha,

Nou hoi e Poomaikelani,

Eia aku nei paha oe,

Me hiku i ka wao,

Ke noho nei makou,

Me ke aloha paumoku,

I kou hala ana aku,

Auwe, aloha ino-e.

 

            A na ke Akua no e kokua mai ia kakou iloko o keia kaumaha nui. Na ka Hui Hooulu Lahui o Hilo, Hawaii, ma ko lakou Komite la.

            Me ka haahaa,

            MRS. HARRIET HAPAI.

            MRS. KALAONA KALAMA.

            MRS. MARY BROWN.

 

            Ke hoi hou mai nei ka pamalo i ke kulanakauhale nei, a ke hoomau nei no hoi o Kanepuniu i ka wela a ka la.

            Ua haawi ae ka nupepa Hoku i na keiki liilii kalewa nupepa, oia nupepa he paina hoohauoli ia lakou, ma ke awakea o ka Poaha nei, he aneane kanalima ka nui o na keiki.

            Ma ka Poalua nei, ua loaa iho la kekahi haole sela i ka mai huki, o ka mokupea Coloma, iaia e hana ana maluna o kekahi i-a o ka moku, ua kahea mai oia e kokua i kona wa i loaa ai i ka mai aka, mamua ae o ka hoea ana aku o na lima kokua, ua haule aku la oia a pa aku la kona poo iluna o kekahi waapa e lana ana ma ka aoao o ka moku, ua maihi pu ia kona ihu, a ua lepe kekahi o kona mau lehelehe, ua hiki ae ke kauka o ka Beninetona malaila, mahope o ka humuhumu ia ana o kona mau wahi i poino, ua lawe ia aku la oia no ka Haukipila.

 

            KUAI KUDALA A KA ONA HALE.

 

            Ma keia ke hoolahaia aku nei ma ke akea ua hoopaa a hoomalu ka mea nona ka inoa malalo iho nei i na ukana a me na waiwai i haiia malalo iho nei, oia na waiwai o Damiana, no ka uku hoolimalima i aieia e Damiana i oleloia ia Kuakea i haiia malalo a i hak@ loa ka manawa e hookaa ai i hiki i ka huuna o iwakaluakumamaha dala ($24), he uku hoolimalima no kekahi wahi ma Alanui Moiwahine e kokoke ana me Alanui Alakea ma Honolulu. Oia hoi keia; he 6 noho liilii, 2 noho paipai, 1 pakaukau poepoe, 1 pahuume, 1 pahu me ku waiho lole, 2 moe, 3 bela, 5 uluna, 1 pahukoa, 2 pahulole liilii, 8 kii kau hale liilii. Ke hoolaha hou ia aku nei, e Kaa Kudala Akeaia aku ana ua ukana me na waiwai i haiia ae la i mea e kaa ai ka uku hoolimalima i aieia a hala loa ka manawa e hookuai i haiia a e nei ma ka Halekuai Kudala o W.S. Luce e W.S. Luce, Lunakudala, ma ka POAONO, LA 14 o DEKEMABA 1895, ma ka hora umi (10) o ke kakahiaka o ia la.

            KUAKEA.

            Ma o kona Loio W.L. WILCOX.

            Nov28-13tsdly 2tswkly.

 

SAMUEL M. KAAUKAI.

LOIO ME ANA AINA!!

            He Loio, a he Ana Aina, a he Agena He oiaio Palapala no ka Apana o Kona, Mokupuni o Oahu.

            He oluolu ka uku ma ke kuka ana, a he hooko kauoha me ka eleu.

            Keena Hana. Aia ma ke Keena mahope o ka Hale Pohaku ma e kihi o na alanui Nuuanu a me Moiwahine.

            my26-9mkdly, wk1@