Ke Aloha Aina, Volume I, Number 18, 21 Kepakemapa 1895 — Page 1
| This text was transcribed by: | Gloria Vlachos |
| This work is dedicated to: | Na Lei Hulu I Ka Wekiu |
KE ALOHA AINA
UA MAU KE AE O KA AINA I KA PONO
HONOLULU, POONO, SEPATEMABA 21, 1895 HELU 18
-----
@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@
Ma ka hora 8 a.m. o ka la Sabati nei, Sept. 15, ua lawe ia aku o John Kuaana a me kekahi poe kalaiwa kaa o ka IXL, e ninauia no ka mea e pili ana i ka palapala maluna'e a ma ka hora 11 a.m., ua hookuuia mai ka nui, a koe aku o Kuaana a ma ka hora 2 p.m. oia i hookuuia mai ai, no ka mea, aohe he mea i loaa aku ia lakou.
-----
He mea pono e huli ponoia keia mea, no ka mea, ua pili ia i ke ola o ka lahui, a i ka hana hoi a k Papa Ola e hana ai.
Ina no he mea oiaio ole keia, e huliia e pono ai, i akaka ka wahehee a me ke kolohe maoli o ka mea i hoolahaia; e like me ka hana ana o Enelani, ma ka imi ana i na mea i hoolaha ia e kekahi nupepa e pili ana no na hana pono ole maluna o na kaikamahine opiopio o ko lakou lahui.
He hana Karaima keikie keia a ka mea nana kela palapala i hoolaha ai, a he hana Karaima pepehi kanaka hoi ia, ke loaa he mea e hiki ai ke hooiaio ia imua o ke ao holookoa, ua hana io ia pela.
-----
E Holo hou ana o Calaudine
-----
Ma ka hora 5 p.m. o ka Poaha nei, Sept. 19, i holo hou ai ka mokuahi Calaudine no Kahuylui a me Hila. Me ka lawe pu no i na ukana, malalo o na kauoha a ka Papa Ola, ke ole e kue ia mai e na wahi e hoopae aku ai, e ka poe (1) o Lahaina, (2) Maalea, (3) Makena, (4) Mahukona, (5) Laupahoehoe, (6) Hakalau, (7) Honomu, (8) Pepeekeo, (9) Onomea a me Papaikou.
E makaala, e kakau e i na leta i ole e haule, a ike ole ko oukou mau makamaka ma na mokupuni e aku, i ke ano a me kulana o kakou noho ana.
-----
He hookahi wale no o na pio kalaiaina i huli hoi mai nei ma ka mokuahi Caludine, oia o Henry Mahoe, kekahi o na keiki Puhiohe o ka Bana Lahui. O kakahi poe o lakou aia no I Hilo.
-----
Ma ka po Poaono nei, oiai kekahi kanaka e holo mai ana mai ke alanui Kukui, ua komo hele aku la oia iloko o na halekuai Pake, a olelo aku e pani na puka, oiai ka, wahi ana, eia ae na Kepani me na pu e iho mai ana e pepehi i na Pake, a oia ka wa i paa ai na puka i ke pani, a mahope iho ua ikeia he mau hana hoopunipuni. O Kahoano ka inoa o keia kanaka, a ua paa oia i keia wa.
Na Wahi Haawi Ai o ka Hui Kokua Hawaii.
-----
Maheleia ke Kulanakauhale Iloko o na Apana he 21.
-----
Ma ka halawai ana o ka Hui Hawaii Kokua Aloha; ua hooholo lakou a ua koho pono aku i na poe nona na inoa malalo iho nei, i mau luna nana e haawi aku i na kokua i na ohana pilikia maloko o na apana i hoakaka ia malalo iho nei penei.
Apana 1. - Mrs. Leihulu M. Keohokalole, wahi haawi ai. aia ma kahi hoolulu kaa ahi.
Apana 2. - Mrs. E. Aima Nawalii, wahi haawi ai, aia ma kona wahi noho ma Maunakamala ma Kapalama.
Apana 3. - Joseph A. Victor, wahi haawi ai, aia ma kahi noho o Mrs. Nakuina ma Alanui Liliha.
Apana 3 1/2, 4, 5, 6, 7 a me 7 1/2. - Aia kahi e kii ai o ka lakou ai ma ke Keena Poo Oihana, ma ke Alanui Betela, mauka iho o ka halekuai o Kakela ma Kuke.
Apana 8. - Mr. Kamiki wahi haawi ai, ma kahi nono o Keohokii ma Kakaako.
Apana 9. - Mr. Mahelona, wahi haawi ai aia ma kahi kiki pu raifela.
Apana 10. - Mrs. S. Douglass, wahi haawi ai, aia ma kahi o Bower.
Apana 10 1/2. - Harieta Hairama, wahi haawi ai, aia ma ka Halekula ma Komoiliili.
Apana 11. - William Auld, wahi haawi ai, ma kona wahi ma Waialae.
Apana 12. - Lunakanawai Perry, wahi haawi ai, ma Palolo iho no.
Apana 13 me 14. - Mrs. Makanoe, wahi haawi ai, ma ka Pahooulu mea kanu o ke Aupuni ma uka o ke Alanui Moi.
Apana 15. - Charles Booth, wahi haawi ai, ma kona wahinoho ma Pauoa.
Apana 16. - Mr. Kahahawai, wahi haawi ai, aia ma ka Halehalawai make Alanui Wale.
Apana 16 1/2. - Mrs. Maraea Kahea, wahi haawi ai, ma kahi hoolulu kaa hapaumi ma ka Alanui Nuuanu.
Apana 17. - Mrs. T. Meekapu, wahi haawi ai, aia ma kona wahi noho ma Alanui Kula.
Apana 18. - Mr. M. Nakuina, wahi haawi ai, aia ma kekahi @@ai hale ma ke kihi o na Alanui Beckley a ma Kaili.
Apana 19. - William Mutch, wahi haawi ai ma Moanalua.
Apana 20. - Mrs. C. Clark, wahi haawi ai, ma ka papai hale o ke Oihana Wai, ma kela aoao mai o kahi o Hobron.
Apana 21. - Keena Poo Oihana, Alanui Betela.
Ua hooholo hou ia no hoi, e haawi mau ia no na lako ai a pela aku ma na la noa a pau koe ka la Sabati.
Nolaila, ke konoia ma nei na poe @@hune a pau loa i loaa na tikiki, e kii i na haawina kokua aloha, i na manawa i hoike ia mai ia oukou, e na poe luna i hoonohoia ma na apana a pau malalo o na kauoha ana a ka Hui Hawaii Kokua Aloha.
E hoomauia pela, a hiki i ka wa e hoololi ia ai, a hoopuka kou ia mai na kauoha, alaila, e hoolaha hou ia aku no ma keia mua aku.
-----
Na Palapala
Aole e ili maluna o makou ke koikoi o na ahewa ana no keia mau manao i hoopukaia malalo o keia poo, aka, e ili no ia maluna o na poie na lakou i kakau mai.
MOLOKAI NUI A HINA KUE IA MAUI O KAMALALAWALU.
-----
Ma ka Poaono Sept. 7 aku nei, ua holo aku la he elua mau waapa lawe ia mai Molokai aku no Lahaina, (hookahi no Waialua, a hookahi no Kamalo). Ia laua i hiki aku ai no Lahaina, ua hoole mai la lakou aole e hiki i keia mau waapa mai Molokai aku ke pae iuka o Lahaina nolaila, ua lilo iho la laua he mau mouo e lana ana i ka moana. Ua nonoi aku ka poe o na waapa i ai, a he palaoa ka ai i loaa mai, pela lakou i noho ai a hiki i ko lakou hoi hou ana Molokai.
Eia ka mea kupaianaha loa, o na poe haole o luna o ka moku manua Amerika e ku ana i Lahaina ia wa, ua ae ia lakou e lele iuka o Lahaina, a ua ike aku keia poe o Molokai i ko lakou la holoholo mai iluna o ka uapo a ma na alanui hoi o Lahaina. Olelo keia poe Molokai: Kupaianaha maoli! O keia moku mai Honolulu mai kahi o ka mai kolera, ua ae ia aku kona poe haole e lele iuka; a o makou hoi mai Molokai mai, kahi aole he mai korela, aole nae he ae ia mai e lele aku iuka o ka aina! Heaha la hoi, ua hana mai la oukou ia makou i ka mea hoohoka, e ike ana oukou i ka pule -o-o a ka Molokai! Na ka nalu ka i ka pohuehue, a pau loa ka ulu o Lele i ka helelei!!!!
M.N. Hina,
Molokai, Sept. 12, 1895
-----
Ke ano akakuu mai nei hoi ka pahola ana o ka ma'i Kolera.
-----
He elima pule mahope o ka mai kolera hope e hemo ai na Kula Aupuni.
-----
Ua mahuka aku he eiwa mau keiki o ke kula o Keoneula, ma ka hora 6 p.m. o Poakahi nei, a ua loaa aku lakou ma uka o Kalihi ma ka po nei no, i ko lakou wa i ninauia ai i ke kumu o ko lakou holo mahuka ana ua hai mai lakou no ko lakou ae oleia e ike i ko lakou mau makua.
-----
HOOLAHA! HOOLAHA!!
-----
E ike auanei na kanaka a pau, ma keia, ua makaukau ka mea nona ka inoa malalo iho nei no ka huki ana i na hale, a i ole, kuai hale hoi ma ke kumukuai makepopo. Lawe i na pohaku no ka hoopihamoku, a kukulu hale lawe one (eleele a keokeo) no ka halii alanui ana, kawili puna hale, lawe i na lepo kipulu mea kanu, a hoopiha aina paha. O ke kumukuai, he oluolu a haahaa loa. E loaa no au ma Kapalama ae nei, a i ole, ma ko'u keena hana ma ke alanui Pauahi, mawaena o na alanui Kamika me Nuuanu, ma kahi keena o ka hale o C. B. Maile. E hooko ia no na kauoha me ka eleu.
H. K. ALAPAI
my 23 - @ ms.
-----
HOOLAHA KUAI AINA.
-----
Ua makaukau ka mea nona ka inoa malalo iho nei e kuai aku he o mau apana aina ku pono no ka Pa-hale, ma kela wahi kokoke, makai o Kaluaopalena, ma Kalihi, mahope iho o ka luakini e pili la me ko Kamepela wahi.
O ke ano o na pa, he 85 kapuai pili ma ke alanui, a he 131 kapuai ka hohonu aku iloko. E ikeia no ke kii o na aina ma ko'u keena Loio ma ke kihi o na alanui Moi me Betela.
J. L. KAULUKOU.
-----
Hui Hawaii o na Mea Hoonani.
----- O @ O -----
E kuai ma ana au, a e hoolilo aku ana hoi na mea hoonani Hawaii o na ano a pau loa. A pela no hoi, e hoopukaia ana na Kauoha uo na peahi, na papale, na moena a me na hinai.
Aia keia wahi ma ke Alanui Moi, ma ka aoao mauka mai o ka Halekuai Ka REPURALIKA.
Harry Saylor
Lunahoohana.
Honolulu, Aug. 5, 1895. 3 ms.
-----
Hulupiha Maikai no ke Kapa Apana.
-----
UA MAKAUKAU ka mea nona ka inoa malalo iho nei e hoolawa aku i na hulu hipa maikai loa no ka hana anai na kapa apana no na home o na mea a pau loa ma Hawaii nei.
He oluolu ke kumukuai, he ao keneta o ka paona hulu hookahi. E hoouna mai i ka oukou mau kauoha ia'u ma Waimea, Hawaii, a i ole ia e waiho ae paha i ke kauoha ma ke Keena o KE ALOHA AINA ma Honolulu, ae hookoia no ka hikiwawe loa.
Owau no, H. AKONA.
Waimea Hawaii, Augate 26, 1895. 3@