Ke Aloha Aina, Volume I, Number 6, 29 June 1895 — Page 8

KE ALOHA AINA, POAONO, IUNE 29, 1895.

 

NUHOU KUWAHO

------

            Ma ke ku ana mai nei o ka moku ahi Australia ma ka auina la Poalima nei Iune 21, mai Kapalakiko mai, ua loaa mai na mea hou e pili ana no Amerika a me Europa penei:

KO AMERIKA

-----

KA MEA I KOHOIA I PANI NO GRESHAM.

            Wasinetona, Iune 7: - I keia la, ua hookohu aku la o Kalivilana ia Loio Kuhina Richard Olney, i Kakauolelo o na Mokuaina o Amerika Huipuia, (Kuhina Nui) ma ko Gresham wahi i make.

            O ka hookohuia ana o Olney ma keia kulana, ua apono lokahiia mai ia e ka poe kalaiaina o ka aoao Demokarata, ma Wasinetona i keia po.

            O ke koho ia ana hoi o Lunakanawai Judson Harmon i Loio Kuhina, ua hoopuiwa nui loa ia ka lehulehu nona.

            Ua kokoke no i ka hora 5 p.m. o keia la (7 o Iune) ka lohe ia ana o keia mau hookohu. O ko Olney hoopiiia ana ae iluna i ke kulana Kuhina Nui, he mea no ia i hoopuiwa ole ai i ka manao o ka lehulehu, aka, aia ka nui loa o na manao haohao, ma ko Harmon hookohu ia ana. He nui na leo ninau e olelo ana, owai o Harmon? Aole he poe i ike nona, aole no hoi i hoomaopopo nui no keia ano kanaka. He nui na poe o ke kulanakauhale o Cincinati m Ohio i ake loa e ike i na mea no keia kanaka i kohoia ai i Loio Kuhina. Eia ka mea i ikeia, he Demokarata oia o ke ano hoopeepee. He Repubalika oia mamua i ka wa e kaua ana o Amerika; aka, iloko mai o ka 1872, ua lele aku la oia a kokua i ka holo balota ana o ka moho Demokarata Greely, e hahai pu ana me Murat Halstead kekahi mea i lele pu aku me ia, a mahope hoi hou aku la i ka aoao Repubalika.

            NA LONO MAI CINCINNATI MAI.

            Ohio, Iune 7, - I ka wa i loaa mai ai ka lohe no ko Lunakanwai Judson Harmon kohoia ana i keia auina la, ua nui na poe loio mai ka Aha mai, a mai ke Keena OIhana mai, i awiwi ae i ke Keena Oihana o Harmon, Golstone, Goldsmith a me Headley, e hoomaikai aku i ka Loio Kuhina hou a nonoi aku la no lakou na hoa loio e paina aloha pu ai.

            Aole wale no o Judson Harmon i ikeia ma ke ano he loio kahiko, a luna kanawai hoi no kona Mokuaina iho, aka, oia no kekahi o na kamaaina ohoiaia o ka mokuaaina o Ohio.

            Ua hanauia oia he 49 mau maka hiki mamua aku nei, ma kahi kokoke loa i keia kulanakauhale; a oia no kona wahi noho mau a me kona home.

            O kona makuakane, oia no o Rev. B.F. Harmon, ke Kahunapule Bapetiso i ike nui ia e ke Awawa o Ohio.

            Ua puka mai o Harmon mai ke Kula Nui mai o Denison, he Kula Babetiso ma Granville ma Ohio iloko o ka 1866, a hoomaka ka lawelawe loio ana ma Cincinnati iloko o 1872. He Repubalika oia a hiki i ka 1872 kona wa i huli ai no Greely, a lilo oia i Demokarata, kohoia oia i Lunakanawai Apana ma ko Tilden tikiki iloko o 1876.

            Iloko o ka 1878, ua kohoia oia i Lunakanawai Nui, koho hou ia i ka 1883; a i ka wa o Kiaaina George Hoadley i hele ai i Nu Ioka i ka 1888, ia wa haalele o Lunakanawai Harmon i ka noho hoa ana no ka Aha Kiekie, a lilo i poo no ka hui, Harmon Colstove, Golksmith, a me Hoakley, e malama ana ina alanui hao he nui wale, me na hui lawelawe e ae he nui wale, a ma ia hui oia i hoomau ai i kona noho lawelawe oihana ana.

            O Mrs. Harmon hoi (kana wahine mare) he wahine maiau oia, he kaikamahine ia a Dr. Scobey o Hamilton. He ekolu a laua mau kaikamahine, oia oia o Mrs. Edman Wright Jr., o Piledelepia, o Miss Elizabeth, a me Margerie ka pokii loa nona na makahiki he 14.

 

KO ENELANI.

-----

            Iloko o ka Hale Ahaolelo o na Makaainana, ua ku mai la o Mr. Hogan, a ninau mai la i ke Kuhina o ko na Aina E, ina paha he kulana hana ka ke aupuni i lawelawe aku ai e pili ana i na poe kupa Beritania e hoopaahaoia nei e ke Aupuni Repubalika ma Honolulu?

            Ua pane mai la o Haku George Gray. Aia na mea a pau loa, ua waihoia aku iloko o na lima o ke Keena Oihana Kanawai o ke Karaunu, na lakou e hooko aku i na hana a pau loa e pili ana ia mea.

 

NA OLELO O KE SACREMENTO "BEE."

-----

            Ua hoike ae o George Dole (ka hoahanu ponoi o Peresidena Dole o ka Repubalika o Hawaii) e noho la ma Los. Angles, ua hoomaopopo oia no Kakina he Hawaii oia, me ka manao aloha pili paa no ka aina makuahine; a me kona aupuni, a ina he manao kona e hoihoi ia Kaiulani ma ke Karaunu o Hawaii, alaila, he alakai hou no ka aoao aloha aina, a e pono e kipu ia oia.

            Ua olelo iho ka Lunahoopuka o ka "Bee." "Ina pela iho la kona ano maoli, mamuli o ka hooko pono ana i ka pololei i hana ia mai ai i ka Lahui Hawaii, no na ano a pau loa. he mea pono oia ke kipuia.

 

UA HOOHUIIA MA KA MARE.

-----

            Ma ka hora 7:30 p.m. o ka Poaha nei, Iune 20, ua hoohui ia ae la ma ka berita maemae o ka mare e Bihopa Willis, maloko o ka luakini o St. Andrews, o Thomas Ayers o ka Malu Ulu o Lele a me Zoe Haimoeipo o keia kulanakauhale, kekahi o na opio i maalo mau i ke alo o Kaleleonalani i hala aku. Ua nui ke anaina i hiki aku e ike i ko laua mare ana. I ka pau ana o ka mare, ua haawiia ka ike ana aku o na ohana a me na makamaka ma kahi o Miss Lucy Peabody; mahope iho o ka ike ana, ua haawiia mai na mea ai mama, ka haukarima a pela aku.

            O ka KE ALOHA AINA e kalokalo ae nei. E loaa i na mea i mareia ka nohona oluolu a me ka pomaikai, a e hooulu hoi i ka lahui Hawaii i mau ai ke aloha i ka aina hanau.

-----

            Ua hoihoi ia i ka Haukipila o Willie Greig, kekahi pio kalaiaina e paa nei ma Kawa, no ka mai la garipa. Ua lohe ia mai aia ke pii mahuahua ae la ka oluolu ma kona kino, aole hoi e like me mamua.

 

Na Palapala.

            Aole e ili maluna o makou ke koikoi o na ahewa ana no keia mau manao i hoopukaia mallo o keia poo, aka, e ili no ia maluna o na poe na lakou i kakau mai.

------

KA AHAHUI EUANELIO O KO HAWAII PAEAINA.

-----

            E MR. LUNAHOOPONOPONO, Aloha oe: -

            Ke haawi aku nei au i ko'u mahalo me ka hoomaikai nui, i ke ola hou ana o kekahi nupepa ma kela inoa KE ALOHA AINA. A o ka inoa no hoi ia o ka'u kamalei hope nona na malama ewalu i keia wa o Letera Kealohaaina.

            Ma kou helu 4, ua ike au i kekahi ninau maloko o keia poo maluna, a oia keia; "heaha keia hana a ka Ahahui Euanelio o Hawaii?" Ua pili keia ninau no kekahi o ka lakou mau kumu hana i hooholo ai ma keia kau iho la iloko o keia mlama, ma ko lakou halawai makahiki, ma kahi o ka poe mare i hookaawale ia aku i Molokai no ka ma i.

            E Mr. Lunahooponopono, aole he mea haohao ia'u ko kela Ahahui a me kona mau lala mau ano hana, ua kamaaina au ia Aha, a me na Aha Apana o na Mokupuni. A ke manaoio nei no au, ooe no kekahi e Mr. Lunahooponopono, i hoomaopopo no ia mea, a oia iho keia:

            Ua hala ka wa o ka hoopono, a me ka hoopololei ia o na Luna Euanelio, malalo o ka ke Akua mau kuhikuhi, oiai ka wa o na mkua mikanele e ola ana, a e lawelawe pu ana me na kanaka Hawaii i ka Oihana Laa. I ko lakou wa i pau ai i ka moe, koe mai na keiki a lakou, ka poe aole he like me na mkua na hana. A o ka hapanui o na kanaka Hawaii maoli i komo pu iloko o na hana hai Euanelio, ua kau-o ia lakou e na keiki a ka Mikanele, a lilo i poe kokua wale mahope o na manao pololei ole, a kua Akua hoi.

            A oia kela au e ike aku la e hanaia mai la i ke akea, ua pau ka hoopono, ka hoopololei, ka makee oiaio, a ua nele i ka uhane maikai ole, ua piha i ka Mamene, ke Akua nui o ke ao nei. Pela i hele hewa loa ai na hana e ikea aku nei. Ua ike oe, a me ka lahui, i ka hiolo nui ana o na Kahunapule kanaka maoli mamuli o ka Mamene, a kapa aku lakou i ka hewa nui pokeokeo o Ianuari 17, 1893, he hana pono loa ia, a he maemae, a hoohiki nui iho la, pau pele, pau mano. Auwe i ka poe kapa aku i ka hewa he pono, a i ka pono hoi he hewa. Aloha nui.

HILO BAY.

            [Ua oleloia, ua hookomoia ae nei, iloko o ka Ahaolelo Repubalika, na bila kanawai a ka Ahahui Euanelio i hana ai no ka hoopau ana i ka noho mare o na mea i loaa ia i ka mai lepera! L.H.]

 

HE HOALOHALOHA I KA OHANA O MR. U.S. NAKIKIAO.

-----

            Ia J.W. KEOLOEWA, na ka Ohana o Mr. U.S. Nakikiao - Me ka walohia.

            O makou hoahanau kuokoa o ka Ekalessia Hoole Pope o ka apana o Kohala Akau, Hawaii, a me na Hui Aloha Aina o na kane a me na wahine o ka apana i oleloia, ma o ko makou mau Luna Nui la;

            Ano, ua ili iho maluna o makou na haawe o ka ehaeha a me ke kaumaha, no ko makou hoahanau, a hoa lawehana iloko o na hana maikai a ka Haku, a me kona mau manao o ke kuio no ke aloha i ka aina, a he kiahoomanao ia nona, nolaila;

            E HOOHOLOIA: Ke komo pu aku nei makou iloko o na hoomanao ana, a e auamo pu me oukou ka ohana ma ke kanikau pu ana no ko makou hoahanau a hoa lawehana Mr. U.S. Nakikiau i hala e aku la ma kela aoao o keia ola,

            E HOOHOLOIA: Ke nonoi aku makou i ke Akua mana Loa, iloko o Kona lokomaikai hoomama mai ia oukou me ke kaumaha a me na luuluu i @ ia iho maluna o oukou a pau.

            O makou iho no me ka pa@ luuluu:

J. KAIMANA, Lunahoomalu o ka Aha K@ Ekalesia Kuokoa.

SOL. KAMAKA, Hope Lunahoomalu @ Aina o na Kane.

MRS. E.A. AHRONA, Peresidena Hanohano o ke Aloha Aina o na Wahine.

MRS. L. KEOHOEHU, Peresdiena o ka Hui Aloha Aina o na Wahine.

S.K. KAUNAMANO, Kakauolelo o ka Aha Ko@ Ekalesia Kuokoa a me na Aloha Aina o Kohala Akau.

Kohala Akau, Iune 14, 1895.

 

KAUKA Yong Kam Pang.

[APANA.]

Helu 306 Alanui Hotele

-----

KAUKA LOEA O KA AINA PUA.

            Ua hiki ke hoolaia kela a me keia ano ma'i, mai ko na kane, na wahine a na keiki liilii. O na ma'i Hano, ua hiki loa ia ke hoola ia, na ma'i Akemama a me na ma'i Puuwai a me na ano ma'i a pau. Pela hoi na ma'i lele Kolera, Hebera, fiva Lenalena, Lepera Maialii ke oki a me ka hoola ana pau pu me na mai koko ino. Ua hiki loa i ka'u laau ke hoohemo i ke keiki i ka wa nahunahu me ka poino ole. He laau no kekahi no ka hooponopono ana i ka waihona keiki, a i ka wa e inu ai i keia laau me ka malama i ka rula e loaa no he keiki ka poe i loaa ole he keiki mamua aku.

            E NAUE MAI I IKE MAKA. He pomaikai nui keia no na makamaka i hooneleia me keia haawina makemae. E hauoli no au ke ike aku i na makamaka e kipa mai ana e kuka pu me a'u ma na ano a pau e pili ana i ka'u oihana.

            E kipa mai e ka poe i hooluuluuia ma na haawina pilihua a ka ma'i, a na'u oukou e hooluolu aku.

my27-1yr.

 

Elia Kaululaau.

-----

KAUKA HANA NIHO.

-----

            Ke hoike hou aku nei au imua o ko'u hoa makaainana a puni ko kakou nei Paeaina, eia no au ke hoomau nei ma ka'u oihana hana niho, ma ko'u Keena ma ke kihi o alanui Moi me Betela, ma ke alanui Moi ka puke e komo mai ai.

            Ke kono aku nei au i ka poe a pau i loaa ko lakou niho i ka eha, a na'u no e hoopau aku i na haawina ehaeha iloko o ka manawa pokole loa, me ka'u mau laau i kaulana iwaena o ka poe a pau hele i mai io'u nei.

            He wai auau no'u ka huki ana i ka niho, a iloko o ka imo ana a ka maka me ka palenehe launa ole ua hemo a niho eha, a ua hiki hoi ke hoopiha i na niho me ke Gula, Kala a Iwi paha, me na uku haahaa a oi loa aku o ka maikai o ka hana ia ana me ka maiau nui.

            E kipa mai e o'u mau makamaka, a e loaa no au ma ko'u keena hana, me ka makaukau mau e haawi aku i na ao ana i ka mea kupono e hana ai i ko oukou mau niho, me ka auhau ole aku ia oukou no ia ao ana.

Elia Kaululaau, Kauka Hana Niho.

            Keena Hana, kihi o Alanui Moi me Betela.