Ke Aloha Aina, Volume I, Number 4, 15 June 1895 — HEWA KA EA A UMIAMAKA. [ARTICLE]

HEWA KA I'A A UMIAMAKA.

Ua ike iho makou ma ka nupepa P. C. Advertiser o keia la 13, e olelo ana: "Ua olelo ia ae, o ke Kanawai no na aina i hoomakaukau ia ai, aole loa ia he mea e hiki mai ai o na poe Anglo-Saxon hoolaupai (poe mamo haole e keokeo) e noho i Hawaii nei. Ina ua hana ia pela, alaila, ke koi nei lakou e hooponopono hou ia ke kanawai." Ua hoomaopopo mua no ka nupepa Advertiser i na manao o ua kanawai la; a me ka manao o na Komisina no na Aina, a ua hoolaha ae oia mamua aku nei i ke ano, a me ka io maoli o ua kanawai la; aka, i keia wa, ke pelukua hou nei, a haohao me he mea la aole oia i ike iki ia mea.

Ke ninau nei makou. No keaha ia haohao ana? No ka mea, ua hewa ka I'a a Umiamaka, he okea o loko. Ua maopopo, o ua Kanawai la, he pili wale no ia i kekahi pono o kekahi ohana i punahele ia, aole hoi no ka pono o na kanaka a pau loa. No ko lakou nei hopohopo o hoole mai na poe o na aina e i kono ia aku, mamuli o na olelo o ia Kanawai, nolaila, ke hoaiai ae nei, e pono e hana hou i Kanawai!