Ke Aloha Aina, Volume I, Number 4, 15 June 1895 — I KEKAHI MANAWA. [ARTICLE]

I KEKAHI MANAWA.

I kekahi manawa, o na loli ano e ana o ka hana, he mea no ia e loli ano e ai ka hopena e hoea mai ana no ia hana. Mamuli o ka loli ano e ana o na hana o kela kuikahi hoohuiaina, pela no ka loli ano e ana o na kulana aupuni, a lilo he mea hooko ole ia no ka manao hoohuiaina. Ua ike makou i na olelo a W. R. Kakela i hoolaha ia ma na nupepa, e olelo ana oia, aia he palapala hoopii mai na poe kulana maikai mai o na Hawaii he 135 inoa, e koi ana no ke apono i ke kuikahi, hoohui me Amerika Huipuia. Aka nae, i ka wa i ninau ia mai o Kakela, auhea la ia palapala hoopii, ua pane aku la oia: Ka! ua haule no i Honolulu mamua o ko'u kau ana mai i ka moku. Nolaila, e ike ana kakou, ua loli ano e ke kumu i hooia ia ka hana ana e loaa ai, a ua hele aku la ka hemahema i mea e hoopahua ai i na hana i hana malu ia i mea e lilo ai ka pono nui o Hawaii nei.

He makaala no paha ko Kakela ma kona hele ana e huli i na inoa o kela poe Hawaii 135, aka nae, ua oi loa aku ko ke Akua makaala i ko Kakela; a na ke Akua i kiola aku i kela palapala hoopii mai loko aku o kana Paiki Buke e lawe ana no Wasinetona; a i kona hiki ana aku imua o ka Peresidena o Amerika, ua huli iho la oia, aohe loaa iki. Nani ko ke Akua aloha i kana hana e hoole ana i ka makemake o ka poe puni hanohano.