Ke Aloha Aina, Volume I, Number 3, 8 Iune 1895 — PEHEA KO NA OPIO HAWAII NOONOO? [ARTICLE]

PEHEA KO NA OPIO HAWAII NOONOO?

Ma ka hoomaopopo ana i ke ano o ka hanauna hou, a me na opio o ka Lahui Hawaii, ua loaa no he mau mea e manaolana ai, a ua loaa pu no hoi, he mau mea e hemahema ai. I ka wa e noho ana na keiki ma na Kula, a e ao ana i na haawina o ka ike a me ka naauao, ua kau aku ka manaolana o na makua a me ka lahui maluna o lakou, no ka puka ana mai na Kula mai, e lawelawe i na hana, a e hooko i ka hopena o ka lakou mea i ao ia ai. O kekahi o na opio Hawaii, ua eleu, ua hana, ua hooko koke i ka hana ana aku i ka hopena waiwai, i kau nuiia e ka hoo manawanui o lakou a me ko lakou mau makua. Ma ia mea, ua loaa ka waiwai a me ka pomaikai, maluna o na makua a me ka lahui Hawaii holookoa. Oia ke ano a me ke kulana o kekahi poe opio o Hawaii nei. Ma kekahi mahele hoi o na opio, ua okoa loa ia, ua hiki ole a ua lilo wale ko lakou hoonaauao ia ana i mea waiwai ole loa. He mea waiwai ole no na makua ponoi nana ke keiki, a he mea waiwai ole no ka Lahui Hawaii. O ka lakou mau mea e hana ai, he mea hoopilikia maoli, a he hana hoi i na hana hoopoino i kona aina hanau. Wahi a ka olelo a ka Profesa So!omona. "O ke keiki naau-

ao, hoohauoli oia i kona makuakane, a o ke keiki lapuwale, hoouluhua oia i kona makuahine.