Ke Aloha Aina, Volume I, Number 3, 8 Iune 1895 — UA HAMAU OIA. [ARTICLE]

UA HAMAU OIA.

Ma ko makou hoolohe ana aku i ka haiolelo a Alapaki Kauka ma kela ahiahi Poakahi aku nei, ua pololei no kekahi mau manao ona. I kona ho- ikeike ana mai nae i na hana a na aupuni o Farani a me Beritania e pili ana i ke Aupuni Moi o Hawaii nei iloko o na la i hala aku, e hoike ana o Alapaki, ua hanaia ia mau hana hoopilikia me ka manao kolohe maoli (ke pololei la oe). Aka, heaha la ko Alapaki mea i hamau ai aohe hoike mai i keia mau hana hookahuli Aupuni Moi iho nei a lakou? Ina he hana hewa loa ka na aupuni o Farani a me Beritania i hana ai, ma ka hao ana aku a lawe i ke kuokoa o Hawaii me ka limaikaika, alaila, pehea la e hiki ai ia Alapaki ma ke alo ae mai ia hana hewa ano like loa? Ina hoi ua holoi o Farani a Beritania i ka laua mau hana hewa, a ua hoihoi hou mai i

na pono a me ke kuokoa o ke Aupuni Moi o Hawaii, i ka wa e noho Moi ana o Kauikeaouli, alaila, heaha ko Alapaki ma mea i hana ole ai pela i keia wa, a e hoihoi hou i ke Aupuni o ka Moiwahine Liliuokalani a lakou i hoohiolo ai a i hana ino ai? O kona hamau ana, oiai oia e haiolelo ana ma ka luakini o Kaumakapili i kela po, he hoike no ia e ikeia aku ai e na poe a pau loa e hoolohe aku ana, ua hana no lakou ia hana hewa ano like loa, a ua hamau nae o Alapaki i ka hoike ae no ko lakou hana hewa ana. O na hana hookamani imua o ka lahui Hawaii, he mea hoopailua ia ia makou.